Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JANUARY 2013

Ituaha N̄kpọfiọk Ndinam N̄kpọ Abasi

Ituaha N̄kpọfiọk Ndinam N̄kpọ Abasi

“Mfefre mme n̄kpọ oro ẹdude ke edem nnyụn̄ nnyanade mbịne mme n̄kpọ oro ẹdude ke iso.”—PHIL. 3:13.

1-3. (a) Nso ke owo nditua n̄kpọfiọk ọwọrọ, ndien didie ke emi ekeme ndifịna nnyịn? (b) Nso ke nnyịn ikeme ndikpep nto Paul mban̄a nte owo ekemede ndinam n̄kpọ Abasi edi ituaha n̄kpọfiọk?

EWET UTO kiet ekewet ete: “Idụhe ikọ emi esibiakde owo nte: ‘Ekpedi mma mfiọk!’” Ewet uto oro ekekere J. G. Whittier, ndien enye eketịn̄ aban̄a mme n̄kpọ oro nnyịn ituade n̄kpọfiọk iban̄a, kpa mme n̄kpọ oro nnyịn ikerede ke ekpedi idahaemi ke nnyịn ikpanamke ntre. “N̄kpọfiọk” edi owo ndikere nnyụn̄ mfụhọ mban̄a n̄kpọ, esịt ndidiọk owo ke n̄kpọ emi enye akanamde m̀mê emi enye mîkanamke, onyụn̄ ekeme ndiwọrọ “ndifiak ntua.” Kpukpru nnyịn imesinam n̄kpọ emi isituade n̄kpọfiọk iban̄a. Nso ke afo atua n̄kpọfiọk aban̄a?

2 Ndusụk owo ẹnam ikpọ ndudue, mîdịghe ẹnam ikpọ idiọkn̄kpọ. Ndusụk owo inamke akamba idiọkn̄kpọ, edi mmọ ẹsikere m̀mê ndusụk ubiere emi mmimọ ikanamde ẹma ẹnen̄ede ẹfọn. Ndusụk owo ẹsifre ẹban̄a se mmọ ẹkenamde ke ini edem inyụn̄ iyakke emi afịna mmọ. Mbon en̄wen ẹtak ke ndidọhọ ubaha nte n̄kpakanamde emi m̀mê oko. (Ps. 51:3) Afo esinam okwo didie? Ndi ọdọn̄ fi ndinam n̄kpọ Abasi edi utuaha n̄kpọfiọk—yak idọhọ ọtọn̄ọde ke emi? Ndi odu owo emi akanamde ntre, emi ikemede ndikpebe? Ih, apostle Paul.

3 Paul ama anam ikpọ ndudue onyụn̄ anam nti ubiere. Enye ama enen̄ede atua n̄kpọfiọk aban̄a mme ndudue esie, edi enye ama ekpep n̄ko ndisọn̄ọ nda nnam akpanikọ nnọ Abasi. Ẹyak ise se ikemede ndikpep nto enye mban̄a nte owo ekemede ndinam n̄kpọ Abasi edi ituaha n̄kpọfiọk.

MME NDUDUE EMI PAUL AKANAMDE KE INI EDEM

4. Nso ke apostle Paul akanam ke ini edem, emi enye akatuade n̄kpọfiọk aban̄a?

4 Paul ekedi Pharisee ke ini enye ekedide akparawa;  enye ama anam mme n̄kpọ emi enye akatuade n̄kpọfiọk aban̄a nte ini akakade. Ke uwụtn̄kpọ, enye akada iso ke ibak ibak ukọbọ emi ẹkekọbọde mme mbet Christ. Bible ọdọhọ ke ndondo oro ẹkewotde Stephen ke ntak emi enye ekedide Christian, ke “Saul [emi ẹkedide ẹdidiọn̄ọ nte Paul ama] ọtọn̄ọ ndinam n̄kpọ idiọk idiọk ye esop. Enye odụk ke ufọk ke ufọk, odụri iren ye iban ọwọrọ, ọkọdọn̄ mmọ ke ufọk-n̄kpọkọbi.” (Utom 8:3) Albert Barnes, ata ekpep n̄kpọ mban̄a Bible, ọkọdọhọ ke ikọ Greek oro ẹkabarede “ndinam n̄kpọ idiọk idiọk” edi “ọkpọsọn̄ ikọ oro owụtde ifịk ye ikpahaesịt emi [Saul] akadade ọkọbọ [mme Christian].” Ntem, Barnes ọdọhọ ke “Saul okosobo ufọkabasi nte idiọk unam.” Sia Saul ekedide ifịk ifịk Jew, enye ekenịm ke Abasi ọkọdọn̄ imọ isobo Ido Ukpono Christ ifep. Ntre, enye ama ọnọmọ mme Christian etieti, “esịn mbet Ọbọn̄ ndịk ke idem onyụn̄ oyom ndiwot mmọ, . . . iren ye iban.”—Utom 9:1, 2; 22:4. *

