Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NOVEMBER 2015

 SE BIBLE ETỊN̄DE ABAN̄A

Ubuene

Ubuene

Kpa ye ofụri se ẹnamde man mme owo ẹkûbuene, ata ediwak owo ke ofụri ererimbot ẹsụk ẹbebuene.

Didie ke mme ubuene ẹkeme ndikop inemesịt?

SE MME OWO ẸDỌHỌDE

Ediwak owo ẹkere ke imọ owo kpọt ekeme ndikop inemesịt ye nte ke owo emi enyenede okụk edi n̄kpọ ke ererimbot emi. Ndusụk owo ẹkere ke mme ubuene ikemeke-keme ndikop inemesịt sia mmọ mînyeneke okụk ika n̄wed, ika eti ufọkibọk, inyụn̄ idep mme n̄kpọ eken oro mmọ ẹyomde.

SE BIBLE ỌDỌHỌDE

Bible idọhọke ke inyene esinam owo okop inemesịt. Edi ọdọhọ ke se isinọde owo ata inemesịt edi owo ndidi ufan ye Andibot enye. Matthew 5:3 ọdọhọ ete: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.” Inamke n̄kpọ m̀mê owo enyene okụk m̀mê inyeneke, owo emi ọdiọn̄ọde ke imoyom Abasi ke uwem imọ esiyom ndifiọk nte Abasi ọdọhọde ẹnam n̄kpọ. Ndien emi esinam enye ekpep Bible onyụn̄ edifiọk mme n̄kpọ emi ọdọn̄de enye esịt onyụn̄ anamde esịt ana enye sụn̄. Se isinamde owo enen̄ede okop inemesịt edi oro.

Mbon oro ẹdiọn̄ọde se Bible ekpepde ẹnyụn̄ ẹnamde item esie ẹdiọn̄ọ nte mmọ ẹdude uwem mbak mmọ ẹdinen̄ede ẹbuene. Ke uwụtn̄kpọ, mmọ isin̄wọn̄ke sika, isịnke un̄wọn̄, inyụn̄ in̄wọn̄ke mmịn ibe ubọk sia Bible owụt ke mme n̄kpọ emi ifọnke owo ke idem. Mme n̄kpọ ntem esitahade owo onyụn̄ ekeme ndinam owo ọdọn̄ọ onyụn̄ abiat okụk ọsọbọ idem.—Mme N̄ke 20:1; 2 Corinth 7:1.

Bible akpan idiọkitọn̄ ye uma-inyene. (Mark 4:19; Ephesus 5:3) Utọ item emi ekeme ndin̄wam owo okûbiat okụk ke mbre mfọniso okûnyụn̄ ama okụk sia Bible ọdọhọ ke “ima okụk” edi “orụn̄ kpukpru orụk idiọkn̄kpọ.” (1 Timothy 6:10) Ikọ Abasi ọdọhọ ete: “Idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” (Luke 12:15) Ke nditịn̄ ibio ibio, okụk ikemeke ndidep uwem. Edi ndinam item Bible emi ekeme ndinam inen̄ede ikop inemesịt.

Okposụkedi emi mme ubuene ẹsifiọn̄ọde-fiọn̄ọ ubọk ẹyom se ẹdade ẹka inua, se ẹsịnede, ye ebiet emi ẹdụn̄de, mmọ ẹsụk ẹkeme ndikop inemesịt edieke mmọ ẹyụhọde ye se mmọ ẹnyenede ẹnyụn̄ ẹdude uwem nte Abasi ọdọhọde. Mmọ ẹfiọk ke se Bible etịn̄de emi edi akpanikọ: “Edidiọn̄ Jehovah ofori owo, enye inyụn̄ idianke ubiak ke esịt.”—Mme N̄ke 10:22.

ITIE BIBLE EMI EDIN̄WAMDE FI: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.”—Matthew 5:3.

 Ndi ini eyedi emi owo ndomokiet mîdibueneke?

SE BIBLE ỌDỌHỌDE

Okposụkedi emi mme owo mîkemeke ndinam ubuene etre, ini ama ekem, Abasi eyetre ubuene ofụri ofụri. Enye oyosio se inamde mme owo ẹbuene, oro edi, mme idiọkowo ye ukara emi ẹkerede ẹban̄a idemmọ kpọt. (Ecclesiastes 8:9) Abasi oyosobo ukara owo efep. Obio Ubọn̄ esie, oro edi, ukara esie ke heaven, ọyọnọ kpukpru owo ke ofụri isọn̄ emi se inanade mmọ. Bible ọdọhọ ke Edidem Obio Ubọn̄ Abasi ọyọnọ mme ubuene se mmọ ẹyomde. “Enye ayanyan̄a ubuene emi esemede oyom un̄wam . . . Enye ayatua usụhọde owo ye ubuene mbọm, oyonyụn̄ anyan̄a ukpọn̄ mme ubuene.”—Psalm 72:12-14.

Ofụri isọn̄ ayakabade Paradise, ndien kpukpru owo ẹyenyene ufọk ye udia, owo ndomokiet idinyụn̄ ibueneke. Abasi eketịn̄ aban̄a ikọt esie ke n̄wed Isaiah ete: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. . . . Ndimek ikọt mi ẹyedia ufọn utom ubọk mmọ ọyọhọ ọyọhọ.” (Isaiah 65:21, 22) Utu ke ndifọfiọn̄ọ ubọk nyom se ẹdidiade, Jehovah ayanam “usọrọ udia emi enyenede isek ọnọ kpukpru owo” onyụn̄ ọnọ mmọ mme n̄kpọ eken oro ẹdinamde uwem enen̄ede enem.—Isaiah 25:6.

NTAK EMI EKPEBEHEDE FI?

Nditie n̄kere un̄wọn̄ọ Abasi emi aban̄ade ererimbot emi owo ndomokiet mîdibueneke esinam mbon oro ẹbuenede ẹdiọn̄ọ ke Abasi ekere aban̄a mmimọ ye nte ke mfịna mmimọ ọmọn̄ etetre. Ndinyene utọ idotenyịn emi ekeme ndinam owo ọyọ nsọn̄ọn̄kpọ idahaemi.

ITIE BIBLE EMI EDIN̄WAMDE FI: “Enye ayanyan̄a ubuene emi esemede oyom un̄wam . . . Enye ayatua usụhọde owo ye ubuene mbọm, oyonyụn̄ anyan̄a ukpọn̄ mme ubuene.”—Psalm 72:12, 13.

Kpep N̄kpọ En̄wen

Nso Idi Obio Ubọn̄ Abasi?

Anie edi Edidem Obio Ubọn̄ Abasi, ndien nso ke Obio Ubọn̄ Abasi edinam?

Ntak Emi Abasi Ayakde Idiọkn̄kpọ ye Ufen Ẹdu?

Didie ke idiọkn̄kpọ ọkọtọn̄ọ, ndien ntak emi Abasi ayakde idiọkn̄kpọ aka iso? Ndi ufen eyetre tutu amama?

Didie ke Mme Edumbet Bible Ẹn̄wam Nnyịn?

Jesus ama etịn̄ ntak emi iyomde ndausụn̄ onyụn̄ etịn̄ edumbet iba emi okponde akan.