Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! JULY 2013

 SE BIBLE ETỊN̄DE ABAN̄A

Satan

Satan

Ndi Satan akam odu?

“Akani urụkikọt, enye emi ẹkotde Devil ye Satan, emi adade kpukpru mme andidụn̄ isọn̄ otụn usụn̄.”—Ediyarade 12:9.

SE MME OWO ẸTỊN̄DE

Ndusụk owo ẹkere ke Satan idụhe, ke idiọkn̄kpọ emi esịnede owo ke esịt edi Satan.

SE BIBLE ỌDỌHỌDE

Satan odu. Enye edi akpa angel emi ọkọsọn̄de ibuot ye Abasi. Bible okot Satan “andikara ererimbot emi.” (John 12:31) Enye esida “nsunsu idiọn̄ọ” ye “abian̄a” enyene se enye oyomde.—2 Thessalonica 2:9, 10.

Bible etịn̄ nte Abasi ekenyenede nneme ye Satan ke heaven. Edieke Satan ekpedide idiọkn̄kpọ emi esịnede owo ke esịt, oro ọkpọwọrọ ke Abasi ekenyene nneme ye idiọkn̄kpọ ke esịt esie. Edi nnyịn imọdiọn̄ọ ke Abasi nnyịn ọfọn ama anana ndo! (Deuteronomy 32:4; Job 2:1-6) Se Bible etịn̄de enen̄ede owụt ke Satan odu, ke enye idịghe idiọkn̄kpọ emi esịnede owo ke esịt.

NTAK EMI EKPEBEHEDE FI?

Satan iyomke mme owo ẹfiọk ke imọ do kpa nte abiatibet mîsiyomke mme owo ẹdiọn̄ọ imọ man enye akpaka iso abiat ibet. Akpa n̄kpọ emi edin̄wamde fi ekpeme mbak Satan edinyene fi edi ndifiọk ke enye do.

 Satan odụn̄ ke m̀mọ̀n̄?

“Mbọm isọn̄ . . . koro Devil omosụhọde etiene mbufo.”—Ediyarade 12:12.

SE MME OWO ẸTỊN̄DE

Ediwak owo ẹdọhọ ke Satan odụn̄ ke esịt ikan̄ hell ke esịt isọn̄. Ndusụk owo ẹkere ke enye esịne mme idiọkowo ke idem.

SE BIBLE ỌDỌHỌDE

Satan odu mi ke isọn̄, edi nnyịn ikemeke ndikụt enye sia enye edi spirit. Ama odu ini emi enye ekesikemede ndibe ndụk heaven nte enye amama n̄kodu ye nti angel Abasi. (Job 1:6) Edi tọn̄ọ ẹkesio enye ye ndiọi angel eken ẹduọk ke isọn̄, enye ikemeke aba ndibe ndụk heaven.—Ediyarade 12:12.

Ndi emi ọwọrọ ke enyene akpan ebiet emi Satan odụn̄de ke isọn̄ emi? Ekeme ndidi emesikot Ediyarade 2:13 emi ọdọhọde ke Pergamum ekedi “ebiet emi Satan odụn̄de.” Itie Bible oro owụt ke ata ediwak nditọ Pergamum ẹkesituak ibuot ẹnọ Satan. Satan inyeneke akpan ebietidụn̄ ke isọn̄ emi. Bible ọdọhọ ke enye enyene “kpukpru mme obio ubọn̄ isọn̄.”—Luke 4:5, 6.

Ndi Satan ekeme ndinam mme owo n̄kpọ m̀mê ndikara mmọ?

“Ofụri ererimbot esịne ke idak odudu andidiọk.”—1 John 5:19.

SE BIBLE ỌDỌHỌDE

Ediwak owo ke ererimbot ẹyak Satan akara mmọ onyụn̄ ada mmọ otụn usụn̄. (2 Corinth 11:14) Ntak edi oro mme owo mîkemeke ndinam n̄kpọ ọfọn ke ererimbot emi.

Bible etịn̄ nte Satan m̀mê ndiọi angel esie ẹketụhọrede mme owo ẹnyụn̄ ẹnam mmọ n̄kpọ.—Matthew 12:22; 17:15-18; Mark 5:2-5.

SE AKPANAMDE

Ufọn idụhe ndifehe Satan. Se akpanamde mbak enye editiene akara fi inyụn̄ ida fi itụn usụn̄ edi ndidiọn̄ọ n̄kari esie. (2 Corinth 2:11) Edieke esikotde Bible, afo ọyọdiọn̄ọ kpukpru n̄kari Satan onyụn̄ ọfiọk se akpanamde mbak ududụk afia esie.

Fọp kpukpru n̄kpọ emi ẹnyenede ebuana ye mme demon. (Utom 19:19) Emi ekeme ndisịne n̄kpọ n̄kpemeidem, mme n̄wed, mme vidio, ikwọ, ye n̄kpọ ekededi emi aban̄ade ibọk, idiọk odudu, n̄kukụt, ye n̄ka ekịm.

Bible ọdọhọ ete: “Ẹbiọn̄ọ Devil, ndien enye eyefehe ọkpọn̄ mbufo.” (James 4:7) Edieke anamde se Bible etịn̄de emi, Satan idikemeke ndida n̄kari esie ntap fi.—Ephesus 6:11-18.