Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  February 2013

Sọn̄ọ Du Ke Itịghede Ukpeme Jehovah

Sọn̄ọ Du Ke Itịghede Ukpeme Jehovah

“Jehovah [ayan̄wana] ekọn̄ ye mme idụt oro nte edide ke usen emi enye an̄wanade ekọn̄, ke usen en̄wan.”—ZECH. 14:3.

1, 2. Ewe ata ekọn̄ edin̄wana ke mîbịghike, ndien nso ke mme asan̄autom Jehovah mîdinamke ke ekọn̄ oro?

KE October 30, 1938, ata ediwak owo ke United States ẹkekpan̄ utọn̄ ẹkop ọwọrọetop edinam ekebe ukopikọ. Ke edinam oro, mbon mbre ẹma ẹnam nte idi mme ọnọ-mbụk n̄kpọntịbe ẹnyụn̄ ẹdọhọ ke mme n̄kpọ ke ẹto ekondo emi ẹkotde Mars ẹdisobo isọn̄. Okposụkedi emi ẹdide ẹma ẹtọtọt ke ekebe ukopikọ ẹte ke mbre ke ẹyom ndinam, ediwak owo ẹkekere ke edi ata idem n̄kpọ, ntre idem ama enen̄ede enyek mmọ. Ndusụk owo ẹma ẹkam ẹnam n̄kpọ mbak mme n̄kpọ oro ẹkekerede ke ẹto Mars ẹdi do ẹdinam mmimọ n̄kpọ.

2 Mfịn, ata ekọn̄ enen̄ede ekpere ndisiaha. Edi mme owo iben̄eke idem inọ enye. Owo itịn̄ke iban̄a ekọn̄ emi ke ikpîkpu mbụk, edi Ikọ Abasi eke odudu spirit, kpa Bible etịn̄ aban̄a enye. Edi ekọn̄ Armageddon—kpa ekọn̄ emi Abasi edin̄wanade ye idiọk editịm n̄kpọ emi. (Edi. 16:14-16) Mme asan̄autom Abasi ke isọn̄ iditieneke in̄wana ekọn̄ emi. Edi uten̄e oyodoro mmọ aban̄a mme n̄kpọ oro ẹditịbede ye nte Jehovah edidade odudu esie inam n̄kpọ ke utịbe utịbe usụn̄.

3. Ewe ntịn̄nnịm ikọ ke iyom ndineme mban̄a, ndien ntak emi enye edide akpan n̄kpọ ọnọ nnyịn?

3 Ntịn̄nnịm ikọ Bible oro ẹwetde ke Zechariah ibuot 14 etịn̄ n̄kpọ nnennen nnennen aban̄a ekọn̄ Armageddon. Okposụkedi emi ẹkewetde enye n̄kpọ nte isua 2,500 emi ẹkebede, ntịn̄nnịm ikọ emi enen̄ede ebehe nnyịn. (Rome 15:4) Ekese se ẹtịn̄de do ẹban̄a se itịbede inọ ikọt Abasi tọn̄ọ Obio Ubọn̄ Messiah ọkọtọn̄ọ ndikara ke heaven ke 1914 ye mme utịbe utịbe n̄kpọ oro ẹditịbede ke mîbịghike. Mme akpan n̄kpọ oro ẹtịn̄de ẹban̄a ke ntịn̄nnịm ikọ emi ẹsịne “ata akamba itịghede”  ye “odu-uwem mmọn̄” emi ewetde. (Zech. 14:4, 8) Itịghede emi enen̄ede an̄wam ndikpeme mme andituak ibuot nnọ Jehovah. Ndien ke ini ifiọkde se odu-uwem mmọn̄ emi ekemede ndinam nnọ nnyịn, iyokụt ke ọfọn in̄wọn̄ enye ndien eyesidọn̄ nnyịn ndin̄wọn̄ enye. Mmọdo, oyom inen̄ede idụn̄ọde ntịn̄nnịm ikọ emi.—2 Pet. 1:19, 20.

‘USEN EMI ENYENEDE JEHOVAH’ ỌTỌN̄Ọ

4. (a) Ini ewe ke ‘usen emi enyenede Jehovah’ ọkọtọn̄ọ? (b) Nso ke mme andituak ibuot nnọ Jehovah ẹkekwọrọ ke ediwak isua mbemiso 1914, ndien ikpọ owo ukara ererimbot ẹkenam n̄kpọ didie?

