Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) APRIL 2013

‘Ẹdụn̄ọde Ẹfiọk Se Idide Akpan N̄kpọ Ikan’

‘Ẹdụn̄ọde Ẹfiọk Se Idide Akpan N̄kpọ Ikan’

“[Ẹdụn̄ọde] ẹfiọk se idide akpan n̄kpọ ikan.”—PHIL. 1:10.

1, 2. Ekere ke ewe ntịn̄nnịm ikọ oro aban̄ade mme akpatre usen akanam mme mbet Jesus ẹkere n̄kpọ, ndien ntak-a?

PETER, James, John, ye Andrew kpọt ẹdu ye Eteufọk mmọ. Ikọ oro Jesus etịn̄de aban̄a nsobo Jerusalem enen̄ede afịna mmọ. (Mark 13: 1-4) Ntem, mmọ ẹbụp enye ẹte: “Sian nnyịn, Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu fo ye eke akpatre ini editịm n̄kpọ emi?” (Matt. 24:1-3) Jesus asian mmọ mme n̄kpọntịbe emi ẹdinamde uwem enen̄erede okpụhọde, emi edinyụn̄ inamde ẹfiọk mme akpatre usen idiọk editịm n̄kpọ Satan. Anaedi mme mbet Jesus ẹnen̄ede ẹkere ẹban̄a kiet ke otu n̄kpọntịbe emi. Ke Jesus ama eketịn̄ aban̄a mme utọ afanikọn̄ nte ekọn̄, akan̄, ye ubiatibet nditọt, enye ama etịn̄ eti n̄kpọ emi editienede inam ẹfiọk mme akpatre usen. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—Matt. 24:7-14.

2 Mme mbet Jesus ẹma ẹsisan̄a ye enye ẹkwọrọ eti mbụk Obio Ubọn̄. (Luke 8:1;9:1, 2) Ekeme ndidi mmọ ẹma ẹti ke enye ọkọdọhọ ete: “Ke akpanikọ, idọk okpon, edi mme anamutom iwakke. Mmọdo, ẹben̄e Enyene-idọk ẹte enye osio mme anamutom ọnọ ẹdi ke idọk esie.” (Luke 10:2) Edi anaedi mmọ ẹma ẹkere ẹte: ‘Idisan̄a didie ikwọrọ ikọ “ke ofụri isọn̄” inyụn̄ inọ ‘kpukpru mme idụt ikọ ntiense’? Mme anamutom emi ẹdito m̀mọ̀n̄?’ Ubaha-e nte mmọ ẹkpekekemede ndida n̄kụt ini iso ke ini mmọ ẹketiede do ye Jesus! Idem akpakakpa mmọ ndikụt nte ikọ oro ikotde ke Matthew 24:14 do osude.

3. Tịn̄ nte Luke 21:34 osude mfịn, ndien nso mbụme ke ikpobụp idem nnyịn?

 3 Ntịn̄nnịm ikọ Jesus emi ke osu idahaemi. Ata ediwak owo ẹtiene ẹkwọrọ eti mbụk Obio Ubọn̄ emi ke ofụri isọn̄. (Isa. 60:22) Edi Jesus ama etịn̄ n̄ko ete ke ọyọsọn̄ ndusụk owo ndida utom emi nte akpan utom ke mme akpatre usen emi. Mmọ ẹyeyak mme n̄kpọ en̄wen ẹwọn̄ọde ntịn̄enyịn mmọ, esịt mmọ ẹyenyụn̄ “ẹkabade ẹdobi.” (Kot Luke 21:34.) Ikọ enye emi n̄ko ke osu idahaemi. Ndusụk ikọt Abasi ẹyak mme n̄kpọ ẹwọn̄ọde ntịn̄enyịn mmọ. Imekeme ndikụt emi ke nte mme owo ẹdade utom idịbi udia, ufọkn̄wed ntaifiọk, inyene, ye adan̄a ini emi ẹbiatde ke mbre mbuba ye unọ idem inemesịt. Idem emem mbon eken ke ntak mfịna ye editịmede esịt uwem emi. Bụp idemfo ete: ‘Ami nnam n̄kpọ didie? Ubiere mi owụt ke nso inen̄ede idi akpan n̄kpọ inọ mi?’

