Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  May 2014

 SE BIBLE ETỊN̄DE ABAN̄A

Okụk

Okụk

Ndi okụk edi ntak kpukpru orụk idiọkn̄kpọ?

“Ima okụk edi [ntak] kpukpru orụk idiọkn̄kpọ.”—1 Timothy 6:10.

SE NDUSỤK OWO ẸTỊN̄DE

Okụk edi ntak kpukpru orụk idiọkn̄kpọ.

SE BIBLE ỌDỌHỌDE

“Ima okụk” esinam nsio nsio ndiọi n̄kpọ ẹsịm owo, ikam idịghe okụk ke idemesie. Ke Bible, Edidem Solomon emi ekedide imọ owo ama etịn̄ ndiọi n̄kpọ ita emi ẹsiwọrọde mbon emi ẹmade okụk. Akpa, ọkpọsọn̄ ekikere: “Uwak n̄kpọ emi owo inyene enyenede iyakke enye ede idap.” (Ecclesiastes 5:12) Ọyọhọ iba, idiọkitọn̄: “Owo emi amade silver idiyụhọke ye silver, okụk inyụn̄ iyụhọke owo emi amade inyene.” (Ecclesiastes 5:10) Ọyọhọ ita, owo ndiyom ndibiat ibet: “Owo eke obụmerede oyom inyene iditreke ndidue.”—Mme N̄ke 28:20.

 Ndi okụk enyene ufọn?

Okụk esikpeme owo.Ecclesiastes 7:12.

SE NDUSỤK OWO ẸTỊN̄DE

Ama enyene okụk esịt eyenem fi, udunyụn̄ unyeneke mfịna.

SE BIBLE ỌDỌHỌDE

“Abian̄a abian̄a odudu inyene” esinam owo ekere ke ima inyene okụk, esịt eyenem imọ, ke imọ idinyụn̄ inyeneke mfịna. (Mark 4:19) Kpa ye emi mîdịghe akpanikọ, ‘okụk esinam owo enyene kpukpru se enye oyomde.’ (Ecclesiastes 10:19) Ke uwụtn̄kpọ, emekeme ndida okụk ndep udia ye ibọk nse mban̄a idem fo.—2 Thessalonica 3:12.

Okụk oyonyụn̄ an̄wam fi ese aban̄a ubon fo. Bible akam ọdọhọ ete: “Edieke owo ekededi mîtịmke n̄kpọ inọ ikọt esie, akpan akpan mbonufọk esie, enye akan̄ mbuọtidem.”—1 Timothy 5:8.

Didie ke akpada okụk anam n̄kpọ ke eti usụn̄?

Bem iso sụhọde tie bat se iditakde.Luke 14:28.

SE BIBLE ỌDỌHỌDE

Da okụk nam n̄kpọ nte Ikọ Abasi ọdọhọde. (Luke 16:9) Ọfọn owo anam akpanikọ ke mbubehe okụk okûnyụn̄ atahade okụk esie. (Mme Hebrew 13:18) Edieke mûyomke ndikama isọn, ‘kûyak usụn̄ uwem fo asan̄a ye ima okụk.’—Mme Hebrew 13:5.

Okposụkedi emi Bible mîkpanke owo ndikama isọn, enye ọdọhọ ke “andibọ ebuọt . . . edi ofụn andinọ ebuọt.” (Mme N̄ke 22:7) Kûdi ama okokụt n̄kpọ afo edep, sia “kpukpru owo eke ẹnamde n̄kpọ ke ibụmede iditreke ndidu ke unana.” (Mme N̄ke 21:5) Utu ke oro, ‘sio okụk nịm n̄kan̄ kiet’ oro edi, ama oyom ndidep akpan n̄kpọ, nịm okụk man akpada edep.—1 Corinth 16:2.

Bible ọdọhọ ‘isinọ owo n̄kpọ.’ (Luke 6:38) Ana mbon emi ẹyomde ndinem Abasi esịt ẹtat ubọk ẹnọ owo n̄kpọ sia “Abasi amama owo eke ọnọde ke idatesịt.” (2 Corinth 9:7) Ntre, “[kûfre] ndinam eti n̄kpọ ndinyụn̄ mbuana n̄kpọ ye mbon en̄wen, koro orụk uwa emi enen̄erede enem Abasi esịt.”—Mme Hebrew 13:16.