Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! JULY 2013

 NDỤN̄ỌDE | RACQUEL HALL

N̄wan Jew Etịn̄ Ntak Emi Enye Ọkọkpọn̄de Ido Ukpono Esie

N̄wan Jew Etịn̄ Ntak Emi Enye Ọkọkpọn̄de Ido Ukpono Esie

Eka Racquel Hall oto Israel, ete esie oto Austria. Mmọ mbiba ẹsika Ido Ukpono Mme Jew. Ete eka ye eka eka esie ẹkedi mbon Ido Ukpono Mme Jew. Mmọ ẹkedi ẹdidụn̄ ke Israel ke 1948, kpa isua emi Israel ẹketọn̄ọde ndikara idem mmọ. Mme andiwet Ẹdemede! ẹma ẹkebụp Racquel se ikanamde enye ọkpọn̄ Ido Ukpono Mme Jew.

Tịn̄ n̄kpọ ban̄a idem fo.

N̄kamana ke 1979 ke United States. Ete mi ama osio eka emi ndọ ke ini n̄kedide eyen isua ita. Eka mi ọkọbọk mi nte n̄wan Jew onyụn̄ ọnọ mi n̄ka ufọkn̄wed mme Jew. Ke mma n̄kesịm isua itiaba, eka mi ama emen mi ọwọrọ okodụn̄ ke Israel ke isua kiet. Mma nnyụn̄ n̄ka ufọkn̄wed do n̄ko. Ekem, eka mi ama emen mi okodụn̄ ke Mexico.

Okposụkedi emi synagogue ndomokiet mîkodụhe do, mma n̄ka iso ndu uwem nte eyen Jew. Mma nsidomo tiande kpukpru Sabbath, n̄kot Torah, nsinyụn̄ n̄kama n̄wed akam mme Jew mbọn̄ akam. N̄kesidọhọ nditọ ufọkn̄wed nnyịn ke ido ukpono nnyịn ọfọn akan. N̄kokotke Obufa Testament emi aban̄ade se Jesus Christ ọkọkwọrọde. Ke akpanikọ, eka mi ọkọdọhọ n̄kûkot mbak enye edibiat mi.

Nso ikanam ọtọn̄ọ ndikot Obufa Testament?

Mma n̄wọrọ n̄kodụn̄ ke United States ke ini n̄kedide isua 17 man n̄kokụre n̄wed. Do ke owo kiet emi ọkọdọhọde ke idi Christian ọkọdọhọ mi ke ntọn̄ọke-tọn̄ọ n̄kpọ Abasi kan̄a edieke mmennịmke Jesus ke akpanikọ.

Mma ndọhọ enye ke mbon emi ẹnịmde Jesus ke akpanikọ idiọn̄ọke se ẹnamde.

Enye ama obụp mi ete, “Ndi akanam omokot Obufa Testament?”

Mma ndọhọ enye ke n̄kotke.

Enye ama ọdọhọ mi ete, “Ifọnke nan̄a nditịn̄ se mûdiọn̄ọke.”

Ikọ esie ama odụk mi ọkpọ sia mma ndọdiọn̄ọ ke ifọnke owo nditịn̄ se enye mîdiọn̄ọke. Ntre mma mbọ enye Bible esie n̄kọtọn̄ọ ndikot Obufa Testament.

 Didie ke se okokotde okotụk fi?

Idem ama akpa mi ndifiọk ke nditọ Jew nnyịn ẹkewet Obufa Testament. Nte n̄kokotde, ntre ke n̄kokụt ke Jesus ekedi eyen Jew emi ọfọnde ido, osụhọrede idem, onyụn̄ amade ndin̄wam mme owo, utu ke nditụk mmọ. Mma n̄kam n̄ka itie ubonn̄wed n̄kọbuọt mme n̄wed emi ẹtịn̄de n̄kpọ ẹban̄a Jesus. Edi n̄wed emi ndomokiet ikanamke mi nnịm ke Jesus edi Messiah. Ndusụk n̄wed emi ẹkekam ẹdọhọ ke Jesus edi Abasi—ndien utọ ikọ oro ikenyeneke se ọwọrọde ọnọ mi. Mma n̄kere nte, ‘Edieke Jesus ekpedide Abasi, anie ndien ke enye ọkọbọn̄ akam ọnọ? Ndi ọkọbọn̄ ọnọ idemesie?’ Ke adianade do, Jesus ama akpa, ndien Bible ọdọhọ ke Abasi ikpaha. *

Akanam didie ọfiọk ibọrọ mbụme emi?

