Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! SEPTEMBER 2013

 SE BIBLE ETỊN̄DE ABAN̄A

Obio Ubọn̄ Abasi

Obio Ubọn̄ Abasi

Ndi Obio Ubọn̄ Abasi odu owo ke esịt?

“Afo uyomke usụn̄ ukpọn̄ obio ubọn̄ Abasi.”Mark 12:34.

SE MME OWO ẸTỊN̄DE

Ediwak owo ẹdọhọ ke “Obio Ubọn̄ Abasi odu owo ke esịt.” Se ndusụk ufọkabasi ẹnyụn̄ ẹkpepde edi oro.

SE BIBLE ỌDỌHỌDE

Obio Ubọn̄ Abasi idụhe owo ke esịt, edi edi ukara Abasi emi edikarade ofụri isọn̄.—Psalm 72:8; Daniel 7:14.

Jesus ọkọdọhọ ete: “Obio ubọn̄ Abasi odu ke otu mbufo.” (Luke 17:21) Ndusụk Bible ẹsịn ufan̄ikọ emi ntem: “Obio Ubọn̄ Abasi ododu kesịt mbufo.” (Edisana N̄wed Abasi Ibom eke 1949) Nso ke ikọ Jesus ọkọwọrọ? Ikọ Jesus ikọwọrọke ke Obio Ubọn̄ Abasi odu ke esịt owo. Ntak emi idọhọde ntre? Ntak edi koro Jesus eketịn̄ ikọ emi ọnọ mme Pharisee emi mîdidụkke Obio Ubọn̄ Abasi. Abasi ikenemke esịt ye mmọ sia mmọ ẹkedi mbon mbubịk. (Matthew 23:13) Se ikanamde Jesus ọdọhọ ke Obio Ubọn̄ odu ke otu mmọ edi sia enye nte Edidem Obio Ubọn̄ oro okodu do ye mmọ.—Luke 17:21.

 Nso idi Obio Ubọn̄ Abasi?

“Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” Matthew 6:10.

SE BIBLE ỌDỌHỌDE

Obio Ubọn̄ emi edi ukara Abasi emi Jesus Christ akarade. (Matthew 28:18; 1 Timothy 6:14, 15) Enye ayanam ẹnam uduak Abasi ke heaven ye ke isọn̄. (Matthew 6:10) Obio Ubọn̄ emi ke Abasi edinyụn̄ ida ikọk mfịna ubonowo. Enye n̄ko ayanam se ukara owo ndomokiet mîkemeke ndinam.

Ini oro ndien ke mme owo ẹdidu ke emem ye ifụre ke isọn̄ emi. N̄kpọ ọyọfọn kpukpru owo, isọn̄ oyonyụn̄ edi Paradise. (Psalm 46:9; Isaiah 35:1; Micah 4:4) Owo ndomokiet ididọn̄ọke aba, n̄kpa idinyụn̄ idụhe aba. (Isaiah 33:24; Ediyarade 21:4) N̄kani owo ẹyefiak ẹsehe. Bible ọdọhọ ete: “Yak obụkidem esie akabade esehe akan eke ini uyen; yak enye afiak enyene odudu nte ekenyenede ke ini uyen esie.”—Job 33:25.

SE AKPANAMDE

Inamke n̄kpọ m̀mê afo oto m̀mọ̀n̄, edieke anamde se Abasi amade, afo emekeme nditiene mbọ ufọn Obio Ubọn̄ Abasi. Bible ọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.

Ndi mme owo ẹkeme ndida Obio Ubọn̄ Abasi ndi?

“Abasi enyọn̄ oyowụk obio ubọn̄ eke owo mîdisoboke ifep tutu amama.”Daniel 2:44.

SE MME OWO ẸTỊN̄DE

Ndusụk owo ẹkere ke mme owo ẹdida Obio Ubọn̄ Abasi idi isọn̄ emi. Mmọ ẹkere ke ndinam mme owo ẹdi ufọkabasi mmimọ mîdịghe ndinam mme owo ke ofụri ererimbot ẹdụn̄ ọtọkiet ke emem edi Obio Ubọn̄ Abasi.

SE BIBLE ỌDỌHỌDE

Abasi edida Obio Ubọn̄ emi idi, idịghe owo. (Daniel 2:44) Abasi ọkọdọhọ ke ini Obio Ubọn̄ oro ọkọtọn̄ọde ndikara ke heaven ete: “Mmodori edidem mi ke Zion.” (Psalm 2:6) Emi owụt ke idịghe owo edida Obio Ubọn̄ Abasi idi, inyụn̄ idụhe eke ekemede ndibiat enye sia Obio Ubọn̄ emi edidu ke heaven idikara isọn̄ emi.—Matthew 4:17.

NTAK EMI EKPEBEHEDE FI?

Ekeme ndidi emesikere nte mme owo ẹkpekemede ndinam emem ye edidianakiet odu ke isọn̄ emi. Akam ekeme ndidi emesidomo ndinam mme owo ẹdu ke emem edi ukemeke. Ndidiọn̄ọ ke Abasi kpọt ekeme ndinam emi idiyakke ọbọ ufen odomo ndinam se mûdukemeke. Kam nam se ekemede, oro edi, ndidu uwem nte owo emi etiede ebet Obio Ubọn̄ Abasi.