Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MARCH 2013

Ke Emi Mbufo “Ẹma Ẹkedifiọk Abasi”—Nso ke Oyom Ẹnam?

Ke Emi Mbufo “Ẹma Ẹkedifiọk Abasi”—Nso ke Oyom Ẹnam?

‘Mbufo ẹmedifiọk Abasi.’—GAL. 4:9.

1. Ntak emi awat ubomofụm akpakamade n̄wed odụn̄ọde ubomofụm mbemiso adahade uwat?

INI ekededi emi awat ubomofụm oyomde ndidaha uwat, enye enyene ndikama n̄wed emi ẹwetde se ibede n̄kpọ 30 emi anade ẹdụn̄ọde ndụn̄ọde ubomofụm ke nde ke nde. Edieke enye mîtịn̄ke enyịn idụn̄ọde mme n̄kpọ emi ini ekededi oro enye oyomde ndidaha, enye ekeme ndinyene ata idiọk unọmọ. Ndi ọmọfiọk awat ubomofụm emi ẹsinen̄erede ẹyom anam ndụn̄ọde emi kpukpru ini? Edi enye emi awatde ubomofụm ebịghi! Owo emi awatde ubomofụm ebịghi ekeme ndikere ke imọfiọk se inamde inyụn̄ inamke ndụn̄ọde oro akpanade enye anam ke nde ke nde.

2. Nso ke ẹdọhọ mme Christian ẹsidụn̄ọde?

2 Ukem nte awat ubomofụm enyenede ndikama n̄wed emi ẹwetde se anade ẹdụn̄ọde ndụn̄ọde ubomofụm, enyene mme n̄kpọ emi anade afo odụn̄ọde man okụt ete ke mbuọtidem fo aka iso ọsọn̄ ke ini osobode afanikọn̄. Edide ana baptism obufa m̀mê amanam n̄kpọ Abasi ke ediwak isua, ọfọn esidụn̄ọde adan̄a nte ọbuọtde idem ye Jehovah Abasi ye nte amade enye. Edieke mûtịn̄ke enyịn udụn̄ọde mme n̄kpọ emi kpukpru ini, mbuọtidem fo ekeme ndimem. Bible odụri nnyịn utọn̄ ete: “Yak owo eke ekerede ete imọ imọsọn̄ọ ida ekpeme mbak enye ediduọ.”—1 Cor. 10:12.

3. Nso ke akana mme Christian ke Galatia ẹnam?

3 Akana mme Christian ke Galatia ẹdụn̄ọde nte mbuọtidem mmọ okponde ẹnyụn̄ ẹnen̄ede ẹdara ifụre emi mmọ ẹnyenede ke ntak emi ẹnamde n̄kpọ Abasi. Uwa Jesus ọnọ mbon oro ẹbuọtde idem ye enye ifet ndifiọk Abasi ke ata ndyọ ndyọ usụn̄—oro edi, ndikabade ndi nditọ Abasi! (Gal. 4:9) Man mbon Galatia ẹka iso ẹdi nditọ Abasi, akana mmọ ẹsịn  ukpepn̄kpọ mme Jew, emi ẹkesọn̄ọde ẹyịre mmọ ẹte ẹnịm Ibet Moses. Ke akpa ifet, idịghe nte Ibet Moses ama ọbọp mme Gentile emi mîkanaha mbobi ke esop. Akana mme Jew ye mme Gentile ẹka iso ẹkọri ke n̄kan̄ eke spirit. Emi ama esịne ndifiọk ke ndinịm Ibet Moses idinamke mmọ ẹdi ndinen.

AKPA N̄KPỌ ORO ẸNYENEDE NDINAM MAN ẸFIỌK ABASI

4, 5. Nso item ke Paul ọkọnọ mbon Galatia, ndien didie ke item emi ebehe nnyịn?

4 Ẹkewet item oro apostle Paul ọkọnọde mbon Galatia ẹnịm man akpan ata mme Christian ke emana ekededi ndiwọn̄ọde n̄kpọn̄ mme ọsọn̄urua akpanikọ Bible mfiak mbịne mme n̄kpọ oro mmọ ẹkekpọn̄de ke edem. Jehovah ọkọnọ apostle oro odudu spirit ada esịn udọn̄ ọnọ mme esop ke Galatia ye kpukpru mme andituak ibuot nnọ Abasi ẹsọn̄ọ ẹda.

