Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  September 2015

 IBUOTIKỌ MAGAZINE EMI | NDI AMAYAK MFỊNA EMEN FI EMEN?

Mfịna: Mfụhọ ye Iyatesịt

Mfịna: Mfụhọ ye Iyatesịt

NDI mfụhọ m̀mê iyatesịt adia fi idem? Edieke edide ntre, udûnyeneke ini m̀mê odudu unam se ikam idide akpan n̄kpọ inọ fi. Ntre, nso ke akpanam? *

UWỤTN̄KPỌ KIET KE BIBLE: DAVID

Edidem David ama esifụhọ, esịt ama esinyụn̄ etịmede enye ndusụk ini. Nso ikan̄wam enye aka iso ọyọ mfịna esie? Enye akayak kpukpru n̄kpọ esịn Abasi ke ubọk. (1 Samuel 24:12, 15) Enye n̄ko ama esiwet nte eketiede enye ke idem. Ndien enye ama esibọn̄ akam kpukpru ini sia enye ọkọbuọtde idem ye Abasi. *

SE GREGORY ANAMDE

Nte iketịn̄de ke akpa ibuotikọ, Gregory ọdọn̄ọ udọn̄ọ emi esinamde esịt etetịmede enye kpukpru ini. Enye ọdọhọ ete: “Mma nsitịmede esịt mbe nde.” Nso ikan̄wam Gregory? Enye ọdọhọ ete: “Se ikan̄wamde mi edi ndinyịme n̄wan mi ye mme ufan mi ẹn̄wam mi. Mma nnyụn̄ n̄ka n̄kokụt dọkta man mfiọk se ifịnade mi. Ke mma n̄kokpụhọde nte nsinamde n̄kpọ, idem ama ọtọn̄ọ ndifere mi. N̄kayakke ekikere adia mi idem. Okposụkedi emi esịt esitịmerede mi ndusụk ini, idahaemi mmọdiọn̄ọ ndusụk n̄kpọ oro ẹsinamde emi etịbe, mmonyụn̄ mfiọk ndiyọ udọn̄ọ mi.”

“Esịt eke adarade ọkọk ubiak.”—Mme N̄ke 17:22

SE AKPANAMDE

Edieke mfụhọ m̀mê iyatesịt adiade fi idem, nam emi ise:

  • Wet nte esitiede fi ke idem.

  • Tịn̄ se ifịnade fi nọ owo ke ubon mbufo m̀mê ufan fo.

  • Fiak kere nte esede idemfo nyụn̄ bụp idemfo ete: ‘Nso inam n̄kere utọ n̄kpọ emi mban̄a idemmi? Ndi se n̄kerede emi enen?’

  • Kûda ini oro akpadade anam akpan n̄kpọ utie utịmede esịt, uyat esịt, m̀mê udiọk idemfo esịt. *

Se Anade Eti: Ediwak ini, idịghe se iwọrọde nnyịn esinam ifụhọ m̀mê itịmede esịt, esidi nte isede se iwọrọde nnyịn.

^ ikp. 3 Ndusụk mbon emi ẹnyenede mfịna emi, udọn̄ọ edi ntak, ndien ekeme ndiyom mmọ ẹka ufọkibọk. Ẹdemede! imekke usọbọ ekededi inọ owo. Owo kiet kiet enyene nditịn̄ enyịn ndụn̄ọde nsio nsio usọbọ oro ẹdude, ndien ekem enye anam ubiere idemesie.

^ ikp. 5 Ediwak psalm ke Bible ẹdi mme akam emi David ekesibọn̄de okonyụn̄ ewetde enịm.

^ ikp. 13 Edieke oyomde ndifiọk n̄kpọ en̄wen mban̄a emi, kot ibuotikọ emi “Se Akpanamde ke Ini Esịt Etịmerede Fi,” ke Enyọn̄-Ukpeme eke July 1, 2015.