Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JANUARY 2013

Mmọ Ẹma Ẹnọ Idemmọ Unyịme Unyịme—Ke Norway

Mmọ Ẹma Ẹnọ Idemmọ Unyịme Unyịme—Ke Norway

KE ISUA ifan̄ emi ẹkebede, Roald ye Elsebeth an̄wan esie ẹkedụn̄ ke Bergen, udiana n̄kponn̄kan obio Norway, ndien mmọ ẹma ẹnyene n̄kpọ. Mmọ ẹma ẹkpere ndisịm isua 50 ini oro. Mmọ ye Fabian ye Isabel nditọ mmọ ẹma ẹsidiana kiet ẹnam n̄kpọ Abasi ke esop mmọ. Roald ekedi ebiowo, Elsebeth edi asiakusụn̄, ke ini Fabian ye Isabel ẹkedide mme asuanetop emi ẹsọn̄de idem.

Edi ke September 2009, mmọ ẹma ẹbiere ndinam ukpụhọde—oro edi, ndika n̄kodu ke nsannsan ebiet n̄kwọrọ ikọ ke urua kiet. Ntre, Roald, Elsebeth ye Fabian, emi ekedide isua 18 ini oro, ẹma ẹka Nordkyn, ekpri isuo emi odude ke Finnmark, ke Ata Edem Edere Ererimbot. Mmọ ẹma ẹkediana ye nditọete eken emi ẹkenyụn̄ ẹdide ndikwọrọ ikọ ke nsannsan ebiet emi, ẹkwọrọ ikọ ke ekpri obio Kjøllefjord. Roald ọdọhọ ete: “Ke ntọn̄ọ ntọn̄ọ urua oro, mma mfụn̄ idem ke ọfọn̄ nte ke mmetịme etieti ke ndikan̄wana nnam ndutịm ntiene nnam akpan utom emi ke ofụri urua kiet.” Edi nte ini akakade ke urua oro, esịt ama ọtọn̄ọ nditịmede Roald. Nso iketịbe?

 MBỤME EMI MMEN̄KODORIKE ENYỊN

Roald ọdọhọ ete, “Mario, asiakusụn̄ kiet ke Finnmark, ama obụp ke ini mmen̄kodorike enyịn ete m̀mê nnyịn ikpama ndiwọrọ n̄kodụn̄ ke Lakselv n̄n̄wam esop do emi enyenede mme asuanetop 23.” Idem ama akpa Roald ke mbụme emi enye mîkodorike enyịn mi. Enye ọdọhọ ete: “Ami ye n̄wan mi ima ikekere iban̄a ndika n̄kanam utom ke ebiet emi udọn̄ okponde—edi ikoyom ndinam oro ke ini nditọ nnyịn ẹkponide ẹma ẹnyene ufọk idemmọ.” Edi Roald ama okụt ke usen ifan̄ emi imọ idude ke nsannsan ebiet emi ikwọrọ ikọ, ke mme owo ẹnen̄ede ẹyom ndifiọk Jehovah. Idahaemi ke mmọ ẹyom un̄wam idịghe ke ini iso. Enye ọdọhọ ete, “Mbụme emi ama afịna mi tutu n̄kemeke ndide idap ke ediwak usen.” Ekem Mario ama awat Roald, n̄wan esie, ye eyen esie aka Lakselv, emi edide n̄kpọ nte kilomita 240 ọtọn̄ọde ke edem usụk Kjøllefjord. Mario okoyom mme Roald ẹkụt ke idemmọ nte ekpri esop oro etiede.

Ke mmọ ẹma ẹkesịm Lakselv, Andreas, kiet ke otu mbiowo iba emi ẹdude ke esop oro, ama emen mmọ asan̄a owụt obio onyụn̄ owụt mmọ Ufọkmbono Obio Ubọn̄. Nditọete ke esop oro ẹma ẹnen̄ede ẹdara mmọ ẹnyụn̄ ẹdọhọ Roald ye n̄wan esie ke esịt eyenen̄ede enem mmimọ edieke mmọ ẹdide ẹdidụn̄ do ẹn̄wam mmimọ ke utom Obio Ubọn̄. Andreas ama etịn̄ inua imam imam ete ke imọ ima iyom utom inịm inọ Roald ye Fabian. Nso ke mmọ ẹdinam?