4 Zechariah ibuot 14 ọtọn̄ọ ke nditịn̄ mban̄a ‘usen emi enyenede Jehovah.’ (Kot Zechariah 14:1, 2.) Nso idi usen emi? Enye edi “usen Ọbọn̄,” emi ọkọtọn̄ọde ke ini “obio ubọn̄ ererimbot emi” akakabarede edi “obio ubọn̄ Ọbọn̄ nnyịn ye eke Christ esie.” (Edi. 1:10; 11:15) Usen oro ọkọtọn̄ọ ke 1914 ke ini Obio Ubọn̄ Messiah ọkọtọn̄ọde ndikara ke heaven. Ediwak isua mbemiso 1914, mme andituak ibuot nnọ Jehovah ẹma ẹkwọrọ ẹnọ mme idụt ke utịt “edimek ini mme idụt” edidi ke 1914, ye nte ke orụk afanikọn̄ emi akanam mîdụhe ke ererimbot ọyọtọn̄ọ. (Luke 21:24) Mme idụt ẹkenam n̄kpọ didie? Utu ke ndikop ekemini item oro ẹkenọde do, ikpọ owo ukara ye eke ido ukpono ẹma ẹsak ẹnyụn̄ ẹkọbọ ifịk ifịk mme ọkwọrọ eti mbụk oro ẹkeyetde aran do. Ke ndinam ntre, ikpọ owo ukara ererimbot emi ẹkesak Ata Ọkpọsọn̄ Abasi ke idemesie, sia mme isụn̄utom Obio Ubọn̄ oro ẹyetde aran ẹda ke ibuot “Jerusalem eke heaven”—kpa Obio Ubọn̄ Messiah—emi mmọ ẹtienede ẹbuana.—Heb. 12:22, 28.

5, 6. (a) Nso ke mme idụt ẹkenam “obio oro” ye ‘nditọisọn̄’ esie kpa nte ẹketịn̄de ẹnịm? (b) Mmanie ẹkedi “mbon oro ẹsụhọde”?

5 Zechariah ama etịn̄ se mme idụt ẹdinamde ete: “Ẹyenyụn̄ ẹkan obio oro [Jerusalem].” “Obio oro” ada aban̄a Obio Ubọn̄ Messiah Abasi. ‘Nditọisọn̄’ esie, kpa nsụhọ mme Christian oro ẹyetde aran, ẹda ke ibuot esie mi ke isọn̄. (Phil. 3:20) Ke ini ẹkemụmde nditọete oro ẹkekamade ifetutom ke esop Abasi ẹkekọbi ke Atlanta, Georgia, U.S.A. ke ini akpa ekọn̄ ererimbot, eketie nte ‘ẹma ẹkan obio oro.’ Ẹma “ẹbụme mme ufọk” sia ẹma ẹfiomo ẹnyụn̄ ẹnam n̄kpọ ibak ibak ye mmọ ye mbon eken oro ẹkesọn̄ọde ẹda. Ke ini mme asua emi ẹkekpande mme n̄wed nsụhọ oro ẹyetde aran mi ẹnyụn̄ ẹdomode nditre mmọ ndikwọrọ ikọ, eketie nte n̄kpọ eke mmọ ‘ẹbụmede’ mme ufọk obio oro.

6 Okposụkedi emi mme asua ẹkewakde ẹkan ikọt Abasi, ẹsu nsu ẹdori mmọ, ẹbiọn̄ọ mmọ, ẹnyụn̄ ẹkọbọ mmọ, owo ikekemeke nditre utuakibuot akpanikọ. Ama odu ‘mbon oro ẹkesụhọde,’ oro edi, mbon oro ẹyetde aran, emi ẹkesọn̄ọde ẹda mînyụn̄ inyịmeke ‘ẹsịbe mmimọ ẹfep ke obio oro.’

