Obio Ubọn̄ Abasi—Obufa Ukara Isọn̄

“Ubọn̄ emi . . . ayanuak onyụn̄ ama kpukpru mme idụt emi, ndien enye ayada ke nsinsi.”—DANIEL 2:44.

1. Nso mbuọtidem ke nnyịn ikeme ndinyene ke Bible?

BIBLE edi se Abasi ayararede ọnọ mme owo. Apostle Paul ama ewet ete: “Ke ini mbufo ẹbọde ikọ emi Abasi ọnọde ke ubọk nnyịn ẹsọk mbufo, mbufo idaha enye nte ikọ owo, edi ẹda enye nte ikọ Abasi—ke akpanikọ edi oro.” (1 Thessalonica 2:13) Bible ọdọn̄ọ se oyomde nnyịn ifiọk iban̄a Abasi: ntọt aban̄ade edu esie, mme uduak esie, ye mme n̄kpọ oro enye oyomde oto nnyịn. Enye enyene mfọnn̄kan item kaban̄a uwem ubon ye edu uwem eke usen usen. Enye ọnọ ọyọhọ ntọt aban̄a mme ntịn̄nnịm ikọ oro ẹkesude ke ini edem, oro ẹsude idahaemi, oro ẹdinyụn̄ ẹsude ke ini iso. Ih, “kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.”—2 Timothy 3:16, 17.

2. Didie ke Jesus okodori nsọn̄uyo ke ibuotikọ Bible?

2 Se idide akpan n̄kpọ ikan ke Bible edi ibuotikọ esie: ediwụt unen itie edikara Abasi (unen esie ndikara) ebe ke Obio Ubọn̄ esie eke heaven. Jesus ama anam oro edi akpan ibuotikọ ukwọrọikọ esie. “Jesus ọtọn̄ọ ndikwọrọ, ndinyụn̄ ndọhọ, ete, Ẹkabade esịt; koro Ubọn̄ Heaven ke ekpere.” (Matthew 4:17) Enye ama owụt itie oro enye ekpenyenede ke uwem nnyịn, akpakde ete: “Ẹkam ẹbem iso ẹyom Obio Ubọn̄ Esie ye edinen ido Esie.” (Matthew 6:33) Enye ama owụt n̄ko nte enye edide akpan n̄kpọ ebe ke ndikpep mme anditiene  enye ndibọn̄ akam nnọ Abasi nte: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:10.

Obufa Ukara Isọn̄

3. Ntak emi Obio Ubọn̄ Abasi enen̄erede edi akpan n̄kpọ ọnọ nnyịn?

3 Ntak emi Obio Ubọn̄ Abasi enen̄erede edi akpan n̄kpọ ntre ọnọ mme owo? Koro enye ọyọsọp ndinam n̄kpọ oro edikpụhọrede ukara isọn̄ emi ke nsinsi. Ntịn̄nnịm ikọ oro ke Daniel 2:44 ọdọhọ ete: “Ke eyo ndidem oro [ẹkarade isọn̄ idahaemi], Abasi enyọn̄ ayanam ubọn̄ [ukara ke heaven] eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi [mme ukara eke isọn̄], ndien enye ayada ke nsinsi.” Ke ini Obio Ubọn̄ Abasi eke heaven edikarade ọyọhọ ọyọhọ, mme owo iditọn̄ọke aba ntak ikara isọn̄ tutu amama. Ukara owo emi ọtọde ubahade mînyụn̄ inọhọ uyụhọ edidi n̄kpọ eset ke nsinsi.

4, 5. (a) Ntak emi Jesus edide owo oro odotde akan ndidi Edidem Obio Ubọn̄? (b) Nso utom ke Jesus edinyene ke n̄kpet n̄kpet ini iso?

