“Idụt emi Abasi mmọ edide Jehovah, kpa mbon emi enye emekde nte udeme esie, ẹkop inemesịt.”​—PS. 33:12.

IKWỌ: 40, 50

1. Ntak emi Jehovah odotde ndinyene kpukpru n̄kpọ? (Se akpa ndise ibuotikọ emi.)

JEHOVAH enyene kpukpru n̄kpọ! Enye enyene “heaven, kpa n̄kon̄n̄kan heaven . . . ye isọn̄ ye kpukpru se idude ke esịt.” (Deut. 10:14; Edi. 4:11) Jehovah onyụn̄ enyene kpukpru nnyịn sia enye okobot nnyịn. (Ps. 100:3) Edi toto ke eset, Jehovah esimek ndusụk owo nte akpan inyene esie.

2. Mmanie ke Bible ọdọhọ ke ẹdi “akpan inyene” Jehovah?

2 Ke uwụtn̄kpọ, Psalm 135 ọdọhọ ke nditọ Israel oro ẹkenamde n̄kpọ Jehovah ke ofụri esịt ẹkedi “akpan inyene” esie. (Ps. 135:4) Prọfet Hosea ama ọdọhọ n̄ko ke mbon oro mîdịghe nditọ Israel ẹyekabade ẹdi ikọt Jehovah. (Hos. 2:23) Prọfesi Hosea oro ama osu ke ini Jehovah ekemekde mbon oro mîdịghe nditọ Israel esịn ke otu mbon oro ẹditienede Jesus ikara ke heaven. (Utom 10:45; Rome 9:​23-26) Mbon oro ẹditienede Jesus ikara ẹdi “edisana idụt.” Mmọ ẹdi “akpan inyene” Jehovah sia enye ada edisana spirit eyet mmọ aran onyụn̄ emek mmọ ẹkedu uwem ke heaven. (1 Pet. 2:​9, 10) Edi ata ediwak nti ikọt Abasi eken ẹdidu uwem ke isọn̄. Jehovah ada mmọ didie? Enye okot mmọ “ndimek ikọt mi.”​—Isa. 65:22.

3. (a) Mmanie idi ikọt Jehovah mfịn? (b) Nso ke idineme ke ibuotikọ emi?

 3 Mfịn, “ekpri otuerọn̄” emi ẹdoride enyịn ndidu uwem ke nsinsi ke heaven ye “mme erọn̄ en̄wen” emi ẹdoride enyịn ndidu uwem ke nsinsi ke isọn̄ ẹdi “otuerọn̄ kiet.” Jehovah enen̄ede ama mmọ onyụn̄ ada mmọ nte ikọt esie. (Luke 12:32; John 10:16) Ọfọn iwụt Jehovah ke imenen̄ede ima nte enye anamde nnyịn idi ikọt esie. Ke ibuotikọ emi, iyeneme nsio nsio usụn̄ oro ikemede ndiwụt ke imama nte Jehovah anamde nnyịn idi ikọt esie.

IMAYAK UWEM NNYỊN INỌ JEHOVAH

4. Nso idi n̄kpọ kiet emi ikpanamde man iwụt ke imama nte Jehovah anamde nnyịn idi ikọt esie, ndien didie ke Jesus akanam ukem n̄kpọ oro?

4 Nnyịn ndiyak uwem nnyịn nnọ Jehovah owụt ke imama nte enye anamde nnyịn idi ikọt esie. Ke ini inade baptism, nnyịn inam mme owo ẹfiọk ke Jehovah edinyene nnyịn, ke imonyụn̄ inyịme ndisụk ibuot nnọ enye. (Heb. 12:9) Jesus ama anam ukem n̄kpọ oro ini enye akanade baptism. Eketie nte n̄kpọ eke enye ọdọhọde Jehovah ete: “Mmadat esịt ndinam uduak fo, O Abasi mi.” (Ps. 40:​7, 8) Jesus ama ayak idemesie ọnọ Jehovah man anam uduak esie kpa ye oro edide enye akamamana odụk idụt oro ẹma ẹkeyayak idem ẹnọ Abasi.

5, 6. (a) Nso ke Jehovah akanam ini Jesus akanade baptism? (b) Ewe uwụtn̄kpọ owụt ke Jehovah ama nte iyakde idem inọ enye kpa ye oro edide enye enyene nnyịn?