5. Tịn̄ nte Saul akasan̄ade etre ndikọbọ mme anditiene Jesus akabade ọkọkwọrọ aban̄a Christ.

5 Saul akaduak ndika Damascus n̄kodụri mme mbet nsion̄o ke ufọk mmọ nda n̄ka Jerusalem man ẹkeda ke iso ikpe Sanhedrin. Edi enye ikekemeke ndinam oro sia enye ọkọbiọn̄ọde Ibuot esop mme Christian. (Eph. 5:23) Ke ini Saul akasan̄ade ke usụn̄ uka Damascus, Jesus ama owụt enye idem, utịbe utịbe un̄wana onyụn̄ anam enye akabade nnan. Ekem Jesus ama ọdọhọ Saul aka Damascus ekebet owo en̄wen emi edisobode ye enye. Imọfiọk se iketịbede ke oro ebede.—Utom 9:3-22.

6, 7. Nso iwụt ke Paul ama ọfiọk ke imọ ima inam ikpọ ndudue?

6 Se Paul akadade nte akpan n̄kpọ ama okpụhọde ke ndondo oro enye akakabarede edi Christian. Utu ke ndidi ibak ibak asua Ido Ukpono Christ, enye ama akabade edi ifịk ifịk anditan̄a ido ukpono oro. Kpa ye oro, nte ini akakade, enye ekewet ntem aban̄a idemesie: “Mbufo ẹma ẹkop ẹban̄a edu uwem mi mbemiso ke ido ukpono mme Jew, ẹte ke mma n̄kọbọ esop Abasi mbe nde nnyụn̄ nsobo enye.” (Gal. 1:13) Ekem, enye ama afiak ewet aban̄a mme ndudue emi enye akanamde ke ini edem ọnọ mbon Corinth, mbon Philippi, ye Timothy. (Kot 1 Corinth 15:9; Phil. 3:6; 1 Tim. 1:13) Ikenemke-nem Paul ndiwet orụk n̄kpọ oro mban̄a idemesie, edi enye ikonyụn̄ idomoke ndidịp se iketịbede. Enye ama enen̄ede ọfiọk ke imọ ima inam ikpọ ndudue.—Utom 26:9-11.

7 Frederic W. Farrar, ata ekpep n̄kpọ mban̄a Bible, ama etịn̄ aban̄a ‘enyene-ndịk ukọbọ emi Saul ọkọkọbọde mme mbet.’ Farrar ọdọhọ ke ima ikere nte Paul ọkọdiọkde ke ini edem ke “nnyịn idifiọk nte enye okofụhọde ye adan̄a nte mme asua ẹketịn̄de n̄kpọ ẹbiat enye.” Nditọete ẹma ẹsisobo ye Paul ke nsio nsio esop oro enye akakade ekese, ndusụk ini, ekeme ndidi mbon oro ẹkesobode ye enye ke akpa ini ẹma ẹdọhọ ẹte, ‘Ọwọrọ afo edi Paul—afo edi owo oro ekesikọbọde nnyịn!’—Utom 9:21.