5 Ọfọn kpukpru nnyịn iti nte ikọbọhọde ufụn nsunsu ido ukpono ikabade idi Mme Ntiense Jehovah. Man anam emi, kere ban̄a mbụme iba emi: Ndi emeti mme n̄kpọ oro akanamde man odot ndina baptism? Ndi emeti nte ekedide edifiọk Abasi, enye onyụn̄ edide edifiọk fi ndien ke ntem enen̄ede ọbọhọ ufụn nsunsu ido ukpono?

6. Ewe n̄kpọ usụkkiet ke idineme?

6 Kpukpru nnyịn ikanam n̄kpọ usụkkiet. Ẹwet n̄kpọ usụkkiet oro ke ekebe oro  “Se Isinamde man Idot Ndina Baptism Inyụn̄ Ika Iso Ikọri.” Ndisiti mme n̄kpọ emi ayanam nnyịn inyene uko itre ndifiak n̄ka mbịne mme n̄kpọ oro ikọkpọn̄de ke ererimbot. Kpa nte awat ubomofụm emi enyenede mbufiọk onyụn̄ etịn̄de enyịn esiwatde ubomofụm ifụre ifụre ke ndibem iso ndụn̄ọde se anade ẹdụn̄ọrede ke ubomofụm, ntre ke afo ndisiti mme n̄kpọ emi edin̄wam fi aka iso ọsọn̄ọ ada anam n̄kpọ Abasi.

MBON ORO ABASI ỌFIỌKDE ẸKA ISO ẸKỌRI KE N̄KAN̄ EKE SPIRIT

7. Ewe uwụtn̄kpọ ke oyom itiene, ndien ntak-a?

7 N̄wed oro awat ubomofụm esidade odụn̄ọde ubomofụm esiti enye ke enyene mme n̄kpọ oro anade enye etịn̄ enyịn odụn̄ọde mbemiso adahade uwat. Nnyịn n̄ko imekeme ndidụn̄ọde idem nnyịn kpukpru ini ye se isinamde tọn̄ọ ikana baptism. Paul ekewet ntem ọnọ ẹsọk Timothy: “Ka iso mụm uwụtn̄kpọ nti ikọ oro afo okokopde mi ke inua kama, nyụn̄ nyene mbuọtidem ye ima Christ Jesus.” (2 Tim. 1:13) “Nti ikọ” oro ẹdu ke Ikọ Abasi. (1 Tim. 6:3) Kpa nte mbuwed ewet ndise ekemede ndinam nnyịn ifiọk nte n̄kpọ editiede, “uwụtn̄kpọ nti ikọ” an̄wam nnyịn ifiọk se Jehovah oyomde oto nnyịn. Mmọdo, idahaemi ẹyak idụn̄ọde mme n̄kpọ oro ẹkenamde nnyịn idot ndina baptism man ise adan̄a nte nnyịn idude uwem ekekem ye “uwụtn̄kpọ nti ikọ.”

8, 9. (a) Ntak emi anade ika iso ikọri ke ifiọk ye mbuọtidem? (b) Ntak emi nnyịn ndikọri nte mme Christian edide akpan n̄kpọ, ndien didie ke n̄kọri nnyịn ebiet eke eto?

8 Akpa n̄kpọ oro ikanamde ekedi ndikọ ifiọk, ndien emi ama anam inyene mbuọtidem. Edi ana ika iso ikọri ke n̄kpọ mbiba emi. (2 Thess. 1:3) Ke ima ikana baptism, akpana ika iso ikọri ke n̄kan̄ eke spirit.