5 Nso ke Jehovah akanam ke ini Jesus akanade baptism? Bible ọdọhọ ete: “Ke Jesus ama akana baptism, kpa idaha oro enye ọwọrọ ke mmọn̄; ndien, sese! enyọn̄ eberede, ndien enye okụt spirit Abasi osụhọrede nte ibiom edidoro enye ke idem. Sese! N̄ko, uyo oto ke heaven ọdọhọ ete: ‘Emi edi edima Eyen mi, emi ami nnyịmede.’ ” (Matt. 3:​16, 17) Kpa ye oro edide Jehovah enyene Jesus, esịt ama enem enye ndikụt Eyen esie enyịmede ndinam uduak esie. Ntre ke esịt esinyụn̄ enem Jehovah ke ini nnyịn iyakde idem inọ enye. Enye iditreke-tre ndidiọn̄ nnyịn.​—Ps. 149:4.

6 Ke uwụtn̄kpọ, yak idọhọ ke ete kiet enyene in̄wan̄ ibokpot. Usen kiet, ekpri eyen esie odụk in̄wan̄ oro ekesịbe ibokpot kiet edifọp ọnọ enye. Ndi enye oro osụk edi enọ? Ndi idịghe ete esie ọkọtọ ibokpot oro? Ete oro amade eyen esie idikereke m̀mê eyen imọ akpanam didie emen ibokpot imọ edinọ imọ nte enọ. Esịt edikam inenem enye ke eyen imọ ama imọ. Enye ayama ibokpot oro akan kpukpru ibokpot eken ke in̄wan̄. Esịt esinem Jehovah n̄ko ke ini nnyịn inyịmede ndiyak uwem nnyịn nnọ enye man inam uduak esie.​—Ex. 34:14.

7. Didie ke Malachi anam nnyịn ifiọk nte Jehovah adade mbon oro ẹnyịmede ndinam n̄kpọ esie?

7 Kot Malachi 3:16. Edieke mûyakke idemfo unọ Jehovah kan̄a unyụn̄ una baptism, ọkpọfọn etie ekere ntak emi akpanamde oro. Imọdiọn̄ọ ke Jehovah enyene kpukpru nnyịn, enye onyụn̄ enyene fi tọn̄ọ usen emi eka fo okoyomode fi. Edi, kere nte esịt edinemde Jehovah edieke ayakde idemfo ọnọ enye onyụn̄ anamde uduak esie man owụt ke emenyịme enye akara fi. (N̄ke 23:15) Jehovah ọdiọn̄ọ mbon oro ẹnyịmede ndinam n̄kpọ esie, enye onyụn̄ ewet enyịn̄ mmọ esịn ke “n̄wed editi” esie.

8, 9. Nso ke Jehovah oyom mbon oro enye ewetde enyịn̄ esịn ke “n̄wed editi” esie ẹnam?

8 Enyene se anade inam edieke iyomde  Jehovah ewet enyịn̄ nnyịn esịn ke “n̄wed editi” esie. Malachi ọkọdọhọ ke ana ‘ibak Jehovah inyụn̄ ikere iban̄a enyịn̄ esie.’ Jehovah ọyọsọhi enyịn̄ owo ekededi oro atuakde ibuot ọnọ owo m̀mê n̄kpọ ekededi efep ke n̄wed uwem.​—Ex. 32:33; Ps.69:28.

Ndiyak idem nnọ Jehovah ikụreke ke ndin̄wọn̄ọ nnọ enye ke iyanam uduak esie, inyụn̄ ikụreke ke ndina baptism. Isiyak idem inọ Jehovah ini kiet, isinyụn̄ ina baptism ini kiet. Edi edieke iyomde ndika iso ndi ikọt Jehovah, ana isikop uyo esie ke ofụri eyouwem nnyịn.​—1 Pet. 4:​1, 2.

NNYỊN ISITIENEKE ERERIMBOT INAM SE MMỌ ẸNAMDE

10. Nso ukpụhọde ikpodu ke ufọt mbon oro ẹnamde n̄kpọ Jehovah ye mbon oro mînamke?

10 Ima ineme iban̄a Cain, Solomon, ye nditọ Israel ke ibuotikọ oro okokụrede. Kpukpru mmọ ẹkedọhọ ke ituak ibuot inọ Jehovah edi mmọ ikanamke oro ke ofụri esịt. Mbụk mmọ ekpep nnyịn ke ana mbon oro ẹdade ye Jehovah ẹnen̄ede ẹsua se idiọkde ẹnyụn̄ ẹma se ifọnde. (Rome 12:9) Ke Malachi ama eketịn̄ aban̄a “n̄wed editi,” Jehovah ama ọdọhọ ke “ẹyetọn̄ọ ntak ẹkụt ukpụhọde ke ufọt edinen owo ye idiọkowo, ye ke ufọt owo emi anamde n̄kpọ Abasi ye owo emi mînamke.”​—Mal. 3:18.

