Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ẸDEMEDE! NO. 1 2016

Se Akpanamde Man Emem Odu ke Ufọk

Se Akpanamde Man Emem Odu ke Ufọk

NDI emekere ke Bible ekeme ndin̄wam mbufo ẹnyene emem ke ufọk? Mme andiwet magazine emi ẹma ẹnyene nneme ye ndusụk owo ndien mmọ ẹma ẹtịn̄ se in̄wamde ubon mmọ. Mbọk men se Bible etịn̄de domo ye se mmọ ẹtịn̄de ise. Se m̀mê ewe ke otu emi edinam mbufo ẹkûsutọhọ utọk, edi ẹdu ke emem ẹnyụn̄ ẹka iso ẹdiana kiet.

 MME ITEM BIBLE EMI ẸDIN̄WAMDE MBUFO ẸDU KE EMEM

ẸMA KIET EKEN.

“Ẹkûnam baba n̄kpọ kiet ke ndomoidem m̀mê ke n̄kụtidem, edi ẹda nsụhọdeidem ẹbat ẹte mbon en̄wen ẹfọn ẹkan mbufo, ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”Philippi 2:3, 4.

“Imokụt ke ọfọn owo ama n̄wan m̀mê ebe esie akan nte enye amade idemesie ye mbon en̄wen.”—C. P., emi ọdọde ndọ isua 19.

SINEN̄EDE KPAN̄ UTỌN̄.

“Ti mmọ ete . . . ẹkûdi mbon en̄wan, ẹnyene eti ibuot, ẹtie ifụre ifụre ye kpukpru owo.”Titus 3:1, 2.

“Edieke n̄wan esibọrọde ebe ikọ ukpono ukpono, ebe onyụn̄ anam kpa ntre, utọk ididụhe. Ọfọn ndinen̄ede n̄kpan̄ utọn̄ nnọ n̄wan m̀mê ebe fo nnyụn̄ nda se enye etịn̄de ke akpan n̄kpọ, idem ọkpọkọm unyịmeke se enye etịn̄de.”—P. P., emi ọdọde ndọ isua 20.

KPEP IME YE NSỤHỌDEIDEM.

“Ẹda ime ẹkpek etubom, sụn̄sụn̄ edeme onyụn̄ ekeme ndibụn̄ ọkpọ.”Mme N̄ke 25:15.

“Idụhe nte ikọ mîdidụhe ke ubon, edi se idinamde ke ini ikọ odude edinam emem odu mîdịghe anam itọhọ. Ọfọn inyene ime. Iyebiere mfịna ekededi emi odude edieke inyenede ime.”—G. A., emi ọdọde ndọ isua 27.

KÛDEDEI UMIA OWO KÛNYỤN̄ USỤN̄I OWO.

“Ẹsion̄o kpukpru mmọ ke idem mbufo ẹfepiyatesịt ye ifụtesịt ye idiọkn̄kpọ ye isụn̄i, ẹkûnyụn̄ ẹyak mbubiam ikọ ọwọrọ mbufo ke inua.”Colossae 3:8.

“Mmama nte ebe mi esimụmde idem akama ke ini n̄kpọ abiakde enye. Enye isisọpke iyat esịt, isiduatke mi, isinyụn̄ isụn̄ike mi.”—B. D., emi ọdọde ndọ isua 20.

SISỌP FEN NỌ OWO NYỤN̄ NAM EMEM.

“Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye owo.”Colossae 3:13.

“Isimemke utom ndimụm idem n̄kama ke ini n̄kpọ abiakde owo, ndien emekeme nditịn̄ ikọ mîdịghe anam se idibiakde ebe m̀mê n̄wan fo. Utọ ini oro ke ọfọn ndifen nnọ owo. Ndọ idifọnke edieke n̄wan ye ebe mîsifenke inọ kiet eken.”—A. B., emi ọdọde ndọ isua 34.

SINỌ OWO N̄KPỌ.

“Ẹnọ owo n̄kpọ, ndien ẹyenọ mbufo n̄kpọ. . . . Koro udomo eke mbufo ẹdade ẹdomo ẹnọ owo, ke mmọ ẹdida ẹdomo ẹnọ mbufo ke usiene.”Luke 6:38.

“Ebe mi ọdiọn̄ọ se nsimade esinyụn̄ anam n̄kpọ ọnọ mi ke ini mmendorike enyịn. Ami n̄ko mmesikere m̀mê nso ke n̄kponyụn̄ nnam man nnem enye esịt. Imesisak imam etieti.”—H. K., emi ọdọde ndọ isua 44.

ẸKA ISO ẸNAM EMEM ODU KE UFỌK MBUFO

Mbon oro ẹketịn̄de se ikotde mi ẹnọ mme andiwet Ẹdemede! ẹdi owo ifan̄ kpọt ke otu ediwak miliọn mbon oro Bible an̄wamde mmọ ẹnyene mme edu emi ẹsinamde emem odu ke ufọk. * Idem ke ini ndusụk owo ke ubon mmọ mîmaha nditiene mmọ nnam item Bible, mmọ ẹkụt ke ukeme oro mmimọ isịnde ndinam emem itakke-tak sia Bible ọdọhọ ke “mmọ eke ẹyomde emem [ẹsikop idatesịt].”—Mme N̄ke 12:20.

^ ikp. 23 Edieke oyomde ndifiọk n̄kpọ en̄wen mban̄a se akpanamde man ubon fo ẹkop inemesịt, mbọk kot ibuot 14 ke n̄wed Mme Ntiense Jehovah emi, Nso ke Bible Enen̄ede Ekpep? N̄wed emi odu n̄ko ke www.jw.org/efi. Se n̄ko ebiet emi okụtde SE BIBLE EKPEPDE > SE IDIN̄WAMDE UBON.

Kpep N̄kpọ En̄wen

ẸDEMEDE!

Nte Ẹkpefende Ẹnọ Kiet Eken

Ntak emi esisọn̄de ebe ye n̄wan ndifen nnọ kiet eken? Kot mi kop nte Bible ekemede ndin̄wam mbufo.

ẸDEMEDE!

Nte Akpakpan̄de Utọn̄

Ima esinam owo akpan̄ utọn̄ okop se owo etịn̄de. Kpep nte ekemede nditịm n̄kpan̄ utọn̄.