Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NOVEMBER 2014

 SE BIBLE ETỊN̄DE ABAN̄A

Akam

Akam

Ndi odu eke esikopde akam nnyịn?

“O Andikop akam, kpukpru obụkidem ẹyedi ẹbịne fi.”—Psalm 65:2.

SE MME OWO ẸTỊN̄DE

Ndusụk owo ẹkere ke akam mmimọ ikaha ebiet. Mbon emi n̄kpọ anamde ẹsikere m̀mê Abasi akam okop akam mmimọ.

SE BIBLE ỌDỌHỌDE

“Enyịn Jehovah [Abasi] ke ese ndinen owo, enye onyụn̄ okop n̄kpeubọk mmọ; edi Jehovah inenke iso ye mbon emi ẹnamde idiọk.” (1 Peter 3:12) Omokụt do ke Abasi esikop akam. Edi enye enen̄ede ama ndikop akam mbon oro ẹnịmde ibet esie. Kop se itie Bible en̄wen etịn̄de mi aban̄a nte Abasi amade ndikop akam nnyịn: “Mbuọtidem emi nnyịn inyenede ke enye edi emi, ite, se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.” (1 John 5:14) Ntem, ana mbon emi ẹben̄ede Abasi n̄kpọ ẹdiọn̄ọ utọ eben̄e emi ekemde ye uduak esie.

 Didie ke ikpọbọn̄ akam?

“Ke ini ọbọn̄de akam, kûyịre nditịn̄ mfiak ntịn̄ n̄kpọ kiet.”—Matthew 6:7.

SE MME OWO ẸTỊN̄DE

Ẹsikpep mbon nsio nsio ido ukpono—utọ nte Buddha, Catholic, Hindu, ye Muslim ndibat n̄kwa akam nda mbọn̄ akam.

SE BIBLE ỌDỌHỌDE

Nnyịn ikpomụmke-mụm akam idọn̄ ke ibuot. Akpana akam emi ibọn̄de oto nnyịn esịt, ibọn̄ke nte ẹteteme nnyịn. N̄wed Abasi ọdọhọ nnyịn ete: “Ke ini ọbọn̄de akam, kûyịre nditịn̄ mfiak ntịn̄ n̄kpọ kiet, kpa nte mbon idụt ẹnamde, koro mmọ ẹkere ke nditịn̄ uwak ikọ edinam ẹkop akam mmimọ. Ntre, ẹkûtie nte mmọ, koro Abasi emi edide Ete mbufo ọfiọk mme n̄kpọ emi mbufo ẹyomde idem mbemiso mbufo ẹben̄ede enye.”—Matthew 6:7, 8.

NTAK EMI EKPEBEHEDE FI

Edieke owo mîbọn̄ke akam nte Abasi oyomde, akam oro ekeme ndiwọrọ ubiatini mîdịghe ayayat Abasi esịt. Bible ọdọhọ ke akam mbon oro mîmaha ndinịm ibet Abasi “edi n̄kpọ mbubiam” ọnọ enye.—Mme N̄ke 28:9.

Anie ke ikpọbọn̄ akam inọ?

Mbufo ẹyom Jehovah ke adan̄aemi ẹkemede ndikụt enye. Ẹseme ẹkot enye ke adan̄aemi enye ekperede.”—Isaiah 55:6.

SE MME OWO ẸTỊN̄DE

Ndusụk mme aka ufọkabasi ẹsibọn̄ akam ẹnọ Mary mîdịghe ẹbọn̄ ẹnọ mme angel ye mbon emi mmọ ẹsikotde Saint, oro edi, “ndisana owo.” Owo mmọ kiet edi “Saint” Anthony emi okotode Padua, emi ẹdọhọde ke enye esin̄wam mme owo ẹnam n̄kpọ Abasi ẹnyụn̄ ẹnyene se ẹdiade; en̄wen edi “Saint” Jude emi ẹdọhọde ke enye esin̄wam mbon nnanenyịn. Ediwak owo ẹsibọn̄ akam ẹnọ ndisana owo emi ye mme angel sia ẹkerede ke mmọ ẹyekpe Abasi ubọk ẹnọ mmimọ.

SE BIBLE ỌDỌHỌDE

Ikọt Abasi ẹkpenyene ndibọn̄ akam nnọ “Ete nnyịn emi odude ke heaven.” (Matthew 6:9) Bible ọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde.”—Phillippi 4:6.

Kpep N̄kpọ En̄wen

Nso ke N̄kpeben̄e Abasi?

Se ntak emi idọhọde ke Abasi isidaha mfịna nnyịn mfefere mfefere.

“Ẹka Iso Ẹben̄e, Ndien Ẹyenọ Mbufo”

Se uwụtn̄kpọ iba emi Jesus ọkọnọde ke Luke ibuot 11 ndiwụt ke Abasi esikop akam nnyịn.