Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) 2000-10-15

Se Obio Ubọn̄ Abasi Edinamde

Se Obio Ubọn̄ Abasi Edinamde

“Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—MATTHEW 6:10.

KE INI Jesus ekekpepde mme anditiene enye ndibọn̄ akam nyom Obio Ubọn̄ Abasi, enye ama ọfiọk ete ke Obio Ubọn̄ oro ndidi ayada utịt ọsọk ukara owo oro adade ke idem ọkpọn̄ Abasi ke ediwak tọsịn isua. Ke ofụri ini oro, owo ikanamke uduak Abasi ke isọn̄ ke ofụri ofụri. (Psalm 147:19, 20) Edi ke ẹma ẹkewụk Obio Ubọn̄ oro ke heaven, ẹnyene ndinam uduak Abasi ke kpukpru ebiet. Ini uten̄e uten̄e ediwọrọ ke ukara owo ndụk ukara Obio Ubọn̄ Abasi eke heaven enen̄ede ekpere.

2. Nso ke ẹdida ẹdiọn̄ọ ediwọrọ ke ukara owo ndụk ukara Obio Ubọn̄?

2 Se ẹdidade ẹdion̄ọ ukpụhọde emi edidi ini oro Jesus okokotde “akwa ukụt . . . orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21)  Bible itịn̄ke m̀mê ini emi edibịghi adan̄a didie, edi mme afanikọn̄ oro ẹnyenede ndida itie ke ini emi ẹyenen̄ede ẹdiọk ẹkan n̄kpọ ekededi oro ererimbot akanam okụtde. Ke ntọn̄ọ akwa ukụt oro, n̄kpọ eyetịbe oro edidide ata n̄kpọ n̄kpaidem ọnọ ata ediwak owo ke isọn̄: nsobo kpukpru nsunsu ido ukpono. Oro ididịghe n̄kpọ n̄kpaidem inọ Mme Ntiense Jehovah, koro mmọ ẹtie ẹbet emi ke anyan ini. (Ediyarade 17:1, 15-17; 18:1-24) Akwa ukụt edisịm utịt ke Armageddon ke ini Obio Ubọn̄ Abasi edinuakde ofụri editịm n̄kpọ Satan.—Daniel 2:44; Ediyarade 16:14, 16.

3. Didie ke Jeremiah anam se inade ibet mbon oro mîsụkke ibuot an̄wan̄a?

3 Nso ke emi ediwọrọ ọnọ “mmọ emi mîfiọkke Abasi, mînyụn̄ isụkke ibuot inọ gospel” Obio Ubọn̄ esie eke heaven ke ubọk Christ? (2 Thessalonica 1:6-9) Ntịn̄nnịm ikọ Bible asian nnyịn ete: “Sese, idiọk-n̄kpọ oto ke idụt kiet esịm idụt eken, akwa oyobio oyonyụn̄ edemede ke n̄kan̄ ererimbot. Ndien mmọ eke Jehovah ediwotde ke usen oro ẹyetọn̄ọ ke utịt ererimbot ẹna ẹsịm ke utịt ererimbot: idituaha mmọ, idinyụn̄ itan̄ke, idinyụn̄ ibụkke, mmọ ẹyetie nte ifụm ke iso isọn̄.”—Jeremiah 25:32, 33.

Utịt Idiọkido

4. Ntak emi Jehovah enende ke ndida utịt nsọk idiọk editịm n̄kpọ emi?

4 Ke ediwak tọsịn isua, Jehovah Abasi ọmọyọ idiọkido ke ini oro ọniọn̄de ekem mbon esịt akpanikọ ndikụt nte ke ukara owo enen̄ede okpu. Ke uwụtn̄kpọ, nte ekemde ye n̄wed kiet, ke ọyọhọ isua ikie 20 ikpọn̄, ẹma ẹwot se iwakde ibe miliọn owo 150 ke mme ekọn̄, mme edinam ukpụhọ ukara, ye mme ndutịme eken ẹtode mbio obio. Ẹma ẹkụt ibak ibak edinam owo akpan akpan ke Ekọn̄ Ererimbot II ke ini ẹkewotde n̄kpọ nte miliọn owo 50, ye ediwak ke otu mmọ ẹkpade enyene-ndịk n̄kpa ke mme itienna ekikere Nazi. Kpa nte Bible ekebemde iso etịn̄, ‘ndiọi owo ye mbon abian̄a ẹdọdiọn̄ ẹdiọk ẹka iso’ ke eyo nnyịn. (2 Timothy 3:1-5, 13) Mfịn, oburobụt ido, ubiatibet, afai, mbiara edinam, ye unana ediwụt ukpono nnọ mme idaha Abasi ẹdu ntatara ntatara. Ntem, Jehovah enen̄ede enen ke ndida idiọk editịm n̄kpọ emi nsịm utịt.

