Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  March 2015

 IBUOTIKỌ MAGAZINE EMI | NDI BIBLE KE ENYENYENE UFỌN?

Sitịn̄ Akpanikọ

Sitịn̄ Akpanikọ

SE BIBLE ETỊN̄DE: “Anie edidi esen ke tent [Abasi]? . . . Owo eke asan̄ade nte ọfọnde ama onyụn̄ anamde se inende onyụn̄ etịn̄de akpanikọ ke esịt esie.”Psalm 15:1, 2.

UFỌN ORO IDIDIADE: Ata ediwak owo ẹsima mbon emi ẹtịn̄de akpanikọ mînyụn̄ idiaha inọ. Edi edieke owo enyenede ifet ndidia inọ ndien owo ndomokiet idiọn̄ọke, se enye edinamde oyowụt utọ owo emi enye enen̄erede edi.

Raquel, emi esidepde n̄kpọ ọnọ kọmpeni mmọ, ọdọhọ ete: “Ndusụk mme anyamurua ẹma ẹdọhọ ke imọn̄ inọ mi ubọkedem. Mmọ ẹkedọhọ ke edieke ndepde n̄kpọ ye mmimọ, ke iyemen okụk oro ikpọnọde kọmpeni nnyịn nte usịn inọ mi. Edi mma nti ke Bible ọdọhọ isitịn̄ akpanikọ, ntre mma nsịn okụk emi. Ke ini akwaowo itieutom nnyịn okopde n̄kpọ emi, enye ama etetịm enyene mbuọtidem ke idem mi.”

Edieke Raquel ọkpọkọbọde okụk oro, ekeme ndidi enye okpokoforo ke esisịt ini. Edi afo ekere ke ẹkpenam enye nso edieke akwaowo itieutom mmọ okpokopde emi? Ndi owo ikposioho enye ke utom? Ndi owo en̄wen ekpenyịme ndida enye ke utom? Edi enyene se ikenen̄erede inam Raquel esịn okụk oro. Enye ikoyomke esịt afịna enye, ikonyụn̄ iyomke ndibiat enyịn̄ esie. Mme N̄ke 22:1 ọdọhọ ete: “Ọfọn ndimek eti enyịn̄ akan ediwak inyene; ndinyene unyịme ọfọn akan silver ye gold.”

Ẹkediọn̄ọ Jessie ke itieutom nte owo emi esitịn̄de akpanikọ mîsinyụn̄ idiaha inọ

Jessie n̄ko ama esitịn̄ akpanikọ inyụn̄ idiaha inọ ke itieutom mmọ. Enye okonyụn̄ edi owo emi ẹkemede ndiberi edem, ntre eteutom esie ama ama enye. Nso ufọn ke enye akadia? Ẹma ẹmenerede enye itie ẹnyụn̄ ẹsụhọde ibat hour oro enye esinamde utom. Ndien emi ama anam enye enen̄ede enyene ini esitie ye n̄wan ye nditọ esie onyụn̄ anam n̄kpọ Abasi.

Ke ini ndusụk owo ẹyomde ndida mme owo ke utom, mmọ ẹsika ẹbịne mbon emi mmọ ẹdiọn̄ọde ke ẹsitịn̄ akpanikọ isinyụn̄ idiaha inọ. Ke uwụtn̄kpọ, etubom kọmpeni kiet ke Philippines ama ọnọ leta ẹsọk ọfis Mme Ntiense Jehovah ke idụt oro ọdọhọ mmọ ẹdọhọ Mme Ntiense ẹdinam utom ke kọmpeni imọ. Enye ọkọdọhọ ke Mme Ntiense Jehovah “ẹsisịn idem ẹnam utom, ẹtịn̄ akpanikọ, inyụn̄ idiaha inọ.” Jehovah Abasi odot itoro ke n̄kpọ emi sia edi enye ekpep nnyịn ‘ndisua se idiọkde’ nnyụn̄ ‘mma se ifọnde.’—Amos 5:15.

Kpep N̄kpọ En̄wen

ETI MBỤK EMI OTODE ABASI!

Didie ke Mme Edumbet Bible Ẹn̄wam Nnyịn?

Jesus ama etịn̄ ntak emi iyomde ndausụn̄ onyụn̄ etịn̄ edumbet iba emi okponde akan.

ẸDEMEDE!

Mme Ido Emi Ẹsinamde Uwem Enem

Ediwak owo ẹsidọhọ, ‘Nam se esịt fo ọdọhọde, kûbọrọ owo.’ Ndi utọ ekikere oro ọfọn? Se nte item Bible mîsikpaha mmọn̄.