8. Paul ekese didie mbọm ye ima oro Jehovah ye Jesus ẹkewụtde enye, ndien nso ke oro ekpep nnyịn?

8 Edi Paul ama ọfiọk ke mfọnido Abasi oro owo mîdotke akanam imọ ikeme ndinam utom ukwọrọikọ. Enye ama etịn̄ aban̄a edu Abasi emi n̄kpọ nte utịm ike 90 ke leta 14 oro enye ekewetde—idụhe andiwet Bible en̄wen emi eketịn̄de awak ntre. (Kot 1 Corinth 15:10.) Paul ama enen̄ede owụt esịtekọm aban̄a nte ẹketuade imọ mbọm, ndien ikoyomke mfọnido oro owo mîdotke, emi ẹkewụtde enye edi ke ikpîkpu. Ntre, enye ‘ama anam utom akan’  kpukpru mme apostle eken. Se iketịbede inọ Paul owụt ke edieke nnyịn iyararede idiọkn̄kpọ nnyịn inyụn̄ ikpụhọrede, ke Jehovah enyịme ndida uwa ufak Jesus mfen ọkpọkọm ikpọ idiọkn̄kpọ oro ikanamde. Emi edi ata eti uwụtn̄kpọ ọnọ mbon oro ẹkerede ke idiọkn̄kpọ mmimọ ẹkponi ẹkan se ẹdade uwa Christ ẹfen! (Kot 1 Timothy 1:15, 16.) Okposụkedi emi ini kiet ko Paul ekedide ibak ibak andikọbọ Christ, enye ama ewet ete: ‘Eyen Abasi ama ama mi onyụn̄ ayak idemesie ọnọ kaban̄a mi.’ (Gal. 2:20; Utom 9:5) Paul ama ekpep nte okpodude uwem mbak edifiak anam ikpọ ndudue en̄wen. Ndi afo emekpep emi n̄ko?

Paul ama ekpep nte akpanamde n̄kpọ Abasi edi ituaha n̄kpọfiọk

NDI ENYENE SE ATUADE N̄KPỌFIỌK ABAN̄A?

9, 10. (a) Ntak emi ndusụk mme asan̄autom Jehovah ẹsituade n̄kpọfiọk? (b) Ntak emi ndika iso ntịmede esịt mban̄a ndudue nnyịn mîfọnke?

9 Ndi ama anam n̄kpọ oro atuade n̄kpọfiọk idahaemi? Ndi ama ada odudu ye ini fo anam mme n̄kpọ oro mînyeneke ufọn? Ndi ama anam n̄kpọ oro ọkọnọde mbon en̄wen unan? Mîdịghe ekeme ndidi enyene mme n̄kpọ en̄wen oro afo atuade n̄kpọfiọk aban̄a. Mbụme edi, Nso ke ekeme ndinam mban̄a emi?

10 Ediwak owo ẹka iso nditịmede esịt! Edi nditịmede esịt kpukpru ini ọwọrọ ndifiomo idem, ndiyat idem esịt, ndikọbọ idem. Emi esinam owo okop ebeubọk editịmede esịt. Edi ndi nditịmede esịt ekeme ndikọk mfịna ekededi? Ikemeke! Kere nte owo okpoyomde ndidọn̄ mmọn̄ nyọhọ drọm emi edịtde—ada ofụri usen okoi mmọn̄ ọdọn̄ ke drọm oro edi ufọn idụhe! Utu ke nditịmede esịt, enyene se akpanamde. Emekeme ndikpe owo emi ekeduede ubọk, afiak edi ufan esie. Emekeme ndifep n̄kpọ ekededi oro akanamde anam idiọkn̄kpọ oro, ndien ke ntem unyeneke aba mfịna ke ini iso. Akan oro, odu ndusụk n̄kpọ emi mûkemeke ndinyan̄a. Edi n̄kukụre se editịmede esịt ekemede ndinam edi ndikpan owo ndinam n̄kpọ Abasi  ọyọhọ ọyọhọ. Ndien editịmede esịt inyeneke baba ufọn kiet!

11. (a) Nso ke ana inam man Jehovah atua nnyịn mbọm onyụn̄ owụt nnyịn ima-mfọnido? (b) Nso ke Abasi ọdọhọ inam mbak esịt edika iso obiom nnyịn aban̄a se ikanamde ke ini edem?

11 Ndusụk owo ẹsiyak idiọkn̄kpọ ini edem akan mmọ ubọk tutu ẹkere ke mmimọ iwọrọke n̄kpọ ke enyịn Abasi. Mmọ ẹkeme ndikere ke Abasi ikemeke nditua mmimọ mbọm, edide ke ntak emi ẹkerede ke idiọkn̄kpọ mmimọ okpon akaha m̀mê ke awak akaha. Edi se idude edi ke inamke n̄kpọ m̀mê nso ke mmọ ẹkenam ke ini edem, mmọ ẹkeme ndikabade esịt, ẹkpụhọde, ẹnyụn̄ ẹben̄e Abasi efen ọnọ mmimọ. (Utom 3:19) Jehovah ekeme nditua mmọ mbọm onyụn̄ owụt mmọ ima-mfọnido, kpa nte enye anamde ye ediwak owo en̄wen. Jehovah eyefen ọnọ owo emi osụhọrede idem, enyenede esịt akpanikọ, onyụn̄ enen̄erede akabade esịt. Abasi ama efen ọnọ Job, emi ọkọdọhọde ete: “Mmetie ke ntan ye ntọn̄ ntua n̄kpọfiọk.” (Job 42:6) Ana kpukpru nnyịn inam se Abasi ọdọhọde inam mbak esịt edika iso obiom nnyịn. Enye ọdọhọ ete: “Owo eke edịpde idiọkn̄kpọ esie idikwe unen, edi owo eke ayararede onyụn̄ ọkpọn̄de mmọ, ẹyetua enye mbọm.” (N̄ke 28:13; Jas. 5:14-16) Mmọdo, ana iyarade idiọkn̄kpọ nnyịn inọ Abasi, ibọn̄ akam iben̄e ẹfen ẹnọ nnyịn, inyụn̄ idiọn̄ se ikabiatde. (2 Cor. 7:10, 11) Edieke inamde mme n̄kpọ emi, do Enye emi ‘esifende ke akamba usụn̄’ ayatua nnyịn mbọm.—Isa. 55:7.