11. Ntak emi ikpanamde mme owo ẹfiọk ke Jehovah enyene nnyịn?

11 Nso en̄wen ke ikpanam man iwụt ke imama nte Jehovah anamde nnyịn idi ikọt esie? Ana inam ‘kpukpru owo ẹkụt’ ke nnyịn idi ikọt Jehovah. (1 Tim. 4:15; Matt. 5:16) Ntre, bụp idemfo ete: ‘Ndi kpukpru owo ẹkụt ke nda ye Jehovah? Ndi mmesiyom usụn̄ nnam mme owo ẹfiọk ke ndi Ntiense Jehovah?’ Jehovah emek nnyịn idi ikọt esie. Ntre akpayat enye ata etieti edieke nnyịn mîmaha ndinam mme owo ẹfiọk ke enye enyene nnyịn.​—Ps. 119:46; kot Mark 8:38.

Ndi nte afo odude uwem anam ẹdiọn̄ọ ke afo edi Ntiense Jehovah? (Se ikpehe 12, 13)

12, 13. Didie ke ndusụk owo ẹnam ọsọn̄ ndifiọk m̀mê mmọ ẹdi Mme Ntiense Jehovah m̀mê idịghe?

12 Edi n̄kpọ o-bụt ndikụt ndusụk nditọete  ẹyakde “spirit ererimbot” emi adia mmọ idem tutu iyakke mme owo ẹdiọn̄ọ m̀mê mmọ ẹnam n̄kpọ Abasi m̀mê inamke. (1 Cor. 2:12) Spirit ererimbot emi esinam mme owo ẹnam se idọn̄de mmọ. (Eph. 2:3) Ke uwụtn̄kpọ, kpa ye ofụri item oro esop Abasi ẹnọde ẹban̄a nte ẹkpesịnede ọfọn̄, ndusụk nditọete nnyịn ẹsụk ẹsesịne ọfọn̄ ẹnyụn̄ ẹkama idem ke usụn̄ oro owụtde ke mmọ inyeneke iso o-bụt. Mmọ ẹsisịne ọfọn̄ emi ọbọpde mmọ onyụn̄ osion̄ode mmọ ndido idem owụt ekondo. Mmọ ẹsikam ẹsọn̄ esịt ẹsịne utọ ọfọn̄ oro ẹka mbono esop ye mbono. Ndusụk nditọete ẹsifat idet ẹnyụn̄ ẹnam idet emi edide okpokụt idịbi obụhọde fi. (1 Tim. 2:​9, 10) Ndien ke ini mmọ ẹdude ke otuowo, ekeme ndisọn̄ ndifiọk mbon emi ẹdide Mme Ntiense Jehovah ye mbon emi ẹdide “ufan ye ererimbot.”​—Jas. 4:4.

13 Enyene mme n̄kpọ en̄wen emi ndusụk nditọete ẹsinamde nte mbon ererimbot. Nte mmọ ẹsinekde unek ẹnyụn̄ ẹnamde n̄kpọ ke itie usọrọ isitiehe nte mmọ ẹdi Mme Ntiense Jehovah. Okpokụt ndise mmọ ye se mmọ ẹwetde ke Intanet udûkereke-kere ke mmọ ẹdiọn̄ọ Abasi. Ekeme ndidi ke owo ikpehe ikpe inọ mmọ ke mmọ ẹnam akwa idiọkn̄kpọ, edi mmọ ẹkeme ndibiat nditọete eken emi ẹdomode ndidu eti uwem.​—Kot 1 Peter 2:​11, 12.

Kûyak mbon oro mînen̄ekede iwụt ke ida ye Jehovah ẹnam fi etie nte mmọ

14. Nso ke ana inam man ika iso idi ufan Jehovah?

14 Se ibehede ererimbot emi edi ndinam mme owo ẹyom “se idọn̄de obụkidem ye se idọn̄de enyịn ye edida se owo enyenede n̄wụt idem.” (1 John 2:16) Edi sia edide Jehovah enyene nnyịn, enye ọdọhọ nnyịn “ikûdu uwem unana uten̄e Abasi, inyụn̄ ifep mme udọn̄ ererimbot, inyụn̄ idu uwem ye eti ibuot ye edinen ido ye uten̄e Abasi ke editịm n̄kpọ emi.” (Titus 2:12) Akpana kpukpru se inamde anam mme owo ẹkụt ke Jehovah enyene nnyịn. Emi esịne nte inamde utom, itịn̄de ikọ, idiade udia, in̄wọn̄de mmịn, isịnede ọfọn̄, ye nte ikamade idem.​—Kot 1 Corinth 10:​31, 32.