Eto isitreke n̄kọri. Mme Christian ikpetreke n̄ko

9 Imekeme ndimen nte nnyịn isikọride ke n̄kan̄ eke spirit ndomo ye nte eto esikọride. Eto ekeme ndinen̄ede n̄kọri n̄kpon, akpan akpan edieke orụn̄ esie enen̄erede odụk isọn̄. Ke uwụtn̄kpọ, ndusụk ikpọ cedar Lebanon ẹkeme ndikon̄ nte ufọk emi enyenede enyọn̄ 12, ẹnyụn̄ ẹnyene ikpọ orụn̄ ye ekpat emi  an̄wan̄ade mita 12. (Ikwọ Sol. 5:15) Eto esikọri usọp usọp ke ntọn̄ọ. Nte orụn̄ enen̄erede odụk isọn̄ onyụn̄ atarade, ntre n̄ko ke eto oro okpon onyụn̄ ọniọn̄. Nte ini akade, owo isisọpke ikụt nte eto oro ọkọride. Ukem oro ke edi ye n̄kọri oro nnyịn mme Christian inamde. Imekeme ndikọri usọp usọp ke nsonso oro itọn̄ọde ndikpep Bible inyụn̄ ina baptism. Mme owo ke esop ẹsikop inemesịt ndikụt n̄kọri nnyịn. Imakam ikeme ndikabade ndi asiakusụn̄ mîdịghe inyene mme ifetutom en̄wen. Ke mme isua oro ẹtienede, ekeme ndidi owo idisọpke ikụt n̄kọri nnyịn. Kpa ye oro, oyom ika iso ikọri ke ifiọk ye mbuọtidem inyụn̄ “ikpon iwọrọ owo, isịm ọyọhọ idaha emi Christ ekesịmde.” (Eph. 4:13) Ntem ke ini ikọride nte mme Christian, nnyịn itie nte ekpri n̄kpasịp emi ọkọride akabade akamba eto.

10. Ntak emi oyomde idem mbon oro ẹnamde n̄kpọ Abasi ẹbịghi ẹka iso ẹkọri?

10 Edi ikpanaha itre do. Akpana ifiọk nnyịn etetịm okpon, mbuọtidem nnyịn onyụn̄ etetịm ọsọn̄. Ntre ke nnyịn ididọn̄ n̄kam ke Ikọ Abasi. (N̄ke 12:3) Odu ediwak nditọete ke esop emi ẹnamde oro. Ke uwụtn̄kpọ, eyenete kiet emi edide ebiowo ke se ibede isua 30 ọdọhọ ke imọ isụk ikọkọri ke n̄kan̄ eke spirit. Enye ọdọhọ ete: “Mmenen̄ede mma Bible idahaemi. Idụhe ini emi mmenyeneke mbufa usụn̄ ndida mme edumbet ye ibet Bible nsịn ke edinam ke nsio nsio usụn̄. Nnyụn̄ ndọdiọn̄ mma utom ukwọrọikọ n̄ko.”

DỌDIỌN̄ DI UFAN ABASI

11. Didie ke ikeme ndinen̄ede mfiọk Jehovah nte ini akade?

11 Edieke iyomde ndikọri, ana idọdiọn̄ ida Jehovah nte Ufan ye Ete nnyịn. Enye oyom nnyịn ifiọk ke imọ imama nnyịn inyụn̄ iyomke n̄kpọ anam nnyịn. Ndifiọk ke Abasi ama nnyịn ayanam etie nnyịn ke idem nte esitiede eyenọwọn̄ ke ini ete m̀mê eka esie afatde enye, m̀mê nte esitiede nnyịn ke idem ke ini idude ye mme ufan nnyịn emi nnyịn idiọn̄ọde ke ikemeke ndinam nnyịn ibak. Anaedi afo ọmọfiọk ke ndikpere Jehovah ntem idịghe n̄kpọ usen kiet. Ayada ini mbemiso ikemede ndifiọk nnyụn̄ mma enye ntem. Ke ntre, edieke oyomde ndinen̄ede mfiọk Jehovah, sio ini nịm sida kot Ikọ esie kpukpru usen. Ke adianade do, kot kpukpru nsiondi Enyọn̄-Ukpeme ye Ẹdemede! ye mme n̄wed esop Abasi eken.