5, 6. Tịn̄ ban̄a idiọkido oro okodude ke Canaan eset.

5 Idaha oro odude mfịn edi ukem ye enye oro okodude ke Canaan ke n̄kpọ nte isua 3,500 emi ẹkebede. Bible ọdọhọ ete: “Mmọ [ẹnam] kpukpru orụk mbubiam emi Jehovah asuade ẹnọ mme abasi mmọ: koro mmọ ẹfọpde idem nditọ-iren mmọ ye nditọ mmọ iban ẹnọ mme abasi mmọ.” (Deuteronomy 12:31) Jehovah ama asian idụt Israel ete: “Edi idiọk ido mme idụt emi esịn Jehovah Abasi fo osio mmọ ke iso fo efep.” (Deuteronomy 9:5) Ewetmbụk Bible oro Henry H. Halley ama ewet ete: “Utuakibuot nnọ Baal, Ashtoreth, ye mme abasi Canaan eken ama esịne ikpọ idat idat usọrọ; mme temple mmọ ẹkedi iwụk ebiet ndiọi edinam.”

6 Halley ama owụt nte idiọkido mmọ okokponde, koro ke kiet ke otu utọ ediwak n̄kann̄kụk oro, mme ọdọkisọn̄ nyom n̄kpọeset “ẹma ẹfiọhọ ediwak aban̄ oro utak-usụhọ idem nditọwọn̄ oro ẹkewade ẹnọ Baal ẹkedọn̄ọde.” Enye ọkọdọhọ ete: “Ofụri n̄kann̄kụk oro ekedi itie ubụk nseknditọ. . . . Mbon Canaan ẹkesituak ibuot, ebe ke ndisịn idem ke oburobụt ido, nte mme usọrọ ido ukpono, ke iso mme abasi mmọ; ndien ekem, ke ndiwot akpan mmọ, nte uwa ẹnọde kpasụk mme abasi oro. Ke akamba udomo, etie nte isọn̄ Canaan ama akabade etie nte Sodom ye Gomorrah ke udomo eke ofụri idụt. . . . Nte ntatenyịn eke utọ mbubiam mbubiam ye obom obom ido ntre ama enyene unen ekededi ndika iso ndu? . . . Mme ọdọkisọn̄ nyom n̄kpọeset emi ẹkedọkde n̄wụre ke mme obio Canaan ẹkam ẹyeyịk ntak emi Abasi mîkọsọpke isobo mmọ nte enye okosobode.”

 Ndida Isọn̄ Nnyene

7, 8. Didie ke Abasi edinam isọn̄ emi asana?

7 Kpa nte Abasi akanamde Canaan asana, ibịghike enye ayanam ofụri isọn̄ asana onyụn̄ ayak enye ọnọ mbon oro ẹnamde uduak esie. “Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt. Edi ẹyesobo mme idiọk owo ke isọn̄ ẹfep.” (Mme N̄ke 2:21, 22) Ndien andiwet Psalm ọdọhọ ete: “Osụk esisịt idiọk owo ididụhe . . . Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:10, 11) Ẹyesio Satan n̄ko ẹfep, “man okûbian̄a aba mme idụt tutu thousand isua ẹbe.” (Ediyarade 20:1-3) Ih, “ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.

8 Ke nditịn̄ ibio ibio mban̄a akwa idotenyịn oro odude ọnọ mbon oro ẹyomde ndidu uwem ke nsinsi ke isọn̄, Jesus ọkọdọhọ ete: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.” (Matthew 5:5) Eyedi enye eketịn̄ aban̄a Psalm 37:29, emi ekebemde iso etịn̄ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” Jesus ama ọfiọk ete ke ekedi uduak Jehovah ndinam mbon esịt akpanikọ ẹdu uwem ke paradise isọn̄ ke nsinsi. Jehovah ọdọhọ ete: “Ami  n̄kada akwa odudu mi . . . nnam isọn̄, ye owo ye unam emi ẹdude ke iso isọn̄, ndien mmen enye nnọ owo nte enende mi ke enyịn.”—Jeremiah 27:5.