7. Nso uwụtn̄kpọ ke Mme Ntiense Jehovah oro ẹyetde aran ẹnịm ẹnọ mme andituak ibuot nnọ ata Abasi mfịn?

7 Ndi ntịn̄nnịm ikọ emi ama osu ofụri ofụri ke utịt akpa ekọn̄ ererimbot? Ihih. Mme idụt ẹma ẹka iso ndikọbọ nsụhọ mbon oro ẹyetde aran ye mme anam-akpanikọ nsan̄a mmọ emi ẹnyenede idotenyịn ndidu mi ke isọn̄. (Edi. 12:17) Ẹma ẹkụt emi ke ini udiana ekọn̄ ererimbot. Nsọn̄ọnda Mme Ntiense oro ẹyetde aran esịn udọn̄ ọnọ mme asan̄autom Abasi mfịn ndiyọ orụk ukọbọ ekededi oro mmọ ẹsobode, esịnede ubiọn̄ọ mbonubon, nsan̄autom,  m̀mê nsan̄a ufọkn̄wed oro mîdịghe Mme Ntiense, emi ẹsisakde mmọ ke ntak mbuọtidem mmọ. (1 Pet. 1:6, 7) Ke ebiet ekededi emi mbon oro ẹtuakde ibuot ẹnọ ata Abasi ẹdụn̄de, mmọ ẹnen̄ede ẹbiere ‘ndisọn̄ọ nda ke spirit kiet,’ “iyakke mme andibiọn̄ọ [mmọ] ẹsịn [mmọ] ndịk ke idem.” (Phil. 1:27, 28) Edi m̀mọ̀n̄ ke ikọt Jehovah ẹdinyene ubọhọ ke ererimbot emi asuade mmọ mi?—John 15:17-19.

JEHOVAH AYANAM “ATA AKAMBA ITỊGHEDE”

8. (a) Nso ke obot ekeme ndida mban̄a ke Bible? (b) Nso ke “obot eto olive” ada aban̄a?

8 Sia Jerusalem—kpa “obio oro”—adade aban̄a Jerusalem eke heaven, ọwọrọ “obot eto olive emi asakde iso ese Jerusalem” edi ndamban̄a n̄ko. Nso ke obot oro ada aban̄a? Didie ke enye ‘edisiaha ke ufọt’ akabade obot iba? Ntak emi Jehovah okotde mmọ “obot mi”? (Kot Zechariah 14:3-5.) Ke Bible, obot ekeme ndida mban̄a obio ubọn̄, m̀mê ukara. Ẹsiwak n̄ko ndidọhọ ke mme edidiọn̄ ye ukpeme ẹto obot Abasi. (Ps. 72:3; Isa. 25:6, 7) Ke ntem, obot eto olive emi Abasi adade ke edem usiahautịn Jerusalem emi odude ke isọn̄ ada aban̄a itie ukara Jehovah eke ofụri ekondo.

9. Nso ke “obot eto olive” ndisiaha iba ọwọrọ?

9 Nso ke obot eto olive ndisiaha iba ọwọrọ? Obot oro, emi odude ke edem usiahautịn Jerusalem, ndisiaha ọwọrọ ke Jehovah ọtọn̄ọ udiana ukara. Udiana ukara emi edi Obio Ubọn̄ Messiah emi Jesus Christ akarade. Oro esịn Jehovah okot obot iba oro ẹwọrọde ẹto “obot eto olive” ndisiaha, “obot mi.” (Zech. 14:4) Ukara mbiba oro ẹdi ukara esie.

10. Nso ke “ata akamba itịghede” emi odude ke ufọt obot iba oro ada aban̄a?

10 Ke ini ndamban̄a obot oro asiahade iba, ubak aka edem edere, ubak eken aka edem usụk, ukot Jehovah ọsọn̄ọ owụhọ ke obot mbiba. “Ata akamba itịghede” odu ke idak ukot Jehovah. Itịghede emi ada aban̄a ukpeme Abasi. Kpa nte n̄kpọ mîsisọpke inam mbon oro ẹdude ke itịghede emi odude ke ufọt obot iba, mme asan̄autom Jehovah ẹnyene ifụre ke ukara esie ye ke ukara Eyen esie. Jehovah oyokụt ete ke owo isọhike edisana utuakibuot ifep tutu amama. Ini ewe ke obot eto olive emi akasiaha? Akasiaha ke ini emi ukara Obio Ubọn̄ Messiah ọkọtọn̄ọde, ke Ini Mme Gentile ama ekesịm utịt ke 1914. Ini ewe ke mme andituak ibuot nnọ ata Abasi ẹketọn̄ọ ndifehe n̄ka ndamban̄a itịghede oro?

ẸTỌN̄Ọ NDIFEHE N̄KA ITỊGHEDE ORO!

11, 12. (a) Ini ewe ke ẹketọn̄ọ ndifehe n̄ka ndamban̄a itịghede oro? (b) Nso iwụt ke ọkpọsọn̄ ubọk Jehovah odu ye ikọt esie?

