Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! MAY 2014

 SE IDIN̄WAMDE MME UBON | MME UYEN

Se Akpanamde ke Ini Ẹnọde Fi Item

Se Akpanamde ke Ini Ẹnọde Fi Item

MFỊNA

Amy * emi edide isua 17 ọdọhọ ete: “Edieke owo ọnọde fi item, ọwọrọ ke enyene se mûnamke ọfọn. Mmọdiọn̄ọ ke idụhe eke akpamade ẹdọhọ ke enye inamke ọfọn.”

Owo emi mîmaha ndibọ item etie nte awat ubomofụm emi mîmaha ndinam se ẹdọhọde enye anam. Enye ekeme ndinyene akamba mfịna.

Ndi esisọn̄ fi ndikop item ete ye eka fo, mme andikpep, ye eke ikpọ owo eken? Edieke edide ntre, ibuotikọ emi ọmọn̄ an̄wam fi.

SE ANADE ỌFIỌK

Idụhe eke mîyomke item.

“Kpukpru nnyịn idedue ediwak ini.”—James 3:2.

Jessica ọdọhọ ete: “Edieke owo anamde se idiọkde, ikpanaha enye okop bụt ndibọ item.”

Owo ndinọ fi item iwọrọke ke edi idiọk owo.

“Jehovah * [asua] ọnọ owo eke enye amade, kpa nte ete anamde ye eyen eke enemde enye esịt.”—Mme N̄ke 3:12.

Tamara ọdọhọ ete: “Ke ini ẹnọde mi item, mmesikụt ke ikememke inọ owo oro ndidaha ndinọ mi item; mmesinyụn̄ mfiọk ke ima anam enye ọnọ mi item.”

Item ekeme ndinam fi etetịm ọfọn.

‘Bọ ntụnọ man enyene ọniọn̄.’—Mme N̄ke 8:33.

Deanne ọdọhọ ete: “Item esin̄wam owo enyene ibuot. Item ayanam ọfiọk nte mbon en̄wen ẹdade fi onyụn̄ an̄wam fi etre ndiọi edu emi mûkọdiọn̄ọke ke emenyene.”

 SE AKPANAMDE

Kûbọ ke iyatesịt. Emekeme ndiyat esịt ke ini ẹnọde fi item. Edi domo ndimụm idem n̄kama. Da nte ke afo ọnọ ekpri eyeneka fo ukem item oro. Ndi omokụt ke item oro enyene ufọn ndien? Fiak kere item oro ẹkenọde fi do nyụn̄ se m̀mê enyene ufọn.—Se se Bible etịn̄de: Ecclesiastes 7:9.

Theresa ọdọhọ ete: “Ndusụk ini emekeme ndiyat esịt ke ini ẹnọde fi item tutu efre ke owo oro akakam oyom ndin̄wan̄wam fi, ikoyomke ndiyat fi esịt.”

Sụhọde idem. Kûsịn item sia owo emi mîsibọhọ item edi owo ntan̄idem. Kûnyụn̄ uyak esịt ọduọ fi edieke okụtde ke oyom okpụhọde edu. Ama osụhọde idem, ọyọbọ item onyụn̄ okpụhọde. Ti ete ke item emi abiakde fi akan ekeme ndidi item emi edifọnde ye afo ikan. Edieke esịnde item emi, udubọhọ ufọn emi ọkpọbọde.—Se se Bible etịn̄de: Mme N̄ke 16:18.

Item emi abiakde fi akan ekeme ndidi item emi edifọnde ye afo ikan

Lena ọdọhọ ete: “Edieke oyomde ndidi ọdiọn̄ọ-idem-owo, ana ọbọ item. Edieke nnyịn mîbọhọ item inyụn̄ ikpụhọde, iyatua n̄kpọfiọk nte ini akade.”

Kọm owo emi ọnọde fi item. Ọkpọkọm ọsọsọn̄ fi ndinam item oro ẹnọde fi, sụk kọm owo emi ọnọde fi item oro. Owo oro amama fi onyụn̄ oyom n̄kpọ ọfọn fi.—Se se Bible etịn̄de: Psalm 141:5.

Carla ọdọhọ ete: “Inyeneke se iditakde fi edieke ọkọmde owo emi ọnọde fi item, akpan akpan edieke okụtde ke item oro ọyọfọn ye afo. Ọkpọkọm idifọnke, emekeme ndisụk n̄kọm enye ke ndidomo ndin̄wam fi.”

^ ikp. eki. 4 Ẹkpụhọ ndusụk enyịn̄ ke ibuotikọ emi.

^ ikp. eki. 11 Bible ọdọhọ ke Abasi ekere Jehovah.