 IMENEN̄EDE IMA NDITỌETE NNYỊN

15. Ntak emi ikpamade nditọete nnyịn inyụn̄ ifọnde uwem ye mmọ?

15 Nte inamde n̄kpọ ye nditọete nnyịn oyowụt m̀mê imama nte Jehovah anamde nnyịn idi ikọt esie. Edieke isitide ke Jehovah enyene mmọ n̄ko, iyesima mmọ inyụn̄ ifọn uwem ye mmọ. (1 Thess. 5:15) Jesus ọkọdọhọ mme mbet esie ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”​—John 13:35.

16. Nso ke Ibet Moses eketịn̄ oro anamde ifiọk nte Jehovah adade ikọt esie?

16 Ibet kiet oro Jehovah ọkọnọde nditọ Israel an̄wam nnyịn ifiọk nte ikpanamde n̄kpọ ye nditọete nnyịn. Enyene mme n̄kpoduoho ke temple oro mîkanaha ẹda ẹnam n̄kpọ ndomokiet en̄wen ke mîbọhọke ndida mfọp uwa nnọ Jehovah. Ibet Moses ama etịn̄ nte ẹkpesede ẹban̄a mme n̄kpoduoho oro. Akana ẹwot owo oro akabiatde ibet oro. (Num. 1:​50, 51) Edieke ekenen̄erede ebehe Jehovah nte ẹkamade mme n̄kpoduoho oro, ndi ekere ke idibeheke enye nte inamde n̄kpọ ye nditọete nnyịn oro enye emekde ọnọ idemesie? Jehovah ama etịn̄ nte enye adade ikọt esie ete: “Owo eke otụkde mbufo otụk n̄kpasịp enyịn mi.”​—Zech. 2:8.

17. Nso ke Jehovah esikụt onyụn̄ ‘akpan̄ utọn̄ okop’?

17 Malachi ọdọhọ ke ‘Jehovah esikpan̄ utọn̄ okop’ se ikọt esie ẹnemede. (Mal. 3:16) Jehovah enen̄ede ọfiọk “mmọ eke ẹnyenede enye.” (2 Tim. 2:19) Enye ọfiọk kpukpru se nnyịn isinamde onyụn̄ okop kpukpru se isitịn̄de. (Heb. 4:13) Jehovah esikụt ini nnyịn isọn̄de ido ye nditọete nnyịn. Enye esinyụn̄ okụt ini nnyịn ifọnde ido ye nditọete nnyịn, itatde ubọk inọ mmọ n̄kpọ, inyụn̄ ifende inọ mmọ.​—Heb. 13:16; 1 Pet. 4:​8, 9

‘JEHOVAH IDISỊNKE IKỌT ESIE’

18. Nso ke ikpanam man iwụt ke imenen̄ede ima nte Jehovah anamde nnyịn idi ikọt esie?

18 Enen̄ede ọdọn̄ nnyịn ndiwụt Jehovah ke enem nnyịn nte enye anamde nnyịn idi ikọt esie. Imedikụt ke idụhe se ifọnde nte ndidi inyene Jehovah. Ntak edi oro ikenyịmede ndiyak idem nnyịn nnọ enye. Kpa ye oro idude ke “n̄kakwan̄a emana” emi, iyom mme owo ẹkụt ke nnyịn ‘inyeneke nduduọhọ ye ndudue,’ ke imonyụn̄ ‘iyama nte se inọde un̄wana ke ererimbot’ emi. (Phil. 2:15) Imenen̄ede isua idiọkn̄kpọ. (Jas. 4:7) Edi imama nditọete nnyịn inyụn̄ ikpono mmọ sia imọfiọk ke Jehovah enyene mmọ.​—Rome 12:10.

19. Didie ke Jehovah ọdiọn̄ ikọt esie?

19 Bible ọdọhọ ke ‘Jehovah idisịnke ikọt esie.’ (Ps. 94:14) Inamke n̄kpọ m̀mê nso iwọrọ nnyịn, Jehovah idisịnke nnyịn. N̄kpa ikam ikemeke ndinam Jehovah etre ndima nnyịn. (Rome 8:​38, 39) Rome 14:8 ọdọhọ ke “edieke nnyịn idude uwem, idu inọ Jehovah, onyụn̄ edieke ikpade, ikpa inọ Jehovah. Ntre ke idude uwem ye ke ikpade, nnyịn inyene Jehovah.” Enen̄ede ọdọn̄ nnyịn ndikụt usen emi Jehovah edinamde kpukpru nti ikọt esie oro ẹma ẹkekpan̄a ẹset. (Matt. 22:32) Idem idahaemi, Jehovah ke ọdiọn̄ nnyịn nte inua mîkemeke nditịn̄. Bible enen ndidọhọ ke “idụt emi Abasi mmọ edide Jehovah, kpa mbon emi enye emekde nte udeme esie, ẹkop inemesịt.”​—Ps. 33:12.