11 Jesus ama odụri mme anditiene enye utọn̄ ete: “Mbufo ẹyedi mbon emi kpukpru mme idụt ẹsuade ke ntak enyịn̄ mi.” (Matt. 24:9) Ke mme akpatre usen editịm n̄kpọ emi, emi ọkọtọn̄ọde ke 1914, usua oro ọdọdiọn̄ okpon. Kpa ye ibak ibak ukọbọ oro mme asua ẹkekọbọde nsụhọ mbon oro ẹyetde aran ke ini akpa ekọn̄ ererimbot, owo ikosoboke mbon oro ẹkesọn̄ọde ẹda mi ifep. Ke 1919, ẹma ẹfak mmọ ẹsio ke ufụn Akwa Babylon—kpa ukara ererimbot eke nsunsu ido ukpono. (Edi. 11:11, 12) * Ini oro ke ẹketọn̄ọ ndifehe n̄ka itịghede obot Jehovah.

12 Toto ke 1919, itịghede ukpeme Abasi aka iso ndikpeme mme andituak ibuot nnọ ata Abasi ke ofụri isọn̄. Ke ediwak isua emi ẹbede, ẹmekpan  ẹnyụn̄ ẹbiọn̄ọ utom ukwọrọikọ ye mme n̄wed emi Mme Ntiense Jehovah ẹdade Bible ẹwet ke ediwak ebiet ke ererimbot. Mme utọ ubiọn̄ọ oro ẹsụk ẹdodu ke ndusụk idụt. Edi ọkpọkọm mme idụt ẹtịme adan̄a didie, mmọ idikemeke ndisọhi ido ukpono akpanikọ mfep! Ọkpọsọn̄ ubọk Jehovah ayaka iso odu ye ikọt esie.—Deut. 11:2.

13. Didie ke nnyịn idu ke itịghede ukpeme Jehovah, ndien ntak emi enen̄erede oyom inam ntre idahaemi?

13 Edieke isọn̄ọde iyịre ye Jehovah inyụn̄ isọn̄ọde ida ke akpanikọ, enye ye Jesus Christ Eyen esie ẹyenam udeme mmọ, Abasi idinyụn̄ iyakke owo m̀mê n̄kpọ ndomokiet ‘awamade nnyịn osio Enye ke ubọk.’ (John 10:28, 29) Jehovah eben̄e idem ndinọ nnyịn un̄wam ekededi oro iyomde man ikop uyo inọ enye nte Akakan Andikara Ekondo inyụn̄ ika iso idi mme andidu ke idak Obio Ubọn̄ Messiah. Enen̄ede oyom isọn̄ọ idu ke itịghede ukpeme, koro itịghede oro eyenen̄ede enyene ufọn ọnọ mme andituak ibuot nnọ ata Abasi ke akwa ukụt oro enen̄erede ekpere mi.

‘USEN EMI ẸN̄WANADE EKỌN̄’ EDISỊM

14, 15. Nso iditịbe inọ mbon oro mîdụhe ke itịghede ukpeme ‘ke usen emi Abasi edin̄wanade ekọn̄’ ye mme asua esie?

14 Nte utịt editịm n̄kpọ emi enen̄erede ekpere, Satan editetịm in̄wana ye mme asan̄autom Jehovah. Ekem “usen emi [Abasi] an̄wanade ekọn̄” ye mme asua esie eyedisịm. Jehovah oyokụt ete ke kiet ke otu en̄wan Satan oro edidi akpatre en̄wan esie. Usen oro, Andikara Ekondo eyenen̄ede owụt akwa odudu esie akan nte akanam owụtde ke “usen en̄wan” ekededi.—Zech. 14:3.

