Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ẸDEMEDE! MAY 2013

Ini Emi Ebe Mîdisitịmke N̄wan Aba

Ini Emi Ebe Mîdisitịmke N̄wan Aba

Akpa Ufọk: Ete ye eka Arit ẹdi ndise Arit * eyen mmọ. Mmọ ẹtie ntre ye Arit ye ebe esie ẹdia udia mbubreyo, ke ẹneme ke ẹsak. Ebe eyen mmọ enem itie etieti. Ewe ete ye eka mîkpamaha eyen mmọ ọdọ utọ akparawa oro ọfọnde ntre? Ebe Arit akama Arit ọfọn etieti.

Ọyọhọ Ufọk Iba: Esịt ayat Edet nte ọmọn̄ owot owo. Enye adaha ebịne n̄wan esie nte ido esie edide, akasiak enye ufia, omụm enye idet odụri, atịgha, onụk ọtọ ke ibibene.

IDEM ekeme ndikpa fi ndifiọk ke ebe Arit emi iketịn̄de iban̄a ke enyọn̄ anam emi.

Ediwak mbon oro ẹsitịmde iban mmọ ẹsidi ẹma ẹkụt owo, m̀mê ukot mmọ, mmọ ẹnam nte idi nti owo. Edi ke ini ẹdude mmọ mmọ ke ufọk, n̄wan enyene ndibọ nta n̄kop.

Mme owo nte Edet ẹkekpon ke ufọk emi etiede afai afai, ntre mmọ ẹsikere ke idiọkke ndidu uwem ntre. Edi utọ uwem  oro enen̄ede ọdiọk. Ntak edi oro esinen̄erede abiak onyụn̄ akpa ediwak owo idem ndikop ke owo etịm n̄wan esie.

Edi mme owo ke ẹtetịm iban mmọ. Ke uwụtn̄kpọ, ke United States, n̄kpọ nte iban 16 ẹsikot kpukpru minit ke fon ẹte ke ebe ọmọn̄ etịm mmimọ owot. Edi n̄kpọ mbọm nditịn̄ nte ke idụhe ebiet emi mme ebe mîsitịmke iban mmọ ke ererimbot emi. Edi sia mîdịghe kpukpru iban ẹsima nditịn̄ utọ n̄kpọ emi nnọ owo, owo ikemeke nditịm ifiọk ibat iban emi mme ebe ẹsitịmde. *

Nte mme ebe ẹsitịmde iban mmọ anam mme owo ẹbụp m̀mê nso ikpanam owo odu uwem ntre ye ekemmọ owo, akpan akpan n̄wan esie. Ndi ẹsụk ẹkeme ndin̄wam mme ebe emi ẹsitịmde iban mmọ?

Mme Ntiense Jehovah emi ẹsiode magazine emi ẹnịm ke Bible ekeme ndinam mme ebe emi ẹsitịmde iban mmọ ẹkpụhọde. Ndi esimem utom ndinam emi? Ihih. Edi ndi utọ ebe oro ekeme ndikabade esịt? Ih. Ndikpep Bible an̄wam ediwak ebe emi ẹkedide mbon afai ẹkabade ẹfọn ido ẹnyụn̄ ẹkpono iban mmọ. (Colossae 3:8-10) Yak ikop mbụk Troy ye Valerie.

Mbufo ẹkesidu uwem didie?

Valerie: Troy ama asiak mi ufia okoneyo emi enye okobụpde mi ndọ. Ufia emi ama anam iso ọyọhọ mi ke ofụri urua kiet. Enye ama ekpe mi ubọk onyụn̄ ọdọhọ ke tutu amama imọ idinamke utọ n̄kpọ oro aba. Edi enye ekesisụk etetịm mi ediwak isua ke oro ebede. Esidi enye ama etịm mi ama enye ekpe mi ubọk.

 Troy: Iwakke n̄kpọ emi mîkesiyatke mi esịt—edieke n̄wan mi mînọhọ mi udia ke ini, esịt ama esiyat mi. Isan̄ kiet mma nda ikan̄ mmia enye. Isan̄ en̄wen, mma mmia enye tutu n̄kere ke enye akpa. Ekem mma mmen ikwa nnam nte nyom ndikịm eyen nnyịn n̄wot man idem enyek n̄wan mi.

Valerie: N̄kodu uwem ke ndịk kpukpru ini. Ndusụk ini, mma nsifehe n̄wọrọ ke ufọk tutu esịt osụhọ ebe mi. Edi se ikesibiakde mi ikan enye nditịm mi ekedi idiọk ikọ inua emi enye ekesisiode ọnọ mi.

Troy, ndi afo ekedi owo afai toto ke editọn̄ọ?

Troy: Ih, toto ke ekpri, afai ama esikpon ke ufọk nnyịn. Ete mi ama esitịm eka mi ke iso mi ye nditọeka emi. Ke enye ama ọkọkpọn̄ eka mi, eka mi ama aka okodụn̄ ye owo en̄wen emi ekesinyụn̄ etịmde enye. Ete emi ama asabade adiahaeka mi onyụn̄ asabade mi nde. Ẹma ẹkọbi enye ke ndikadan̄ nnyịn ke n̄kanubọk. Edi mmọdiọn̄ọ ke emi ikpanamke ndu uwem ntem.

Valerie, nso ikanam aka iso ọdọ enye?

Valerie: Ndịk akanam. Mma nsikere ke enye ekeme ndidi ndiwot mi mîdịghe owot ete ye eka mi. Mma nsinyụn̄ n̄kere ke edieke ntịn̄de nnọ owo, ke enye ekeme ndinam mi n̄kpọ.

