Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! JANUARY 2015

Ufọk Emi Ẹdade Ẹti Ndiọkn̄kan N̄kpọekọn̄

Ufọk Emi Ẹdade Ẹti Ndiọkn̄kan N̄kpọekọn̄

ENYENE akamba ufọk kiet emi adade ekpere mben Akpa Motoyasu ke Hiroshima ke Japan. Ufọk oro ama okowụre mi ana ndon tọn̄ọ 1945. Ntak emi owo mîfiakke ibọp enye ke n̄kpọ nte isua 70 emi ẹbede?

Ẹkekụre ufọk emi ke 1915, ndien enye ekedi enyọn̄ iba. Ẹkeda brick ye mbat ẹbọp enye. Ẹkesibon mme ndise ke ufọk emi man mme owo ẹfiọk nsio nsio mbubehe oro ẹnamde ke obio. Edi kpukpru emi ama etre ke usenubọk Monday, August 6, 1945, ke ebede itiaita ke minit 15. Ẹma ẹsịne ke ubomofụm ẹduọk bọm ke obio Hiroshima. Ubomofụm oro akada ke enyọn̄ ufọk oro, ntre kpukpru mbon oro ẹkedude ke ufọk oro ẹma ẹkpan̄a. Akpa ekedi emi ẹduọkde utọ okopodudu bọm emi ke ini ekọn̄. Edi ufọk emi ikowụreke ofụri ofụri.

N̄wed kiet emi UNESCO * ẹkewetde ọdọhọ ke eyak ufọk emi ana ndon man mme owo ẹti ndiọkn̄kan n̄kpọekọn̄ oro akanam mme owo ẹbotde. Ke 1996, UNESCO ẹma ẹsịn ufọk emi ke otu mme itie ke ererimbot emi owo mîkpefreke.

Edi ufọk emi ẹyakde ẹnịm mi man mme owo ẹkụt ẹti ke ekọn̄ ifọnke inamke mme owo ẹtre ekọn̄. Idiọkitọn̄, ufreidụt, ye usua osụk ananam mme owo ẹn̄wana ekọn̄. Ntre, ndi ekọn̄ iditreke ke ererimbot emi?

Bible ọdọhọ ke eyetre! Psalm 46:9 ọdọhọ ete: “[Abasi] amanam ekọn̄ etre tutu esịm utịt isọn̄. Obụn̄ utịgha onyụn̄ okpok eduat n̄ken̄e n̄ken̄e; ọfọp mme chariot ekọn̄ ke ikan̄.” Abasi ayanam ukara esie, oro edi, Obio Ubọn̄ Abasi, ada itie ukara owo oro odude mfịn. Jesus Christ emi edide “Edidem ndidem” ke Abasi emek ete akara ke Obio Ubọn̄ emi.—Ediyarade 11:15; 19:16.

Ini oro ufọn ididụhe ndibọp m̀mê ndibot n̄kpọ nnịm man eti mme owo ke ekọn̄ ifọnke. Isaiah 65:17 ọdọhọ ke “owo iditịghi aba mme akpa n̄kpọ, [oro edi, mme afanikọn̄ ye nnanenyịn oro isobode mfịn] mmọ idinyụn̄ idụkke owo esịt.”

^ ikp. eki. 4 UNESCO ada aban̄a United Nations Educational, Scientific, and Cultural Organization.

Kpep N̄kpọ En̄wen

Nso ke Obio Ubọn̄ Abasi Edinam?

Se se ukara Abasi edinamde ke ererimbot.

Ufen Ọmọn̄ Etetre!

Abasi ọn̄wọn̄ọ ke imọn̄ itre kpukpru ufen ke ererimbot emi. Didie ke enye edinam oro, ndien ini ewe?