4. (a) Nso ke Paul ekeben̄e Abasi ete anam ọnọ mme Christian ke Philippi, ndien ntak-a? (b) Nso ke idineme ke ibuotikọ emi ye ke enye oro etienede, ndien nso ufọn ke emi edinyene?

4 Akpa mme Christian ẹkenyene ndisịn ifịk man ẹkeme ndinịm n̄kpọ Abasi akpa ke uwem mmọ. Oro akanam apostle Paul ọbọn̄ akam ete Abasi an̄wam mbon Philippi “[ẹdụn̄ọde] ẹfiọk se idide akpan n̄kpọ ikan.” (Kot Philppi 1:9-11.) Ndusụk mmọ ẹketie nte apostle Paul, “ẹdọdiọn̄ ẹtịn̄ ikọ Abasi uko uko, ifeheke ndịk.” (Phil. 1:12-14) Ata ediwak nnyịn n̄ko ke ikwọrọ Ikọ Abasi uko uko. Edi ndidụn̄ọde se esop Jehovah anamde idahaemi ekeme ndinam nnyịn itetịm isịn idem ke akakan utom, oro edi, utom ukwọrọikọ. Ke ibuotikọ emi, iyeneme iban̄a ndutịm emi Jehovah anamde man Matthew 24:14 osu. Nso inen̄ede idi akpan utom emi esop Abasi anamde, ndien didie ke ndidiọn̄ọ emi ekeme ndinyene ufọn nnọ nnyịn ye ubon nnyịn? Ke ibuotikọ oro etienede, iyeneme iban̄a mme n̄kpọ emi ẹdin̄wamde nnyịn ika iso ke utom Abasi inyụn̄ isan̄a ikpat kiet ye esop Jehovah.

IKPEHE ESOP JEHOVAH EKE HEAVEN AKA ISO ISO

5, 6. (a) Ntak emi Jehovah okowụtde Ezekiel ikpehe esop esie eke heaven ke n̄kukụt? (b) Nso ke Ezekiel okokụt ke n̄kukụt?

5 Enyene ediwak n̄kpọ emi Jehovah mîwetke isịn ke Bible. Ke uwụtn̄kpọ, enye itịn̄ke ofụri ofụri nte mfre nnyịn ye ekondo ẹtiede, kpa ye edide mme utọ n̄kpọ emi ẹkpenen̄ede ẹnem nnyịn ndifiọk. Utu ke oro, enye akam etịn̄ mme n̄kpọ emi ẹdin̄wamde nnyịn ifiọk uduak esie inyụn̄ idu uwem ekekem ye uduak emi. (2 Tim. 3: 16, 17) Ntem, enen̄ede enem nnyịn nte Jehovah owụtde nnyịn esisịt se ikade iso ke ikpehe esop esie eke heaven. Enem nnyịn ndikot mban̄a mme n̄kpọ emi ke n̄wed Isaiah, Ezekiel, Daniel, ye Ediyarade. (Isa. 6:1-4; Ezek. 1:4-14, 22-24; Dan. 7:9-14; Edi. 4:1-11) Emi onyụn̄ etie nte n̄kpọ eke Jehovah ofụhọrede ikpehe man ikeme ndikụt esisịt se ikade iso ke heaven. Ntak emi Jehovah anamde nnyịn ifiọk ndusụk n̄kpọ emi ẹtịbede ke heaven?