12. (a) Didie ke uwụtn̄kpọ David ekpep nnyịn mfọnn̄kan n̄kpọ oro ikpanamde ke ini esịt obiomde nnyịn? (b) Didie ke Jehovah esitua n̄kpọfiọk, ndien didie ke ndifiọk emi an̄wam nnyịn? (Se ekebe.)

12 Akam enyene odudu etieti; Abasi ekeme ndida enye n̄n̄wam nnyịn. David ama etịn̄ ke ndinem Psalm ke Abasi eyere akam imọ. (Kot Psalm 32:1-5.) Mbemiso David akayararede idiọkn̄kpọ esie ọnọ Abasi, esịt ama enen̄ede obiom enye! Esịt ama etịmede enye, ọdọn̄ọ, inyụn̄ ikopke idatesịt ke ntak emi enye mîkayarakede idiọkn̄kpọ esie. Nso ikanam ẹfen ẹnọ David, enye onyụn̄ enyene ifụre? Ekedi ndiyarade idiọkn̄kpọ esie nnọ Abasi. Jehovah ama eyere akam David, anam enye okop inem uwem, onyụn̄ anam se ifọnde. Kpasụk ntre, edieke afo ọbọn̄de akam ke ofụri esịt, emekeme ndinịm ke Jehovah oyokop eben̄e fo. Edieke se akanamde ke ini edem afịnade fi, nam ofụri se ekemede nyụn̄ nịm ke Jehovah efen ọnọ fi!—Ps. 86:5.

DORI ENYỊN KE INI ISO

13, 14. (a) Nso idi akpan n̄kpọ oro ikpekerede iban̄a idahaemi? (b) Mme mbụme ewe ke ikeme ndida ndụn̄ọde idem nnyịn idahaemi?

13 Edi akpanikọ ke imekeme ndikpep n̄kpọ nto se iketịbede, edi inyene ndida idotenyịn ini iso ndu uwem. Mmọdo, utu ke nditịmede esịt mban̄a se iketịbede,  ikpenyene ndikere mban̄a idahaemi ye ini iso. Nso ke inam idahaemi, m̀mê mînamke, emi edide ediwak isua ẹma ẹbe nnyịn itie ikere ke ikpakanamke ntre? Ndi ke idu uwem ke usụn̄ oro mîdinamke nnyịn itua n̄kpọfiọk ke ini iso?

14 Nte akwa ukụt asan̄ade ekpere, idifọnke nnyịn itịmede esịt ikere ite: ‘Ndi n̄kpekenen̄ede nsịn ifịk ke n̄kpọ Abasi? Nso ikanam n̄kûnam utom usiakusụn̄? Nso ikanam n̄kudot ndidi asan̄autom unamutom? Ndi mma nnen̄ede nsịn ukeme ndimen obufa owo nsịne? Ndi ami ndi orụk owo emi Jehovah oyomde ke obufa ererimbot esie?’ Utu ke nditịmede esịt mban̄a mme akpan mbụme emi, ọfọn ida mmọ idụn̄ọde idem nnyịn idahaemi inyụn̄ itịm ikụt ite ke inam ofụri ukeme nnyịn ke utom Jehovah. Mîdịghe ntre, imekeme ndidu uwem ke usụn̄ oro edinamde nnyịn itua akpatre n̄kpọfiọk.—2 Tim. 2:15.

