Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  January 2015

 SE BIBLE ETỊN̄DE ABAN̄A

Isọn̄

Isọn̄

Nso ke Abasi aduak aban̄a isọn̄ emi?

“Ntem ke Jehovah ọdọhọ, . . . kpa Andibot isọn̄ . . . , emi mîkobotke enye ke ikpîkpu, emi okobotde enye man ẹdụn̄ ke esịt.”—Isaiah 45:18.

SE MME OWO ẸDỌHỌDE

Ndusụk owo ẹdọhọ ke idịghe Abasi okobot isọn̄. Mbon en̄wen ẹdọhọ ke ererimbot emi etie nte urua, anyam ama ọnyọn̄. Ndusụk ufọkabasi ẹnyụn̄ ẹdọhọ ke isọn̄ edi ebiet emi Abasi odomode mme owo ese m̀mê mmọ ẹdot ndika heaven m̀mê hell.

SE BIBLE ỌDỌHỌDE

Bible ọdọhọ ke “Abasi okobot enyọn̄ ye isọn̄.” (Genesis 1:1) Abasi ọkọdọhọ akpa ete ye eka nnyịn ete: “Mbufo ẹtọt ẹnyụn̄ ẹwak ẹnyụn̄ ẹyọhọ ke isọn̄ ẹnyụn̄ ẹkan enye, ẹnyụn̄ ẹkara . . . kpukpru mme odu-uwem edibotn̄kpọ eke ẹnyọnide ke isọn̄.” (Genesis 1:28) N̄kụkụre se ikanamde mmọ ẹkpa ekedi nsọn̄ibuot. (Genesis 2:17) Ntem, Abasi okoyom isọn̄ odu ke nsinsi. Enye okoyom nti owo ẹdụn̄ ẹyọhọ isọn̄ emi ẹnyụn̄ ẹse ẹban̄a enye ke nsinsi.

 Ndi ẹyesobo isọn̄ emi?

“Enye owụk isọn̄ ke itie esie; idisehekede tutu amama, m̀mê ke nsinsi.”—Psalm 104:5.

SE MME OWO ẸDỌHỌDE

Ntaifiọk ẹsiak nsio nsio n̄kpọ emi ẹkemede ndisobo isọn̄ m̀mê ndinam owo okûkeme aba ndidụn̄ ke isọn̄, utọ nte ata ikpọ itiat ndito enyọn̄ nditọ isọn̄ n̄wụri, ikpọ obot nditop mbomo mfụk ofụri isọn̄, utịn nditak nsịt nsịt tutu idụhe aba, m̀mê ererimbot ndifiop mbe ubọk. Mmọ ẹdọhọ n̄ko ke ẹkeme ndisuan idiọk ofụm ye n̄kpri unam udọn̄ọ ke ererimbot n̄wot mme owo mîdịghe ẹduọk bọm ẹsobo ofụri ererimbot.

SE BIBLE ỌDỌHỌDE

Abasi ikpụhọkede se enye akaduakde aban̄a isọn̄ emi. Ikọ Abasi ọdọhọ ete: “Isọn̄ ada ke nsinsi.” (Ecclesiastes 1:4) N̄ko, ẹdisụk idodụn̄ ke isọn̄ emi ke nsinsi. Bible ọdọhọ ke “ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

NTAK EMI EKPEBEHEDE FI?

Ediwak owo ẹdia isọn̄ emi ke en̄weme sia mmọ ẹkere ke ẹyesobo isọn̄ emi ẹfep usen kiet. Utọ ekikere emi iyakke mme owo ẹdori enyịn ke ini iso, edi anam mmọ ẹdu uwem ikereke n̄kpọn̄. Emi ekeme ndinam uwem efek owo. Edi edieke inịmde ke imekeme ndidu uwem ke nsinsi ke isọn̄, iyanam mme ubiere oro ẹdifọnde ye nnyịn ye mbon nnyịn idahaemi ye ke ini iso.

Ndi mme owo ẹdika ikodụn̄ ke heaven?

“Heaven enyene Jehovah, edi enye ada isọn̄ ọnọ nditọ owo.”—Psalm 115:16.

SE MME OWO ẸDỌHỌDE

Ediwak owo ẹkere ke kpukpru nti owo ẹdika heaven.

SE BIBLE ỌDỌHỌDE

Heaven enyene Abasi, edi enye ayak isọn̄ ọnọ mme owo ẹdụn̄. Bible etịn̄ aban̄a “isọn̄ oro edidide.” (Mme Hebrew 2:5) Jesus ekedi ata akpa owo ndika heaven. Bible ọdọhọ ke odu ndusụk owo emi ẹdikade heaven ndien ke enyene se mmọ ẹdikade do ikanam. Mmọ ẹyetiene Jesus ‘ẹkara isọn̄ nte ndidem.’—Ediyarade 5:9, 10; Luke 12:32; John 3:13.

NTAK EMI EKPEBEHEDE FI?

Bible idọhọke ke kpukpru nti owo ẹdika heaven. Edieke Abasi akpatan̄de kpukpru nti owo aka heaven, emi okpọwọrọ ke enye ikemeke ndinam se enye akaduakde aban̄a isọn̄ emi ye nte ke se enye ọkọn̄wọn̄ọde aban̄a mme owo ndidụn̄ ke isọn̄ ke nsinsi idịghe akpanikọ. Edi Ikọ Abasi ọdọhọ ete: “Dori enyịn ke Jehovah nyụn̄ tiene usụn̄ esie, ndien enye eyemenede fi ke enyọn̄ man ada isọn̄ enyene.”—Psalm 37:34.

Kpep N̄kpọ En̄wen

ENYỌN̄-UKPEME

Ndi Enyene Ntak Emi Ẹkebotde Isọn̄?

Ndi isọn̄ ayafiak etie nte ẹkeyomde enye etie?