Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  2006-07-15

Obio Ubọn̄ Abasi Akan Ukara Owo ke Kpukpru Usụn̄

Obio Ubọn̄ Abasi Akan Ukara Owo ke Kpukpru Usụn̄

JESUS CHRIST ekekpep mme anditiene enye ete: “Mbufo ẹnyene ndibọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’” (Matthew 6:9, 10) Akam emi, oro ediwak owo ẹsikotde Ete Nnyịn, m̀mê Akam Ọbọn̄, anam nnyịn ifiọk se idide uduak Obio Ubọn̄ Abasi.

Obio Ubọn̄ emi ayanam enyịn̄ Abasi asana. Enye eyetre kpukpru esuene oro nsọn̄ibuot Satan ye owo ẹsuenede enyịn̄ Abasi. Enen̄ede oyom ẹnam emi. Inemesịt kpukpru mme enyene-ifiọk edibotn̄kpọ ọkọn̄ọ ke mmọ ndinam enyịn̄ Abasi asana nnyụn̄ nnyịme ke Abasi enyene unen ndikara.—Ediyarade 4:11.

Ke adianade do, ẹtọn̄ọ Obio Ubọn̄ emi man ‘anam uduak Abasi ada itie ke isọn̄ kpa nte edide ke heaven.’ Nso idi uduak oro? Enye edi ndinam ubonowo ẹfiak ẹkenyene itie ebuana ye Abasi, kpa se Adam ọkọduọkde. Obio Ubọn̄ oro oyonyụn̄ anam uduak Andikara ekondo, Jehovah, oro edi ndinam isọn̄ edi Paradise oro nti owo ẹdụn̄de ke nsinsi. Ih, Obio Ubọn̄ Abasi eyetre kpukpru afanikọn̄ oro ẹtode idiọkn̄kpọ Adam ye Eve onyụn̄ anam eti uduak oro Abasi akaduakde ọnọ isọn̄ osu. (1 John 3:8) Obio Ubọn̄ emi ye se enye edinamde ẹdi ata akpan etop Bible.

Didie ke Enye Akan Ukara Owo?

Obio Ubọn̄ Abasi edi ata ukara oro enyenede akwa odudu. Prọfet Daniel ama anam nnyịn ifiọk adan̄a nte odudu esie okponde. Enye ama ebem iso etịn̄ anyan ini ko ete: ‘Abasi enyọn̄ ayanam ubọn̄ eke edinuakde onyụn̄ ama kpukpru mme idụt emi.’ Akan oro, Obio Ubọn̄ Abasi emi ibietke ukara owo emi odude mfịn onyụn̄ ebe efep n̄kpọn̄; owo ‘idisoboke enye ke nsinsi.’ (Daniel 2:44) Ikụreke ke oro. Obio Ubọn̄ emi akan ukara owo ke kpukpru usụn̄.

Obio Ubọn̄ Abasi enyene akakan Edidem.

Kere ban̄a enye emi edide Edidem esie. Ke “ndap kiet ye n̄kukụt” oro ẹkewụtde Daniel, enye ama okụt Andikara Obio Ubọn̄ Abasi nte “owo eke ebietde eyen owo” emi ẹdade ẹdi iso Ata Ọkpọsọn̄ Abasi ẹnyụn̄ “ẹnọ enye ubọn̄, ye ukpono, ye itie-edidem.” (Daniel 7:1, 13, 14) Eyen owo oro idịghe owo en̄wen ikan Jesus Christ—kpa Messiah. (Matthew 16:13-17) Jehovah Abasi ama emek Eyen esie, Jesus, ndidi Edidem Obio Ubọn̄ Esie. Ke ini Jesus okodude ke isọn̄, enye ọkọdọhọ mme Pharisee oro ẹkedide mme anam-ukwan̄n̄kpọ ete: “Obio ubọn̄ Abasi odu ke ufọt mbufo,” emi ọwọrọde ke imọ emi idude ke otu mmọ ididi Edidem Obio Ubọn̄.—Luke 17:21.

