Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  November 2013

 SE BIBLE ETỊN̄DE ABAN̄A

Ọkpọsọn̄ Mfụhọ

Ọkpọsọn̄ Mfụhọ

Nso ke ọkpọsọn̄ mfụhọ esinam owo?

“Idem mi etịmede, mmonụhọ mbe nde; nsan̄a mfụhọ mfụhọ kpukpru usen.”—Psalm 38:6.

SE NTAIFIỌK ẸTỊN̄DE

Idụhe eke mîsifụhọke ndusụk ini, edi odu ndusụk mbon emi ẹsifụhọde tutu ẹdinam n̄kpọ nte owo mbe-ibuot. Ntaifiọk ẹnyene nsio nsio ekikere ẹban̄a utọ mfụhọ iba emi. Edi imọfiọk ke n̄kpọ esinam ndusụk owo ẹfụhọ tutu uwem odorode mmọ.

SE BIBLE ỌDỌHỌDE

Bible asiak irenowo ye iban emi ẹkefụhọde etieti. Ke uwụtn̄kpọ, Bible ọdọhọ ke Hannah ama “ofụhọ idiọk idiọk.” Bible kiet ọdọhọ ke ‘esịt ama ọbụn̄ọ’ Hannah, en̄wen ọdọhọ ke ‘enyịn ama enen̄ede anan’ enye. (1 Samuel 1:10) Isan̄ kiet, ọkpọsọn̄ mfụhọ ama anam Elijah ọdọhọ Abasi ke n̄kpa imọ ọfọn akan uwem!—1 Ndidem 19:4.

Ẹkedọhọ mme akpa Christian “ẹtịn̄ ikọ ẹsọn̄ọ ukpọn̄ eke ofụhọde esịt.” (1 Thessalonica 5:14) N̄wed kiet ọdọhọ ke ikọ emi, “ukpọn̄ eke ofụhọde,” ekeme ndiwọrọ mbon oro “mfịna uwem mîyakke mmọ ẹnyịghede idem.” Emi owụt ke ikọt Abasi ke eset ẹma ẹsinen̄ede ẹfụhọ ndusụk ini.

 Ndi owo ọkpọsọn̄ mfụhọ anam idem?

“Kpukpru n̄kpọ oro ẹbotde ke ẹmụm mmụm ọtọkiet ẹnyụn̄ ẹdu ke ubiak.”—Rome 8:22.

SE BIBLE ỌDỌHỌDE

Bible ọdọhọ ke nsọn̄ibuot Adam ye Eve anam nnyịn idọn̄ọ. Ke uwụtn̄kpọ, Psalm 51:5 ọdọhọ ete: “N̄kamana ye ukwan̄n̄kpọ . . . eka mi okonyụn̄ oyomo mi ke idiọkn̄kpọ.” N̄ko Rome 5:12 ọdọhọ ke ‘idiọkn̄kpọ okoto owo kiet, oro edi Adam, odụk ererimbot, n̄kpa onyụn̄ oto idiọkn̄kpọ oro odụk, ndien n̄kpa ebe esịm kpukpru owo koro kpukpru owo ẹma ẹnam idiọkn̄kpọ.’ Ntre idiọkn̄kpọ oro ikadade ke Adam imana anam idọn̄ọ kpukpru se idọn̄ọde emi—edide ubiakidem m̀mê ọkpọsọn̄ mfụhọ. Ntak edi oro Bible ọdọhọde ke ‘kpukpru se Abasi okobotde ke ẹmụm mmụm ẹnyụn̄ ẹdu ke ubiak tutu esịm emi.’ (Rome 8:22) Edi Bible etịn̄ se Abasi edinamde emi abiausọbọ ndomokiet mîdikemeke ndinam. Abasi ọn̄wọn̄ọ ndinam ererimbot emi ọfọn, kpukpru owo ẹnyụn̄ edu ke emem. Udọn̄ọ ye mme afanikọn̄ eken emi ẹsinamde owo ofụhọ ididụhe aba.—Ediyarade 21:4.

Nso ke akpanam mbak ọkpọsọn̄ mfụhọ edimen fi emen?

“Jehovah emekpere mmọ eke esịt obụn̄ọde; Enye onyụn̄ anyan̄a mmọ eke spirit mmọ anuahade.”—Psalm 34:18.

NTAK EMI EKPEBEHEDE FI

Enyene se mûdukemeke ndinyan̄a ke uwem emi, ndien se mûmaha oyosụk ọwọrọ fi ndusụk ini. (Ecclesiastes 9:11, 12) Ntre, da uwem nte onyụn̄ okụtde nyụn̄ nam se ekemede mbak ọkpọsọn̄ mfụhọ edimen fi emen.

SE BIBLE ỌDỌHỌDE

Bible ọdọhọ ke owo emi idem mîsọn̄ke esiyom abiausọbọ. (Luke 5:31) Mmọdo, edieke ọkpọsọn̄ mfụhọ etiede nte ọmọn̄ anam ibuot ebe fi, ka ufọkibọk. Bible ọdọhọ n̄ko ke akam esifọn etieti ke utọ n̄kpọ emi. Ke uwụtn̄kpọ, Psalm 55:22 ọdọhọ ete: “Top mbiomo fo nọ Jehovah, ndien enye ọyọsọn̄ọ fi idem. Tutu amama enye idiyakke edinen owo esehede.” Edi, ididịghe ama ọbọbọn̄ akam idem ọsọn̄ fi. Ọbọn̄ akam man eneme nneme ye Jehovah Abasi sia enye ‘ekpere mmọ eke esịt obụn̄ọde.’—Psalm 34:18.

N̄kpọ en̄wen emi ekemede ndin̄wam fi edi nditịn̄ mfịna emi nnọ ata ufan fo. (Mme N̄ke 17:17) Daniela emi edide Ntiense Jehovah ọdọhọ ete: “Ntiense kiet ama eyịre mi tutu ntịn̄ nnọ enye ke mfụhọ ọmọn̄ owot mi. N̄kesimaha nditịn̄ n̄kpọ emi nnọ owo, edi ama enem mi ndikụt nte idem eferede mi ke mma n̄ketịn̄ nnọ enye. Ubaha-e n̄kpakanamde emi tọn̄ọ oko.”