Utịbe Utịbe Obufa Ererimbot

9. Nso orụk ererimbot ke Obio Ubọn̄ Abasi edida idi?

9 Ke Armageddon ebede, Obio Ubọn̄ Abasi ayada utịbe utịbe “obufa isọn̄” edi emi ‘edinen ido edidụn̄de.’ (2 Peter 3:13) Nso akwa ubọhọ ke oro edidi ntem ọnọ mme andibọhọ Armageddon ndidi se ẹfakde ẹsio ke ufịk ufịk idiọk editịm n̄kpọ emi! Mmọ ẹdikop inemesịt didie ntem ndibe ndụk edinen obufa ererimbot ke idak ukara Obio Ubọn̄ eke heaven, ẹnyenede mme utịbe utịbe edidiọn̄ ye nsinsi uwem ke ekikere!—Ediyarade 7:9-17.

10. Ndiọi n̄kpọ ewe mîdidụhe aba ke idak ukara Obio Ubọn̄?

10 Ekọn̄, ubiatibet, biọn̄, m̀mê idem mme unam emi ẹsitade ekemmọ unam ididịgheke mme owo uwem aba. ‘Nyanam ediomi emem ye ikọt mi, nnyụn̄ nnam mme idiọk unam ẹtre ke isọn̄. Ndien eto ikọt ọyọnọ mfri esie, isọn̄ oyonyụn̄ on̄wụm n̄kpọ esie, ndien mmọ ẹyedu ke isọn̄ mmọ ke ifụre.’ “Mmọ ẹyeda ofụt mmọ ẹdom n̄kpọ ufụn̄isọn̄, ẹnyụn̄ ẹda eduat mmọ ẹdom ikwa udiọn̄-eto: ndien idụt idimenke ofụt itiene idụt, idinyụn̄ ikpepke aba ekọn̄. Ndien kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—Ezekiel 34:25-28; Micah 4:3, 4.

11. Ntak emi nnyịn ikemede ndinyene mbuọtidem nte ke udọn̄ọ ikpọkidem eyetre?

11 Ẹyesio udọn̄ọ, mfụhọ, ye idem n̄kpa ẹfep. “Andidụn̄ ididọhọke ite, Ndọdọn̄ọ: ẹfen mme idiọk ido mmọ eke ẹdụn̄de ke esịt.” (Isaiah 33:24) “[Abasi] ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep. . . . Sese, mmanam kpukpru n̄kpọ ẹdi mbufa.” (Ediyarade 21:4, 5) Ke ini enye okodude ke isọn̄, Jesus  ama owụt ukeme esie ndinam mme n̄kpọ oro ebe ke odudu oro Abasi ọkọnọde enye. Ye un̄wam edisana spirit, Jesus ama asan̄a ke ofụri idụt ọkọk mme mbụn̄ọ ye mbon udọn̄ọ.—Matthew 15:30, 31.

12. Nso idotenyịn idu inọ mme akpan̄kpa?

12 Jesus ama akam anam se ikande oro. Enye ama anam mme akpan̄kpa ẹset. Didie ke mbon nsụhọdeidem ẹkenam n̄kpọ? Ke ini enye akanamde eyenan̄wan isua 12 eset ke n̄kpa, ‘akamba n̄kpaidem ama omụm’ ete ye eka esie. (Mark 5:43a) Emi ekedi uwụtn̄kpọ efen kaban̄a se Jesus edinamde ke ofụri isọn̄ ke idak ukara Obio Ubọn̄, koro ke ini oro “nti owo ye mme idiọk owo ẹyeset ke n̄kpa.” (Utom 24:15) Kere ban̄a akamba n̄kpaidem oro edidude ke ini ediwak otu mme akpan̄kpa ẹdisetde ke n̄kpa ẹdidu uwem ẹnyụn̄ ẹfiak ẹdiana ye mbonima mmọ! Eyịghe idụhe nte ke akwa utom unọ ukpep oyodu ke idak ndausụn̄ Obio Ubọn̄ man ‘ifiọk Jehovah ọkpọyọhọ ke ererimbot, kpa nte mmọn̄ ofụkde inyan̄.’—Isaiah 11:9.

