Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) APRIL 2013

Mmọ Ẹma Ẹnọ Idemmọ Unyịme Unyịme—Ke Mexico

Mmọ Ẹma Ẹnọ Idemmọ Unyịme Unyịme—Ke Mexico

ESINEM etieti ndikụt nte ediwak n̄kparawa Ntiense ẹdude mmemmem uwem man ẹkpenam ekese ke utom ukwọrọikọ mmọ. (Matt. 6:22) Nso ukpụhọde ke mmọ ẹsinam? Nso mfịna ke mmọ ẹsisobo? Man ifiọk emi, ẹyak ineme iban̄a ndusụk ke otu mmọ, emi ẹnamde utom ukwọrọikọ idahaemi ke Mexico.

“IKENYENE NDINAM UKPỤHỌDE”

Dustin ye Jassa, emi ẹtode United States, ẹkedọ ndọ ke January 2007. Esisịt ini ke oro ebede, mmọ ẹma ẹdep n̄kpọ emi mmọ ẹkenen̄erede ẹyom—oro edi, ubomufọk ẹnyụn̄ ẹdụn̄ do. Ẹkeyịri ubom mmọ ẹkpere Astoria ke Oregon U.S.A., kpa ediye obio emi enyenede n̄kpri obot emi akai ofụkde ye ikpọ obot emi snow ofụkde, emi onyụn̄ ekperede Inyan̄ibom Pacific. Dustin ọdọhọ ete: “Kpukpru ebiet ẹkeyeye!” Ebe ye n̄wan emi ẹkekere ke mmimọ idu mmemmem uwem inyụn̄ iberi edem ke Jehovah. Mmọ ẹkekere ẹte, ‘Idem n̄kpọ, n̄kọ idụn̄ ke ekpri ubomufọk, inam utom idịbi udia ke ibio ini, idụk mbono esop ye esop oro ẹsemde usem esenidụt, inyụn̄ isinam utom usiakusụn̄ unọ un̄wam ke ini ke ini.’ Edi nte ini akakade, mmọ ẹma ẹdikụt ke ikababian̄a idem mmimọ. Dustin ọdọhọ ete: “Utu ke ndin̄wam esop, ikesida ekese ini nnyịn idiọn̄ ubom nnyịn. Ima idifiọk ke edieke inen̄erede iyom ndinịm Jehovah akpa ke uwem nnyịn, ke ikenyene ndinam ukpụhọde.”

Jassa adian do ete: “Mbemiso n̄kọdọde ebe, n̄kodụn̄ ke Mexico, ndien n̄kodu ke esop Ikọmbakara. Esop oro ama esinem mi etieti, ndien ama  esidọn̄ mi ndifiak n̄ka do.” Man Dustin ye Jassa ẹben̄e idem ndinam utom ukwọrọikọ ke esenidụt, ke ini utuakibuot ubon mmọ, mmọ ẹma ẹsikot mme mbụk eyouwem nditọete oro ẹkewọrọde ẹka idụt emi n̄kpọ adatde ekem se ẹkpen̄ede. (John 4:35) Dustin ọdọhọ ete: “Ikoyom ndikop ukem idatesịt oro.” Ke ini nditọete ke Mexico ẹkedọhọde mmọ ke obufa otu emi ẹtọn̄ọde ke Mexico ẹyom un̄wam, mmọ ẹma ẹbiere ndika. Mmọ ẹma ẹkpọn̄ utom, ẹnyam ubomufọk mmọ, ẹnyụn̄ ẹwọrọ ẹka Mexico.

“MFỌNN̄KAN N̄KPỌ ORO AKANAM INAMDE”

Dustin ye Jassa ẹkewọrọ ẹkedụn̄ ke Tecomán—emi osụk ekperede Inyan̄ibom Pacific, edi edide n̄kpọ nte kilomita 4,345 ọtọn̄ọde ke edem usụk Astoria sịm do. Dustin ọdọhọ ete: “Utu ke mbịtmbịt ofụm ye ndiye obot, uyat uyat eyo esifọp nnyịn, ndien isinyụn̄ ikụt in̄wan̄ sokoro ntanntan kpọt.” Ke nsonso oro, mmọ ikenyeneke utom. Sia mmọ mîkenyeneke okụk, mmọ ẹkesidia edesi ye ọkọti ikaba ke usen. Jassa ọdọhọ ete: “Edi ke ata ini emi eketiede nte ke nnyịn ikemeke ndidia aba utọ udia oro, nditọ ukpepn̄kpọ Bible nnyịn ẹma ẹtọn̄ọ ndisinọ nnyịn man̄ko, mboro, pọpọ, ye sokoro ntanntan ke ekpat!” Nte ini akakade, mmọ ẹma ẹnyene utom ndisikpep mme owo usem ke Intanet, ndien ibuot itieutom oro okodu ke Taiwan. Ndien okụk emi mmọ ẹnyenede ẹto utom emi ekem mmọ ndida nse mban̄a idemmọ.

