Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NO. 1 2016

 SE BIBLE ETỊN̄DE ABAN̄A

Utịt Ererimbot

Utịt Ererimbot

Akpa John 2:17 ọdọhọ ete: “Ererimbot ke ebebe efep ye mme udọn̄ esie.” Ewe ererimbot ke ẹtịn̄ ẹban̄a ke itien̄wed emi? Didie ke enye edibe ifep ndien ini ewe ke emi editịbe?

Ewe “ererimbot” idibe ifep?

SE BIBLE ỌDỌHỌDE

Ererimbot oro ẹtịn̄de ẹban̄a mi enyene “mme udọn̄” emi Abasi asuade, ntre idịghe ata ata isọn̄ nnyịn emi ke ẹtịn̄ ẹban̄a. Utu ke oro, mbon oro ẹmiomde Abasi ẹnyụn̄ ẹnamde idemmọ asua Abasi ẹdi ererimbot emi edibede ifep. (James 4:4) Mmọ “ẹyebọ ufen nsinsi nsobo.” (2 Thessalonica 1:7-9) Edi mbon emi “mîdịghe ubak ererimbot” nte Jesus ọkọdọhọde, ẹyedu uwem ke nsinsi.—John 15:19.

Kop nte ẹdade 1 John 2:17 ẹkeberi mi: “Owo eke anamde uduak Abasi ododu ke nsinsi.” Utọ owo oro edidu uwem ke nsinsi ke isọn̄ emi sia Psalm 37:29 ọdọhọ ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”

“Ẹkûma ererimbot m̀mê se idude ke ererimbot. Edieke owo ekededi amade ererimbot, enye imaha Ete.”1 John 2:15.

Didie ke ererimbot emi edibe ifep?

SE BIBLE ỌDỌHỌDE

Utịt ererimbot edidi ke ikpehe iba. Akpa, Abasi oyosobo kpukpru nsunsu ufọkabasi emi Bible okotde “Akwa Babylon” onyụn̄ ọdọhọde ke edi akpara. (Ediyarade 17:1-5; 18:8) Akpara emi ọdọhọ ke ida inọ Abasi, edi enye ke adia ubọk udia kiet ye ikpọ mme andikara ererimbot emi. Kpa mme andikara emi ẹdinam enye n̄kpọ. “Mmọ ẹyesua akpara oro ẹnyụn̄ ẹsobo enye ẹnyụn̄ ẹnịm enye iferi, ẹnyụn̄ ẹta obụkidem [m̀mê, inyene] esie ẹnyụn̄ ẹfọp enye ke ikan̄ ofụri ofụri.”—Ediyarade 17:16.

Ekem Abasi ọyọwọn̄ọde ese mme andikara emi—oro edi, “ndidem ofụri isọn̄.” Ẹyesobo mmọ ye mme idiọkowo eken ke “ekọn̄ akwa usen Abasi Ata Ọkpọsọn̄,” emi ẹnyụn̄ ẹkotde “Armageddon.”—Ediyarade 16:14, 16.

“Ẹyom Jehovah, mbufo kpukpru sụn̄sụn̄ mbon isọn̄ . . . Ẹyom edinen ido, ẹyom sụn̄sụn̄ ido. Ekeme ndidi ẹyedịp mbufo ke usen iyatesịt Jehovah.” Zephaniah 2:3.

 Ini ewe ke ererimbot emi edisịm utịt?

SE BIBLE ỌDỌHỌDE

Utịt edidi ke ẹma ẹkekwọrọ Obio Ubọn̄ Abasi ẹnọ ofụri ubonowo nte Abasi oyomde. Obio Ubọn̄ Abasi edi ukara emi edisobode ukara owo ifep onyụn̄ akara ofụri isọn̄. (Daniel 7:13, 14) Jesus Christ ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matthew 24:14) Sia Abasi mîyomke owo ndomokiet atak, enye anam ẹkwọrọ ikọ ke ofụri isọn̄. Ukwọrọikọ edi kiet ke otu n̄kpọ emi owụtde ke utịt ekpere. Mme n̄kpọ en̄wen emi ẹwụtde ke utịt ekpere edi ekọn̄, unyekisọn̄, akan̄, ye idiọk udọn̄ọ.—Matthew 24:3; Luke 21:10, 11.

Ke adianade ye mme n̄kpọ emi ẹditịbede mi ke ererimbot, Bible ama etetịn̄ nte mme owo ẹdidude uwem ke “mme akpatre usen” emi. Bible ọdọhọ ete: “Ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyedi mme ama idem, mme ama okụk, . . . ẹsọn̄ ibuot ye ete ye eka, . . . ẹnana mfara ke idem, ẹtie obom obom, imaha eti ido, . . . ẹma unọ idem inemesịt utu ke ndima Abasi.” *2 Timothy 3:1-5.

Idiọk ererimbot emi ọmọn̄ ‘ebebe efep.’—1 John 2:17

Kpukpru mme n̄kpọ emi ẹnen̄ede ẹtịbe ke emana emi ọkọtọn̄ọde ke ini akpa ekọn̄ ererimbot ke 1914. N̄ko, ọtọn̄ọde ke isua oro, ẹkwọrọ Obio Ubọn̄ Abasi ke kpukpru ebiet, ndien Mme Ntiense Jehovah ẹbat ke edi ata akwa n̄kpọ ndidi mbon emi ẹkwọrọde etop emi. Ke nditịm ntịn̄, akpan n̄wed mmọ kiet ekere Enyọn̄-Ukpeme Ọnọ Ntọt Obio Ubọn̄ Jehovah.

“Ẹdu ke ukpeme . . . koro mbufo mîfiọkke usen m̀mê hour oro.”Matthew 25:13.

^ ikp. 14 Edieke oyomde ndifiọk n̄kpọ en̄wen mban̄a emi, mbọk kot ibuot 9 ke n̄wed Mme Ntiense Jehovah emi Nso ke Bible Enen̄ede Ekpep? N̄wed emi odu n̄ko ke www.jw.org/efi.

Kpep N̄kpọ En̄wen

Afo Emekeme Nditiene Mbọhọ

Nso ke akpanam man ọbọhọ? Ndi akpana ọtọn̄ọ nditan̄ udia, inyene, ye mme n̄kpọ ntre mbon?