Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! JULY 2015

 SE BIBLE ETỊN̄DE ABAN̄A

Efịbe

Efịbe

Okposụkedi emi ediwak owo mîmaha ebe m̀mê n̄wan ọwọrọ aka akama owo en̄wen, mme owo ẹsụk ẹsesịn efịbe, ndien emi asuan ata ediwak ubon mfịn.

Nso idi efịbe?

SE MME OWO ẸDỌHỌDE

Ke ndusụk itie, mme owo ẹkere ke idiọkke owo ndiwọrọ n̄kpọn̄ n̄wan m̀mê ebe esie n̄ka n̄kama owo en̄wen. Mmọ ẹdọhọ ke emi idiọkke, akpan akpan edieke edide erenowo anam. Ndusụk owo inyụn̄ ikereke ke ndọ akpana ebịghi ke ofụri eyouwem.

SE BIBLE ỌDỌHỌDE

Bible ọdọhọ ke efịbe edi erenowo m̀mê n̄wan ndikpọn̄ owo emi enye ọdọde n̄wọrọ n̄kanam idan̄ ye owo en̄wen. (Job 24:15; Mme N̄ke 30:20) Efịbe edi mbubiam n̄kpọ ke enyịn Abasi. Ke eyo nditọ Israel, ẹkesiwowot owo emi esịnde efịbe. (Leviticus 18:20, 22, 29) Jesus ọkọdọhọ ke inaha mbet imọ ẹsịn efịbe.—Matthew 5:27, 28; Luke 18:18-20.

NTAK EMI EKPEBEHEDE FI

Owo emi esịnde efịbe abiat un̄wọn̄ọ emi enye akanamde ke usen ndọ esie. Enye n̄ko ‘edue Abasi.’ (Genesis 39:7-9) Efịbe ekeme ndidian̄ade nditọ n̄kpọn̄ ete ye eka mmọ. Se idiọkde ikan edi ke Bible ọdọhọ ke “Abasi eyekpe ikpe ye . . . mme esịn efịbe.”—Mme Hebrew 13:4.

“Yak kpukpru owo ẹkpono ndọ, ẹkûnyụn̄ ẹsabade bed ndọ.” Mme Hebrew 13:4.

 Ndi akpana ẹdian̄ade ndọ ke ini ẹsịnde efịbe?

SE BIBLE ỌDỌHỌDE

Bible ọdọhọ ke owo ekeme ndidian̄ade ndọ edieke n̄wan m̀mê ebe esie esịnde efịbe. (Matthew 19:9) Emi ọwọrọ ke edieke owo esịnde efịbe, ke n̄wan m̀mê ebe esie enyene unen ndibiere m̀mê iyaka iso idọ enye m̀mê ididọhọ. Enyene-idem enyene ndibiere n̄kpọ emi.—Galatia 6:5.

Edi Abasi iyomke n̄wan ye ebe ẹdian̄ade ke adan̄aemi mmọ mbiba ẹsụk ẹdude uwem. (1 Corinth 7:39) Abasi asasua owo emi adian̄arede ndọ ke ntak n̄kpri n̄kpọ, utọ nte owo ndidọhọ ke ebe m̀mê n̄wan imọ odorode imọ. Ntre, ndibiere m̀mê akpana adian̄ade ndọ idịghe n̄kpọ emi akpadade mfefere mfefere.—Malachi 2:16; Matthew 19:3-6.

“Ndọhọ mbufo nte owo ekededi eke osiode n̄wan esie ndọ, ke mîdịghe ke ntak use, ekeme ndinam n̄wan oro esịn efịbe.”Matthew 5:32.

Ndi efịbe edi idiọkn̄kpọ emi Abasi mîkemeke ndifen?

SE BIBLE ỌDỌHỌDE

Ihih. Bible ọdọhọ ke Abasi esifen ọnọ mbon oro ẹkabarede esịt ẹnyụn̄ ẹtrede idiọkn̄kpọ mmọ—esịnede efịbe. (Utom 3:19; Galatia 5:19-21) Bible etịn̄ n̄ko aban̄a iren ye iban emi ẹketrede ndisịn efịbe ẹkenyụn̄ ẹkabarede ẹdi ufan Abasi.—1 Corinth 6:9-11.

Abasi ama atua Edidem David mbọm. Enye ama esịn efịbe ye n̄wan owoekọn̄ esie. (2 Samuel 11:2-4) Bible ọdọhọ ke se David akanamde ama ọdiọk Abasi ke enyịn. (2 Samuel 11:27) Ke ẹma ẹkesua ẹnọ David, enye ama akabade esịt ndien Abasi ama efen ọnọ enye. Edi akana David ọbọ utịp idiọkn̄kpọ esie. (2 Samuel 12:13, 14) Nte ini akade, Edidem Solomon ama ọdọhọ ke “owo ekededi eke esịnde efịbe . . . anana ibuot.”—Mme N̄ke 6:32.

SE AKPANAMDE

Edieke edide emesịn efịbe, kpe Abasi ubọk ete efen ọnọ fi; nam ntre n̄ko ye n̄wan m̀mê ebe fo. (Psalm 51:1-5) Kpep ndisua efịbe nte Abasi asuade. (Psalm 97:10) Kûse ndise idan̄, kûtie ukere nte akpanamde idan̄ ye owo en̄wen, kûbre ndisịme mbre ye owo, kûnyụn̄ unam n̄kpọ ekededi emi ekemede ndinam akanam idan̄ ye owo en̄wen.—Matthew 5:27, 28; James 1:14, 15.

Edieke edide n̄wan m̀mê ebe fo esịn efịbe, nịm ke Abasi ọdiọn̄ọ nte etiede fi ke idem. (Malachi 2:13, 14) Bọn̄ akam dọhọ enye ọdọn̄ fi esịt onyụn̄ anam ọdiọn̄ọ se akpanamde, ndien “enye ọyọsọn̄ọ fi idem.” (Psalm 55:22) Edieke ebierede ndifen nnọ n̄wan m̀mê ebe fo nnyụn̄ n̄ka iso ndọ enye, oyoyom mbufo mbiba ẹnam se ẹkekeme man ẹfiak ẹkpere kiet eken.—Ephesus 4:32.

Ke David ama ekesịn efịbe onyụn̄ akabade esịt, prọfet Nathan ọkọdọhọ enye ete, ‘Jehovah emefen idiọkn̄kpọ fo.’2 Samuel 12:13.

Kpep N̄kpọ En̄wen

Ẹkûkpọn̄ Kiet Eken

Ndi ndinam akpanikọ ke ndọ ọwọrọ nditre efịbe kpọt?

Nso ke Akpanam man Ubon Fo Ẹkop Inemesịt?

Jehovah, emi edide Abasi inemesịt oyom mme ubon ẹkop inemesịt. Se nti item emi Bible ọnọde mme ebe, ibanndọ, mme ete ye eka, ye nditọ.