Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! SEPTEMBER 2015

 SE IDIN̄WAMDE UBON | MME UYEN

Ke Ini Afo ye Owo Emi Ọkpọkọdọde Ẹdian̄arede

Ke Ini Afo ye Owo Emi Ọkpọkọdọde Ẹdian̄arede

SE ISITỊBEDE

“N̄kekere ke mmokụt owo emi ndidọde. Eketie mi nte ufan emi eyenen̄ede ọfọn ye ami. Edi ke mma n̄kanam ufan ye enye ọfiọn̄ iba kpọt, ima idian̄ade. N̄kpenịmke ke n̄kpọ emi eketiede nte n̄kpa n̄kpa edidian̄ade nnyịn akpabiara ke edikep enyịn!”—Anna. *

“Eketie mi nte ẹkebot nnyịn mbiba ẹnọ kiet eken. N̄kekere ke idụhe se idinamde nnyịn ikûdọ ndọ. Edi nte ini akakade, mma ntọn̄ọ ndikụt ke n̄kpọ itiehe nte n̄kekerede. Ke ini n̄kokụtde ke idifọnke ndidọ enye, mma ndọhọ enye yak idian̄ade.”—Elaine.

Ndi akanam se itịn̄de emi ọwọrọ fi? Edieke edide ntre, ibuotikọ emi ayan̄wam fi.

SE AKPANADE ỌDIỌN̄Ọ

Ke ini n̄kaiferi ye akparawa ẹdian̄arede, esibiak mmọ mbiba. N̄kaiferi emi ekerede Sarah ama adian̄ade ye owo emi enye okoyomde ndidọ. Mmọ ẹkedi ufan ọfiọn̄ itiokiet kpọt. Enye ọdọhọ ete: “Ama abiak mi tutu. Ami ye enye ikedi itai ye aban̄. N̄kenịmke ke n̄kpọ ekeme ndidian̄ade nnyịn. Edi usen kiet, ima idian̄ade. Ndien ke ini n̄kopde mme ikwọ emi ẹkesinemde nnyịn mbiba, mma nsiti nte uwem ekesinemde nnyịn ini oro. Ke ini n̄kade mme ebiet emi ami ye enye ikesisan̄ade ntre ika, esibiak mi nte enye mîdụhe do ye ami. Kpa ye oro edide ami n̄kọdọhọ yak idian̄ade, okosụk ababiak mi.”

Kpa ye oro esibiakde owo, ndidian̄ade ekeme ndikam ndi ke ufọn mbufo. Elaine ọdọhọ ete: “Uyomke ndinam n̄kpọ emi edibiakde ufan fo. Edi ọmọdiọn̄ọ ke ebebịghi awawara ayabiak mbufo mbiba edieke mbufo ẹnamde ufan emi mînaha ibuot.” Sarah esịn kpa ke uyo oro. Enye ọdọhọ ete: “N̄kere ke edieke mûkopke inem ye owo ke ini ẹsụk edide ufan, etie nte udûkopke inem ẹma ẹdọ ndọ, ntre ndidian̄ade edikam ifọn ye mbufo.”

Mbufo ndidian̄ade iwọrọke ke okwo okụre. N̄wan ye erenowo ẹsinam ufan man ẹfiọk m̀mê ọyọfọn mmimọ idọ kiet eken. Edieke afo m̀mê owo emi oyomde ndidọ okụtde ke mbufo idifọnke ye kiet eken, ọkpọfọn mbufo ẹdian̄ade. Edieke emi etịbede, iwọrọke ke okwo okụre. Enyene mme n̄kpọ emi akpanamde. Nte nso?

