Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ẹdemede!  |  May 2013

 SE BIBLE ETỊN̄DE ABAN̄A

Ndise Idan̄

Ndise Idan̄

Ndi Bible ọdọhọ owo okûse ndise idan̄?

“Owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ye enye ama ke esịt esie.”—Matthew 5:28.

NTAK EMI EKPEBEHEDE FI

Ndise idan̄ enen̄ede awak mfịn etieti onyụn̄ odu ke kpukpru ebiet. Edieke oyomde ndinem Abasi esịt nnyụn̄ nnen̄ede n̄kop inem uwem, ana ọdiọn̄ọ se Abasi ekerede aban̄a n̄kpọ emi.

SE BIBLE ETỊN̄DE

Owo isiakke ndise idan̄ ke itie ndomokiet ke Bible. Edi se enye etịn̄de owụt ke Abasi imaha owo ese utọ ndise oro.

Ke uwụtn̄kpọ, Bible ọdọhọ ke edieke owo emi ọdọde n̄wan “owụkde enyịn ese n̄wan” en̄wen, onyụn̄ ekere nte ikpọfiọkde enye, ke ndinam utọ n̄kpọ oro ekeme ndinam enye esịn efịbe. Se Bible etịn̄de emi ebehe kpukpru owo, edide owo ọdọ ndọ m̀mê idọhọ. Edieke owo “owụkde enyịn ese” ndise idan̄ tutu udọn̄ idan̄ edemede enye, utọ n̄kpọ oro esiyat Abasi esịt etieti.

 Ndi osụk ọdiọk ndise ndise idan̄ idem ekpededi oro inamke owo anam oburobụt ido?

“Ẹwot mme ndido idem mbufo . . . man ẹtre use, mbubiam ido, ọkpọsọn̄ udọn̄ idan̄, idiọk udọn̄, ye edisịn esịt ke n̄kpọ owo.”—Colossae 3:5.

SE MME OWO ẸTỊN̄DE

Ndusụk ntaifiọk ẹdọhọ ke ndise idan̄ inen̄ekede inam owo anam oburobụt ido. Edi ndi ndise idan̄ ke idemesie idịghe oburobụt ido?

SE BIBLE ẸTỊN̄DE

Bible ọdọhọ ke “ikọ idiọk mbubru” onyụn̄ ọdiọk nte oburobụt ido. (Ephesus 5:3, 4) Ndi owo ndise ndise idan̄ ikam idiọkke ikan ikọ idiọk mbubru? Ẹsisio nte mme owo ẹsịnde ẹfịbe, erenowo anade ye erenowo, n̄wan onyụn̄ anade ye n̄wan, ye mme orụk use eken. Ke akpanikọ, ndise utọ obụrobụt n̄kpọ oro esikam ayat Abasi esịt akan owo nditịn̄ ikọ idiọk mbubru.

Ntaifiọk ke ẹfan̄a ke ndise idan̄ ikemeke ndinam owo anam idan̄. Edi Bible owụt ke ndise idan̄ ke idemesie edi idiọkn̄kpọ emi enen̄erede ayat Abasi esịt. Bible ọdọhọ ete: “Ẹwot mme ndido idem mbufo . . . man ẹtre use, mbubiam ido, ọkpọsọn̄ udọn̄ idan̄.” (Colossae 3:5) Utu ke ndiwot ndido idem mmọ man ẹtre use, mbon emi ẹsede ndise idan̄ ẹkam ẹdedemede udọn̄ emi ke idem mmọ.

Nso ikeme ndin̄wam fi man okûse ndise idan̄?

“Ẹyom se ifọnde ẹkûyom se idiọkde . . . Ẹsua se idiọkde ẹnyụn̄ ẹma se ifọnde.”—Amos 5:14, 15.

SE BIBLE ETỊN̄DE

Bible etịn̄ nte mbon use, mme akpammịn, ye mme inọ ẹkekabarede esịt ẹkpọn̄ idiọk uwem mmọ. (1 Corinth 6:9-11) Nso ikan̄wam mmọ ẹnam emi? Ndinam se Ikọ Abasi etemede akan̄wam mmọ ẹsua se idiọkde.

Nnyịn n̄ko imekeme ndisua ndise idan̄ edieke itiede ikere ndiọi utịp emi enye edinyenede ke idem nnyịn. Ndụn̄ọde oro ufọkn̄wed ntaifiọk kiet ke America akanamde ndondo emi owụt ke ndusụk mbon oro ẹsisede ndise idan̄ ẹsinyene udọn̄ọ ibuot, ikemeke ndidụk otu, inyeneke ufan, ẹnyụn̄ ẹbọ ndiọi utịp eken. Se ikam idiọkde-diọk ikan oro edi ke ndise ndise idan̄ esiyat Abasi esịt etieti nte ikosụk itịn̄de ke enyọn̄ emi. Ndise idan̄ isiyakke owo asan̄a ekpere Abasi.

Bible ayan̄wam nnyịn ikpep ndima se inende. Nte nnyịn ikotde Bible, ntre ke nnyịn iditetịm ima mme edumbet Abasi. Utọ ima emi idiyakke nnyịn ise ndise idan̄. Nnyịn iyanam se andiwet Psalm akanamde. Enye ekewet ete: “Ami ndinịmke obukpo n̄kpọ ekededi ke iso mi.”—Psalm 101:3.

 

Kpep N̄kpọ En̄wen

ENYỌN̄-UKPEME

Ndi Ndise Idan̄ Esinam Owo N̄kpọ?

Nso ke ndise idan̄ esinam owo ye mme ubon?