Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! SEPTEMBER 2013

Ufịk Ikayakke N̄wọn̄ọde Idem

Ufịk Ikayakke N̄wọn̄ọde Idem

N̄KAMANA ke 1965 ke Northern Ireland. Nnyịn ikenyeneke n̄kpọ. N̄kokpon ke County Derry ke ini oro mbon Catholic ye mbon Protestant ẹkesịnde ntịme ke se ibede isua 30. Sia mbon Catholic mîkawakke ke edem nnyịn, mmọ ẹkedọhọ ke mbon Protestant ẹfịk mmimọ ẹkaha, iyakke ẹtiene ẹmek mbon mmimọ ẹsịn ke ukara, mme bodisi inyụn̄ iyakke mmimọ inyịghede idem, owo idaha mmimọ ke utom, inyụn̄ inọhọ mmimọ eti ufọk idụn̄.

Ufịk ikayakke n̄wọn̄ọde idem. N̄kemeke ndibat ini emi mme bodisi m̀mê ekọn̄ ẹkemiade mi. Ndusụk ini ẹyedụri mi ẹsio ke moto, ẹnyan mi ikan̄ ke iso, ẹse mi idem m̀mê nso ke n̄kama, mîdịghe ẹbụp mi mbụme. Ekesinam mi n̄kpọ nte ndi unam. Ntre mma n̄kere ke akpana nsio mmọ usiene, mîdịghe mbọ ita ke ime ndaha.

Mma ntiene nsan̄a ke efak ke 1972 nditi owo 14 oro mbonekọn̄ Britain ẹketopde ẹwot ye mbon n̄kpọkọbi oro ẹketiede biọn̄ ẹkpan̄a ke ntak ufịk ke 1981. Mma mmenede ọfọn̄ etakubom Northern Ireland emi ẹma ẹkekpan nnyụn̄ n̄wet ndisịme mban̄a ukara Britain ke kpukpru ebiet. Eketie nte ke idụhe ini emi owo mîdiwotke owo Catholic  mîdịghe ẹnam owo Catholic ibak man isịn ntịme. Ndusụk ini isitọn̄ọ ke ndinyụn̄ nsan̄a ntre ke efak, ekem itọn̄ọ ata ntịme.

Ke ini n̄kodude ke ufọkn̄wed ntaifiọk, mma ntiene nditọ ufọkn̄wed nnyịn nsan̄a ke efak ndọhọ ke ifọnke nte ẹbiatde isọn̄. Ekem mma n̄ka London n̄ketiene nsan̄a ke efak ndọhọ ke ifọnke nte ẹfịkde mme ubuene man ikpọ owo ẹtetịm ẹforo. Ke 1990, mma ntiene nsan̄a ke efak ndiwụt ke nnyịmeke nte ukara ẹsion̄ode okụk ọfiọn̄ owo, ke ini edide mmọ ke ẹsịn okụk tax edide amanam utom m̀mê unamke. Ntịme emi ikesịnde akanam ẹbiat Trafalgar Square ke London.

Ekem mma ndikụt ke ofụri ntịme emi ikenyeneke ufọn. Utu ke ndinyene se ikoyomde, ntịme akakam ananam ẹdọdiọn̄ ẹsua nnyịn.

Owo inyeneke odudu nditre ufịk ke ererimbot emi ọkpọkọm enye etịme didie

Ini emi ke ufan mi akanam n̄kụt Mme Ntiense Jehovah. Mmọ ẹma ẹda Bible ẹwụt mi ke Abasi enen̄ede ama nnyịn inyụn̄ ikopke inemesịt nte nnyịn ibọde ufen. Mma nnyụn̄ n̄kụt ke Abasi eyetre kpukpru ufen emi mme owo ẹmiade nnyịn mi. (Isaiah 65:17; Ediyarade 21:3, 4) Mma ndikụt ke owo inyeneke odudu nditre ufịk ke ererimbot emi ọkpọkọm enye etịme didie. Abasi kpọt ekeme nditeme owo usụn̄, enye n̄ko ekeme ndinyan̄a nnyịn nsio ke ubọk Satan ye mme demon esie emi ẹdide ntak afanikọn̄ ererimbot emi.—Jeremiah 10:23; Ephesus 6:12.

Mmedi ndikụt ke ofụri se n̄kanamde man ntre ufịk ke ererimbot emi eketie nte ndiduọn̄ọ inụn̄ ke nsia ebiọn̄. Esịt enen̄ede enem mi ndifiọk ke Abasi eyetre kpukpru ufịk ererimbot emi usen kiet, owo ndomokiet idinyụn̄ ikarake owo en̄wen aba.

Bible ọdọhọ ke Jehovah edi Abasi emi “amade unenikpe.” (Psalm 37:28) Ntak edi oro inen̄erede inịm ke enye eyetre ufịk emi ukara owo ndomokiet mîkemeke nditre mi. (Daniel 2:44) Edieke oyomde ndifiọk n̄kpọ efen mban̄a emi, mbọk nyene nneme ye Mme Ntiense Jehovah ke edem mbufo, mîdịghe se ikpehe Intanet nnyịn emi, www.jw.org/efi.

Kpep N̄kpọ En̄wen

Ntak Emi Abasi Ayakde Idiọkn̄kpọ ye Ufen Ẹdu?

Didie ke idiọkn̄kpọ ọkọtọn̄ọ, ndien ntak emi Abasi ayakde idiọkn̄kpọ aka iso? Ndi ufen eyetre tutu amama?

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?