Dustin ye Jassa ẹse didie nte mmọ ẹdude uwem idahaemi? Mmọ ẹdọhọ ẹte: “Nnyịn ndiwọrọ ndidụn̄ mi edi mfọnn̄kan n̄kpọ oro akanam inamde. Idahaemi imenen̄ede ikpere Jehovah inyụn̄ ikpere kiet eken ikan nte ikekerede. Imesinam ata ediwak n̄kpọ ọtọkiet kpukpru usen—isan̄a kiet ke an̄wautom, ineme nte ikemede ndin̄wam nditọ ukpepn̄kpọ Bible nnyịn, inyụn̄ itie kiet iben̄e idem inọ mbono esop. Ke adianade do, nnyịn inyeneke aba mme mfịna oro ikesinyenede akpa.” Mmọ ẹdian do ẹte: “Idahaemi ndien ke se ẹn̄wọn̄ọde ke Psalm 34:8 enen̄ede an̄wan̄a nnyịn, oro edi, ‘Mbufo ẹtabi ẹnyụn̄ ẹse nte Jehovah ọfọnde.’”

SE INAMDE ATA EDIWAK MBON EN̄WEN ẸNỌ IDEMMỌ UNYỊME UNYỊME

Se ibede nditọete 2,900—esịnede mbon emi ẹdọde ndọ ye mbon emi mîdọhọ, emi ediwak ẹdude ke iduọk isua 20 ye 30—ẹwọrọ ẹkenam utom ke nsio nsio ikpehe Mexico emi ẹnen̄erede ẹyom mme ọkwọrọ Obio Ubọn̄. Nso inam ediwak Ntiense ntre ẹnyịme ndinam utọ utom emi? Ke ini ẹkebụpde otu kiet mbụme emi, mmọ ẹma ẹnọ akpan ntak ita. Mmọ ẹkedọhọ didie?

Leticia ye Hermilo

Man iwụt ke imama Jehovah ye mme owo. Leticia akana baptism ke ini enye ekedide isua 18. Enye ọdọhọ ete: “Ke ini n̄kayakde idem nnọ Jehovah, mma mfiọk ke emi ọwọrọ ke nnyene ndinam n̄kpọ  nnọ enye ke ofụri esịt ye ukpọn̄. Ntre man n̄wụt Jehovah ke mmama enye ke ofụri esịt, mma mbiere ndinen̄ede nda ini ye odudu mi nnam utom esie.” (Mark 12:30) Hermilo, emi edide ebe Leticia idahaemi, ọkọwọrọ akanam utom ke ebiet emi ẹnen̄erede ẹyom mme ọkwọrọ Obio Ubọn̄ ke ini enye ekedide n̄kpọ nte isua 22. Enye ọdọhọ ete: “Mma ndikụt ke ndin̄wam mme owo ẹfiọk Abasi edi mfọnn̄kan usụn̄ ndiwụt ke mmama mbọhọidụn̄ mi.” (Mark 12:31) Ntre enye ama ọwọrọ ke ediye obio Monterrey emi enye akanamde utom ke ban̄k onyụn̄ odude inem inem uwem, aka ekpri obio.

Essly

Man ikop ata idatesịt emi ebịghide. Esisịt ini ke Leticia ama akana baptism, enye ama asan̄a ye eyenete an̄wan emi anamde utom usiakusụn̄ ebịghi aka obio emi odude nsannsan ọkọkwọrọ ikọ ke ọfiọn̄ kiet. Leticia ọdọhọ ete: “Idem ama enen̄ede akpa mi. Nte mme owo ẹkemade etop Obio Ubọn̄ oro ikọkwọrọde ama anam esịt enen̄ede adat mi. Ke ọfiọn̄ kiet oro ama okokụre, mma mbiere ke se nyomde ndida uwem mi nnam edi emi!” Ukem oro ke edi ye Essly, eyenete an̄wan emi mîdọhọ ndọ, emi edide n̄kpọ nte isua 22. Nte mbon oro ẹnamde utom emi ẹkopde idatesịt akanam enye oyom nditiene nnam. Ke ini enye okodude ke ufọkn̄wed sekọndri, enye ama osobo ediwak ifịk ifịk Mme Ntiense emi ẹkewọrọde ẹkenam utom ukwọrọikọ ke ebiet emi ẹnen̄erede ẹyom mme ọkwọrọikọ. Enye ọdọhọ ete, “Ndikụt nte nditọete emi ẹkopde idatesịt ama anam nyom nditiene nnam utom emi.” Ediwak nditọete iban ẹnam kpa nte Essly akanamde. Ke nditịm ntịn̄, se ibede nditọete iban 680 emi mîdọhọ ebe ẹnam utom ke Mexico ke ebiet emi ẹnen̄erede ẹyom mme ọkwọrọikọ. Nso eti uwụtn̄kpọ ke mmọ ẹnịm ntem ẹnọ kpukpru nnyịn!

