Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! JANUARY 2014

 SE BIBLE ETỊN̄DE ABAN̄A

Jesus

Jesus

Ndi Jesus edi Abasi?

“Akananam baba owo kiet ikwe Abasi.”—John 1:18.

SE MME OWO ẸTỊN̄DE

Ediwak owo ẹnịm ke Jesus idịghe Abasi. Edi mbon en̄wen ẹdọhọ ke ndusụk ufan̄ikọ ke Bible ẹwụt ke Jesus edi Abasi.

SE BIBLE ỌDỌHỌDE

Idụhe itie ke Bible emi ọdọhọde ke Jesus edi Ata Ọkpọsọn̄ Abasi m̀mê ke enye edi n̄ka ye Abasi. Edi Bible ọdọhọ ke Abasi okpon akan Jesus. Ke uwụtn̄kpọ, Jesus ke idemesie ọkọdọhọ ke John 14:28 ete: “Ete omokpon akan mi.” Bible ọdọhọ n̄ko ete: “Akananam baba owo kiet ikwe Abasi.” (John 1:18) Edi ediwak owo ẹma ẹkụt Jesus, ntre Jesus ikemeke ndidi Abasi.

Mme akpa mbet Jesus ikọdọhọke ke enye edi Abasi. Ke uwụtn̄kpọ, John emi eketienede ewet Bible ọkọdọhọ ete: “Ẹwet [mme n̄kpọ] emi ẹnịm man mbufo ẹkpenịm ke akpanikọ ẹte Jesus edi Christ, Eyen Abasi.”John 20:31. *

 Ini ewe ke Jesus akamana?

“Mme ekpemerọn̄ ẹma ẹdu . . . ke an̄wa ẹkpeme otuerọn̄ mmọ ke okoneyo.”—Luke 2:8.

SE MME OWO ẸTỊN̄DE

Ndusụk owo ẹkere ke Jesus akamana ke usen Christmas—oro edi, ke December 25. Ntak edi oro mmọ ẹsidiade Christmas. Mbon en̄wen ẹsidia Christmas mmọ ke January.

SE BIBLE ỌDỌHỌDE

Bible isiakke usen emi Jesus akamanade. Edi ọdọhọ ke ini emi Jesus akamanade, ke “mme ekpemerọn̄ ẹma ẹdu . . . ke an̄wa ẹkpeme otuerọn̄ mmọ ke okoneyo.” (Luke 2:8) Nnyịn ikereke ke mme ekpemerọn̄ oro ẹkpekeyak erọn̄ mmọ ke an̄wa okoneyo December m̀mê January. Ntak idọhọde ntre?

December ye January ẹsibịt etieti ke ebiet emi Jesus akamanade. Ẹtịn̄ n̄kpọ ẹban̄a utọ ini oro ke Bible. Ẹdọhọ ke mme owo ‘ẹkenyenyek ke ntak edịm, owo inyụn̄ ikemeke ndida ke an̄wa.’ (Ezra 10:9, 13; Jeremiah 36:22) Idịghe utọ ini oro ke mme ekpemerọn̄ ‘ẹkpekedu ke an̄wa’ ye mme erọn̄ mmọ.

Ndi edi akpanikọ ke Jesus ama eset?

“Abasi ama anam [Jesus] eset ke n̄kpa.”—Utom 3:15.

SE MME OWO ẸTỊN̄DE

Ndusụk owo ẹdọhọ ke owo ekededi emi akpade ata n̄kpa ikemeke-keme ndiset, kpa ye Jesus.

SE BIBLE ỌDỌHỌDE

Jesus ama ọdọhọ mbet esie ke imọ ‘iyokụt ediwak ndutụhọ, ke ẹyewot imọ, imọ iyonyụn̄ iset ke ọyọhọ usen ita.’ (Matthew 16:21) Bible ọdọhọ ke ẹma ẹwot Jesus, ekem enye eset owụt se iwakde ibe owo 500 idem. (1 Corinth 15:6) Mbon oro enye okowụtde idem do ẹma ẹnịm ke Jesus ekeseset. Mmọ ẹma ẹkam ẹnyịme ndikpa ke ntak emi!—Utom 7:51-60; 12:1, 2.

NTAK EMI EKPEBEHEDE FI

Bible ọdọhọ ke Jesus ndikpa nnyụn̄ nset anam kpukpru nnyịn inyene ifet ndidu uwem ke Paradise ke isọn̄. (Psalm 37:11, 29; Ediyarade 21:3, 4) Jehovah emi edide Ata Ọkpọsọn̄ Abasi ye Jesus Eyen esie ẹma nnyịn etieti. Emi anam mmọ ẹbiere ndinam nnyịn idu ata inem uwem ke nsinsi ke Paradise ke isọn̄ emi.—John 3:16; Rome 6:23.

^ ikp. eki. 7 Emi iwọrọke ke Abasi ọdọ n̄wan emi amande nditọ ọnọ enye. Edi Bible okot Jesus “Eyen Abasi” koro Abasi okobot Jesus onyụn̄ anam enye ekeme ndidu uwem nte imọ idude.