4 Akwa Andikara ke Obio Ubọn̄ eke heaven oro, ke idak ndausụn̄ Jehovah, edi owo oro odotde akan—kpa Christ Jesus. Mbemiso ekedide isọn̄, enye ama ododu ke heaven nte “etubom anamutom” (NW) Abasi, edide akpa ke kpukpru se Abasi obotde. (Mme N̄ke 8:22-31) “Enye edi mbiet Abasi emi enyịn owo mîkwe; Abasi okobon Enye ete edi Akpan, ndien edibot ofụri ererimbot. Koro ke Enye ke ẹkebot kpukpru n̄kpọ ke enyọn̄ ye ke isọn̄.” (Colossae 1:15, 16) Ndien ke ini Abasi ọkọnọde Jesus edi isọn̄, enye akanam uduak Abasi kpukpru ini. Enye ama ọyọ ata n̄kpọsọn̄ idomo onyụn̄ akpa ke edinam akpanikọ nnọ Ete esie.—John 4:34; 15:10.

5 Ke ntak edinam akpanikọ esie nnọ Abasi idem tutu esịm n̄kpa, ẹma ẹnọ Jesus utịp. Abasi ama anam enye eset ke n̄kpa aka heaven onyụn̄ ọnọ enye unen ndidi Edidem Obio Ubọn̄ eke heaven. (Utom 2:32-36) Nte Edidem Obio Ubọn̄ oro, Abasi ọyọnọ Christ Jesus akwa utom ndida akwa udịm okopodudu edibotn̄kpọ eke spirit usụn̄ ke ndisio ukara owo mfep ke isọn̄ nnyụn̄ nsio kpukpru idiọkido mfep ke ekondo nnyịn. (Mme N̄ke 2:21, 22; 2 Thessalonica 1:6-9; Ediyarade 19:11-21; 20:1-3) Ndien Obio Ubọn̄ Abasi eke heaven ke ubọk Christ edidi obufa ukara, kpa n̄kukụre ukara oro edikarade ofụri isọn̄.—Ediyarade 11:15.

6. Nso utọ ukara ke nnyịn ikeme ndidori enyịn nto Edidem Obio Ubọn̄ oro?

6 Ikọ Abasi etịn̄ aban̄a obufa Andikara isọn̄ oro ete: “Ẹnọ enye ubọn̄, ye ukpono, ye itie-edidem, ẹte kpukpru mme idụt ye obio ye usem ẹnam n̄kpọ ẹnọ enye.” (Daniel 7:14) Ke ntak oro Jesus edikpebede ima Abasi, emem ye inemesịt oyokpon ke idak ukara esie. (Matthew 5:5; John 3:16; 1 John 4:7-10) “N̄kọri ukara esie ye emem idinyeneke utịt, . . . man ọsọn̄ọ owụk enye ke unenikpe ye ke edinen ido.” (Isaiah 9:7, Revised Standard Version) Nso edidiọn̄ ke edidi ntem ndinyene Andikara oro akarade ke ima, unenikpe, ye ke edinen ido! Ntem, 2 Peter 3:13 ebem iso etịn̄ ete: “Nnyịn itie ibet obufa enyọn̄ [Obio Ubọn̄ Abasi eke heaven] ye obufa isọn̄ [obufa n̄kaowo eke isọn̄], nte un̄wọn̄ọ Esie edide; ndien edi do ke edinen ido edidụn̄.”

7. Didie ke Matthew 24:14 osu mfịn?

7 Ke akpanikọ, Obio Ubọn̄ Abasi edi ata mfọnn̄kan mbụk ọnọ kpukpru mbon oro ẹmade se inende. Oro edi ntak, nte ubak idiọn̄ọ nte ke nnyịn idahaemi idu uwem ke “ukperedem ini” eke idiọk editịm n̄kpọ emi, Jesus ama ebem iso etịn̄ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (2 Timothy 3:1-5; Matthew 24:14) Ntịn̄nnịm ikọ oro ke osu mfịn, nte n̄kpọ nte Mme Ntiense Jehovah miliọn itiokiet ke idụt 234 ẹsịnde se ibede biliọn hour kiet kpukpru isua ke ndisian mmọ en̄wen mban̄a Obio Ubọn̄ Abasi. Nte odotde, ẹkot itie utuakibuot mmọ kiet kiet oro odude ọnọ n̄kpọ nte esop 90,000 ke ofụri ererimbot Ufọkmbono Obio Ubọn̄. Mme owo ẹsidi do ẹdikpep ẹban̄a obufa ukara oro edide.