15 Nso iditịbe inọ mbon oro mîdụhe ke “akamba itịghede” ukpeme ke usen emi Abasi edin̄wanade ekọn̄? Mmọ idinyeneke “ọsọn̄urua un̄wana”—oro edi, mfọn Jehovah. Ke usen en̄wan oro edide do, n̄kpọ ayanam “enan̄-mbakara ye mule ye camel ye ayara ass ye kpukpru orụk ufene”—kpa se idade iban̄a mme n̄kpọekọn̄ mme idụt. Mme utọ n̄kpọekọn̄ oro idinyeneke ufọn. Jehovah ayamia mme idụt “ufen” n̄ko, oro edi, ọtọ mmọ idiọk udọn̄ọ. Edide ufen emi edi ata ata m̀mê ndamban̄a ufen, enye eyetre ọkpọsọn̄ ndịk oro mme asua ẹsịnde nnyịn ke idem. Ke usen oro, ‘enyịn ye edeme ẹyeyemede owo,’ emi ọwọrọde ke mmọ idikemeke ndinam nnyịn n̄kpọ nnyụn̄ ntịn̄ ikọ isụn̄i ndian Abasi. (Zech. 14:6, 7, 12, 15) Idụhe ebiet ke isọn̄ emi nsobo oro mîdisịmke. Inua idikemeke ndibụk nte udịmekọn̄ Satan ediwakde. (Edi. 19:19-21) “Mmọ eke Jehovah ediwotde ke usen oro ẹyetọn̄ọ ke utịt isọn̄ kiet ẹna ẹsịm utịt isọn̄ eken.”—Jer. 25:32, 33.

16. Nte usen emi Abasi edin̄wanade ekọn̄ asan̄ade ekpere, mme mbụme ewe ke oyom ikere iban̄a, ndien nso ke oyom inam?

16 Kpukpru owo ẹsibọ ufen ke ntak ekọn̄, idem mbon oro ẹdide mme andikan. Udia ekeme ndinana. Ẹkeme nditaba inyene. N̄kpọ ekeme ndisọn̄. Ẹkeme nditre ndinyene ifụre nte ẹkesinyenede. Nso ke nnyịn idinam edieke n̄kpọ ọsọn̄de ntem ye nnyịn? Ndi idem eyenyek nnyịn? Ndi iyakan̄ mbuọtidem? Ndi iyọduọk idotenyịn inyụn̄ inen̄ede ifụhọ? Oyom inen̄ede inyene mbuọtidem ke odudu edinyan̄a Jehovah ke ini akwa ukụt inyụn̄ isọn̄ọ idu ke itịghede ukpeme esie!—Kot Habakkuk 3:17, 18.

‘ODU-UWEM MMỌN̄ EYEWET ỌWỌRỌ’

17, 18. (a) Nso idi “odu-uwem mmọn̄”? (b) Nso ke “inyan̄ edem usiahautịn” ye “inyan̄ edem usoputịn” ẹda ẹban̄a? (c) Nso ke afo ebiere ndinam?

17 Ke ekọn̄ Armageddon ama okokụre,  “odu-uwem mmọn̄” oyoto Obio Ubọn̄ Messiah ewet ọwọrọ kpukpru ini. “Odu-uwem mmọn̄” emi edi ndutịm emi Abasi anamde man inyene uwem. “Inyan̄ edem usiahautịn” edi Inyan̄ Inụn̄, “inyan̄ edem usoputịn” onyụn̄ edi Inyan̄ Mediterranean. Inyan̄ mbiba emi ẹda ẹban̄a mme owo. Inyan̄ Inụn̄ ada aban̄a mbon oro ẹdude ke udi ofụri ubonowo. Sia mme odu-uwem n̄kpọ ẹyọhọde Inyan̄ Mediterranean, enye ada aban̄a “akwa otuowo” emi ẹdibọhọde Armageddon. (Kot Zechariah 14:8, 9; Edi. 7:9-15) Mmọdo, otu mbiba emi ẹyebọ ufọn sia ẹyefak mmọ ẹsio ke ubiomikpe n̄kpa Adam nte mmọ ẹkade iso ndin̄wọn̄ ndamban̄a odu-uwem mmọn̄, m̀mê “akpa mmọn̄ uwem.”—Edi. 22:1, 2.

Biere ndisọn̄ọ ndu ke itịghede ukpeme Jehovah

18 Jehovah eyekpeme onyụn̄ anyan̄a nnyịn esịn ke edinen obufa ererimbot esie ke ini enye edisobode idiọk editịm n̄kpọ emi. Okposụkedi emi kpukpru mme idụt ẹsuade nnyịn, ẹyak ibiere ndika iso ndi mme andidu ke idak Obio Ubọn̄ Abasi, idọdiọn̄ ibiere ndisọn̄ọ ndu ke itịghede ukpeme Jehovah.

^ ikp. eki. 11 Se Ediyarade—Ubọn̄ Ubọn̄ Ata-Utịt Esie Emekpere! page 169-170.