Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NOVEMBER 2013

 SE IDIN̄WAMDE MME UBON | NDỌ

Nte Ẹkpefende Ẹnọ Kiet Eken

Nte Ẹkpefende Ẹnọ Kiet Eken

MFỊNA

Ke ini ndusụk iban ẹtọhọde ye ebe, mmọ ẹsima ndibụhọde se ima ikebebe ẹfiak ẹtịn̄ nte etịbe idahaoro. Nso isinam mmọ ẹnam n̄kpọ ntem? Mmọ ifiọkke ndifen nnọ owo.

Edi afo emekeme ndikpep nte ekpefende ọnọ ebe fo. Akpa kan̄a, yak ise ntak emi esisọn̄de n̄wan m̀mê ebe ndifen nnọ kiet eken. *

NTAK EMI ESITỊBEDE

Man ẹkara owo. Ndusụk iban isimaha ndifen nnọ mme ebe mmọ man ẹnam ebe mmọ se mmọ ẹmama. Ndusụk ebe ẹsinyụn̄ ẹnam iban mmọ ntem. Ntre, n̄kpọ ama etetịbe, mmọ ẹsibụhọde se ima ikebe ẹda ẹkpe ikpe ẹnọ kiet eken.

Edisịn owo ke esịt. Ndusụk iban isimaha ndisọp nsio n̄kpọ ke esịt. N̄wan ekeme ndidọhọ ke imefen inọ ebe imọ edi imaha ndifre enyịn mban̄a se iketịbede. Ndusụk mmọ ẹsikam ẹdọn̄ idem ẹbet ini emi ẹdisiode ebe usiene.

N̄kpọ itiehe nte ekekerede. Ndusụk owo ẹsikere ke ndọ mmimọ editie nte se isikụtde ke fim. Ntre ke ini ekpri mfan̄a odude, mmọ ẹyom ndiwot idem sia mîkekereke ke owo emi mmimọ idọde ayafan̄a n̄kpọ ye mmimọ. Emi esinam ndusụk iban ẹtak ndikụt mme ebe idiọk inyụn̄ imaha ndifen nnọ mmọ.

Unana ifiọk. Ndusụk iban isimaha ndifen nnọ mme ebe mmọ sia mmọ mîtịmke ifiọk se ndifen nnọ owo ọwọrọde. Ke uwụtn̄kpọ, ndusụk mmọ ẹsikere ẹte:

Edieke mfende, enye idikwe ke se inamde ọdiọk.

Edieke mfende nnọ enye, ọwọrọ ana mfre se iketịbede.

Edieke mfende, ọwọrọ nyom enye ada mi ọbọp ekpan̄.

Edi ndifen nnọ owo iwọrọke ndomokiet ke otu emi. Kpa ye oro, esisụk ọsọsọn̄ ndusụk iban ndifen nnọ mme ebe mmọ, onyụn̄ ọsọn̄ ndusụk ebe ndifen iban mmọ n̄ko.

 SE AKPANAMDE

Diọn̄ọ se ndifen nnọ owo ọwọrọde. Ke ndusụk itie ke Bible, ikọ oro ẹkabarede nte “fen nọ” ọwọrọ “ndifre enyịn mban̄a n̄kpọ.” Ntem, ndifen nnọ owo iwọrọke ke udutịghi se iketịbede, inyụn̄ iwọrọke ke se enye akanamde idiọkke. Ndusụk ini, ndifen nnọ ọwọrọ ndision̄o idem n̄kpọn̄ n̄kpọ, ndien emi isiyakke owo ọdọn̄ọ ndusụk udọn̄ọ inyụn̄ iyakke ndọ abiara.

Diọn̄ọ se iditịbede edieke mbufo mîfenke kiet eken. Ndusụk ntaifiọk ẹdọhọ ke n̄wan ye ebe emi mîsifenke inọ kiet eken ẹsisọp ẹdọn̄ọ nsio nsio udọn̄ọ nte n̄kon̄kon̄ iyịp, udọn̄ọ ibuot, inyụn̄ ikopke aba inem ndọ. Ntak edi oro Bible ọdọhọde nnyịn ete: “Ẹfọn ido ye kiet eken, ẹtua owo mbọm, ẹfen kiet eken ke ofụri esịt.”—Ephesus 4:32.

Diọn̄ọ ufọn edifen nnọ owo. Edieke esifende ọnọ ebe fo, udukereke ke enye okokokoi anam fi n̄kpọ, udunyụn̄ utiehe ubat kpukpru se enye esinamde fi. Emi n̄ko idiyakke esịn enye ke esịt, edi edikam inam ọdọdiọn̄ ama enye.—Se Bible etịn̄de: Colossae 3:13.

Da ebe fo nte enye onyụn̄ etiede. Se idinamde esifen ọnọ ebe fo edi ndida enye nte enye onyụn̄ etiede utu ke nditie mbat kpukpru ndudue esie. N̄wed kiet ọdọhọ ete: “Ke ini etiede ekere se ebe m̀mê n̄wan fo mînamke, udukwe kpukpru se enye anamde.” N̄wed oro obụp ete: “Ewe ke otu iba emi ke edisitie ikere?” Ti ke idụhe owo emi ọfọnde ama—kpa ye afo nde.—Se Bible etịn̄de: James 3:2.

Kûsọn̄ ido. Ke ini ebe fo anamde se ibiakde fi, bụp idemfo ete, ‘Ndi utọ n̄kpọ emi ke n̄kposụk nyat esịt? Ndi idịghe se n̄kpefrede enyịn̄ mban̄a? Ndi ana enye edikpe mi ubọk mbemiso emem odu?’—Se Bible etịn̄de: 1 Peter 4:8.

Edieke n̄kpọ afịnade fi, tịn̄ nọ enye. Tịn̄ se ebe fo anamde fi nọ enye ukpono ukpono nyụn̄ nam enye ọfiọk ntak emi n̄kpọ oro abiakde fi. Kûdọhọ ke uwem esie ikanke oro, m̀mê ndikere ke enye okokoi anam fi. Utọ ikọ oro idiyakke enye okụt se afo etịn̄de, edi edikam inanam enye oyom se etịn̄de anyan̄a idem.

^ ikp. eki. 5 Okposụkedi emi itịn̄de iban̄a iban mi, ndusụk irenowo ẹsinyụn̄ ẹdu uwem ntem. Ntre se inemede ke ibuotikọ emi ebehe mmọ n̄ko.

Kpep N̄kpọ En̄wen

Nte Ẹkpebierede Mfịna

Edieke ẹnemede mfịna mbufo ke nnennen usụn̄, emi ekeme ndinam ndọ ọfọn onyụn̄ enem