6 Jehovah oyom nnyịn isiti kpukpru ini ke nnyịn isịne ke esop ofụri ekondo. Ata ediwak n̄kpọ emi nnyịn mîkwe ke ẹka iso man uduak Jehovah osu. Ke uwụtn̄kpọ, Ezekiel ama okụt akwa chariot eke enyọn̄ emi adade aban̄a ikpehe esop Jehovah oro enyịn mîkwe ke n̄kukụt. Chariot emi  esisọp etieti onyụn̄ ekeme ndiwọn̄ọde n̄ka ebiet ekededi inikiet inikiet. (Ezek. 1:15-21) Chariot emi esika usụn̄ oyom ini ekededi emi wheel esie oyụtde. Ke n̄kukụt emi, Ezekiel ama okụt n̄ko esisịt n̄kpọ aban̄a Andiwat chariot emi. Enye ọkọdọhọ ete: “[Mma] n̄kụt n̄kpọ eke ebietde ikan̄, enye onyụn̄ ayama akan okụk . . . Enye ekebiet ubọn̄ Jehovah.” (Ezek. 1:25-28) Anaedi se Ezekiel okokụtde emi ama odoro enye uten̄e. Enye ama okụt ke Jehovah akara esop esie, onyụn̄ ada spirit esie ọnọ enye ndausụn̄. N̄kukụt emi owụt utịbe utịbe usụn̄ emi ikpehe esop Jehovah eke heaven akade-ka iso.

7. Didie ke n̄kukụt Daniel an̄wam nnyịn?

7 Daniel n̄ko ama okụt n̄kukụt emi anamde nnyịn ibuọt idem ke esop Abasi. Enye okokụt nte Jehovah edide “Andisọn̄ọ Usen” onyụn̄ etiede ke ebekpo emi edide edemeikan̄. Ndien ebekpo oro ama enyene wheel. (Dan. 7:9) Jehovah okoyom Daniel okụt ke esop imọ ituakke-tuak ida, edi ke anam n̄kpọ man osu uduak esie. Daniel ama okụt n̄ko nte ẹnọde “owo eke ebietde eyen owo,” oro edi, Jesus, odudu ndikara ikpehe esop Jehovah eke isọn̄. Mfọnmma ukara Christ idịghe ke isua ifan̄ kpọt. Utu ke oro, “ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.” (Dan. 7:13, 14) Emi anam ibuọt idem ye Jehovah inyụn̄ iwụt esịtekọm iban̄a se enye anamde. Enye ayak “ukara ye itie ukpono ye obio ubọn̄” ọnọ Jesus Eyen esie emi ẹma ẹkedomo ẹnyụn̄ ẹkụt ke odot ndikara. Jehovah ọfịok  ke Eyen imọ idikpụhu imọ. Ntem, emi anam inyene mbuọtidem ke ukara Jesus.

8. Didie ke n̄kukụt emi Ezekiel ye Isaiah ẹkekụtde okotụk mmọ, ndien didie ke n̄kukụt mmọ okpotụk nnyịn?

8 Didie ke se inemede iban̄a ikpehe esop Abasi eke heaven okpotụk nnyịn? Se Jehovah anamde odoro nnyịn uten̄e ukem nte okodorode Ezekiel. (Ezek. 1:28) Nditie n̄kere mban̄a mme edinam esop Jehovah ekeme ndinam nnyịn inam uduak Abasi ukem nte Isaiah. Ke ini ẹkeyomde owo emi edikade iketịn̄ se Jehovah anamde inọ mme owo, enye ama ọsọsọp enyịme. (Kot Isaiah 6:5, 8.) Isaiah ama enyene mbuọtidem ke Jehovah ayan̄wam imọ iyọ se ededi emi imọ idisobode. Kpasụk ntre n̄ko, ekpri se ifiọkde iban̄a ikpehe esop Jehovah eke heaven ekpenyene ndidoro nnyịn uten̄e nnyụn̄ nnam inam ekese ke utom Abasi. Enen̄ede enem nnyịn ndifiọk ke idu ke esop emi akade-ka iso anam uduak Abasi.

IKPEHE ESOP JEHOVAH EKE ISỌN̄

9, 10. Ntak emi ẹyomde ikpehe esop Jehovah emi ẹkụtde ke enyịn?

9 Jehovah ama ada Eyen esie ọtọn̄ọ ndutịm mi ke isọn̄, emi adianade kiet anam utom ye ikpehe esop esie emi enyịn mîkwe. Ntak emi ẹyomde ikpehe esop emi ẹkụtde ke enyịn man ẹnam utom oro ẹtịn̄de ẹban̄a ke Matthew 24:14? Kere ban̄a ntak ita.