“Nti owo ye mme idiọk owo ẹyeset ke n̄kpa”

Ẹwụt Unen Itie Edikara Jehovah

13. Didie ke ẹdiwụt nte ukara Abasi enende?

13 Etisịm utịt tọsịn isua ukara Obio Ubọn̄, ẹyenam ekpụk ubonowo afiak edi mfọnmma ke ekikere ye ke ikpọkidem. Isọn̄ edidi in̄wan̄ Eden ofụri ekondo, kpa paradise. Ẹyenyene emem, inemesịt, ifụre, ye ima ima n̄kaowo. Akanam owo ikekwe utọ n̄kpọ emi ke mbụk owo mbemiso ukara Obio Ubọn̄. Nso akamba ukpụhọde ke ẹdiwụt ntem ini oro ke ufọt idiọk ukara owo ke ediwak tọsịn isua oro ẹkebemde iso ye ubọn̄ ubọn̄ ukara Obio Ubọn̄ Abasi eke heaven eke tọsịn isua! Ẹyewụt ke ukara Abasi ebe ke Obio Ubọn̄ esie ọfọn akan ke kpukpru usụn̄. Ẹyewụt unen Abasi ndikara, unen itie edikara esie, ọyọhọ ọyọhọ.

14. Nso iditịbe inọ mbon nsọn̄ibuot ke ini tọsịn isua ẹma ẹkesịm utịt?

14 Ke utịt tọsịn isua, Jehovah ayayak mme mfọnmma owo ẹda ifụre edimek mmọ ẹbiere m̀mê anie ke mmọ ẹyom ndinam n̄kpọ nnọ. Bible owụt nte ke “ẹyekpọhọde Satan ke n̄kpọkọbi esie ẹsana enye ẹyak.” Enye ayafiak odomo nditụn mme owo usụn̄, ndusụk ke otu mmọ ẹyemek ndida ke idem n̄kpọn̄ Abasi. Man akpan ‘afanikọn̄ nditọn̄ọ ntak ntịbe,’ Jehovah oyosobo Satan, mme demon esie, ye kpukpru mbon oro ẹsọn̄de ibuot ye itie edikara Jehovah. Owo ndomokiet idikemeke ndifan̄a nte ke owo ikọnọhọ owo ekededi oro ẹdisobode ke nsinsi adan̄aoro ifet m̀mê nte ke idiọk edinam mmọ okoto unana mfọnmma. Baba, mmọ ẹditie nte mfọnmma owo oro Adam ye Eve, oro ẹkekoide-koi ẹmek ndisọn̄ ibuot ye edinen ukara Jehovah.—Ediyarade 20:7-10; Nahum 1:9.

Mbon oro ẹnamde akpanikọ ẹyefiak ẹnyene eti itie ebuana ye Jehovah

15. Nso itie ebuana ke mme anam-akpanikọ ẹdinyene ye Jehovah?

15 Ke n̄kan̄ eken, eyedi ata ediwak owo ẹyemek ndisọn̄ọ mmụm itie edikara Jehovah n̄kama. Ke ẹma ẹkesobo kpukpru mbon nsọn̄ibuot, ndinen owo ẹyeda ke iso Jehovah, ke ẹma ẹkebe akpatre udomo edinam akpanikọ. Jehovah eyenyịme mme anam-akpanikọ emi ndien nte nditọ esie iren ye iban. Ke ntre mmọ ẹyefiak ẹdinyene itie ebuana oro Adam ye Eve ẹkenyenede ye Abasi mbemiso mmọ ẹkesọn̄de ibuot. Ntem, Rome 8:21 oyosu: “Ẹyenyan̄a ekondo ke idemesie [ubonowo] nde ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.” Prọfet Isaiah ebem iso etịn̄ ete: “[Abasi] eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep.”—Isaiah 25:8.

Idotenyịn Nsinsi Uwem

16. Ntak odotde ndidori enyịn ke utịp nsinsi uwem?

16 Nso utịbe utịbe ini iso ina ibet mme anam-akpanikọ ntem, ndifiọk nte ke Abasi ayan̄wan̄a uwak ufọn eke obụk ye eke spirit ọnọ mmọ ke nsinsi! Andiwet psalm ama etịn̄ nte enende ete: “Afo atat ubọk fo, onyụn̄ ọnọ kpukpru mme andidu uwem se mmọ ẹmade [oro edide nnennen] ẹyụhọ.” (Psalm 145:16) Jehovah esịn udọn̄ ọnọ mbon oro  ẹdide otu eke isọn̄ ndinyene idotenyịn uwem eke Paradise emi nte ubak mbuọtidem mmọ ke enye. Ke adan̄aemi eneni aban̄ade itie edikara Jehovah edide akpan n̄kpọ akan, enye iyomke mme owo ẹnam n̄kpọ ẹnọ imọ ye unana idotenyịn edibọ utịp. Ke ofụri Bible, ẹkpaha edinam akpanikọ nnọ Abasi ye idotenyịn nsinsi uwem ẹdian ọtọkiet nte mme akpan ikpehe mbuọtidem Christian ke Abasi. “Owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.”—Mme Hebrew 11:6.