 Mme Nsan̄a Andikara

8, 9. (a) Mme nsan̄a andikara ye Christ ẹto m̀mọ̀n̄? (b) Nso mbuọtidem ke nnyịn ikeme ndinyene ke ukara Edidem oro ye mme nsan̄a andikara esie?

8 Mme nsan̄a andikara ye Christ Jesus ke Obio Ubọn̄ Abasi eke heaven ẹyedu. Ediyarade 14:1-4 ama ebem iso etịn̄ nte ke owo 144,000 ke ẹkenyene ‘ndifak nsio ke otu owo’ nnyụn̄ nnam ẹset ke n̄kpa ẹkedụk uwem eke heaven. Emi esịne iren ye iban oro, utu ke ndidi se ẹnamde n̄kpọ ẹnọ, ẹkesụhọrede idem ẹnam n̄kpọ ẹnọ Abasi ye mme ekemmọ owo. “Mmọ ẹyedi mme oku Abasi ye Christ, mmọ ẹyenyụn̄ ẹda ubọn̄ ye Enye ke thousand isua.” (Ediyarade 20:6) Ibat mmọ enen̄ede ekpri akan “akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem” oro ẹdibọhọde utịt editịm n̄kpọ emi. Mmọ emi n̄ko “ẹnam n̄kpọ ẹnọ [Abasi] uwemeyo ye okoneyo,” edi mmọ inyeneke ikot eke heaven. (Ediyarade 7:9, 15) Mmọ ẹdi ntọn̄ọ obufa isọn̄ nte mme andidu ke idak Obio Ubọn̄ Abasi eke heaven.—Psalm 37:29; John 10:16.

9 Ke ndimek mbon oro ẹdikarade ye Christ ke heaven, Jehovah ekemek mbon oro ẹnamde akpanikọ oro ẹma ẹkenyene ifiọk ẹban̄a uwem ye kpukpru mfịna esie. Ekpere ndidi n̄kpọ ndomokiet idụhe oro mme owo ẹsobode oro ndidem ye mme oku emi mîkosoboke n̄ko. Ntre uwem mmọ ke isọn̄ oyofori ukeme mmọ ndikara mme owo. Jesus ama akam “ekpep nsụk-ibuot ọfiọk oto ke ndutụhọ eke Enye okụtde.” (Mme Hebrew 5:8) Apostle Paul ama etịn̄ aban̄a enye ete: ‘Nnyịn inyeneke Akwa Oku eke mîkemeke nditiene nnyịn n̄kụt mmem-idem nnyịn; edi Akwa Oku emi okokụtde idomo ke kpukpru nde kpa nte nnyịn, edi mînyeneke idiọk-n̄kpọ.’ (Mme Hebrew 4:15) Edi n̄kpọ ndọn̄esịt didie ntem ndifiọk nte ke edinen obufa ererimbot Abasi, mme ima ima, okop-mbọm ndidem ye mme oku ẹdikara mme owo!

Nte Abasi Ama Aduak Obio Ubọn̄?

10. Ntak emi Obio Ubọn̄ eke heaven mîkedịghe ubak akpa uduak Abasi?

10 Nte Obio Ubọn̄ eke heaven ekedi ubak akpa uduak Abasi ke ini enye okobotde Adam ye Eve? Ke mbụk Genesis aban̄ade edibot mme n̄kpọ, owo itịn̄ke iban̄a Obio Ubọn̄ oro edikarade ubonowo. Jehovah ke idemesie ekedi Andikara mmọ, ndien adan̄a nte mmọ ẹkesụkde ibuot ẹnọ enye, ufọn ukara efen ekededi ikodụhe. Genesis ibuot 1 owụt nte ke Jehovah, eyedi ebede ke akpa edibon Eyen esie ke heaven, ama esinyene nneme ye Adam ye Eve. Mbụk oro ada mme utọ ikọ nte “Abasi onyụn̄ ọdọhọ mmọ ete” ye “Abasi ọdọhọ ete.”—Genesis 1:28, 29; John 1:1.

