Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! NOVEMBER 2013

 SE BIBLE ETỊN̄DE ABAN̄A

Ndinam Idan̄ Mbemiso Ndọ

Ndinam Idan̄ Mbemiso Ndọ

Ndi ọdiọk mbon emi mîdọhọ ndọ ndinam idan̄?

“Emi edi uduak Abasi, . . . ete mbufo ẹbet use.”1 Thessalonica 4:3.

SE MME OWO ẸTỊN̄DE

Ndusụk owo ikwe se idiọkde erenowo ye n̄wan emi ẹmade kiet eken ndinam idan̄ kpa ye oro mmọ mîdọhọ ndọ. Ndusụk owo ẹkere ke inyụn̄ idiọkke akparawa ye n̄kaiferi emi mîdọhọ ndọ nditụk nnyụn̄ mfiọn̄ọ kiet eken ama akam edi mmọ mbiba ẹnyịme.

SE BIBLE ỌDỌHỌDE

Se Bible okotde “use” esịne owo ndinam idan̄ ye owo emi mîdịghe ebe m̀mê n̄wan esie. Abasi ọdọhọ ikọt esie “ẹbet use.” (1 Thessalonica 4:3) Bible abat use esịn ke otu ikpọ idiọkn̄kpọ nte efịbe, ubụpekpo, ukpammịn, ukpono ndem, uwotowo, ye uyịp-inọ.—1 Corinth 6:9, 10; Ediyarade 21:8.

NTAK EMI EKPEBEHEDE FI

Bible ọdọhọ ke “Abasi eyekpe ikpe ye mbon use.” (Mme Hebrew 13:4) Enyene ata akpan ntak emi akpanamde ibet use nte Abasi ọdọhọde. Ndinam emi owụt ke imenen̄ede ima Abasi. (1 John 5:3) Abasi n̄ko esidiọn̄ mbon oro ẹkopde item esie.—Isaiah 48:18.

 Ndi ọdiọk owo iba emi mîdọhọ ndọ nditụk nnyụn̄ mfiọn̄ọ kiet eken?

“Ẹkûdedei ẹtịn̄ ẹban̄a use ye orụk mbubiam ido ekededi m̀mê idiọkitọn̄ ke otu mbufo.”Ephesus 5:3.

SE MME OWO ẸTỊN̄DE

Ediwak owo ẹkere ke idiọkke erenowo ye n̄wan nditụk nnyụn̄ mfiọn̄ọ kiet eken ama akam edi mmọ inamke idan̄.

SE BIBLE ỌDỌHỌDE

Bible idọhọke ke use kpọt ọdiọk, edi ọdọhọ ke “mbubiam ido” ye “obukpo ido” ẹdiọk n̄ko. (2 Corinth 12:21) Abasi esiyat esịt etieti edieke erenowo ye n̄wan emi mîdọhọ ndọ ẹtụkde ẹnyụn̄ ẹfiọn̄ọde kiet eken nte idi ebe ye n̄wan ọkpọkọm mmọ inamke idan̄.

Bible owụt ke ebe ye n̄wan kpọt ẹkpenam utọ n̄kpọ emi. Bible n̄ko ọdọhọ ke ifọnke owo ndinyene “idiọk udọn̄ idan̄.” (1 Thessalonica 4:5) Nso idi idiọk udọn̄ idan̄? N̄wan ekeme ndidọhọ ke tutu amama imọ idinamke idan̄ ye ufan imọ erenowo. Edi enye esiyak erenowo oro afat enye, ọfiọn̄ọ onyụn̄ otụk enye kpukpru itie ke idem. Enye onyụn̄ anam erenowo oro ntre. Nso ke mmọ ẹnam oro? Mmọ ẹdiọk itọn̄ ẹyom se ubọk mmọ mîsịmke. “Idiọk udọn̄ idan̄” edi oro. Ndien Bible ọdọhọ ke Abasi asasua utọ idiọkitọn̄ oro.—Ephesus 5:3-5.

Nso ke akpanam mbak udunam use?

“Ẹfehe ẹkpọn̄ use.”1 Corinth 6:18.

NTAK EMI EKPEBEHEDE FI

Bible ọdọhọ ke owo ekededi emi anamde use ikemeke ndidi ufan Abasi ibọhọke enye akabade esịt.—Colossae 3:5, 6.

SE BIBLE ỌDỌHỌDE

Bible ọdọhọ ete: “Ẹfehe ẹkpọn̄ use.” (1 Corinth 6:18) Owo emi anamde item emi enyene ndifehe n̄kpọn̄ n̄kpọ ekededi emi ekemede ndinam enye anam use. (Mme N̄ke 22:3) Ke uwụtn̄kpọ, enye ididụkke ndụk ye owo ekededi emi mîmaha ndinam se Abasi etịn̄de aban̄a use. Bible ọdọhọ ete: “Owo eke asan̄ade ye mbon ọniọn̄ eyenyene ọniọn̄, edi ọyọdiọk ye owo eke odụkde nsan̄a ye mme ndisịme.”—Mme N̄ke 13:20.

Nditie n̄kere ndisịme, nse mbukpo n̄kpọ, nnyụn̄ n̄kokot ke n̄wed ekeme ndinam owo anam use. (Rome 8:5, 6) Ntre owo emi oyomde ndifehe n̄kpọn̄ use idibreke ikwọ, isehe vidio, m̀mê ndikot n̄wed emi ẹban̄ade idan̄. Enye idinyụn̄ inamke mbubiam ido ekededi mbak Abasi ediyat esịt ye enye.—Psalm 101:3.

Kpep N̄kpọ En̄wen

Ndi Ọfọn Ndidụn̄ Ntre Mbemiso Ẹdọde Ndọ?

Se se Bible etịn̄de aban̄a ima, idan̄, ye edidụn̄ ọtọkiet.