Jehovah emek Jesus Christ ndidi Edidem Obio Ubọn̄ Esie

Anie owo ke isọn̄ odot ndikara nte Jesus? Jesus ama owowụt ke imọ imenen̄ede inen nte Adausụn̄ oro ẹkemede ndiberi edem, emi esinyụn̄ atuade owo mbọm. Mme Gospel ẹwụt ke enye edi eren uko oro amade owo esinyụn̄ atuade owo mbọm. (Matthew 4:23; Mark 1:40, 41; 6:31-34; Luke 7:11-17) Ke emi ẹma ẹkenam Jesus eset mi, enye ikemeke ndikpa  aba m̀mê ndinyene mme mmeme en̄wen oro owo enyenede.—Isaiah 9:6, 7.

Jesus ye mme nsan̄a esie ẹditie ke n̄kokon̄ itie ẹkara.

Daniel ama okụt n̄ko ke ndap ye n̄kukụt oro nte ẹdade “itie-edidem, ye ubọn̄ . . . ẹnọ edisana ikọt Ata Edikon̄.” (Daniel 7:27) Jesus idikarake ikpọn̄. Enye enyene mbon oro ẹditienede enye ẹkara nte ndidem ye mme oku. (Ediyarade 5:9, 10; 20:6) Apostle John ekewet ntem aban̄a mmọ: “N̄kụt, ndien, sese! Eyenerọn̄ ke ada ke Obot Zion, owo tọsịn ikie ye aba-ye-inan̄ ẹnyụn̄ ẹda ye enye, . . . emi ẹkedepde ẹsio ke isọn̄.”—Ediyarade 14:1-3.

Eyenerọn̄ oro edi Jesus Christ emi ẹma ẹkedori ke ebekpo nte Edidem Obio Ubọn̄ Abasi. (John 1:29; Ediyarade 22:3) Obot Zion ada aban̄a heaven. * (Mme Hebrew 12:22) Jesus ye mme nsan̄a esie emi ẹdide owo 144,000 ẹditie ke heaven ẹkara. Nso n̄kokon̄ itie ke mmọ ẹditie ntem ẹkara! Mmọ ẹyekụt kpukpru n̄kpọ sia ẹdude ke heaven. Ẹkot “obio ubọn̄ Abasi” emi n̄ko “obio ubọn̄ heaven” sia ẹditiede ke heaven ẹkara. (Luke 8:10; Matthew 13:11) Idụhe n̄kpọekọn̄ ekededi, ọkpọkọm eke nuclear, oro ekemede ndisịm nnyụn̄ mbiat ukara heaven emi. Enye edi ukara emi owo mîkemeke ndikan, enye oyonyụn̄ anam se Jehovah oyomde enye anam.—Mme Hebrew 12:28.

Obio Ubọn̄ Abasi enyene mme andida ke ibuot esie mi ke isọn̄, kpa mbon oro ẹkemede ndiberi edem.

Nnyịn isan̄a didie ifiọk emi? Psalm 45:16 ọdọhọ ete: “Afo ayada mmọ enịm ke mbọn̄ ke ofụri ererimbot.” Ke ntịn̄nnịm ikọ emi, “afo” ada aban̄a Eyen Abasi. (Psalm 45:6, 7; Mme Hebrew 1:7, 8) Ntem, Jesus Christ ke idemesie edimek mbọn̄ ke isọn̄ ndida ke ibuot ukara esie. Nnyịn imenen̄ede inịm ke mmọ ẹyenam se enye etemede ketket. Idem mfịn emi, ẹteme iren oro ẹdotde, emi ẹdide mbiowo ke esop Christian ẹte ‘ẹkûbre odudu’ ye ekemmọ mme andinịm ke akpanikọ, edi ẹkpeme, ẹnam mmọ ẹkop inem, ẹnyụn̄ ẹdọn̄ mmọ esịt.—Matthew 20:25-28; Isaiah 32:2.