11. Nso mfọnmma ntọn̄ọ ke ubonowo ekenyene?

11 Bible ọdọhọ ete: “Abasi okụt kpukpru se enye akanamde, ndien, sese ẹfọn eti eti.” (Genesis 1:31) Kpukpru n̄kpọ ke in̄wan̄ Eden ẹma ẹnen̄ede ẹfọn ẹma. Adam ye Eve ẹkedụn̄ ke paradise. Mmọ ẹkenyene mfọnmma ekikere ye mfọnmma idem. Mmọ ẹma ẹkeme  ndinyene nneme ye Andinam mmọ ndien enye ama onyụn̄ ekeme ndinyene nneme ye mmọ. Ndien ebede ke ndika iso nnam akpanikọ, mmọ ẹkpekenyene mfọnmma nditọ. Ufọn ikpokodụhe ndiyom obufa ukara eke heaven.

12, 13. Nte mfọnmma ubonowo ọkọtọtde, ntak emi Abasi okpokosụk ekemede ndinyene nneme ye mmọ?

12 Nte ekpụk ubonowo ọkọtọtde, didie ke Abasi ekpekekeme ndinyene nneme ye kpukpru mmọ? Kere ban̄a mme ntantaọfiọn̄ ke enyọn̄. Ẹtịm mmọ ẹdọn̄ ọtọkiet ke mme otu ntantaọfiọn̄ oro ẹkotde ndutịm ntantaọfiọn̄. Ndusụk ndutịm ntantafiọn̄ ẹsịne ntantaọfiọn̄ biliọn kiet. Mmọ efen ẹsịne n̄kpọ nte triliọn kiet. Ndien ntaifiọk ẹnọ ekikere ẹte ke ndutịm ntantaọfiọn̄ biliọn 100 ẹdu ke ekondo oro ẹkụtde ke enyịn! Edi, Andibot ọdọhọ ete: “Ẹmenede enyịn mbufo ke enyọn̄, ẹnyụn̄ ẹse! Anie okobot mme mmọ emi? Anie ada otu mmọ ọwọrọ ke ibat mmọ? Enye osio kpukpru mmọ enyịn̄: koro nsọn̄idem esie okponde, enye onyụn̄ ọsọn̄ odudu; baba owo mmọ kiet isopke.”—Isaiah 40:26.

13 Sia Abasi ekemede ndidiọn̄ọ kpukpru ntantaọfiọn̄ ikpaenyọn̄ emi, ke akpanikọ, ikpedịghe mfịna inọ enye ndidiọn̄ọ mme owo oro ẹnen̄erede ẹkpri ke ibat. Idem idahaemi, ediwak miliọn asan̄autom esie ẹsibọn̄ akam ẹnọ enye ke usen ke usen. Akam oro ẹsisịm Abasi ke ebe oro. Ntre ndinyene nneme ye kpukpru mfọnmma owo ikpekedịghe mfịna inọ enye. Enye ikpokoyomke Obio Ubọn̄ eke heaven man ọdiọn̄ọ mmọ. Nso utịbe utịbe ndutịm—ndinyene Jehovah nte Andikara, nditịn̄ ikọ ye enye nnennen nnennen, nnyụn̄ nnyene idotenyịn editre ndikpa, ndidu uwem ke nsinsi ke paradise isọn̄!