10 Akpa, Jesus ọkọdọhọ ke utom ukwọrọikọ emi ayada mme mbet imọ “esịm ata utịt ikpehe isọn̄.” (Utom 1:8) Ọyọhọ iba, oyoyom ẹnam ndutịm man ẹnọ mbon oro ẹnamde utom emi udia eke spirit ẹnyụn̄ ẹse ẹban̄a mmọ. (John 21:15-17) Ọyọhọ ita, oyoyom ẹnam ndutịm man mbon oro ẹkwọrọde eti mbụk ẹsisop idem ọtọkiet ẹtuak ibuot ẹnọ Jehovah ẹnyụn̄ ẹkpep mmọ nte ẹkpenamde utom emi. (Heb. 10:24, 25) Owo ikemeke ndinam ofụri emi ke mbuari. Oyom ẹnam ata eti ndutịm man mme anditiene Christ ẹkeme ndinam utom emi.

11. Didie ke ikeme ndiwụt ke imebere ye ndutịm oro esop Jehovah anamde?

11 Didie ikeme ndiwụt ke imebere ye ndutịm oro esop Jehovah anamde? Akpan usụn̄ kiet edi ndinyene mbuọtidem ke idem mbon oro Jehovah ye Jesus ẹmekde ẹte ẹda usụn̄ ke utom ukwọrọikọ. Nditọete emi ẹnyene ata ediwak n̄kpọ emi mmọ ẹkpedade ini ye odudu mmọ ẹnam, edi mmọ inamke oro. Ẹyak ineme iban̄a se isinen̄erede ibehe ikpehe esop Jehovah eke isọn̄.

WỤK NTỊN̄ENYỊN KE “SE IDIDE AKPAN N̄KPỌ IKAN”

12, 13. Didie ke mbiowo ẹsinam utom mmọ, ndien ntak emi esịnde udọn̄ ọnọ nnyịn?

12 Ẹmek mbiowo emi ẹnyenede mbufiọk ke ofụri ererimbot ẹte ẹse enyịn ẹnyụn̄ ẹda iso ke utom edikwọrọ Obio Ubọn̄ ke idụt emi mmọ ẹnamde utom. Mmọ ẹsiyom ndausụn̄ Ikọ Abasi, ẹnam enye edi ‘utuenikan̄ ukot mmọ ye un̄wana usụn̄ mmọ,’ ẹnyụn̄ ẹnen̄ede ẹbọn̄ akam ẹyom un̄wam Jehovah ke ini ẹyomde ndinam ubiere.—Ps. 119:105; Matt. 7:7, 8.

13 Ukem nte mbiowo oro ẹkedade usụn̄ ke eyo mme apostle, mbiowo emi ẹsede enyịn ke utom ukwọrọikọ mfịn ẹsịn idem “ke utom ikọ Abasi.” (Utom 6:4) Mmọ ẹnen̄ede ẹkop idatesịt ke n̄kọri oro ẹnamde ke utom edikwọrọ eti mbụk ke edem mmọ ye ke ofụri ererimbot. (Utom 21:19, 20)  Mmọ ibọpke ediwak ibet. Utu ke oro, mmọ ẹtiene ndausụn̄ N̄wed Abasi ye eke edisana spirit ke ini mmọ ẹnamde ndutịm man ẹka iso ẹkwọrọ ikọ. (Kot Utom 15:28.) Ke ini nditọete emi ẹnamde ntem, mmọ ẹnịm eti uwụtn̄kpọ ẹnọ kpukpru owo ke esop.—Eph. 4:11, 12.

14, 15. (a) Nso ndutịm ke ẹnam man ẹn̄wam ẹkwọrọ ikọ ke ofụri ererimbot? (b) Afo ada didie ifet oro enyenede nditiene mbuana ke utom edikwọrọ Obio Ubọn̄?

14 Ediwak owo ifiọkke ekese utom oro ẹsinamde man ẹwet mme n̄wed nnyịn ẹnyụn̄ ẹtịm mbono esop ye mbono. Ata ediwak owo ẹnam utom ọkpọsọn̄ man ẹkabade mme n̄wed nnyịn ẹsịn ke se ibede usem 600, man ata ediwak owo ẹkpekpep ẹban̄a “ikpọ utom Abasi” ke usem mmọ. (Utom 2:7-11) N̄kparawa iren ye iban ẹsimịn̄ ẹnyụn̄ ẹdian n̄wed nnyịn ke ukwak umịn̄n̄wed ye ukwak udiann̄wed oro ẹsọpde etieti. Ekem, ẹsimen n̄wed emi ẹkenọ mme esop ke nsio nsio ebiet, idem ke ata esịt obio-in̄wan̄.