NSO KE MMỌ ẸBIERE NDINAM?

Akpa n̄kpọ emi Fabian ọkọdọhọde ekedi: “Idọn̄ke mi ndinyọn̄ ndidụn̄ mi.” Ikọdọn̄ke enye ndikpọn̄ mme ufan esie emi enye ekenyenede toto ke uyen ke esop mmọ, ikonyụn̄ inemke enye ndidụn̄ ke obio-in̄wan̄. Ke adianade do, enye ikokụreke kan̄a ufọkn̄wed ukpep utom ikan̄ ilektrik. Edi ke ini ẹkebụpde Isabel (emi ekedide isua 21 ini oro) m̀mê enye ese didie ndidi ndidụn̄ do, enye ama ọbọrọ ete: “N̄kakam ntetie mbet!” Edi kpa ye oro Isabel ọkọbọrọde ntem, enye ọdọhọ ete: “Ke ini n̄kafiakde ntie n̄kere n̄kpọ emi, mma mbụp idemmi nte, ‘Ndi enen̄ede ọfọn ndika n̄kodụn̄ do? Ndi mme ufan mi ididọn̄ke mi itọn̄? Ndi n̄kpakam nsụhọde ntie mi ke esop nnyịn emi n̄kpọ ọfọnde, emi nnyụn̄ mmehede ye nte n̄kpọ etiede?’” Nso ke Elsebeth akanam esie aban̄a emi? Enye ọdọhọ ete, “N̄kada nte ke Jehovah ọnọ ubon nnyịn utom. Edi mma n̄kere mban̄a ufọk nnyịn emi mîbịghike ikafiak idiọn̄ ye kpukpru inyene nnyịn emi ẹdude ke esịt, emi ikadade isua 25 emi ẹbede idep.”

Elsebeth ye Isabel

Ke akpan urua emi ama ekebe, Roald ye ubon esie ẹma ẹfiak ẹnyọn̄ọ Bergen, edi mmọ ẹkesụk ẹkekere ẹban̄a nditọete mmọ ke Lakselv, emi edide n̄kpọ nte kilomita 2,100. Elsebeth ọdọhọ ete: “Mma mbọn̄ akam nnọ Jehovah ediwak ini, nnyụn̄ n̄ka iso nneme nneme ye mme ufan nnyịn emi ikenyenede ke ebiet oro, nnọ mme ndise ye ifiọkutom ẹsọk mmọ, mmọ ẹnyụn̄ ẹnọ ẹsọk mi n̄ko.” Roald ọdọhọ ete: “N̄koyom ndinen̄ede ntie n̄kere n̄kpọ emi. N̄ko, akana nnen̄ede n̄kere m̀mê iyekeme ndise mban̄a idem nnyịn do. Nso ke idinam ida idu uwem? Mma mbọn̄ akam ediwak ini nnọ Jehovah nnyụn̄ nneme n̄kpọ emi ye ubon mi ye nditọete emi ẹnyenede mbufiọk.” Fabian ọdọhọ ete: “Nte n̄kekerede mban̄a n̄kpọ mi, ntre ke n̄ketetịm n̄kụt ke nnyeneke ntak ndomokiet ndidọhọ ke ndikaha. Mma mbọn̄ akam ediwak ini nnọ Jehovah, ndien sụn̄sụn̄ ama ọtọn̄ọ ndinen̄ede ndọn̄ mi ndiwọrọ n̄ka obio oro.” Nso kaban̄a Isabel? Enye ama ọtọn̄ọ usiakusụn̄ ke obio mmọ man eben̄e idem ọnọ utom emi mmọ ẹdikade ikanam ke obio oro. Ke enye ama akasiak usụn̄ ke ọfiọn̄ itiokiet onyụn̄ ada ekese ini ekpep Bible, enye ama ekere ke imọ imeben̄e idem ndiwọrọ n̄ka ebiet oro.

