Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NOVEMBER 2014

 SE BIBLE ETỊN̄DE ABAN̄A | EDISỌI MBIET

Edisọi Mbiet

Edisọi Mbiet

Ata ediwak owo ẹsikpono ndisọi mbiet, ndien mmọ ẹnam emi ke ofụri esịt. Edi ndi Bible ẹnyịme ẹkpono ndisọi mbiet? Ndi emi enem Abasi esịt?

Ndi mme Jew emi ẹkenamde n̄kpọ Abasi ke eyo Bible ẹma ẹsikpono ndisọi mbiet?

“Kûnam edisọi mbiet unọ idemfo m̀mê mbiet n̄kpọ ekededi eke odude ke heaven ke enyọn̄ m̀mê eke odude ke isọn̄ ke idak m̀mê eke odude ke mmọn̄ ke idak isọn̄. Kûnụhọ unọ mmọ, kûnyụn̄ uyak ẹnam fi anam n̄kpọ mmọ.” —Exodus 20:4, 5.

Idụhe itie ndomokiet ke Genesis esịm Malachi, emi ẹsiwakde ndikot Akani Testament, emi enyịmede ẹkpono edisọi mbiet

SE NDUSỤK OWO ẸNỊMDE

N̄wed emi ẹkotde New Catholic Encyclopedia ọdọhọ ke mme Jew ẹma ẹnyene ediwak ndise ye ndisọi mbiet, “ndien ke mmọ ẹma ẹsikpono mme mbiet emi ẹnyụn̄ ẹtuak ibuot ẹnọ mmọ.” Uwụtn̄kpọ oro n̄wed emi ọnọde edi mme ndise ediwak mfri, flawa, ye mme unam emi ẹkekapde ke ibibene temple ke Jerusalem.—1 Ndidem 6:18; 7:36.

SE AKPANADE ỌDIỌN̄Ọ

Se New Catholic Encyclopedia etịn̄de emi idịghe akpanikọ. Mme Jew oro ẹkenamde n̄kpọ Abasi ikokponoke baba kiet ke otu ndise oro ẹkekapde do ke temple mmọ. Ke nditịm ntịn̄, idụhe ebiet ndomokiet ke Bible emi ikụtde nte eyen Israel emi ekedide ata owo Abasi okponode edisọi mbiet.

SE BIBLE ỌDỌHỌDE

Abasi ọkọdọhọ ke Isaiah 42:8 ete: “Ndinọhọ baba owo kiet ubọn̄ mi, ndinyụn̄ nnọhọ ndisọi mbiet itoro mi.”

 Ndi mme Christian eyo mme apostle ẹma ẹsikama ndisọi mbiet ẹkpono Abasi?

“Nso ediomi ke temple Abasi odiomi ye ndem? . . . [Ẹkûtụk] n̄kpọ ndek.” —2 Corinth 6:16, 17.

“Esịt ekpekenen̄ede etek mme Christian eyo mme apostle ndikop owo oyomde ndimen edisọi mbiet n̄kenịm ke ufọkabasi. Edieke owo akpakade okonụhọ ọnọ mbiet oro m̀mê adade ke iso esie ọbọn̄ akam, mmọ ẹkpeda oro nte ukpono ndem.”—History of the Christian Church

SE NDUSỤK OWO ẸNỊMDE

New Catholic Encyclopedia ọdọhọ ete: ‘Owo ikemeke aba ndidọhọ ke akpa mme Christian ikesikamake mme mbiet ikpono Abasi. Ndise ẹyọyọhọ itie emi ẹkesibụkde akpa mme Christian. Ẹma ẹsida mme ndise ye mme mbiet ẹbana mme itie utuakibuot ye itie ubụkowo mmọ.’ *

SE AKPANADE ỌDIỌN̄Ọ

Mbịghi-n̄kan ndise ye mbiet emi ẹkụtde ke itie emi ẹkesibụkde mme Christian edi n̄kpọ nte isua 1,800. Emi ọwọrọ ke mmọ ẹkedu n̄kpọ nte isua 200 ke Jesus ama akakpa. Ntem, idịghe mme Christian eyo mme apostle ẹkenam se New Catholic Encyclopedia ọdọhọde oro. Owo inyụn̄ iwetke utọ n̄kpọ emi ke Matthew esịm Ediyarade, emi ẹsiwakde ndikot Obufa Testament. Owo ndikụt mme utọ mbiet oro ke itie emi ẹkesibụkde mme owo do ọwọrọ ke etisịm isua 200 tọn̄ọ Jesus akakpa, ke inua-okot mme Christian ẹma ẹtiene mme okpono ndem ẹkpono ndisọi mbiet man mbon oro ẹtiene mmọ ẹdụk ufọkabasi mmọ. *

SE BIBLE ỌDỌHỌDE

“Ẹfehe ẹkpọn̄ ukpono ndem.”—1 Corinth 10:14.

Ndi akpana isikama edisọi mbiet ikpono Abasi?

“Ẹkpeme idem ke ndem.”—1 John 5:21.

Idụhe itie ndomokiet ke Bible emi ọdọhọde ẹkama edisọi mbiet ẹkpono Abasi. Ntak edi oro Mme Ntiense Jehovah mîsikponoke ndisọi mbiet, mînyụn̄ ibonke mmọ ke ufọk mmọ m̀mê ke itie emi mmọ ẹsisopde idem ẹkpono Abasi

SE NDUSỤK OWO ẸNỊMDE

New Catholic Encyclopedia ọdọhọ ete: “Ke ini ẹtuakde ibuot ẹnọ mbiet, owo emi mbiet oro adade aban̄a esibọ ukpono oro. Ntre, ẹkeme ndimen ukpono oro ẹkpenọde owo ẹnọ mbiet emi adade aban̄a enye.”

SE AKPANADE ỌDIỌN̄Ọ

Ke ini Jesus ekekpepde mbet esie nte ẹkpebọn̄ke akam, enye ikọdọhọke mmọ ẹsikama edisọi mbiet ẹbọn̄ akam. Owo ikemeke ndikụt ndomo itie kiet ọtọn̄ọde ke Matthew esịm Ediyarade emi ọdọhọde ẹda edisọi mbiet ẹkpono Abasi.

SE BIBLE ỌDỌHỌDE

“Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.”—Matthew 4:10.

^ ikp. eki. 13 Mbiet emi ẹtịn̄de ẹban̄a mi esịne n̄ko ndise, idiọn̄ọ, edisọi mbiet, se ẹbotde-bot, ye n̄kpọ ekededi oro ẹkemede ndikpono.

^ ikp. eki. 14 Ediwak owo ke Egypt, Greece, ye India ẹma ẹsikpono ndisọi mbiet ini oro.

Kpep N̄kpọ En̄wen

Ndi Akpana Ituak Ibuot Inọ Mbiet?

Ndi Abasi enyịme ida mbiet ituak ibuot inọ enye?