Mme andidu ke idak Obio Ubọn̄ emi ẹdi ndinen owo.

Mmọ ẹfọn ẹma ẹnyụn̄ ẹnen ke enyịn Abasi. (Mme N̄ke 2:21, 22) Bible ọdọhọ ke “mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:11) Mme andidu ke idak Obio Ubọn̄ ẹdi mbon nsụkidem oro ẹmade ndibọ ukpep ẹnyụn̄ ẹtie sụn̄sụn̄ ye ifụre ifụre. Mme n̄kpọ eke spirit ẹdi akpan n̄kpọ ke uwem mmọ. (Matthew 5:3) Mmọ ẹyom ndinam se inende ẹnyụn̄ ẹnyịme ndausụn̄ Abasi.

Obio Ubọn̄ Abasi enyene mfọnn̄kan ibet.

Jehovah Abasi ke idemesie ọnọ mme ibet ye mme edumbet oro ẹwụtde nte ẹkpenamde n̄kpọ ke Obio Ubọn̄ imọ. Mme ibet ye mme edumbet emi ẹdi ke ufọn nnyịn, idịghe man ẹkpan nnyịn ndinam se ikpamade ndinam. (Psalm 19:7-11) Ediwak owo ẹbọbọ ufọn ẹto ẹdida ndinen edumbet Jehovah nsịn ke edinam. Ke uwụtn̄kpọ, ndida item oro Bible ọnọde mme ebe, ibanndọ, ye nditọ nsịn ke edinam esinam uwem ubon nnyịn amana ọfọn. (Ephesus 5:33–6:3) Ke ini inịmde ibet oro ọdọhọde ‘isịne ima,’ itie ebuana nnyịn ye mbon en̄wen eyenen̄ede ọfọn. (Colossae 3:13, 14) Edieke idade mme edumbet N̄wed Abasi isịn ke edinam, nnyịn iyesịn idem inam utom, inyụn̄ inyene nnennen ekikere iban̄a okụk. (Mme N̄ke 13:4; 1 Timothy 6:9, 10) Edieke nnyịn mîkpaha mmịn, mînamke oburobụt ido idan̄, mîdaha un̄wọn̄, ye n̄kpọsọn̄ ibọk oro ẹnọde owo mbumehe, nnyịn iyokop nsọn̄idem.—Mme N̄ke 7:21-23; 23:29, 30; 2 Corinth 7:1.

Obio Ubọn̄ Abasi edi ukara Abasi. Edidem esie—Messiah oro edide Jesus Christ—ọkọrọ ye mbon oro ẹdikarade ye enye ẹnyene  mbiomo ke iso Abasi ndikụt ẹte ke imanam ndinen ibet ye ima ima edumbet Esie. Mme andidu ke idak Obio Ubọn̄ emi, ọkọrọ ye mme andida ke ibuot esie mi ke isọn̄, ẹma ndida ibet Abasi ndu uwem. Mme andikara ye mme andidu ke idak ukara Obio Ubọn̄ emi ẹnen̄ede ẹkere nte ikpenemde Abasi esịt. Ke ntre, Obio Ubọn̄ emi enen̄ede edi ukara Abasi. Enye iditreke ndinam se ẹyomde enye anam. Edi ini ewe ke Obio Ubọn̄ Abasi, emi ẹnyụn̄ ẹkotde Obio Ubọn̄ Messiah, ọtọn̄ọ ndikara?