ẸNAM NDUTỊM MAN ẸKEME NDIWỌRỌ

Nte ekenen̄erede ọdọn̄ ubon emi ndika n̄kanam utom ke ebiet emi ẹnen̄erede ẹyom mme asuanetop, mmọ ẹma ẹnam ndutịm man ẹkpekeme ndiwọrọ n̄ka ebiet emi. Roald akanam utom emi ẹkpede eti okụk ndien enye ama enen̄ede ama utom oro, edi enye ama aka ekeben̄e nduọkodudu isua kiet ke itieutom. Edi eteufọk esie ọkọdọhọ enye anam utom ibio ini—oro edi, ama anam utom urua iba, ọduọk odudu ọfiọn̄ kiet ye urua iba. Raold ọdọhọ ete: “Ẹma ẹnen̄ede ẹsụhọde okụkọfiọn̄ mi, edi ndutịm emi ama enen̄ede ọfọn ye ami.”

Elsebeth ọdọhọ ete: “Ebe mi ama ọdọhọ mi n̄koyom ufọk ke Lakselv nnyụn̄ mmen ufọk nnyịn ke Bergen nnọ ke ukpepokụk. Ama ada ekese ini onyụn̄ oyom ẹnen̄ede ẹsịn ukeme, edi ima isụk inam. Nditọ mi ẹma ẹkụt utom ibio ini nte ini akakade, mmọ ẹma ẹnyụn̄ ẹtiene ẹtịp okụk udia ye okụk ukpeusụn̄.”

 Isabel ọdọhọ ete: “Sia obio emi edide ekpri obio, ikememke utom ndikụt utom nda n̄n̄wam idem ke adan̄aemi nnamde utom usiakusụn̄. Ekesitie mi ndusụk ini nte ke ndinyeneke utom.” Isabel ama anam utom ibio ini ekededi emi enye okokụtde—utom usụkkiet ke akpa isua emi mmọ ẹdude do—ndien enye ama enyene okụk ada ese aban̄a idemesie. N̄kpọ eketie didie ye Fabian? Fabian ọdọhọ ete, “Man n̄kụre ukpep oro n̄kọbọde, n̄kenyene ndika n̄kekpekpep utom oro. N̄kanam emi ke Lakselv. Nte ini akakade, mma mbe udomo nnyụn̄ nnyene utom ibio ini nte anamutom ikan̄ ilektrik.”

NTE MBON EN̄WEN ẸKETATDE UTOM UKWỌRỌIKỌ MMỌ

Marelius ye Kesia ke ẹkwọrọ ikọ ẹnọ n̄wan Sami ke Norway

Marelius ye Kesia an̄wan esie ẹkeyom ndinam utom ke ebiet emi ẹnen̄erede ẹyom mme asuanetop. Marelius, emi edide isua 29 idahaemi, ọdọhọ ete: “Mme utịn̄ikọ ye mme ndụn̄ọde ke mbono, emi ẹban̄ade usiakusụn̄ ẹma ẹnam mi nnen̄ede n̄kere mban̄a nditat utom ukwọrọikọ mi.” Edi mfịna Kesia, emi edide isua 26 idahaemi, ekedi nte enye ediwọrọde ikpọn̄ iman esie. Enye ọdọhọ ete, “Esịt ikenemke mi ndikere ke nyọwọrọ n̄kpọn̄ mbon emi mmade.” Akan oro, Marelius ekesinam utom kpukpru ini man ekeme ndikpe isọn emi mmọ ẹkemende ufọk mmọ ẹnịm ubiọn̄. Marelius ọdọhọ ete: “Ye un̄wam Jehovah, adianade ye ediwak akam oro ikọbọn̄de idọhọ Abasi an̄wam nnyịn inam mme ukpụhọde oro anade inam, nnyịn ima ikeme ndiwọrọ n̄ka ebiet emi ẹnen̄erede ẹyom mme asuanetop.” Akpa n̄kpọ emi mmọ ẹkenamde ekedi ndinen̄ede nsịn idem n̄kpep Bible. Ekem, mmọ ẹma ẹnyam ufọk mmọ, ẹkpọn̄ utom, ẹnyụn̄ ẹwọrọ ẹkedụn̄ ke Alta ke edere edere Norway ke August 2011. Marelius anam utom do nte abatokụk ndien Kesia anam utom ke ufọkurua man mmọ ẹkeme ndise mban̄a idemmọ.