12. Nso ke ikpanam man Jehovah ọdiọn̄ọ nnyịn?

12 Akam ofụri esịt ye nti nsan̄a ẹsinam  mme ufan Abasi ẹnen̄ede ẹkọri ke n̄kan̄ eke spirit. (Kot Malachi 3:16.) Jehovah ‘esikop n̄kpeubọk mmọ.’ (1 Pet. 3:12) Jehovah esikpan̄ utọn̄ ọnọ nnyịn ke ini isemede inọ enye ke akam. Ke ntre, ana ‘ikọbọ ke akam.’ (Rome 12:12) Nnyịn ikemeke ndika iso ndi ufan Abasi ibọhọke enye an̄wam nnyịn. Mfịna ererimbot emi okpon ebe se ikemede ndiyọ ke odudu idem nnyịn. Edieke nnyịn mîbọn̄ke akam kpukpru ini, nnyịn idikemeke ndibọ odudu Abasi. Enye enyene ukeme onyụn̄ eben̄e idem ndinọ nnyịn odudu ida iyọ mme mfịna nnyịn. Ntre, ndi emesibọn̄ akam ọnọ Abasi nte etịn̄ ikọ ye ata ufan fo? Ndi enyene mme n̄kpọ emi akpanade anam man akam fo etie nte nneme ufan ye ufan?—Jer. 16:19.

13. Ntak emi ndisisop idem ye nditọete nnyịn edide akpan n̄kpọ edieke iyomde ndikọri ke n̄kan̄ eke spirit?

13 Jehovah enen̄ede ama mbon emi “ẹyomde ubọhọ ẹto enye”; ntem, idem ke ima ikedi idifiọk Abasi, ana ika iso isop idem ye mbon emi ẹfiọkde enye. (Nah. 1:7) Sia n̄kpọ iduọesịt ẹyọhọde ererimbot emi, ọfọn idian idem ye nditọete nnyịn emi ẹkemede ndidọn̄ nnyịn esịt. Ufọn ndidian idem ye mmọ? Koro ke esop ke edikụt mbon emi ẹdin̄wamde fi enyene “ima” onyụn̄ anam “nti utom.” (Heb. 10:24, 25) Nnyịn idikemeke ndinam item Paul emi edieke nnyịn mîdianke idem ye nditọete ke esop. Ntre kụt ete ke emesidụk mbono esop kpukpru ini. Nyụn̄ tiene buana ke mbono esop ke ndisinọ ibọrọ.

14. Ntak emi anade ikaka iso ikabade esịt inyụn̄ in̄wọn̄ọde ikpọn̄ idiọkn̄kpọ?

14 Akana ikabade esịt inyụn̄ iwọn̄ọde ikpọn̄ idiọkn̄kpọ mbemiso ikakabarede idi Christian. Edi ana ikaka iso inyịme ndikabade esịt. Sia nnyịn mîfọnke ima, imekeme ndinam idiọkn̄kpọ. Idiọkn̄kpọ etie nte urụkikọt emi eben̄ede idem ndikọn̄ nnyịn ini ekededi. (Rome 3:9, 10; 6:12-14) Ẹyak idu ke edidemede ikûnyụn̄ unam nte n̄kpọ eke nnyịn mînyeneke idiọkn̄kpọ. Esịt enem nnyịn sia Jehovah emede ime ye nnyịn nte nnyịn idomode ndikan mmeme nnyịn nnyụn̄ n̄kpụhọde. (Phil. 2:12; 2 Pet. 3:9) Akpan n̄kpọ kiet emi edin̄wamde nnyịn edi ndida ini ye odudu nnyịn nnam n̄kpọ Jehovah utu ke ndida nyom ufọn idem nnyịn. Eyenete an̄wan kiet ewet ete: “N̄kamamana ndikụt ete ye eka mi ke esop Abasi, edi nte n̄kokponde, n̄kadaha Jehovah nte ata ediwak owo ẹkedade enye. N̄kababak enye, nnyụn̄ n̄kere ke idụhe nte n̄kemede ndinem enye esịt.” Enye ikekpereke Jehovah onyụn̄ anam ediwak ndudue. Enye aka iso ete: “Idịghe sia mmen̄kamaha Jehovah, edi ekedi sia mmen̄kenen̄ekede mfiọk enye. Edi ke mma n̄kenen̄ede mbọn̄ akam ediwak ini, mma n̄kpụhọde.” Enye adian do ete: “Mma n̄kụt ke Jehovah akada mi usụn̄ nte ada eyenọwọn̄, an̄wam mi n̄kan n̄kpọ ubiọn̄ọ kiet kiet, anam oro sụn̄sụn̄, onyụn̄ owụt mi se n̄kpanamde.”