Obio Ubọn̄ Ọtọn̄ọ Ndikara

Ikọ Jesus ekeme ndin̄wam nnyịn ifiọk ini emi Obio Ubọn̄ emi ọtọn̄ọde ndikara. Enye ọkọdọhọ ete: “Mme idụt ẹyedịghi Jerusalem ke ikpat, tutu edimek ini mme idụt ọyọhọ.” (Luke 21:24) Jerusalem ekedi n̄kukụre obio ke isọn̄, emi ẹkekotde enyịn̄ Abasi ẹdian nnennen nnennen. (1 Ndidem 11:36; Matthew 5:35) Enye ekedi ibuot obio ubọn̄ eke isọn̄ oro Abasi ekenyịmede. Mme idụt, oro edi ukara ererimbot ẹkenyene ndidịghi obio oro ke ikpat, nnyụn̄ ntre ukara oro Abasi akadade akara ikọt esie. Ini ewe ke emi ọkọtọn̄ọ?

Ẹkedọhọ akpatre edidem oro eketiede ke ebekpo Jehovah ke Jerusalem ẹte: ‘Yarade uyaraibuot fep, nyụn̄ yarade anyanya. Owo en̄wen idiyarake anyanya emi tutu enye emi enyenede unen ndikara edi, ndien nyada nnọ enye.’ (Ezekiel 21:25-27, NW) Ẹkenyene ndiyarade edidem oro anyanya, nnyụn̄ ntre ukara oro Abasi akadade akara ikọt Esie mi ke isọn̄. Emi eketịbe ke ini mbon Babylon ẹkesobode Jerusalem ke isua 607 M.E.N. Abasi ikenyeneke aba ukara ke isọn̄ ke ofụri ini oro mme idụt ẹkedade itie ukara esie. Ekedi ke ini oro ẹma ẹkebe ke Jehovah akayak odudu ukara ọnọ ‘enye emi enyenede unen ndikara’—kpa Jesus Christ. Edi mme idụt ẹkenyene ndida itie ukara Abasi mbịghi adan̄a didie?

Ntịn̄nnịm ikọ kiet ke Bible ke n̄wed Daniel ọdọhọ ete: “Ẹkpen̄e eto emi, ẹnyụn̄ ẹbiat enye; edi ẹkpọn̄ etak orụn̄ esie ke isọn̄, kpa ke ubọpn̄kpọ ukwak ye okpoho . . . tutu isua [“ini,” NW] itiaba ẹbe enye.” (Daniel 4:23) Nte idikụtde, ‘isua, m̀mê ini itiaba’ oro ẹsiakde mi edi ukem ye “edimek ini mme idụt.”

Ke Bible, ndusụk ini eto ẹsida ẹban̄a mme owo, mme andikara, ye mme obio ubọn̄. (Psalm 1:3; Jeremiah 17:7, 8; Ezekiel, ibuot 31) Ndise ndamban̄a eto oro ama “esịm utịt ofụri ererimbot.” (Daniel 4:11) Ntem, ukara oro eto oro ẹkenyenede ndisịbe mfep do nnyụn̄ mbọp ukwak ye okpoho akadade aban̄a ama “esịm utịt ererimbot,” emi abuanade ofụri ubọn̄ ererimbot. (Daniel 4:17, 20, 22) Mmọdo, eto oro ada aban̄a akakan ukara Abasi, akpan akpan, mi ke isọn̄. Ukara emi ama ododu ini kiet ko, kpa ini emi Jehovah akanamde idụt Israel edi obio ubọn̄. Ẹma ẹsịbe ndamban̄a eto emi, ẹnyụn̄ ẹbọp ukwak ye okpoho ke etak orụn̄ esie man enye okûfiak esehe. Emi okowụt ke ukara Abasi mi ke  isọn̄ ekenyene nditre, ndien emi ama etịbe ke isua 607 M.E.N.—edi ukara emi ikenyeneke nditre ke nsinsi. Ukwak ye okpoho oro ẹkenyene ndika iso mbọbọ ke etak orụn̄ eto oro tutu “ini itiaba” ẹbe. Ke utịt ini itiaba oro, Jehovah ekenyene ndiyak ukara oro nnọ owo oro enyenede unen ndikara, kpa Jesus Christ. Nnyịn imenen̄ede ikụt do ndien ke “ini itiaba” oro ye “edimek ini mme idụt” ẹdi ukem ini.