Man idu edinem uwem emi enyenede uduak. Ke ini Essly okokụrede ufọkn̄wed sekọndri, ẹma ẹdọhọ enye edika ufọkn̄wed ntaifiọk ke mfọn. Mme uke esie ẹma ẹdọhọ enye enyịme man ekpenyene eti n̄weditoro, ubọkọkọ, ubomisọn̄, onyụn̄ aka isan̄ nte enye amama. Edi enye ikenyịmeke. Essly ọdọhọ ete: “Ediwak ufan mi emi ẹdide Christian ẹyom mme n̄kpọ emi, edi mma n̄kụt ke mme utịtmbuba eke spirit idịghe aba akpan n̄kpọ inọ mmọ. Mma n̄kụt n̄ko ke mmọ isikopke inemesịt ke ntak mfịna emi mmọ ẹsimende idemmọ ẹkesịn ke ntak emi ẹdiọn̄de-diọn̄ ẹsịn idem ke mme n̄kpọ ererimbot emi. N̄koyom ndida ini uyen mi nnam n̄kpọ Jehovah ọyọhọ ọyọhọ.”

Racquel ye Phillip

Essly ama ọbọ ukpep en̄wen emi akanamde enye ekeme ndinyene utom nda n̄n̄wam idem ke adan̄aemi anamde utom usiakusụn̄, ndien ekem ọwọrọ aka ebiet emi ẹnen̄erede ẹyom mme asuanetop Obio Ubọn̄. Enye ama akam ekpep usem Otomian  ye Tlapanecan. Idahaemi ke isua ita ẹma ẹkebe tọn̄ọ enye ọkọwọrọ akanam utom ukwọrọikọ ke mme nsannsan ebiet, enye ọdọhọ ete: “Ndinam utom ke ebiet emi ẹnen̄erede ẹyom mme ọkwọrọikọ anam mi nnen̄ede n̄kop inemesịt nnyụn̄ n̄kop inem uwem. Edi ata akpan n̄kpọ emi oro anamde ọnọ mi edi ke enye anam mi nnen̄ede n̄kpere Jehovah.” Phillip ye Racquel, ebe ye n̄wan emi ẹdide n̄kpọ nte isua 32, emi ẹtode United States, ẹnyịme ke edi ntre. Mmọ ẹdọhọ ẹte: “Nte ererimbot okpụhọrede usọp usọp anam ediwak owo ẹkere ke n̄kpọ ekeme nditịbe nnọ mmimọ ini ekededi. Edi ndinam utom ukwọrọikọ ke ebiet emi ediwak owo ẹmade ndikpan̄ utọn̄ nnọ etop Bible anam uwem enem. Utom emi enem tutu!”

NTE ẸKPEYỌDE MME MFỊNA

Verónica

Edi ndinam utom ke ebiet emi ẹnen̄erede ẹyom mme ọkwọrọikọ asan̄a ye mfịna esie. Mfịna kiet edi nte owo edikemede ndinyene okụk nda nse mban̄a idem. Man owo anam ntre, ana enyịme ndidu uwem nte enye okụtde ke ebiet emi enye akade. Verónica, emi anamde utom usiakusụn̄ ebịghi, ọdọhọ ete: “Ke ebiet kiet emi n̄kanamde utom, mma nsitem udia nnyam. N̄kesinyam ọfọn̄ nnyụn̄ mfat idet ke ebiet en̄wen. Ke ebiet emi ndude idahaemi, nsikama ufọk nnọ mme owo nnyụn̄ n̄kpep mbon oro ẹtọn̄ọde-tọn̄ọ ndinyene nditọ nte ẹkpenemede nneme ye nditọ mmọ.”

