Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NOVEMBER 2015

 NDI ẸKEBOBOT?

Ikpaidem Ekpọk Australia Emi Etiede N̄kukịm N̄kukịm

Ikpaidem Ekpọk Australia Emi Etiede N̄kukịm N̄kukịm

EKPỌK Australia emi etiede n̄kukịm n̄kukịm (Moloch horridus) esikot mmọn̄ osio ke mbịtmbịt ntan, mbịtmbịt ofụm, ye mbara. Ekem mmọn̄ emi esisan̄a okodụk enye inua man enye ọn̄wọn̄. Enye esisan̄a didie anam emi? Ekeme ndidi nte ikpaidem esie etiede anam.

Nte ikpaidem ekpọk emi etiede esinam enye ekeme ndikot mmọn̄ ke isọn̄ ndọn̄ ke ikpọk esie. Mmọn̄ emi ndien ayasan̄a ke idak ikpọk emi ekesịm enye inua

Kere ise: Ikpọk ọyọyọhọ ikpaidem ekpọk emi etiede n̄kukịm n̄kukịm mi. Ndusụk ntaifiọk ẹdọhọ ke mbara emi ọduọhọde ekpọk emi ke idem ẹsiwere odụk idak ikpọk esie, ekem asan̄a ke idak ikpọk emi okodụk enye inua.

Edi ekpọk emi esinam didie okot mmọn̄ ke ukot esie tutu mmọn̄ emi ọdọk ekesịm enye inua? Enye esinyụn̄ anam didie okot mmọn̄ osio ke isọn̄ ke ini idịbi esie otụkde mbịtmbịt isọn̄?

Ntaifiọk ẹnam ndụn̄ọde tutu ẹkekụt nte ekpọk emi esisan̄ade anam emi. Mmọ ẹdọhọ ke ekpọk emi enyene n̄kpri n̄kpri ndudu ke ikpaidem esie emi mmọn̄ ekemede ndito do nsan̄a n̄kesịm enye inua.

Janine Benyus, akwaowo ke itieutom emi ẹsisede nte n̄kpọ-obot etiede man ẹsio mbufa n̄kpọ ẹdi, ọdọhọ ke nte ekpọk emi esisan̄ade ada mbịtmbịt ntan, mbịtmbịt ofụm, ye mbara enyene mmọn̄, ayan̄wam ntaifiọk ẹsio n̄kpọ emi edikemede ndikot mmọn̄ nsio ke mbịtmbịt ofụm man ufọk ebịt ye nte ke mmọ ẹyeda n̄kpọ emi n̄ko ẹnam ẹnyene edin̄wọn̄ mmọn̄.

Afo ekere didie? Ndi ekpọk emi enyenede utọ ikpaidem emi okofoforo? Mîdịghe ndi ẹkebobot enye?