Be ka se isịnede

Be ka se isịnede

Mme Ntiense Jehovah

Mek usem Efịk

 IBUOTIKỌ MAGAZINE EMI | NTE HEAVEN ETIEDE

Mbon Emi Ẹdụn̄de ke Heaven

Mbon Emi Ẹdụn̄de ke Heaven

Ediwak n̄kukụt ẹdu ke Bible emi ẹnamde ifiọk n̄kpọ iban̄a heaven. Mbọk kot ibuotikọ emi man ọfiọk mme n̄kukụt emi. Kpa ye oro ndusụk n̄kpọ oro ẹtịn̄de ke n̄kukụt emi ẹdade ẹban̄a n̄kpọ, mme n̄kukụt emi ẹkeme ndinam fi ọdiọn̄ọ mbon emi ẹdụn̄de ke heaven ye nte mmọ ẹkemede ndin̄wam nnyịn.

JEHOVAH EDI AKAKAN ANDIKARA

“Ebekpo odu ke itie esie ke heaven, owo onyụn̄ etie ke ebekpo oro. Ndien enye emi etiede, ebiet itiat jasper ye ọsọn̄urua ndatndat itiat, akpara emi ebietde emerald onyụn̄ odu akanade ebekpo oro okụk.”—Ediyarade 4:2, 3.

“N̄kụt n̄kpọ eke ebietde ikan̄, enye onyụn̄ ayama akan okụk. Ndien n̄kpọ eke ebietde akpara odu ke obubịt enyọn̄ nte ke usen emi edịm edepde. Ntem ke uyama oro akande okụk eketie. Enye ekebiet ubọn̄ Jehovah.”—Ezekiel 1:27, 28.

Ke n̄kukụt oro apostle John ye prọfet Ezekiel ẹkekụtde, ẹkeda mme n̄kpọ emi nnyịn ikemede ndifiọk, utọ nte ọsọn̄urua itiat emi esemde, akpara, ye ebekpo oro enyenede uku, ẹwụt ubọn̄ Jehovah, Ata Okpọsọn̄ Abasi. N̄kukụt emi anam ifiọk ke ebekpo Jehovah enen̄ede eye onyụn̄ enyene uten̄e.

Se mmọ ẹkekụtde emi onyụn̄ edi ukem ye se andiwet Psalm ekewetde ete: “Koro Jehovah okponde onyụn̄ enen̄erede odot se ẹtorode. Enye enyene uten̄e akan kpukpru mme abasi efen. Koro kpukpru mme abasi mme idụt ẹdi mme abasi eke mînyeneke ufọn; edi amaedi Jehovah, edi enye akanam enyọn̄. Uku ye ubọn̄ ẹdu enye ke iso; odudu ye uyai ẹdu ke edisana ebiet esie.”—Psalm 96:4-6.

Kpa ye oro Jehovah edide Akakan Andikara, enye ọdọhọ ibọn̄ akam inọ imọ onyụn̄ ọdọhọ ke imọ iyokop akam nnyịn. (Psalm 65:2) Abasi enen̄ede ama nnyịn onyụn̄ ekere aban̄a nnyịn. Ntak edi oro apostle John ekewetde ete: “Abasi edi ima.”—1 John 4:8.

JESUS ODU YE ABASI

“[Stephen emi ekedide anditiene Christ], ọyọhọ ye edisana spirit, owụk enyịn ese enyọn̄ onyụn̄ ada okụt ubọn̄ Abasi ye Jesus nte adade ke ubọk nnasia Abasi, enye onyụn̄ ọdọhọ ete: ‘Sese! Mmokụt enyọn̄ nte ebererede ye Eyen owo nte adade ke ubọk nnasia Abasi.’”—Utom 7:55, 56.

Esisịt ini mbemiso Stephen okokụtde n̄kukụt emi, mme adaiso ido ukpono mme Jew oro enye eketịn̄de n̄kukụt emi ọnọ ẹma ẹnam ẹwot Jesus. N̄kukụt emi ama anam ẹdiọn̄ọ ke Jesus ama eset, ke ẹma ẹnyụn̄ ẹnọ enye ubọn̄. Apostle Paul ama ewet  aban̄a n̄kpọ emi ete: ‘Jehovah ama anam Jesus eset ke n̄kpa onyụn̄ anam enye etie ke ubọk nnasia esie ke mme itie eke heaven, emi etịmde okon̄ akan kpukpru ukara ye odudu ye itie ubọn̄ ye kpukpru enyịn̄ eke ẹsiakde, idịghe sụk ke editịm n̄kpọ emi, edi n̄ko ke editịm n̄kpọ emi edidide.’—Ephesus 1:20, 21.