15. Nso ke Jesus ye Ete esie ẹsikụt?

15 “Ẹdọdiọn̄ ẹtịn̄ kpukpru ikọ emi ẹban̄ade [eti mbụk] ẹnọ mbio obio.” Angel Abasi eketịn̄ ikọ oro ọnọ Peter ye mme apostle en̄wen ke ẹma ẹkesio mmọ ke utịbe utịbe usụn̄ ke ufọk-n̄kpọkọbi. (Utom 5:19-21) Ndikwọrọ ikọ kpukpru urua edi akpan n̄kpọ en̄wen oro anade inam. Jesus ye Ete esie ẹkụt mbuọtidem oro inyenede ye ifịk nnyịn ke an̄wautom. (Edi. 2:19) Edi nte ebiowo oro iketịn̄de iban̄a ọdọhọde: “Ata akpan utom nnyịn edi utom ukwọrọikọ.”

16. Ntak emi ọfọnde ikere iban̄a uyakidem nnyịn?

16 Tie kere ban̄a uyakidem fo. Inyene nnyịn oro ọsọn̄de urua akan edi ufan nnyịn ye Jehovah. Enye ọfiọk mbon emi  ẹnyenede enye. (Kot Isaiah 44:5.) Bọn̄ akam nyụn̄ dụn̄ọde nte ufan fo ye enye etiede. N̄kpọ en̄wen edi ndikere mban̄a baptism fo, kûnyụn̄ ufre akpan usenọfiọn̄ oro. Emi n̄ko ayanam eti ke baptism fo edi akakan ubiere oro akanam anamde.

KA ISO KPERE JEHOVAH KE NDIME IME

17. Ntak emi oyomde inyene ime man ika iso ikpere Jehovah?

17 Paul ama owụt ntak emi edide akpan n̄kpọ ndime ime ke leta oro enye ekewetde ọnọ mbon Galatia. (Gal. 6:9) Ime edi akpan n̄kpọ ọnọ mme Christian mfịn n̄ko. Oyosobo idomo, edi Jehovah ayan̄wam fi. Ka iso bọn̄ akam ben̄e edisana spirit. Esịt ayana fi sụn̄ sia enye ayanam okop idatesịt utu ke mfụhọ, onyụn̄ enyene emem utu ke editịmede esịt. (Matt. 7:7-11) Kere ban̄a emi ise: Edieke Jehovah esede aban̄a inuen, adan̄a didie akan oro ke enye edise iban̄a fi emi amade onyụn̄ ayakde uwem fo ọnọ enye? (Matt. 10:29-31) Inamke n̄kpọ m̀mê nso idomo isịm fi, kûdedei ufiak edem; kûdedei ukpa mba. Nso ekese edidiọn̄ ke inyene ntem ke ntak emi Jehovah ọfiọkde nnyịn!

18. Ke emi ‘ama ekedifiọk Abasi’ mi, nso ke edinam?

18 Ntem, edieke edide ibịghike ekedi edifiọk Abasi onyụn̄ ana baptism, nso ke oyom anam? Ka iso nen̄ede fiọk Jehovah, nyụn̄ kọri ke n̄kan̄ eke spirit. Ndien edieke edide ebịghi akana baptism, nso ke oyom anam? Afo n̄ko enyene ndika iso n̄kpep n̄kpọ mban̄a nnyụn̄ nnen̄ede mfiọk Jehovah. Akpakam nnyịn idehedei ikere ke imọfiọk Jehovah ima. Utu ke oro, ikpenyene ndisidụn̄ọde mme n̄kpọ oro ikanamde mbemiso inade baptism man ika iso idọdiọn̄ ikpere edima Ete, Ufan, ye Abasi nnyịn, kpa Jehovah.—Kot 2 Corinth 13:5, 6.