Bible an̄wam nnyịn ifiọk nte “ini itiaba” oro ẹniọn̄de ẹketre. Enye ọdọhọ ke usen 1,260 ẹdi ukem ye ‘ini kiet ye mme ini [oro edi ini iba] ye ubak ini’—emi ke ofụri ofụri ẹdide “ini” ita ye ubak. (Ediyarade 12:6, 14) Emi ọwọrọ ke ini ita ye ubak ke itie iba, emi edide ini itiaba, ẹdi usen 2,520.

Ndibat ata ata usen 2,520 ọtọn̄ọde ke isua 607 M.E.N. edida nnyịn edisịm isua 600 M.E.N. Nte ededi, ini itiaba emi ẹma ẹniọn̄ ẹkan oro. Ini itiaba emi ẹkesụk ẹkaka iso ini Jesus eketịn̄de aban̄a “edimek ini mme idụt.” Ke ntre, ini itiaba oro ẹdi ndamban̄a ini. Sia edide ntre, ana ibuan edumbet N̄wed Abasi emi: “Usen kiet isua kiet.” (Numbers 14:34; Ezekiel 4:6) Ke inamde oro, ọwọrọ ke ini itiaba oro ukara ererimbot ekenyenede ndikara isọn̄ ye unana Abasi ndisịbe ndụk ẹdi isua 2,520. Ke itọn̄ọde ke isua 607 M.E.N. ibat isua 2,520, oro edida nnyịn edisịm isua 1914 E.N. Isua emi ke “edimek ini mme idụt,” m̀mê ini itiaba, ẹketre. Emi ọwọrọ ke Jesus Christ ọkọtọn̄ọ ndikara nte Edidem Obio Ubọn̄ Abasi ke 1914.

“Yak Obio Ubọn̄ Fo Edi”

Sia Obio Ubọn̄ Messiah ama ọkọtọtọn̄ọ ke heaven, ndi odot ika iso ibọn̄ akam ite enye edi, nte Jesus ekekpepde ke akam uwụtn̄kpọ esie? (Matthew 6:9, 10) Ih. Eben̄e oro odot, onyụn̄ osụk enyenyene ufọn. Obio Ubọn̄ Abasi ikarake ofụri isọn̄ kan̄a.

Nso edidiọn̄ ke mme anam-akpanikọ ubonowo ẹdinyene ntem ke emi ama etịbe! Bible ọdọhọ ete: “Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” (Ediyarade 21:3, 4) Ini oro, “andidụn̄ ididọhọke ite, Ndọdọn̄ọ.” (Isaiah 33:24) Mbon oro ẹnamde se Abasi amade ẹyenyene nsinsi uwem. (John 17:3) Nte nnyịn itiede ibet ini emi n̄kpọ emi ye mme utịbe utịbe ntịn̄nnịm ikọ eken ke Bible ẹdisude, ẹyak nnyịn ‘ika iso ndien, ibem iso iyom obio ubọn̄ ye edinen ido Abasi.’—Matthew 6:33.

Mme andidu ke idak Obio Ubọn̄ Abasi ke isọn̄ ẹyebọ uwak edidiọn̄

^ ikp. eki. 10 Edidem David eke Israel eset akakan mme Jebusite ọbọ ọkpọsọn̄ ebiet Obot Zion eke isọn̄ enyene onyụn̄ ada enye anam ibuot obio ukara esie. (2 Samuel 5:6, 7, 9) Enye ama onyụn̄ emen Ekebe Abasi edinịm do. (2 Samuel 6:17) Sia Ekebe emi okowụtde ke Jehovah odu ke ebiet oro ẹkenịmde enye, ẹkekot Zion ebietidụn̄ Abasi, anamde enye enen̄ede odot ndida mban̄a heaven.—Exodus 25:22; Leviticus 16:2; Psalm 9:11; Ediyarade 11:19.