KÛDEDEI UTUA N̄KPỌFIỌK UBAN̄A UTOM ABASI

15, 16. (a) Nso n̄waidem ke ediwak owo ẹnam man ẹnịm utom Abasi akpa ke uwem mmọ? (b) Ntak emi nnyịn mîkpatuaha n̄kpọfiọk iban̄a n̄kpọ ekededi emi ikayakde atak man inịm mme n̄kpọ Obio Ubọn̄ akpa?

15 Nso kaban̄a mbufo oro ẹyakde n̄kpọ atak mbufo man ẹnam utom uyọhọ ini? Ekeme ndidi ama ọkpọn̄ eti ubọkọkọ m̀mê eti mbubehe man odu mmemmem uwem onyụn̄ enyene ini ada anam utom Obio Ubọn̄. Mîdịghe ekeme ndidi afo ama etre ndidọ ndọ, mîdịghe edieke ọdọde, ebiere nditre ndinyene nditọ man ekeme ndidot ndinam san̄asan̄a utom uyọhọ ini—utọ nte utom Bethel, utom ubọpn̄kpọ ke ofụri ererimbot, utom circuit, m̀mê utom isụn̄utom. Ndi akpana atua n̄kpọfiọk ke ntak emi akanamde utom Jehovah tutu ọsọn̄? Ndi akpana ekere ke ufọn idụhe ndikayak mme n̄kpọ ẹtak m̀mê ke ini ikekemke ndinam ntre? N̄wan̄ansa-o!

16 Akanam mme ubiere emi ke ntak emi amade Jehovah etieti onyụn̄ enyenede ọkpọsọn̄ udọn̄ ndin̄wam mbon en̄wen ẹtiene ẹdinam n̄kpọ esie. Ufọn idụhe ndikere ke n̄kpọ ọkpọkọfọn fi akan emi edieke mûkpakayakke mme n̄kpọ oro ẹtak. Emekeme ndinen̄ede n̄kop inemesịt ndifiọk ke afo akanam se ọkọfiọkde ke edi eti n̄kpọ. Emekeme ndidat esịt ke ima inam ofụri ukeme imọ ke utom Jehovah. Enye idifreke uwem n̄waidem oro afo okodude. Ke ata uwem oro edide ke ini iso, enye ọyọnọ fi mme edidiọn̄ akan nte afo ekerede!—Ps. 145:16; 1 Tim. 6:19.

NTE IKPANAMDE N̄KPỌ ABASI EDI ITUAHA N̄KPỌFIỌK

17, 18. (a) Nso idi edumbet emi akan̄wamde Paul anam n̄kpọ Abasi edi ituaha n̄kpọfiọk? (b) Nso idi ubiere fo kaban̄a n̄kpọ Jehovah oro akanamde ke ini edem, anamde idahaemi, edinyụn̄ inamde ke ini iso?

17 Nso idi edumbet emi Paul ekekpepde, emi akan̄wamde enye ndinam n̄kpọ Abasi edi ituaha n̄kpọfiọk aba? Nte ẹkabarede ke edikabade eke J. B. Phillips, Paul ekewet ete: “Mmefre mban̄a se iketịbede ke ini edem nnyụn̄ nnyanade ubọk ndibọ n̄kpọ ekededi oro anade ke iso.” (Kot Philippi 3:13, 14.) Paul iketiehe ikere iban̄a idiọk uwem oro enye okodude ke Ido Ukpono Mme Jew. Utu ke oro, enye ekesịn ofụri ukeme esie odomo ndidot ndibọ utịp nsinsi uwem ke ini iso.

18 Kpukpru nnyịn imekeme ndinam edumbet emi odude ke ikọ Paul oro. Utu ke nditịmede esịt mban̄a se iketịbede, ntie n̄kere n̄kpọ emi nnyịn mîkemeke ndikpụhọde, ikpakam inyanade ibịne se inade ke iso. Edi akpanikọ ke nnyịn idifreke se iketịbede ofụri ofụri, edi ufọn idụhe ndiyak esịt aka iso obiom nnyịn ke ntak oro. Imekeme ndisịn ukeme mfre enyịn mban̄a se iketịbede, inam n̄kpọ Abasi ke ofụri ukeme idahaemi, inyụn̄ idori enyịn ke ubọn̄ ubọn̄ ini iso!

^ ikp. eki. 4 Nditịn̄ ndien ndien nte ke Paul ama esikọbọ iban n̄ko owụt ke iban ẹma ẹnen̄ede ẹtiene ẹnam Ido Ukpono Christ ọkọri ke eyo mme apostle, kpa nte ẹnamde mfịn.—Ps. 68:11.