Se Knut ye Lisbeth emi ẹdide n̄kpọ nte isua 35 idahaemi ẹkekotde ke N̄wed Isua Mme Ntiense Jehovah ẹban̄a mbon emi ẹnamde utom ke ebiet emi ẹnen̄erede ẹyom mme asuanetop ama enen̄ede otụk mmọ. Lisbeth ọdọhọ ete, “Ifiọkutom nditọete emi ama anam ọdọn̄ nnyịn ndiwọrọ n̄kanam utom ukwọrọikọ ke idụt en̄wen. Edi mma n̄kere ke idịghe ikpîkpu owo nte ami ekeme ndinam oro.” Kpa ye oro, mmọ ẹma ẹnam n̄kpọ man ẹkpekeme ndiwọrọ n̄ka esenidụt n̄kanam utom emi. Knut ọdọhọ ete: “Ima inyam ufọk nnyịn, inịm okụk oro, inyụn̄ iwọrọ ikodụn̄ ye eka mi. Ndien nte ini akakade, ima ika ikodụn̄ ye eka Lisbeth ke Bergen idụk mbono esop ke esop Ikọmbakara ke isua kiet man ikeme nditabi nse nte ndika n̄kodu ke esenidụt etiede.” Ikebịghike, Knut ye Lisbeth ẹma ẹnịm ke mmimọ imeben̄e idem ndiwọrọ n̄ka esenidụt, ndien mmọ ẹkeka Uganda—ata esenidụt! Mmọ ẹsika Norway ẹkenam utom ọfiọn̄ iba ke isua. Ntem ke mmọ ẹsinyene okụk ẹda ẹse ẹban̄a idemmọ ke Uganda.

“ẸTABI ẸNYỤN̄ ẸSE NTE JEHOVAH ỌFỌNDE”

“Imetetịm idiana kiet.”—Roald

N̄kpọ etie didie ye mbon emi ẹnọde idemmọ unyịme unyịme mi? Roald ọdọhọ ete: “Imenen̄ede idu ọtọkiet nte ubon ke nsannsan ebiet emi ikan nte ekedide ke Bergen. Imetetịm idiana kiet. Edi edidiọn̄ ndikụt nte nditọ mi ẹnamde n̄kọri ke esop Abasi.” Enye adian do ete: “Inyene ererimbot emi inen̄ekede ibehe nnyịn aba  idahaemi. Inyene inen̄ekede idi n̄kpọ nte nnyịn ikekerede.”

Elsebeth ama okụt ke ọfọn imọ ikpep usem en̄wen. Ntak-a? Karasjok emi mbon Sami—oro edi, mme amanaisọn̄ edere edere Norway, Sweden, Finland, ye Russia ẹdụn̄ọde—esịne ke efakutom Esop Lakselv. Ntre, Elsebeth ama ekpep usem Sami man ekpekeme ndikwọrọ ikọ nnọ mbon emi. Idahaemi enye ekeme ndineme nneme n̄kpri n̄kpri ke usem emi. Ndi obufa efakutom esie enem enye? Enye ọdọhọ ye idatesịt ete: “Nsinịm ukpepn̄kpọ Bible itiokiet. M̀mọ̀n̄ efen ikpenem ntem?”

