Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! MARCH 2015

 SE IDIN̄WAMDE UBON | MME UYEN

Mụm Idem Kama ke Ini N̄kpọ Ayatde Fi

Mụm Idem Kama ke Ini N̄kpọ Ayatde Fi

SE ISINAMDE ỌSỌN̄

“Mma nduat eyeneka mi nnyụn̄ mberede usụn̄ odudu odudu tutu ukwak oro odude ke edem usụn̄ oro etịbe odudu ke ibibene. Ini ekededi emi n̄kụtde odudu oro, mmesiti ke n̄kanam n̄kpọ nte ata eyenọwọn̄.”—Diane. *

“Mma nyat esịt ndọhọ ete mi nte, ‘Nso utọ ete ke afo ededi?’ nnyụn̄ ntọ usụn̄. Edi mbemiso usụn̄ oro eberede, mma n̄kụt ke iso ete mi ke ikọ emi abiak enye. Mma ntua n̄kpọfiọk, edi ufọn ikodụhe sia mma ntetịn̄.” —Lauren.

Ndi akanam amanam se Lauren ye Diane ẹkenamde emi? Edieke edide ntre, ibuotikọ emi ekeme ndin̄wam fi.

SE AKPANADE ỌDIỌN̄Ọ

Ndiduọ obom ekeme ndibiat fi enyịn̄. Briana, emi edide isua 21 idahaemi, ọdọhọ ete: “N̄kesikere ke akpana mme owo ẹdiọn̄ọ ke nsikemeke ndimụm idem n̄kama ke ini esịt ayatde mi. Edi mma ntọn̄ọ ndikụt ke mbon oro mîsimụmke idem ikama ke ini n̄kpọ ayatde mmọ ẹsinam n̄kpọ ndisịme ndisịme. Do ndien ke n̄kekere ke anaedi nte mme owo ẹsede mi edi oro.”

Bible ọdọhọ ete: “Owo eke ọsọpde iyatesịt ayanam ndisịme.”—Mme N̄ke 14:17.

Mme owo ẹsifehe owo ikponesịt kpa nte ẹsifehede bọmb

Iyatesịt ekeme ndinam mme owo ẹfefehe fi. Daniel emi edide isua 18 ọdọhọ ete: “Owo emi mîdiọn̄ọke ndimụm idem n̄kama ke ini esịt ayatde enye isinyeneke aba ukpono ke iso mbon oro ẹdude ke ebiet emi enye ọduọde obom.” Elaine, emi n̄ko edide isua 18, esịn kpa ke uyo oro ete: “Ikponesịt ifọnke. Mme owo ẹsifefehe owo ikponesịt.”

Bible ọdọhọ ete: “Kûdụk nsan̄a ye owo ekededi eke ọsọpde iyatesịt; kûnyụn̄ udụk ndụk ye owo ifụtesịt.”—Mme N̄ke 22:24.

Afo emekeme ndikpụhọde. Sara emi edide isua 15 ọdọhọ ete: “Ukemeke ndidiọn̄ọ kpukpru se iditịbede ye nte emi edibiakde fi, edi emekeme ndibiere ke imọ idiyakke se itịbede anam imọ inam se imọ mîkpanamke. Ufọn idụhe ndiduọ obom.”

Bible ọdọhọ ete: “Owo eke mîsọpke iyatesịt ọfọn akan ọkpọsọn̄ owo, owo eke akarade spirit esie onyụn̄ ọfọn akan owo emi akande obio.”—Mme N̄ke 16:32.

 SE AKPANAMDE

Biere se edinamde. Utu ke ndidọhọ ke nte imọ itiede edi oro, domo ndikpụhọde. Nịm ini emi edidade ikpụhọde, yak idọhọ ọfiọn̄ itiokiet. Ke ufan̄ ini oro, wet mme ukpụhọde oro anamde nịm. Ini ekededi emi ọduọde obom, wet (1) se iketịbede, (2) nte akanamde n̄kpọ, ye (3) se akpakanamde—ye ntak emi akpakanamde ntre. Ndien biere ke se edinamde edi oro isan̄ en̄wen emi ẹnamde se iyatde fi. Ti n̄ko ndiwet mme ini emi anamde ọfọn. Wet nte esịt ekenemde fi ke ama okomụm idem akama ke ini n̄kpọ abiakde fi.—Se se Bible etịn̄de ke Colossae 3:8.

Bet kan̄a mbemiso etịn̄de ikọ m̀mê anamde n̄kpọ. Ke ini n̄kpọ abiakde fi m̀mê owo ayatde fi esịt, kûtịn̄ akpa n̄kpọ emi odụkde fi esịt. Bet kan̄a. Duọk ibifịk edieke ekerede ke ayan̄wam fi. Erik emi edide isua 15 ọdọhọ ete: “Ke ini nduọkde ibifịk, emi esinam n̄keme ndikere n̄kpọ kan̄a mbemiso nnamde m̀mê ntịn̄de n̄kpọ emi ndituade n̄kpọfiọk.”—Se se Bible etịn̄de ke Mme N̄ke 21:23.

Kûse n̄kpọ edem kiet. Ndusụk ini, esịt esiyat fi sia esede n̄kpọ edem kiet kpọt—oro edi, se ifịnade fi. Domo ndise se ifịnade mbon en̄wen n̄ko. N̄kaiferi kiet emi ekerede Jessica ọdọhọ ete: “Idem ọkpọkọm mme owo ẹsọn̄ ido didie, mmesikere ke anaedi enyene se inamde mmọ ẹnam n̄kpọ ntre.”—Se se Bible etịn̄de ke Mme N̄ke 19:11.

Daha kan̄a edieke okụtde ke ọfọn anam ntre. Bible ọdọhọ ete: “Ke utọk mîka-isiahake kan̄a, daha.” (Mme N̄ke 17:14) Nte itie N̄wed Abasi emi owụtde, ndusụk ini ọfọn adaha ọkpọn̄ itie emi etiede ikọ ikọ. Ekem, utu ke ndika iso n̄kere se iketịbede nnyụn̄ nyak esịt ofụt fi, yom n̄kpọ nam. N̄kaiferi kiet emi ekerede Danielle ọdọhọ ete: “Ndika n̄kesịn̄ede idem esinam mfre mban̄a se iketịbede, n̄kûnyụn̄ nduọ obom.”

Kpep ndimen iso mfep ke n̄kpọ. Bible ọdọhọ ete: “Ẹyat esịt, edi ẹkûnam idiọkn̄kpọ. . . . Ẹneme ke esịt mbufo, ẹnyụn̄ ẹdop uyo.” (Psalm 4:4) Mfịna idịghe esịt ndiyat owo. Mfịna akam edi se owo anamde ke ini esịt ayatde enye. Akparawa emi ekerede Richard ọdọhọ ete: “Edieke ayakde se mbon en̄wen ẹnamde anam fi ọduọ obom, ọwọrọ amayak mmọ ẹkara fi. N̄wana nam n̄kpọ nte enyene ibuot owo, nyụn̄ men iso fep ke se iketịbede oro.” Edieke anamde emi, ọwọrọ amakan iyatesịt ubọk sia uyakke enye anam fi anam se mûkpanamke.

^ ikp. eki. 4 Ẹkpụhọ ndusụk enyịn̄ ke ibuotikọ emi.