Akpanikọ ada ke idem, ndien ama enen̄ede ọdọn̄ mi ndifiọk akpanikọ. Ntre mma mbọn̄ akam nnọ Abasi ke ofụri esịt nnyụn̄ ntua nnọ enye nte an̄wam mi. Akpa ekedi emi ndibọn̄ akam n̄kamake n̄wed akam mme Jew. Ntisesịn amen, se owo iba mi ke enyịnusụn̄ mi. Mmọ ẹkedi Mme Ntiense Jehovah. Mme Ntiense emi ẹma ẹnọ mi n̄wed Ikọ Abasi mmọ. N̄wed emi ye mme nneme en̄wen emi n̄kenyenede ye Mme Ntiense emi ama anam n̄kụt ke mmọ ẹnen̄ede ẹkpep Bible. Ke uwụtn̄kpọ, Mme Ntiense ẹkpep nte ke Jesus edi “Eyen Abasi,” * kpa “ntọn̄ọ edibotn̄kpọ Abasi.” * Mmọ itieneke ikpep ke enye edi Abasi.

Ekem, ke mma n̄kafiak nnyọn̄ Mexico, mma n̄kaka iso ntie ye Mme Ntiense Jehovah n̄kpep mme ntịn̄nnịm ikọ emi ẹban̄ade Messiah. Idem ama akpa mi ndikụt nte mme ntịn̄nnịm ikọ emi ẹwakde ẹketre. Edi okosụk etie mi nte idịghe akpanikọ. Mma nsikere m̀mê Jesus ikpọn̄ akanam kpukpru se ẹtịn̄de emi. Okûkam udi Jesus okonyụn̄ etetie okot mme ntịn̄nnịm ikọ emi kiet kiet ekem anam se ẹketịn̄de do man mme owo ẹdọhọ ke enye edi Messiah?

Nso ikanam fi enịm ndien ke Jesus edi Messiah?

Mme Ntiense Jehovah ẹma ẹwụt mi ntịn̄nnịm ikọ emi owo ndomokiet mîkpekemeke nditie ke idem esiemmọ nnam osu. Ke uwụtn̄kpọ, prọfet Micah ekewet ke se ibede isua 700 mbemiso Jesus edimana ete ke Messiah edimana ke Bethlehem ke Judea. * Anie ekpekeme ndimek ebiet emi enye edimanade? Isaiah ama onyụn̄ ewet ke ẹyewot Messiah nte ata idiọkowo, ye nte ke ẹdibụk enye ye mme imọ owo. * Kpukpru emi ẹkesu Jesus ke idem.

Akpatre ntịn̄nnịm ikọ emi akanamde nnen̄ede nnịm ke Jesus edi Messiah aban̄a ubon emi enye otode. Bible ọkọdọhọ ke Messiah edito ubon Edidem David. * Edieke Jesus mîkotoho ubon David, mme asua esie emi ẹdide ẹma ẹnyene n̄wed emi owụtde ubon emi owo otode ẹkpekedọhọ ke Jesus itoho ubon David. Edi mmọ ikekemeke nditịn̄ utọ ikọ oro sia idụhe eyen Jew emi mîkọdiọn̄ọke ke Jesus oto ubon David. Nditọ Jew ẹkekam ẹkot enye “Eyen David.” *

Mbon Rome ẹma ẹdisobo Jerusalem ke isua 70 E.N.—oro edi, ke isua 37 ama ekebe tọn̄ọ Jesus akakpa. Ndien etie nte ẹma ẹnyụn̄ ẹsobo n̄wed ubon mme Jew mîdịghe edi okososop. Ntre, edieke akanade ẹda n̄wed ubon mme Jew ẹdiọn̄ọ Messiah, ọwọrọ ke Messiah ekenyene ndidi mbemiso ẹsobo Jerusalem.

Nso ke akanam ke ama ọkọdiọn̄ọ kpukpru emi?

Abasi eketịn̄ ke Deuteronomy 18:18, 19 ete ke imọ iyanam prọfet emi ebietde Moses adaha ada. “Ndien owo eke mîdikopke uyo mi eke enye editịn̄de ke enyịn̄ mi, ami nyokot enye edinam ibat.” Se n̄kpepde ke ofụri Bible anam nnịm ke Jesus eyen Nazareth ekedi prọfet oro.