Ekeme ndinen̄ede nsọn̄ ndidu uwem nte mme enyene obio edieke odụn̄de ye mmọ ke ata esịt esịt obio-in̄wan̄. Ntre ke ekedi ye Phillip ye Racquel ke ini mmọ ẹkenamde utom ke ebiet emi ẹsemde usem Nahuatl. Phillip ọdọhọ ete: “Ido n̄kan̄ emi enen̄ede okpụhọde ye ido edem nnyịn.” Nso ikan̄wam mmọ ẹnam ukpụhọde? Enye ọdọhọ ete: “Ikesiwụk ntịn̄enyịn ke nti ido mbon Nahua—oro edi, nte ubon mmọ ẹdianade kiet, nte mmọ ẹsinamde n̄kpọ ye kiet eken ke ofụri esịt, ye ntatubọk mmọ.” Racquel adian do ete: “Ima ikpep ekese ito ndidụn̄ do nnyụn̄ nnam utom ukwọrọikọ ye nditọete nnyịn ke obio-in̄wan̄ oro.”

NTE EKEMEDE NDIBEN̄E IDEM

Edieke akpamade ndinam utom ke nsannsan ebiet emi ẹnen̄erede ẹyom mme ọkwọrọikọ, nso ke ekeme ndinam idahaemi man eben̄e idem ndinam ntre? Nditọete emi ẹnamde utọ utom emi ẹbịghi ẹdọhọ ẹte: Mbemiso ọwọrọde aka, tọn̄ọ ndidu mmemmem uwem nyụn̄ kpep ndiyụhọ ye se enyenede. (Phil. 4:11, 12) Nso en̄wen ke ekeme ndinam? Leticia ọdọhọ ete: “N̄kamaha utom idịbi udia emi ediyomde ndu ke ebiet kiet mbịghi. N̄koyom man n̄kpekeme ndiwọrọ ini ekededi n̄ka ebiet ekededi.” Hermilo ọdọhọ ete: “Mma n̄kpep nditem udia ye ndiyet ọfọn̄ nnyụn̄ n̄kwọhọde.” Verónica ọdọhọ ete: “Ke ini n̄kodude ke ufọk nnyịn, mma nsitiene nnam ufọk asana nnyụn̄ n̄kpep nditem ndinem udia oro mîsọn̄ke urua. Mma n̄kpep n̄ko ndifam n̄kpọ.”

Amelia ye Levi

Levi ye Amelia emi ẹtode United States ẹnyụn̄ ẹdọde ndọ ke isua itiaita ẹtịn̄ nte ndibọn̄ akam san̄asan̄a mban̄a ndinam utom ukwọrọikọ ke Mexico akan̄wamde mmimọ iben̄e idem inọ oro. Levi ọdọhọ ete: “Ima idian ofụri okụk oro idiyomde ndida nnam utom isua kiet ke esenidụt ndien ekem ibọn̄ akam iben̄e Abasi anam nnyịn inyene nnennen ibatokụk oro.” Ke ufan̄ ọfiọn̄ ifan̄ mmọ ẹma ẹnyene ibatokụk oro mmọ ẹkeben̄ede ke akam, ndien mmọ ẹma ẹdaha ye unana ubiatini. Levi ọdọhọ ete: “Jehovah ama ọbọrọ akam oro, ntre idahaemi ekedi nnyịn ndinam udeme nnyịn.” Amelia adian do ete: “Ikekere ke ididu isua kiet kpọt, edi imodu isua itiaba idahaemi, nnyịn inyụn̄ ikereke unyọn̄! Ndidu mi anam nnyịn ikụt nte Jehovah ọdiọn̄de nnyịn. Idụhe usen emi nnyịn mîkwe mfọn esie.”

Adam ye Jennifer

Akam ama an̄wam Adam ye Jennifer n̄ko, ebe ye n̄wan emi ẹtode United States, emi ẹnamde utom ukwọrọikọ ke ebiet emi ẹtịn̄de Ikọmbakara ke Mexico. Mmọ ẹdọhọ ẹte: “Kûbet tutu n̄kpọ ọfọn ama. Bọn̄ akam ban̄a udọn̄ oro enyenede ndinam utom ke esenidụt, nyụn̄ nam se ọbọn̄de akam aban̄a. Du mmemmem uwem, wet n̄kọk itieutom idụt emi afo akpamade ndiwọrọ n̄ka, ndien ke ama eketie ekere se idikpade fi ndiwọrọ n̄ka, daha isan̄!” * Ama anam ntre, eyenen̄ede okop inem uwem onyụn̄ oforo ke n̄kan̄ eke spirit.

^ ikp. eki. 21 Edieke oyomde ndifiọk mme n̄kpọ en̄wen, se ibuotikọ oro “Ndi Emekeme ‘Ndibe Ndi Macedonia’?” ke Utom Obio Ubọn̄ Nnyịn eke November 2011.

Kpep N̄kpọ En̄wen

Nso Idi Utom Isụn̄utom?

Nso ke owo akpanam edieke enye oyomde ndidi isụn̄utom? Ewe ufọkn̄wed ke enye edika?