17. Didie ke Jesus okowụt ke odot ndida idotenyịn nnyịn nsọn̄ọ nnyịn idem?

17 Jesus ama ọdọhọ ete: “Ndien nsinsi uwem oro edi ndifiọk fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Mi enye ama ada edifiọk Abasi ye mme uduak esie akabuan ye utịp oro emi edidade idi. Nte uwụtn̄kpọ, ke ini anamidiọk kiet ekeben̄ede Jesus ete eti imọ ke Obio Ubọn̄ esie, Jesus ama ọdọhọ ete: “Afo oyodu ye Ami ke Paradise.” (Luke 23:43) Enye ikọdọhọke eren oro ite enyene mbuọtidem idem ọkpọkọm enye idinyeneke utịp. Enye ama ọfiọk ete ke Jehovah oyom mme asan̄autom esie ẹnyene idotenyịn nsinsi uwem ke paradise isọn̄ man an̄wam ndisọn̄ọ mmọ idem nte mmọ ẹsobode nsio nsio idomo ke ererimbot emi. Ntem, ndidori enyịn mban̄a utịp edi akpan n̄kpọ un̄wam ke ndisọn̄ọ nyọ nte Christian.

Ini Iso Obio Ubọn̄

18, 19. Nso iditịbe inọ Edidem ye Obio Ubọn̄ ke utịt Ukara Tọsịn Isua?

18 Sia Obio Ubọn̄ ekedide udiana ukara oro Jehovah akadade anam isọn̄ ye mme owo oro ẹdụn̄de ke enye esịm mfọnmma ẹnyụn̄ ẹnam emem ye enye, nso udeme ke Edidem Jesus Christ ye ndidem oku 144,000 ẹdinyene ke Tọsịn Isua ebede? “Edikem ke edisịm utịt ini, emi Enye ediyakde itie-ubọn̄ Esie ọnọ Abasi, kpa Ete Esie; ke Enye ama okosobo kpukpru edikara ye kpukpru nsọn̄-uyo ye odudu. Koro enye enyene ndida ubọn̄ tutu Enye onụk kpukpru mme asua Esie ke idak ikpat.”—1 Corinth 15:24, 25.

19 Ke ini Christ ayakde Obio Ubọn̄ ọnọ Abasi, itien̄wed Abasi oro etịn̄de aban̄a ukara esie nte adade ke nsinsi edin̄wan̄a nnyịn didie? Se Obio Ubọn̄ oro anamde ẹdidu ke nsinsi. Ẹyekpono Christ ke nsinsi ke ntak udeme esie ke ndinam ẹwụt unen itie edikara Abasi. Edi sia ẹdisiode udọn̄ọ ye n̄kpa ifep ofụri ofụri ini oro, sia ẹma ẹkenyụn̄ ẹfak ubonowo, emi ayada utịt ọsọk ediyom enye nte Andifak. Ẹyewụk Ukara Obio Ubọn̄ eke Tọsịn Isua n̄ko ọyọhọ ọyọhọ; ntre owo idiyomke udiana ukara odu aba ke ufọt Jehovah ye okop-item ubonowo. Ntem, ‘Abasi eyedi kpukpru n̄kpọ.’—1 Corinth 15:28.

20. Didie ke nnyịn ikeme ndifiọk se ini iso akamade ọnọ Christ ye owo 144,000?

20 Nso udeme ini iso ke Christ ye mme nsan̄a andikara esie ẹdinyene ke Ukara Tọsịn Isua ama ekebe? Bible itịn̄ke. Edi, nnyịn imekeme ndinịm ke akpanikọ nte ke Jehovah ọyọnọ mmọ ediwak ifetutom efen efen ke nsinsi. Akpakam kpukpru nnyịn mfịn isọn̄ọ imụm unen itie edikara Jehovah ikama inyụn̄ inyene nsinsi uwem, man oto do ke ini iso, nnyịn ikpodu uwem ikụt se Jehovah aduakde ọnọ Edidem ye mme nsan̄a ndidem ye mme oku esie, ọkọrọ ye ofụri akaka ekondo esie!