Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) 2006-07-15

Nso Idi Obio Ubọn̄ Abasi?

Nso Idi Obio Ubọn̄ Abasi?

NSO enyene-ndịk nnama ekesịm ubonowo ntem esisịt ini ke ẹma ẹkebot owo! Angel kiet ama ọsọn̄ ibuot ye Enye emi akakam obotde enye. Ọsọn̄ibuot angel emi ama atap Eve, akpa n̄wan, adia mfri eto oro ẹkekpande. Angel emi ọkọdọhọ ke enye ye ebe esie ‘idikpaha: koro Abasi ọmọfiọk ete ke usen eke mmọ ẹdiade ke esịt, ke enyịn mmọ ẹyetara; mmọ ẹyenyụn̄ ẹtie nte Abasi, ẹfiọk eti ye idiọk.’ (Genesis 2:16, 17; 3:1-5) Ẹkedikot ọsọn̄ibuot angel emi Devil ye Satan.—Ediyarade 12:9.

Ndi Eve ama okop uyo Satan? Bible asian nnyịn ete: “Ekem n̄wan okụt nte eto oro ọfọnde ke udia, nte onyụn̄ eyede ke enyịn, nte eto onyụn̄ enemde ndise, ndien enye ada mfri esie adia; onyụn̄ ọnọ ebe esie n̄ko, ndien enye adia.” (Genesis 3:6) Ih, akpa ebe ye n̄wan oro, Adam ye Eve, ẹma ẹtiene Satan ẹsọn̄ ibuot. Emi ama anam mmọ ye nditọ mmọ ẹtaba Paradise oro ẹkenọde mmọ. Nditọ oro ẹkenyenede ndimana nte mfọnmma owo nnyụn̄ ndu uwem ke nsinsi ẹkedikabade ẹda idiọkn̄kpọ ye n̄kpa ẹmana.—Rome 5:12.

Didie ke Jehovah Abasi, Akakan Andikara ekondo, akanam n̄kpọ? Enye ama aduak ndinam ndutịm man ẹfen mme idiọkn̄kpọ nnyịn. (Rome 5:8) Jehovah Abasi ama onyụn̄ ọtọn̄ọ ukara oro editrede afanikọn̄ emi. Ẹkot ukara emi “obio ubọn̄ Abasi.” (Luke 21:31) Obio Ubọn̄ emi Abasi anamde nte udiana ukara imọ mi enyene akpan uduak.

Nso idi uduak Obio Ubọn̄ Abasi? Nso idi ndusụk ikpehe uduak emi, ndien didie ke mmọ ẹkan eke ukara owo? Ini ewe ke Obio Ubọn̄ emi ekenyene nditọn̄ọ? Ẹyebọrọ mme mbụme emi ke ibuotikọ oro etienede.