15 Ẹnam ediwak ndutịm ke esop nnyịn n̄ko man ikpowụk ntịn̄enyịn ke edikwọrọ eti mbụk. Ke uwụtn̄kpọ, ata ediwak owo ẹnọ idemmọ unyịme unyịme nditiene mbọp Ufọkmbono Obio Ubọn̄ ye Ufọk Mbono, ndin̄wam mbon oro oto-obot afanikọn̄ ọnọmọde m̀mê mbon emi oyomde ẹsọsọp ẹnọ usọbọ, nditịm n̄kpri ye ikpọ mbono, ndinyụn̄ nnọ ukpep ke mme ufọkn̄wed ukara Abasi. Nso idi ufọn ofụri utom emi? Ẹnam emi man ẹn̄wam nnyịn ika iso ikwọrọ ikọ, ikọri ke akpanikọ, inyụn̄ in̄wam ata ediwak mbon en̄wen ẹdituak ibuot ẹnọ Jehovah. Ikpehe esop Jehovah oro ẹkụtde ke enyịn owụk ntịn̄enyịn ke se idide akpan n̄kpọ ikan!

TIENE UWỤTN̄KPỌ ESOP JEHOVAH

16. Nso ke afo m̀mê ubon fo ẹkeme ndikpep mban̄a?

16 Ndi imesida ndusụk ini nnyịn idụn̄ọde se esop Jehovah anamde? Ndusụk owo ẹsida ndusụk ini utuakibuot ubon mmọ m̀mê ini ukpepn̄kpọ idemmọ ẹdụn̄ọde mme n̄kpọ emi ẹnyụn̄ ẹtie ẹkere mmọ. Eyenem fi ndikpep mban̄a n̄kukụt Isaiah, Ezekiel, Daniel, ye John. N̄wed oro Jehovah’s Witnesses—Proclaimers of God’s Kingdom ye mme n̄wed en̄wen m̀mê mme DVD emi ẹdude ke usem mbufo ẹkeme ndinam ọfiọk ekese aban̄a esop Abasi.

17, 18. (a) Tịn̄ nte se inemede ke ibuotikọ emi an̄wamde fi. (b) Mme mbụme ewe ke ikpekere iban̄a?

17 Nditie n̄kere mban̄a se Jehovah adade esop esie anam edi ke ufọn nnyịn. Nnyịn ikpakam ibiere nditiene utịbe utịbe esop Abasi emi n̄wụk ntịn̄enyịn ke se idide akpan n̄kpọ ikan! Ndinam emi ayanam ikeme ndibiere ukem se Paul ekebierede. Enye ekewet ete: “Sia nnyịn inyenede utom emi nte asan̄ade ekekem ye mbọm oro ẹketuade nnyịn, nnyịn ikpaha mba.” (2 Cor. 4:1) Enye ama esịn udọn̄ n̄ko ọnọ nsan̄autom esie ete: “Ẹyak nnyịn ikûkpa mba ke edinam eti n̄kpọ, koro ke edikem ini nnyịn iyọdọk mbun̄wụm edieke nnyịn mîkpaha mba.”—Gal. 6:9.

18 Ndi enyene se akpanade ikpụhọde ke uwem nnyịn m̀mê ke ubon nnyịn man inịm se idide akpan n̄kpọ ikan nte akpa n̄kpọ ke uwem nnyịn? Ndi imekeme ndidu mmemmem uwem nnyụn̄ nsion̄o idem n̄kpọn̄ ndusụk n̄kpọ oro ẹkemede ndida ini nnyịn man ikpenen̄ede ikwọrọ ikọ? Ke ibuotikọ oro etienede, iyeneme n̄kpọ ition oro ẹdin̄wamde nnyịn isan̄a ikpat kiet ye esop Jehovah.