“Idụhe Owo ke Ubọk”

14. Ntak emi mme owo ẹdiyomde ukara Jehovah ke nsinsi?

14 Nte ededi, mme owo—idem mme mfọnmma owo—ẹyeyom ukara Jehovah ke nsinsi. Ntak-a? Koro Jehovah ikobotke mmọ ye ukeme ndida ke idem uforo uforo n̄kpọn̄ ukara esie. Oro edi ibet ubonowo, nte prọfet Jeremiah ekenyịmede ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ. O Jehovah, tụnọ mi.” (Jeremiah 10:23, 24) Ekpedi ndisịme ọnọ mme owo ndikere ke mmimọ imekeme ndikara n̄kaowo uforo uforo ye unana Jehovah ndikara mmọ. Oro akpatuaha ye usụn̄ oro ẹkenamde mmọ. Ndida ke idem n̄kpọn̄ ukara Jehovah, ye unana edikpu, okposụn̄ọ ke ibụk, usua, ibak, afai, mme ekọn̄, ye n̄kpa. ‘Owo akpakara owo tutu ọnọ enye unan.’—Ecclesiastes 8:9, NW.

15. Mme utịp ewe ẹkesụn̄ọ ẹto idiọk edimek oro akpa ete ye eka nnyịn ẹkemekde?

15 Ke mfụhọ, akpa ete ye eka nnyịn ẹma ẹbiere ke mmimọ ikoyomke Abasi nte Andikara mmimọ, ndien mmọ ẹma ẹmek ndidu uwem nda-ke-idem n̄kpọn̄ enye. Nte utịp, Abasi ikomụmke mmọ aba ikama ke mfọnmma. Mmọ idahaemi ẹketie nte ukwakutom ilektrik oro ẹfaharede ẹsio ke ebiet oro odudu esie otode. Ntre nte ini akade, mmọ ẹyesụhọde ẹnyụn̄ ẹtre—ke n̄kpa. Mmọ ẹma ẹkabade ẹtie nte udomon̄kpọ oro enyenede ndo, ndien ndo oro ekedi ukụre se mmọ ẹkekemede ndiyak nnọ nditọ mmọ. (Rome 5:12) “Akwa itiat [Jehovah], utom esie ọfọn ama: koro kpukpru usụn̄ esie ẹnende . . . Enye (Israel) amakabade ọdiọk ye enye, ndo mmọ idịghe eke nditọ esie.” (Deuteronomy 32:4, 5) Edi akpanikọ, ọsọn̄ibuot edibotn̄kpọ eke spirit oro akakabarede edi Satan ama enyene odudu ke idem Adam ye Eve, edi mmọ ẹma ẹnyene mfọnmma ekikere ndien ẹkpekekeme ndisịn mme ukwan̄ ekikere oro enye ọkọnọde.—Genesis 3:1-19; James 4:7.

16. Didie ke mbụk ọsọn̄ọ utịp edida ke idem n̄kpọn̄ Abasi?

16 Mbụk enen̄ede ọsọn̄ọ utịp edida ke idem n̄kpọn̄ Abasi. Ke ediwak tọsịn isua, mme owo ẹmedomo kpukpru orụk ukara owo, kpukpru orụk ndutịm uforo ye ndutịm n̄kaowo. Edi, idiọkido ke ‘ọdọdiọn̄ ọdiọk aka iso.’ (2 Timothy 3:13) Ọyọhọ isua ikie 20 ama ọsọn̄ọ oro. Enye ọkọyọhọ ye idiọk usua ye ndiọkn̄kan afai, ekọn̄, biọn̄, unana, ndutụhọ oro akanam odude ke  ini ekededi ke mbụk. Ndien inamke n̄kpọ m̀mê nso n̄kọri ke ẹnam ke n̄kan̄ ibọkusọbọ, ebebịghi m̀mê awawara kpukpru owo ẹyekpan̄a. (Ecclesiastes 9:5, 10) Ke ndidomo ndinen̄ede ikpatisan̄ mmọ, mme owo ẹmeduọn̄ọ ẹdụk ubọk Satan ye mme demon esie, tutu edi se Bible okotde Satan “abasi eyo emi.”—2 Corinth 4:4.

