Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! JULY 2013

 SE BIBLE ETỊN̄DE ABAN̄A

Bible etịn̄ nte Abasi etiede

Bible etịn̄ nte Abasi etiede

Abasi etie didie?

“Abasi edi Spirit.”—John 4:24.

SE BIBLE ỌDỌHỌDE

Bible ọdọhọ ke Abasi edi spirit. (2 Corinth 3:17) Ntem nnyịn ikemeke-keme ndimen idem nnyịn ndomo ye enye m̀mê nditịm ndiọn̄ọ nte enye etiede. Akpa Timothy 1:17 ọdọhọ ke enye edi “nsinsi Edidem emi mîkemeke ndikpa, enyịn mînyụn̄ ikemeke ndikụt.” Bible ọdọhọ n̄ko ete: “Akananam baba owo kiet ikwe Abasi.”—1 John 4:12.

Abasi ibom okpon onyụn̄ enyene uten̄e tutu nnyịn ikemeke nditịm ndiọn̄ọ nte enye etiede. Isaiah 40:18 ọdọhọ ete: “Mbufo ẹkeme ndimen Abasi ndomo ye anie, ewe mbiet ke mbufo ẹnyụn̄ ẹkeme ndimen ndomo ye enye?” Idem ofụri akaka ikpaenyọn̄ idịghe se ẹdade ẹdomo ye Ata Ọkpọsọn̄ Abasi.—Isaiah 40:22, 26.

Edi odu mbon emi ẹsikụtde Abasi ẹnyụn̄ ẹnyene nneme ye enye iso ye iso. Nso inam mmọ ẹkeme ndikụt Abasi? Sia mmọ n̄ko ẹdide spirit ẹnyụn̄ ẹdude do ke heaven. (1 Ndidem 22:21; Mme Hebrew 1:7) Mmọ ẹdi mme angel, ndien Jesus Christ ọkọdọhọ ke mmọ ‘ẹsikụt iso Ete imọ emi odude ke heaven kpukpru ini.’—Matthew 18:10.

 Ndi Abasi odu ke kpukpru ebiet?

“Mbufo ẹbọn̄ akam ntem, ndien, ẹte: ‘Ete nnyịn emi odude ke heaven.’”—Matthew 6:9.

SE BIBLE ỌDỌHỌDE

Bible idọhọke ke Abasi odu ke kpukpru ebiet nte ofụm emi in̄wekde. Utu ke oro, ikọ Jesus ke n̄wed Matthew 6:9 ye 18:10 owụt ke Abasi odu ke heaven, emi edide “akpan ebietidụn̄” esie, ke enye onyụn̄ edi Ete nnyịn.—1 Ndidem 8:43.

Mbemiso Jesus akpa, enye ama ọdọhọ ete: “Ami mmọn̄ n̄kpọn̄ ererimbot ndien mmọn̄ nnyọn̄ ntiene Ete.” (John 16:28) Jesus akakpa mi ke ererimbot ẹdi ẹma ẹnam enye eset nte spirit. Enye ama ọdọk ‘okodụk heaven, man enye akpada ke iso Abasi.’—Mme Hebrew 9:24.

Enen̄ede ọfọn nnyịn ndidiọn̄ọ mme n̄kpọ emi mban̄a Abasi. Ntak-a? Sia edieke nnyịn mîdiọn̄ọke ke Abasi do, nnyịn idikemeke ndikpep n̄kpọ mban̄a enye nnyụn̄ nsan̄a n̄kpere enye. (James 4:8) N̄kpọ en̄wen edi nte ke nnyịn nditịm ndiọn̄ọ Abasi idiyakke nnyịn ikpono se nnyịn mîkpokponoke. Akpa John 5:21 ọdọhọ ete: “N̄kpri nditọ, ẹkpeme idem ke ndem.”

Bible ndidọhọ ke Abasi okobot owo ke mbiet esie ọwọrọ nso?

“Abasi obot owo ke mbiet esie, ke mbiet Abasi ke obot enye, eren ye n̄wan ke enye obot mmọ.”—Genesis 1:27.

SE BIBLE ỌDỌHỌDE

Nnyịn mme owo imekeme ndinyene nti edu Abasi, utọ nte ima, ọniọn̄, inyụn̄ ima se inende. Ke nditịm ntịn̄, Bible ọdọhọ ete: “Ẹdi mme andikpebe Abasi, nte ndima nditọ, ẹnyụn̄ ẹka iso ẹsan̄a ke ima.”—Ephesus 5:1, 2.

Abasi okonyụn̄ obot nnyịn ke usụn̄ oro ikemede ndibiere se iyomde ndinam. Emi esinam ikeme ndibiere se inende ye se ikwan̄ade inyụn̄ ikeme ndinam n̄kpọ n̄wụt mme owo ke imama mmọ. (1 Corinth 13:4-7) Imekeme ndida ubọk nnyịn nnam nsio nsio n̄kpọ. Esịt esinyụn̄ enem nnyịn ndise ndiye n̄kpọ ye mme utịbe n̄kpọ eken oro Abasi okobotde. Akakan n̄kpọ edi nte ke enye okobot nnyịn man ikeme ndisan̄a n̄kpere imọ, n̄kpep n̄kpọ mban̄a imọ, nnyụn̄ ndiọn̄ọ se imọ iyomde nnyịn inam.—Matthew 5:3.

Nte Bible ekemede ndin̄wam fi. Nte afo ekpepde n̄kpọ aban̄a Abasi onyụn̄ odomode ndikpebe enye, ntre ke afo edidu uwem nte enye oyomde. Emi ayanam fi etịm okop inemesịt onyụn̄ enyene emem. (Isaiah 48:17, 18) Ke akpanikọ, Abasi ọdiọn̄ọ ke nnyịn imama nti edu imọ, ke emi esinyụn̄ anam nnyịn isan̄a ikpere imọ onyụn̄ ọnọ nnyịn idotenyịn uwem nsinsi.—John 6:44; 17:3.