Ini ewe ke n̄kpọ ọkọtọn̄ọ ndifọn?

Troy: N̄wan mi ama ọtọn̄ọ ndikpep Bible ye Mme Ntiense Jehovah. N̄kamaha mmọ, ntre mma nnam se n̄kekeme man mmọ ẹkûdi aba. Mma nnen̄ede ndu uwem afai afai ye n̄wan mi ye Mme Ntiense oro n̄ko. Edi usen kiet, idem ama edịbede Daniel akpan nnyịn emi ekedide isua inan̄. Ima imen enye ikenịm ke ufọkibọk ke n̄kpọ nte urua ita. Mme Ntiense emi ẹma ẹnen̄ede ẹn̄wam nnyịn, ẹnyụn̄ ẹse ẹban̄a Desiree adiaha nnyịn emi ekedide eyen isua itiokiet. Ntiense kiet emi akanamde utom okoneyo ikakaha ikọduọk odudu, edi ama editie ye Daniel man n̄wan mi akanana ede. Idem ama enen̄ede akpa mi ndikụt nte mbon oro n̄kenen̄erede nsua ẹfọnde ido ntem ye ami. Mma ndikụt ke mmọ ẹdi  ata mme Christian, ntre mma ndọhọ owo mmọ kiet edikpep mi Bible. Nte n̄kosụk n̄kpepde Bible, mma ndikụt nte ebe okpodude uwem ye n̄wan esie. Emi ama anam ntre uwem afai ofụri ofụri. Ekem, mma n̄kabade ndi Ntiense Jehovah.

Mme itie Bible ewe ẹken̄wam fi okpụhọde?

Troy: Ẹwak etieti. Akpa Peter 3:7 emi ọdọhọde ‘n̄kpono’ n̄wan mi. Galatia 5:23 emi ọdọhọde nnyene “ifụre ifụre ido” nnyụn̄ “mfara ke idem.” Ephesus 4:31 emi ọdọhọde n̄kususụn̄i n̄wan mi. Mme Hebrew 4:13 emi ọdọhọde ke “kpukpru n̄kpọ ẹna iferi ẹnyụn̄ ẹna in̄wan̄-in̄wan̄ ke enyịn” Abasi. Oro ọwọrọ ke Abasi okụt kpukpru se nnamde ọkpọkọm mme owo ikwe. Mma n̄kụt ke ana ntre ndụk ye ndiọi ufan mi sia “idiọk nsan̄a ababiat eti ido.” (1 Corinth 15:33) Ndiọi ufan mi ẹkekam ẹnam nnen̄ede mma afai. Mmọ ẹkesidọhọ ke ọfọn owo nditịm n̄wan esie man enye okpono owo.

Ndọ mbufo etie didie idahaemi?

Valerie: Esịm isua 25 idahaemi tọn̄ọ ebe mi ekedi Ntiense Jehovah. Tọn̄ọ oro, enye enen̄ede ama mi, ọfọn ido, onyụn̄ etịm mi akama.

Troy: N̄kemeke ndikpụhọde ofụri afanikọn̄ oro n̄kesịnde ke ubon mi, inyụn̄ idịghe ata edima an̄wan mi ke n̄kpakakama ntre. Ke mbebet ini emi Isaiah 65:17 edisude, kpa ini emi owo mîditịghi ofụri afanikọn̄ idiọk ererimbot emi.

Nso item ke mbufo ẹkpenọ mbon oro mme ebe ẹsitịmde?

Troy: Edieke afo esitịmde n̄wan fo, m̀mê esisiode idiọk ikọ inua ke ufọk, mbọk n̄wana kabade esịt. Enyene se ikemede ndin̄wam fi. Okịmmọ, Mme Ntiense Jehovah ẹken̄wam mi. Bible emi mmọ ẹkekpepde mi ye ndụk oro n̄kodụkde ye mmọ ama anam n̄keme nditre afai oro ekesịnede mi ke iyịp.

Valerie: Kûsọp ndimen ebe fo n̄kodomo ye owo en̄wen m̀mê ndinam se owo ekededi ọdọhọde anam ke ọyọfọn ye afo. Okposụkedi eke kpukpru owo mîditiehe nte okịm, esịt enem mi nte mmen̄kọkpọn̄ke ebe mi sia ndọ nnyịn enen̄ede enem idahaemi.

INI EMI EBE MÎDISITỊMKE N̄WAN ABA

Ndikpep Bible an̄wam ediwak ebe ẹkpụhọde

Bible ọdọhọ ete: “Abasi ọkọnọ odudu spirit ẹda ẹwet ofụri N̄wed Abasi, ndien enye ọfọn ndida nnọ ukpep, nsua nnọ owo, nnen̄ede mme n̄kpọ.” (2 Timothy 3:16) Ediwak ebe emi ẹkesitịmde iban mmọ nte Troy oro isụk ibụkde mbụk mmọ mi, ẹnam se Bible etịn̄de ẹnyụn̄ ẹkabade esịt.

Ndi akpama ndifiọk nte Bible ekemede ndinam ndọ mbufo enem? Mbọk nyene nneme ye Mme Ntiense Jehovah ke edem mbufo, mîdịghe, se ikpehe Intanet nnyịn emi: www.jw.org/efi..

^ ikp. eki. 2 Ẹkpụhọ ndusụk enyịn̄ ke ibuotikọ emi.

^ ikp. eki. 7 Okposụkedi emi edide mme ebe ẹsiwak nditịm iban mmọ, imọfiọk n̄ko ke ndusụk iban ẹsitịm ebe n̄ko.