Enọ Ifụre Uduak

17. Didie ke ẹkenyene ndida enọ Abasi eke ifụre uduak nnam n̄kpọ?

17 Ntak emi Jehovah akpayakde mme owo ẹmek usụn̄ idemmọ? Koro enye okobot mmọ ye utịbe utịbe enọ ifụre uduak, kpa ukeme ndimek n̄kpọ ifụre ifụre. Paul ọkọdọhọ ete: “Ọtọ nte Spirit Ọbọn̄ odude, ubọhọ-ufịn etiene odu do n̄ko.” (2 Corinth 3:17) Idụhe owo oro okpoyomde ndidi owo ukwak, kpukpru ini ayakde owo efen ebiere se enye ekpetịn̄de onyụn̄ anamde. Edi Jehovah okoyom mme owo ẹda ẹnọ ifụre uduak oro ẹnam n̄kpọ ke eti usụn̄, ndikụt eti ibuot oro odude ke ndinam uduak esie nnyụn̄ n̄ka iso nsụk ibuot nnọ enye. (Galatia 5:13) Ntre ifụre ikenyeneke ndidi ọyọhọ ọyọhọ, koro oro okposụn̄ọ ke ndutịme. Ẹkenyene ndida enye nnam n̄kpọ ntre ke adan̄a mme ọnọ-ufọn ibet Abasi.

18. Nso ke Abasi owụt ke ndiyak owo ada ifụre edimek anam n̄kpọ?

18 Ke ndiyak ekpụk ubonowo emek usụn̄ esie, Abasi omowụt ke nsinsi nte ke nnyịn imoyom ukara esie. Usụn̄ edikara esie, itie edikara esie, edi n̄kukụre nnennen usụn̄. Enye esisụn̄ọ ke n̄kponn̄kan inemesịt, uyụhọ, ye uforo. Emi edi koro Jehovah eketịm ekikere ye idem nnyịn ndisan̄a nte ọfọnde akan ke ini ẹdude ke n̄kemuyo ye mme ibet esie. “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.” (Isaiah 48:17) Ifụre edimek oro etrede ke adan̄a oro mme ibet Abasi ẹnịmde ididịghe mbiomo edi edisụn̄ọ ke inem inem nsio nsio orụk udia, ufọk, utomusọ, ye ikwọ. Ke ẹdade ẹnam n̄kpọ nte enende, ifụre uduak okpokosụn̄ọ ke utịbe utịbe, inem inem uwem ke paradise isọn̄ ke nsinsi.

19. Nso n̄kpọutom ke Abasi ada ndinam mme owo ẹtie ke emem ye enye?

19 Edi otode ke ntak idiọk edimek mmọ,  mme owo ẹma ẹdian̄ade idemmọ ẹkpọn̄ Jehovah, ẹkabarede ẹdi mme anana mfọnmma, ẹmemde, ẹnyụn̄ ẹkpan̄ade. Ndien oyoyom ẹfak mmọ ẹsion̄o ke utọ mfụhọ mfụhọ idaha oro ẹnyụn̄ ẹnam mmọ ẹfiak ẹnyene eti itie ebuana ye Abasi nte nditọ esie iren ye iban. N̄kpọutom oro Abasi ekemekde ndida nnam emi edi Obio Ubọn̄, ndien Andifak edi Jesus Christ. (John 3:16) Ebede ke ndutịm emi, ẹyenam mbon oro ẹkabarede esịt ke akpanikọ—ukem nte idiọk udọ eke n̄ke Jesus—ẹtie ke emem ye Abasi enye onyụn̄ afiak adara mmọ nte nditọ esie.—Luke 15:11-24; Rome 8:21; 2 Corinth 6:18.

