Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  No. 1 2016

 SE BIBLE ETỊN̄DE ABAN̄A

Ukpọn̄

Ukpọn̄

Nsio nsio ufọkabasi ẹkpep nsio nsio n̄kpọ ẹban̄a ukpọn̄ ye se isitịbede inọ ukpọn̄ ke ini owo akpade. Edi Bible anam n̄kpọ emi an̄wan̄a nnyịn.

Ndi ukpọn̄ isikpaha ke nsinsi?

SE MME OWO ẸDỌHỌDE

Ediwak owo ẹnịm ke ukpọn̄ isikpaha ke nsinsi. Ndusụk owo ẹnịm ke ukpọn̄ esika iso afiak amana ke owo ama akakpa onyụn̄ aka iso odu uwem ke idem owo m̀mê idem n̄kpọ en̄wen. Mbon en̄wen ẹnịm ke owo ama akpakpa, ke ukpọn̄ esie ẹsika heaven m̀mê hell.

SE BIBLE ỌDỌHỌDE

Bible idọhọke ke ukpọn̄ esidu uwem ke nsinsi. Ke nditịm ntịn̄, enye esiwak ndidọhọ ke ukpọn̄ akpa. Prọfet Ezekiel, emi Abasi ọkọdọhọde etiene ewet Bible, ọkọdọhọ ke ukpọn̄ ekeme ndikpa. Ke itien̄wed en̄wen, Bible etịn̄ aban̄a okpo owo nte ‘ukpọn̄ eke akpade.’ (Leviticus 21:11) Omokụt do ke Bible idọhọke ke ukpọn̄ isikpaha ke nsinsi.

“Ukpọn̄ eke anamde idiọk ayakpa n̄kpa.”Ezekiel 18:20.

Ndi owo edi ukpọn̄ m̀mê enyenyene ukpọn̄?

SE MME OWO ẸDỌHỌDE

Owo enyene ukpọn̄ emi esiwọrọde enye ke idem ke ini enye akpade.

SE BIBLE ỌDỌHỌDE

Bible okot nditọ emi mma kiet akamande “ukpọn̄.” (Genesis 46:18) Ndien ẹkeme n̄ko ndikabade ikọ Hebrew oro ẹkabarede “ukpọn̄” ke Bible nte “andikot ibifịk.” Ndusụk ini, ẹsikot unam “ukpọn̄.” N̄ko, Bible ọdọhọ ke ukpọn̄ esiyom ndidia udia. (Deuteronomy 12:20) Edieke owo mîdịghe ukpọn̄, ntak emi ẹtịn̄de ẹban̄a ukpọn̄ nte “andikot ibifịk”? Ntak emi ẹdọhọde ke ukpọn̄ esiyom ndidia udia? Ke Bible, ẹsiwak ndida ikọ oro “ukpọn̄” ntịn̄ mban̄a odu-uwem owo—nte enye etiede ye nte enye esinamde n̄kpọ.

“Enye onyụn̄ aman . . . ukpọn̄ efịtekiet.”—Genesis 46:18.

 Nso isitịbe inọ ukpọn̄ ke ini owo akpade?

SE BIBLE ỌDỌHỌDE

Owo ama akpakpa, ofụri n̄kpọ ke idem esie akpa. Ntre, “baba utom, baba uduak, baba ifiọk, baba ọniọn̄ [idụhe] ke Udi.” (Ecclesiastes 9:10) Bible ọdọhọ ke ini owo akpade, ke “enye afiak ke ntan; kpa ke usen oro mme ekikere esie ẹtak.” (Psalm 146:4) Ukpọn̄ emi akpade ikemeke ndinam n̄kpọ ndomokiet. Oro anam Bible ọdọhọ ke owo emi akpade “edede.”—Matthew 9:24.

NTAK EMI EKPEBEHEDE FI?

Ke ini owo fo akpade, anaedi emesiyom ndidiọn̄ọ m̀mê enye aka m̀mọ̀n̄, m̀mê enye ke osụk ọdọdiọn̄ọ idem, m̀mê enye ke akam ọbọ ufen. Sia Bible ọdọhọde ke mme akpan̄kpa ifiọkke baba n̄kpọ kiet, ọwọrọ mbon nnyịn emi ẹkpade ibọhọ ufen. Ndien enem nnyịn ndifiọk emi. Enem nnyịn n̄ko ndifiọk ke Jehovah ọn̄wọn̄ọ ndinam mme owo, m̀mê ukpọn̄, emi ẹma ẹkekpan̄a ẹset ẹdidu uwem ke ini iso.—Isaiah 26:19.

“Mme akpan̄kpa . . . ifiọkke baba n̄kpọ kiet.”Ecclesiastes 9:5.