 SE AKPANAMDE

Kûnam nte se itịbede ibiakke fi. Elaine, emi iketịn̄de iban̄a, ọdọhọ ete: “Ama abiak mi sia enye ekedi ata ufan mi.” Idiọkke ndifụhọ ke ini afo ye ata ufan fo ẹdian̄arede. Akparawa emi ekerede Adam ọdọhọ ete: “Sia mbufo ẹkedide ufan, idụhe nte ndidian̄ade mîdibiakke fi, idem ọkpọkọm ekedi ke ufọn mbufo mbiba.” Ekeme nditie fi nte eketiede Edidem David ke ini mfụhọ. Enye ọkọdọhọ ete: “Mmanam mmọn̄eyet mi ọtọ emen bed mi.” (Psalm 6:6) Ndinyịme ke se iketịbede abiak fi edi akpa n̄kpọ emi akpanamde man efre aban̄a se iketịbede oro. Ntre, kûnam nte n̄kpọ emi ibiakke fi.—Se se Bible etịn̄de ke Psalm 4:4.

Dian idem ye mbon emi ẹmade fi. Ekeme ndidi emi idimemke. Anna, emi iketịn̄de iban̄a, ọdọhọ ete: “Ke nsonso oro, n̄koyomke ndikụt owo ndomokiet. N̄koyom ndidu ikpọn̄ man n̄kere mban̄a ofụri se iketịbede ye se ikanamde n̄kpọ etie ntre.” Edi nte ini akakade, Anna ama edikụt ke ọfọn ndidian idem ye mbon emi ẹmade enye man mmọ ẹsọn̄ọ enye idem. Enye ọdọhọ ete: “Mmekeme ndinen̄ede n̄kere n̄kpọ idahaemi. Ndien se iketịbede ibiakke mi aba nte ekesibiakde mi akpa.”—Se se Bible etịn̄de ke Mme N̄ke 17:17.

Kpep n̄kpọ to se iketịbede. Bụp idemfo mme mbụme emi: ‘Ndi se iketịbede emi anam n̄kụt se mmen̄kanamke ọfọn? Edieke edide ntre, nso ke ndinam isan̄ en̄wen?’ N̄kaiferi emi ekerede Marcia ọdọhọ ete: “Nte ini akakade, mma n̄keme nditịm n̄kere ofụri se iketịbede. Edi ama ada ini mbemiso n̄kemede ndinam emi.” Adam emi iketịn̄de iban̄a esịn kpa ke uyo oro. Enye ọdọhọ ete: “Ama ada ofụri isua kiet mbemiso ntọn̄ọ ndifre mban̄a se iketịbede. Edi ama ada ata anyan ini mbemiso n̄kemede ndikpep n̄kpọ nto se iketịbede. Se iketịbede oro ama ekpep mi ediwak n̄kpọ aban̄a idemmi, ekpep mi nte n̄kpanamde n̄kpọ ye n̄wan, ye nte n̄kpodude uwem ye mme owo. N̄kpọ emi ibiakke mi aba nte ekesibiakde.”

Bọn̄ akam ban̄a n̄kpọ emi. Bible ọdọhọ ke Abasi ‘esikọk mbon oro esịt obụn̄ọde.’ (Psalm 147:3) Jehovah isimekke n̄wan m̀mê ebe inọ owo. Idịghe enye esinyụn̄ anam owo iba emi ẹkeyomde ndidọ ndọ ẹdian̄ade. Kpa ye oro, enye enen̄ede ekere aban̄a fi. Ntre, bọn̄ akam nọ enye; tịn̄ nte etiede fi ke idem nọ enye.—Se se Bible etịn̄de ke 1 Peter 5:7.

^ ikp. 4 Ẹkpụhọ mme enyịn̄ ke ibuotikọ emi.

Kpep N̄kpọ En̄wen

Ndi Mmeben̄e Idem Nditọn̄ọ Uyomima?

Se mbụme inan̄ emi ẹkemede ndin̄wam fi ebiere m̀mê emeben̄e idem nditọn̄ọ uyomima.

Ndi Mmeben̄e Idem Ndọ?

Ana ese kan̄a idemfo ọfọn man ọdiọn̄ọ m̀mê emeben̄e idem ndọ.Tịm se idem fo man ọdiọn̄ọ.