Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  May 2014

 SE IDIN̄WAMDE MME UBON | NDỌ

Edieke Ndọ Mbufo Mîtiehe Nte Ẹkekerede

Edieke Ndọ Mbufo Mîtiehe Nte Ẹkekerede

MFỊNA

Eketie nte afo ye owo emi oyomde ndidọ ẹmebiet kiet eken ke ata ediwak n̄kpọ. Edi idahaemi ẹma ẹkedọ ndọ mi-e, n̄kpọ itiehe aba nte ekekerede. Utu ke mbufo ndidi itai ye aban̄, mbufo ẹditie nte an̄wa ye eku.

Emekeme ndinam ndọ emi enem. Akpa kan̄a, yak ineme se ikemede ndidi ntak emi ndọ fo mîtiehe nte ekekerede.

NTAK EMI ESITỊBEDE

Uwem ufọkndọ. Ọkpọsọn̄ unam emi nnam oko, ukama nditọ, ye owo nditre ndifiọk nte okpodude uwem ye mme ukot isiyakke ndusụk ndọ ẹnem. N̄kpọ en̄wen emi esinamde emi etịbe edi edieke se owo mîkodorike enyịn etịbede, utọ nte unana okụk m̀mê owo kiet ke ubon ndidọn̄ọ mbịghi.

Se owo mîkemeke ndiyọ. Ediwak owo esidi ẹma ẹyom ndidọ ndọ, kpukpru se owo emi mmọ ẹyomde ndidọ anamde ọfọfọn. Edi ke mmọ ẹma ẹkenam ndọ, mmọ ẹdikụt ndien ke mmimọ isinemeke nneme, ikamake okụk inyụn̄ ikọkke mfịna ukem ukem. N̄kpọ emi ẹkesiyatde esịt ekem ẹfre ẹban̄a edidi se owo mîkemeke aba ndiyọ.

Mbufo ikpereke kiet eken aba. Edieke ẹsitịn̄de ikọ ntịme ntịme ẹnyụn̄ ẹnamde n̄kpọ ntre ntre ye kiet eken, emi ekeme ndinam mbufo ikpereke kiet eken aba, edidi se mbufo ẹkade nneme ye owo en̄wen.

Owo emi ọdọde itiehe nte ekekerede. Ndusụk owo ẹsikere ke owo emi mmimọ iyomde ndidọ “oto heaven,” idinamke ndudue. Utọ ekikere emi ifọnke sia edieke mfịna ọtọn̄ọde ke ẹma ẹkedọ ndọ, mmọ ẹdikere ke idịghe utọ owo oro ke mmimọ ikpọdọ.

 SE AKPANAMDE

Kûfre nti ido ebe m̀mê n̄wan fo. Nam emi ise: Wet nti ido ita emi ebe m̀mê n̄wan fo enyenede. Emekeme ndinịm se ewetde ke edem foto ndọ mbufo mîdịghe esịn ke fon oro akamade asan̄a. Anam anam afo ese se ekewetde emi man eti ntak emi ọkọdọde enye. Nditi nti ido esie ayanam ẹdu ke emem onyụn̄ anam fi efre aban̄a ndusụk n̄kpọ emi enye mînamke ọfọn.—Se se Bible etịn̄de: Rome 14:19.

Ẹyom ini ẹdu kiet. Ini emi mbufo mîkọdọhọ kan̄a ndọ, ẹkesinenem mbufo ndiyom ini man ẹdu kiet. Ntak mûnamke oro idahaemi? Yom n̄kpọ nam emi edinamde mbufo ẹdu kiet. Emi ayanam ẹnen̄ede ẹkpere kiet eken ẹnyụn̄ ẹyọ mfịna ekededi ke uwem.—Se se Bible etịn̄de: Mme N̄ke 5:18.

Tịn̄ nte etiede fi ke idem. Ndi se ebe m̀mê n̄wan fo anamde abiak fi? Edieke mûkemeke ndision̄o idem n̄kpọn̄ n̄kpọ emi, kûnam nte n̄kpọ itịbeke kûnyụn̄ udop enye uyo. Ka keneme n̄kpọ emi ye enye, edieke ekemede, yak edi kpa usen oro, edi nam emi emem emem.—Se se Bible etịn̄de: Ephesus 4:26.

Ndi emekeme ndision̄o idem n̄kpọn̄ se ebe m̀mê n̄wan fo etịn̄de m̀mê anamde, emi abiakde fi?

Kûkere ke ebe m̀mê n̄wan fo okokoi ayat fi esịt. Akanam mbufo itiehe-tie ibiere ke iyayat kiet eken esịt. Ntem edieke ebe m̀mê n̄wan fo ayatde esịt, dọhọ enye ke imọ ikohokoi iyat enye esịt nyụn̄ kpe enye ubọk. Ekem ẹneme se ẹkemede ndinam man ediyat kiet eken esịt. Ẹnam item Bible emi: “Ẹfọn ido ye kiet eken, ẹtua owo mbọm, ẹfen kiet eken ke ofụri esịt.”—Ephesus 4:32.

Diọn̄ọ ke ndọ esisan̄a ye ukụt. Bible ọdọhọ ke mbon oro ẹdọde ndọ “ẹyekụt ukụt.” (1 Corinth 7:28) Ntre, edieke okụtde utọ ukụt emi, kûsọsọp udọhọ ke ẹkenam ndudue ndidọ kiet eken. Ẹkam “ẹka iso ẹyọ kiet eken ẹnyụn̄ ẹfen kiet eken ke ofụri esịt,” man ẹtie ke emem.—Colossae 3:13.