Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! SEPTEMBER 2013

 SE IDIN̄WAMDE MME UBON | UKAMA NDITỌ

Se Akpanamde ke Ini Eyen Fo Esịnde Ntịme

Se Akpanamde ke Ini Eyen Fo Esịnde Ntịme

MFỊNA

Ke ini esịt ayatde eyen fo emi edide isua iba, enye oyofiori n̄kpo, esịn ntịme, asuan n̄kpọ ke ufọk, onyụn̄ atịgha se ededi oro enye okụtde. Emi ekeme ndinam ekere m̀mê idem ọsọn̄ enye, m̀mê akam enyene se imọ inamde enye. Emekeme ndinyụn̄ n̄kere m̀mê ini ewe ke enye editre kpukpru emi.

Afo emekeme ndin̄wam eyen fo etre utọ ido oro. Akpa, ana ọfiọk se isinamde nditọwọn̄ ẹsịn ntịme.

SE ISINAMDE NDITỌWỌN̄ ẸSỊN NTỊME

N̄kukụre se nditọwọn̄ ẹdiọn̄ọde edi nditua eyet ke ini mûnọhọ mmọ se mmọ ẹyomde. Emi ekeme ndinam mmọ ẹsịn ntịme. Edi enyene n̄kpọ en̄wen emi esinamde mmọ ẹsịn ntịme.

Ti se isitịbede ke ini eyenọwọn̄ esịmde isua iba. Tọn̄ọ ke usen emi enye amanade, eka ye ete ẹsinam kpukpru n̄kpọ ẹnọ enye. Ini ekededi emi enye atuade, eka eyefehe ekemen enye ese m̀mê enyene se inamde enye, m̀mê biọn̄ ọdọn̄ enye, m̀mê enye anam mmọn̄ m̀mê ndek oyom ẹkpụhọ imọ napkin ye n̄kpọ ntre.

Edi ke ini eyen emi esịmde isua iba, enye ọtọn̄ọ ndikụt ke ete ye eka inamke aba kpukpru se imọ iyomde, ke mmọ ẹdikam ẹyom imọ inam se mmọ ẹyomde. Emi esinam enye ọtọn̄ọ ntịme.

Edi nte ini akade, eyen emi eyedi edifiọk ke utom ete ye eka ikụreke ke ndikpeme imọ, edi ke esịne n̄ko nditeme imọ se ikpanamde. Imekere ke nditọ emi ẹyedi ẹdifiọk n̄ko ke mmimọ inyene ‘ndikop uyo nnọ ete ye eka mmimọ.’ (Colossae 3:20) Edi ke emi, eyen emi ekeme ndisịn ntịme tutu afo udiọn̄ọke aba se akpanamde.

 SE AKPANAMDE

Diọn̄ọ se inamde enye. Eyen fo idịghe akwaowo. Enye ekeme ndisịn ntịme sia mîkemeke nditịn̄ nte etiede enye ke idem. Ntre, domo ndifiọk se inamde enye.—Se Bible etịn̄de: 1 Corinth 13:11.

Kûsọp uyat esịt. Ufọn idụhe ndiyat esịt ke ini eyen fo esịnde ntịme. Domo ndimụm idem n̄kama nyụn̄ nam nte ukwe se enye anamde. Se idin̄wamde fi edi nditi se isinamde nditọwọn̄ ẹsịn ntịme.—Se Bible etịn̄de: Mme N̄ke 19:11.

Kûyak eyen fo ada fi ọbọp ekpan̄. Edieke edide eyen afo ama esesịn ntịme, afo ọnọ enye se ededi oro enye oyomde, ọwọrọ ọdọhọ enye esisịn ntịme ini ekededi oro enye oyomde n̄kpọ. Ntre, kûyayat esịt, edi nam enye okụt ke enye ikemeke ndida fi mbọp ekpan̄, ke ada ke se eketịn̄de.—Se Bible etịn̄de: Matthew 5:37.

Nditi se isinamde nditọwọn̄ ẹsịn ntịme idiyakke ọsọp ayat esịt

Nyene ime. Kûkere ke eyen fo ọmọn̄ ọsọsọp etre ntịme akpan akpan edieke esinọde enye se ededi oro enye oyomde ke ini enye esịnde ntịme. Edieke anamde se akpanade anam ini ekededi oro enye esịnde ntịme, enye idinen̄ekede isịn ntịme aba. Ndien nte ini akade, enye eyetre ntịme. Bible ọdọhọ ke “ima enyenyene anyanime.”—1 Corinth 13:4.

Ke adianade ye se itịn̄de ke enyọn̄ emi, nam emi ise:

  • Ke ini eyen fo ọtọn̄ọde ntịme, mụm enye ubọk mbiba (edieke ekemede) mbak enye edisuan n̄kpọ, edi kûfian̄ade enye ubọk. Kûduat enye. Bet idem osụhọ enye. Ama ekem, enye eyedi edikụt ke ufọn ntịme idụhe.

  • Yom ebiet oro edinịmde enye ini kiet ekededi oro enye ọtọn̄ọde ntịme. Dọhọ enye ke enye idiwọrọke do ibọhọke enye etre ntịme. Kûnyụn̄ uyak enye ọwọrọ tutu enye etre ntịme oro.

  • Edieke enye esịnde ntịme ke otu owo, men enye wọrọ. Kûdọhọ sia idude ke otu owo, ke akpana inam se enye ọdọhọde mbak enye edisuene fi. Oro edikam inam enye ọdọdiọn̄ esịn ntịme man ọnọ enye se ededi oro enye oyomde.