20. Didie ke uduak Abasi edisu ebe ke Obio Ubọn̄?

20 Ye unana edikpu, ẹyenam uduak Jehovah ke isọn̄. (Isaiah 14:24, 27; 55:11) Ebede ke Obio Ubọn̄ esie ke idak Christ, Abasi oyowụt (m̀mê, ọyọsọn̄ọ) unen esie ọyọhọ ọyọhọ nte Andikara nnyịn. Obio Ubọn̄ oro ayada utịt ọsọk ukara owo ye ukara demon ke isọn̄ emi, ndien enye kpọt edito heaven akara ke tọsịn isua. (Rome 16:20; Ediyarade 20:1-6) Edi ke ini oro, didie ke ẹdiwụt nte ke usụn̄ edikara Jehovah ọfọn akan? Ndien ke tọsịn isua oro ẹma ẹkebe, nso udeme ke Obio Ubọn̄ oro edinyene? Ibuotikọ oro etienede eyeneme mme mbụme emi.

Mme Akpan N̄kpọ Ndidụn̄ọde

• Nso idi ibuotikọ Bible?

• Mmanie ẹnam obufa ukara isọn̄?

• Ntak emi ukara owo emi adade ke idem ọkpọn̄ Abasi mîdikwe unen tutu amama?

• Didie ke ẹkpeda ifụre uduak ẹnam n̄kpọ?

[Mme Mbụme Ukpepn̄kpọ]

 1. Nso mbuọtidem ke nnyịn ikeme ndinyene ke Bible?

 2. Didie ke Jesus okodori nsọn̄uyo ke ibuotikọ Bible?

 3. Ntak emi Obio Ubọn̄ Abasi enen̄erede edi akpan n̄kpọ ọnọ nnyịn?

 4, 5. (a) Ntak emi Jesus edide owo oro odotde akan ndidi Edidem Obio Ubọn̄? (b) Nso utom ke Jesus edinyene ke n̄kpet n̄kpet ini iso?

 6. Nso utọ ukara ke nnyịn ikeme ndidori enyịn nto Edidem Obio Ubọn̄ oro?

 7. Didie ke Matthew 24:14 osu mfịn?

 8, 9. (a) Mme nsan̄a andikara ye Christ ẹto m̀mọ̀n̄? (b) Nso mbuọtidem ke nnyịn ikeme ndinyene ke ukara Edidem oro ye mme nsan̄a andikara esie?

10. Ntak emi Obio Ubọn̄ eke heaven mîkedịghe ubak akpa uduak Abasi?

11. Nso mfọnmma ntọn̄ọ ke ubonowo ekenyene?

12, 13. Nte mfọnmma ubonowo ọkọtọtde, ntak emi Abasi okpokosụk ekemede ndinyene nneme ye mmọ?

14. Ntak emi mme owo ẹdiyomde ukara Jehovah ke nsinsi?

15. Mme utịp ewe ẹkesụn̄ọ ẹto idiọk edimek oro akpa ete ye eka nnyịn ẹkemekde?

16. Didie ke mbụk ọsọn̄ọ utịp edida ke idem n̄kpọn̄ Abasi?

17. Didie ke ẹkenyene ndida enọ Abasi eke ifụre uduak nnam n̄kpọ?

18. Nso ke Abasi owụt ke ndiyak owo ada ifụre edimek anam n̄kpọ?

19. Nso n̄kpọutom ke Abasi ada ndinam mme owo ẹtie ke emem ye enye?

20. Didie ke uduak Abasi edisu ebe ke Obio Ubọn̄?

[Ndise ke page 10]

Ukpepn̄kpọ Jesus ama odori nsọn̄uyo ke ukara Abasi ebe ke Obio Ubọn̄

[Mme ndise ke page 12]

Ke kpukpru idụt Mme Ntiense Jehovah ẹnam Obio Ubọn̄ oro edi akpan ukpepn̄kpọ mmọ

[Mme ndise ke page 14]

Mbụk ọsọn̄ọ ndiọi utịp eke edida ke idem n̄kpọn̄ Abasi

[Ebiet Ẹdade N̄kpọ Ẹto]

Mbonekọn̄ WWI: U.S. National Archives photo; itienna ekikere: Oświęcim Museum; eyenọwọn̄: UN PHOTO 186156/J. Isaac