Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  March 2015

 SE BIBLE ETỊN̄DE ABAN̄A

Ufen

Ufen

Ndusụk owo ẹdọhọ ke Abasi amia nnyịn ufen; ndusụk ẹdọhọ ke ekpededi idịghe enye amia nnyịn ufen, ke enye idọn̄ke enyịn ke se iwọrọde nnyịn. Edi ndi se Bible etịn̄de edi oro? Se Bible etịn̄de ekeme ndikpa fi idem.

Ndi Abasi amia nnyịn ufen?

“Ke akpanikọ, Abasi inamke se idiọkde.”Job 34:12.

SE MME OWO ẸDỌHỌDE

Ndusụk owo ẹdọhọ ke kpukpru se itịbede edi uduak Abasi. Ntre, mmọ ẹnịm ke Abasi esimia nnyịn ufen. Ke uwụtn̄kpọ, ke ini oto-obot afanikọn̄ etịbede, mmọ ẹsikere ke Abasi amia mme anamidiọk ufen.

SE BIBLE ỌDỌHỌDE

Bible owụt ke idịghe Abasi amia nnyịn ufen. Ke uwụtn̄kpọ, Bible ọdọhọ ke ini idomo esịmde nnyịn, ke ekpedi ata ndudue ndidọhọ ke Abasi odomo nnyịn. Ntak-a? “Koro owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” (James 1:13) Emi ọwọrọ ke Abasi isidomoke nnyịn idomo inyụn̄ imiaha nnyịn ufen. Ndikpanam emi ekpedi ata idiọkn̄kpọ, edi “Abasi [isinamke] se idiọkde.”—Job 34:12.

Edieke mîdịghe Abasi amia nnyịn ufen, anie ndien amia? Mîdịghe nso isinam nnyịn ibọ ufen? Mme owo ẹsinam nnyịn ibọ ufen. (Ecclesiastes 8:9) N̄kpọ en̄wen emi esinamde ibọ ufen edi “n̄kpọntịbe unana idotenyịn.” Emi esitịbe edieke idude ke ebiet emi n̄kpọ etịbede. (Ecclesiastes 9:11) Bible ọdọhọ ke Satan emi edide “andikara ererimbot emi,” enen̄ede anam mme owo ẹbọ ufen sia ofụri ererimbot esịne enye ke ubọk. (John 12:31; 1 John 5:19) Ntre, Satan esinam mme owo ẹbọ ufen, idịghe Abasi.

 Ndi Abasi idọn̄ke enyịn ke ufen emi ibọde mi?

“Ke ofụri ini emi mmọ ẹkedude ke nnanenyịn emi ama abiak enye.”Isaiah 63:9.

SE MME OWO ẸDỌHỌDE

Ndusụk owo ẹkere ke Abasi idọn̄ke enyịn ke se iwọrọde nnyịn. Ke uwụtn̄kpọ, ete kiet emi esiwetde n̄wed ọkọdọhọ ke Abasi idọn̄ke enyịn ke ufen oro ibọde mi. Enye ọkọdọhọ ke edieke edide Abasi odu, ke anaedi “mbọm nnyịn isinamke enye.”

SE BIBLE ỌDỌHỌDE

Bible ọdọhọ ke mbọm nnyịn esinam Abasi ke ini enye okụtde nte ibọde ufen onyụn̄ ọdọhọ ke enye ọmọn̄ etetre ufen. Yak ineme n̄kpọ ita ke Bible emi ẹkemede ndidọn̄ nnyịn esịt.

Abasi okụt ufen emi ibọde mi. Sia Jehovah * esikụtde kpukpru n̄kpọ, enye okụt kpukpru mmọn̄eyet emi ẹduọkde ke ntak ufen, toto ke ini emi mme owo ẹketọn̄ọde ndibọ ufen tutu esịm mfịn. (Psalm 11:4; 56:8) Ke uwụtn̄kpọ, ke ini ẹkefịkde ikọt Abasi ke eset, Abasi ọkọdọhọ ete: “Ke akpanikọ, mmokụt ukụt ikọt mi.” Edi ndi enye okototop enyịn ese kpọt? Ihih, enye ọkọdọhọ ke ‘imetịm ifiọk ubiak mmọ.’ (Exodus 3:7) Ndifiọk ke Abasi okụt ofụri ufen emi ibọde mi ọsọn̄ọ ediwak owo idem. Abasi okụt idem mme idomo emi nnyịn isobode emi mbon en̄wen mîkwe mînyụn̄ itịmke ifiọk.—Psalm 31:7; Mme N̄ke 14:10.

Ke ini ibọde ufen, mbọm nnyịn esinam Abasi. Jehovah Abasi esikụt ufen emi ibọde, mbọm nnyịn esinyụn̄ anam enye. Ke uwụtn̄kpọ, ama abiak Abasi ke ini ikọt esie ke eset ẹkebọde ufen. Bible ọdọhọ ete: “Ke ofụri ini emi mmọ ẹkedude ke nnanenyịn emi ama abiak enye.” (Isaiah 63:9) Okposụkedi emi Abasi enen̄erede okpon akan nnyịn, mbọm nnyịn esinam enye ke ini ibọde ufen. Onyụn̄ edi nte Bible ọdọhọde ke “Jehovah enen̄ede enyene esịt ima onyụn̄ atua owo mbọm.” (James 5:11) Ke adianade do, Jehovah esin̄wam nnyịn iyọ se iwọrọde nnyịn. —Philippi 4:12, 13.

Abasi ọmọn̄ etetre kpukpru ufen. Bible ọdọhọ ke Abasi ọmọn̄ etre kpukpru ufen emi nnyịn ibọde mi. Jehovah ayada Obio Ubọn̄ esie emi odude ke heaven okpụhọde kpukpru n̄kpọ ke isọn̄ emi man uwem enem kpukpru owo. Kop se Abasi edinamde ini oro mi: “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.” (Ediyarade 21:4) Nso kaban̄a mbon oro ẹma ẹkekpa? Abasi ayanam mmọ ẹset ẹfiak ẹdidu uwem mi ke isọn̄ ke ererimbot emi ufen mîdidụhe aba. (John 5:28, 29) Ndi mme owo ẹyesitie ẹti ufen emi mmọ ẹkesibọde? Ihih, koro Jehovah ọdọhọ ke “owo iditịghi aba mme akpa n̄kpọ, mmọ idinyụn̄ idụkke owo esịt.”—Isaiah 65:17. *

^ ikp. eki. 13 Bible ọdọhọ ke Abasi ekere Jehovah.

^ ikp. eki. 15 Edieke oyomde ndifiọk ntak emi Abasi ayakde mme owo ẹbọ ufen idahaemi ye nte enye editrede ufen, mbọk kot ibuot 8 ye ibuot 11 ke n̄wed Mme Ntiense Jehovah emi, Nso ke Bible Enen̄ede Ekpep?