Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  March 2014

 SE BIBLE ETỊN̄DE ABAN̄A

Ekondo

Ekondo

Ndi Abasi akada ata ata usen itiokiet obot ekondo nte ndusụk owo ẹdọhọde?

“Ke editọn̄ọ, Abasi okobot enyọn̄ ye isọn̄.” —Genesis 1:1.

SE BIBLE ỌDỌHỌDE

Bible isiakke usenọfiọn̄ emi Abasi okobotde ofụri ekondo edi Genesis 1:1 ọdọhọ ke ẹkebot mmọ “ke editọn̄ọ.” Ntaifiọk eyomfịn ẹnyịme ke ekondo enyene ntọn̄ọ. Mmọ ẹkam ẹtịn̄ ndondo emi ẹte ke ẹtie nte ekondo esịm n̄kpọ nte isua biliọn 14 idahaemi.

Bible ọdọhọ ke ẹkeda “usen” itiokiet ẹbot ekondo. Edi idọhọke ke ekedi ata ata usen itiokiet emi edide hour 24 ke usen. (Genesis 1:31) Se Bible okotde “usen” ndusụk ini isidịghe ata ata usen, edi esidi ata ediwak isua. Ke uwụtn̄kpọ, Genesis 2:4 ọdọhọ ete: “Ke usen oro Jehovah Abasi akanamde isọn̄ ye enyọn̄.” Omokụt ke ofụri ini emi Abasi okobotde enyọn̄ ye isọn̄ ke Bible okot usen oro. Edi “usen” emi ẹtịn̄de ẹban̄a mi ekedi ata ediwak tọsịn isua.—Psalm 90:4.

NTAK EMI EKPEBEHEDE FI

Ama etiene mbon oro ẹdọhọde ke Abasi akada ata ata usen itiokiet obot n̄kpọ, udunịmke se Bible etịn̄de. Edi edieke afo enịmde se Bible etịn̄de aban̄a nte ẹkebotde mme n̄kpọ, afo eyenyene “ata ọniọn̄.”—Mme N̄ke 3:21.

 Ndi se Abasi okobotde ẹkeforo n̄kpọ en̄wen?

“Abasi ọdọhọ ete: ‘Yak isọn̄ osion̄o ukpọn̄ eke ẹdude uwem ke orụk mmọ.’” —Genesis 1:24.

SE BIBLE ỌDỌHỌDE

Abasi ikobotke n̄kpọ kiet ndien enye oforo n̄kpọ en̄wen. Utu ke oro, Abasi okobot mme unam ye mme eto ‘ke orụk ke orụk,’ mmọ ẹnyụn̄ ẹyọhọ ererimbot “ke orụk mmọ.” (Genesis 1:11, 21, 24) Ntre ke nsio nsio orụk n̄kpọ emi Abasi okobotde ke editọn̄ọ ẹsan̄a ẹyọhọ isọn̄.—Psalm 89:11.

Bible itịn̄ke m̀mê orụk kiet ekeme ndinyene uduot ifan̄. Ke uwụtn̄kpọ, edieke ebua mbakara odorode ebua nnyịn, ebua nnyịn oro ekeme ndiman uduot efen, edi edisụk idi kpa ebua. Ndusụk owo ẹsida oro ẹdọhọ ke n̄kpọ kiet oforo en̄wen. Edi eyen ebua oro iforoke-foro, amamana. Ndụn̄ọde oro ntaifiọk ẹnamde mfịn owụt ke mme unam ye mme eto emi ẹdude mfịn inen̄ekede ikpụhọde ye se ikodude ke eset.

NTAK EMI EKPEBEHEDE FI

Se Bible etịn̄de aban̄a nsio nsio “orụk” n̄kpọ ekem ye se ntaifiọk ẹkpepde. Emi anam inịm ke se ededi oro Bible etịn̄de enen.

Abasi akada m̀mọ̀n̄ n̄kpọ obot ekondo?

“Ubọk mi anyanade ikpaenyọn̄ enịm.” —Isaiah 45:12.

SE BIBLE ỌDỌHỌDE

Abasi enyene odudu etieti. (Job 37:23) Akpan n̄kpọ ke itịn̄ emi koro ntaifiọk ẹdọhọ ke owo isidaha ekpri odudu ibot n̄kpọ. Bible ọdọhọ ke Abasi akada “ọkpọsọn̄ ukeme” m̀mê akaka odudu esie obot ekondo. (Isaiah 40:26) Abasi ọn̄wọn̄ọ ndida odudu esie n̄kpeme se enye okobotde. Bible ọdọhọ ke ‘Abasi akanam utịn, ọfiọn̄, ye mme ntantaọfiọn̄ ẹda ke nsinsi nsinsi.’—Psalm 148:3-6.

NTAK EMI EKPEBEHEDE FI

Allan Sandage emi ekpepde n̄kpọ aban̄a ikpaenyọn̄ ọdọhọ ete: “Ntaifiọk ikemeke ndibọrọ ndusụk mbụme. Edieke obụpde mmọ m̀mê nso ikanam ẹbot ekondo emi, mmọ idikemeke ndibọrọ.” Se Bible etịn̄de aban̄a nte ẹkebotde n̄kpọ ekem ye se ntaifiọk ẹtịn̄de. Edi Bible ọbọrọ n̄ko mbụme emi ntaifiọk mîkemeke ndibọrọ, utọ nte, Nso ke Abasi aduak aban̄a isọn̄ emi ye mme owo? *

^ ikp. eki. 16 Edieke oyomde ndifiọk n̄kpọ efen mban̄a emi, mbọk kot ibuot 3 ke n̄wed Mme Ntiense Jehovah emi, Nso ke Bible Enen̄ede Ekpep? N̄wed emi odu n̄ko ke www.jw.org/efi.

Kpep N̄kpọ En̄wen

ETI MBỤK EMI OTODE ABASI!

Ntak Emi Abasi Okobotde Isọn̄ Emi?

Bible etịn̄ ntak emi Abasi okobotde isọn̄ emi, ini emi ufen editrede, ye nte isọn̄ emi editiede ke ini iso ye mbon oro ẹdidun̄de ke isọn̄ ini oro.

ETI MBỤK EMI OTODE ABASI!

Anie Edi Abasi?

Ndi Abasi enyene enyịn̄, n̄ko nte enye ekere aban̄a nnyịn?