Fabian, emi edide asiakusụn̄ ye asan̄autom unamutom idahaemi, ọdọhọ ke imọ ye Isabel ima in̄wam uyen ita ke obufa esop mmimọ emi okoyomde ẹsịn udọn̄ ẹnọ man ẹtiene ẹsịn idem ke mme edinam esop. Mmọ mbita ẹnen̄ede ẹsịn idem ke utom ukwọrọikọ idahaemi. Ke nditịm ntịn̄, iba ke otu mmọ ẹna baptism; ẹma ẹnyụn̄ ẹnam usiakusụn̄ unọ un̄wam ke March 2012. Kiet ke otu mmọ emi edide ama ekpere ndikpọn̄ esop ama ọkọm Fabian ye Isabel ke ndikan̄wam imọ “ifiak isịn idem ke n̄kpọ Abasi.” Fabian ọdọhọ ete: “Esịt ama enem mi tutu ke ini enye eketịn̄de ikọ emi. Nso inem nte ndin̄wam owo!” Isabel ọdọhọ ete: “Mi ke obufa efakutom nnyịn, ‘mmenen̄ede ntabi nnyụn̄ nse nte Jehovah ọfọnde.’” (Ps. 34:8) Enye adian do ete: “Ke adianade do, utom enem ke n̄kan̄ emi etieti!”

Marelius ye Kesia inyeneke n̄kpọ aba nte ekesinyenede, edi uwem mmọ ọfọn idahaemi akan akpa. Asuanetop 41 ẹdu idahaemi ke esop emi mmọ ẹkewọrọde ẹka ke Alta. Marelius ọdọhọ ete: “Ke ini ntide nte uwem nnyịn ekesitiede, esinen̄ede enem mi ndikụt mme ukpụhọde oro nnyịn inamde. Imọkọm Jehovah nte ke nnyịn ke inam utom esie nte mme asiakusụn̄ mi. Idụhe se inemde ntem.” Kesia adian do ete: “Mmekpep ndibuọt idem ofụri ofụri ye Jehovah, ndien enye ese aban̄a nnyịn. Mmonyụn̄ n̄kụt n̄ko ke ndidụn̄ ke ebiet emi oyomde usụn̄ ọkpọn̄ mme iman mi anam ini oro nnyenede ndidu ye mmọ enen̄ede enem mi. Akananam ntuaha n̄kpọfiọk mban̄a ubiere nnyịn.”

Knut ye Lisbeth ke ẹkpep ubon kiet ke Uganda Bible

Ndien n̄kpọ etie didie ye Knut ye Lisbeth ke Uganda? Knut ọdọhọ ete: “Ama ada mi ini mbemiso n̄kekemede ndimehe ye obufa ebiet emi ye ido mmọ. Mmọn̄ ye ikan̄ isidụhe ndusụk ini, idịbi esinyụn̄ abiak nnyịn ndusụk ini, edi imesikpep adan̄a ediwak owo nte ikekeme Bible.” Lisbeth ọdọhọ ete: “Enyene mme ebiet emi ẹdade nnyịn minit 30 kpọt tọn̄ọ ke ebiet emi idụn̄de ndisịm, edi akanam owo ikwọrọke eti mbụk do. Edi ima ika do, nnyịn iyokụt nte mme owo ẹkotde Bible ẹnyụn̄ ẹdọhọ nnyịn ikpep mmimọ Bible. Ndikpep utọ mbon nsụhọdeidem emi Bible esinam ikop inemesịt emi mînyeneke mbiet!”

Anaedi Christ Jesus, Adausụn̄ nnyịn, enen̄ede okop inemesịt nditie ke heaven n̄kụt nte ẹnamde utom ukwọrọikọ emi enye ọkọtọn̄ọde ke ata ediwak ebiet ke isọn̄! Kpukpru ikọt Abasi ẹnen̄ede ẹkop idatesịt ndinọ idemmọ unyịme unyịme, ‘ndika n̄kanam mme owo ke kpukpru idụt ẹdi mbet,’ nte Jesus okowụkde.—Matt. 28:19, 20.

Kpep N̄kpọ En̄wen

Nso Idi Utom Isụn̄utom?

Nso ke owo akpanam edieke enye oyomde ndidi isụn̄utom? Ewe ufọkn̄wed ke enye edika?