Itien̄wed Abasi emi anam ikụt ke itie emi ẹnọde Jesus enen̄ede okpon, onyụn̄ owụt ke Jesus enen̄ede ekere aban̄a nnyịn kpa nte Jehovah ekerede aban̄a nnyịn. Ke ini Jesus okodude mi ke isọn̄, enye ama ọkọk mme owo udọn̄ọ onyụn̄ anam mme akpan̄kpa ẹset. Jesus ndikakpa mfak nnyịn owụt ke enye enen̄ede ama Abasi onyụn̄ ama mme owo. (Ephesus 2:4, 5) Jesus ada ke ubọk nnasia Abasi, ndien Abasi ọnọ enye odudu. Ibịghike enye ọmọn̄ ọdiọn̄ mbon oro ẹkopde uyo Abasi ke ofụri ekondo.

MME ANGEL ẸNAM N̄KPỌ ẸNỌ ABASI

Prọfet Daniel ekewet ete: “N̄kụt tutu ẹdiọk ebekpo ndien Andisọn̄ọ Usen [Jehovah] osụhọde etie. . . . Tọsịn ke itie tọsịn ẹnam n̄kpọ ẹnọ enye, tọsịn duop ke itie tọsịn duop ẹnyụn̄ ẹda enye ke iso.”—Daniel 7:9, 10.

Idịghe angel kiet kpọt ke Daniel okokụt ke n̄kukụt emi, edi okokụt ata ediwak angel. Anaedi n̄kukụt emi ama enen̄ede enyene uten̄e! Mme angel ẹdi spirit, ẹnen̄ede ẹdiọn̄ọ n̄kpọ ẹnyụn̄ ẹkop odudu. Mmọ ẹdi ke utọ ke utọ. Enyene mbon emi ẹkotde seraph, onyụn̄ enyene mbon emi ẹkotde cherub. Ẹtịn̄ ẹban̄a mme angel ẹbe utịm ike-250 ke Bible.

Idịghe mme owo emi ẹkesidude ke isọn̄ ẹkeforo mme angel. Abasi ama obobot mme angel anyan ini mbemiso enye obot owo. Ke ini Abasi okobotde isọn̄, mme angel ẹma ẹkụt ẹnyụn̄ ẹsio n̄kpo idara.—Job 38:4-7.

N̄kpọ kiet emi mme angel ẹsinamde ẹnọ Abasi edi nditiene n̄n̄wam ke ata akpan utom oro ẹnamde ke isọn̄ mfịn, oro edi, utom edikwọrọ eti mbụk Obio Ubọn̄ Abasi. (Matthew 24:14) Ẹma ẹwụt apostle John n̄kukụt emi aban̄ade nte mme angel ẹsin̄wamde mme owo ke utom ukwọrọikọ. Enye ekewet ete: “N̄kụt angel efen efede ke ufọt enyọn̄, enye onyụn̄ enyene nsinsi eti mbụk nditan̄a nte etop idatesịt nnọ mbon emi ẹdụn̄de ke isọn̄, ye kpukpru mme idụt ye esien ye usem ye obio.” (Ediyarade 14:6) Kpa ye oro mme angel mîsitịn̄ke ikọ ye  mme owo mfịn nte ẹkesitịn̄de ke eset, mmọ ẹsin̄wam mbon oro ẹkwọrọde ikọ man ẹkekwọrọ ikọ ẹnọ mbon emi ẹnen̄erede ẹyom ndifiọk se Bible ekpepde.

SATAN ABIAN̄A ATA EDIWAK OWO

“Ekọn̄ asiaha ke heaven: Michael [Jesus Christ] ye mme angel esie ẹn̄wana ekọn̄ ye dragon, dragon ye mme angel esie ẹnyụn̄ ẹn̄wana edi enye ikanke, ufan̄ inyụn̄ idụhe aba inọ mmọ ke heaven. Ntre ẹsio akwa dragon oro ẹduọk, kpa akani urụkikọt, enye emi ẹkotde Devil ye Satan, emi adade kpukpru mme andidụn̄ isọn̄ otụn usụn̄; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.”—Ediyarade 12:7-9.

Enyene ini emi emem mîkodụhe ke heaven. Esisịt ini ke Abasi ama okobot owo, angel kiet ama oyom ẹtuak ibuot ẹnọ imọ, ntre enye ama ọsọn̄ ibuot ye Jehovah onyụn̄ akabade edi Satan, emi ọwọrọde “Andibiọn̄ọ.” Mme angel en̄wen ẹma ẹtiene enye ẹsọn̄ ibuot, ndien ẹkot mmọ mme demon. Sia mmọ ẹnen̄erede ẹdiọk, mmọ ẹbiọn̄ọ Jehovah ẹnyụn̄ ẹnam ata ediwak owo ẹsọn̄ ibuot ye Jehovah.

Satan ye mme demon esie ẹdiọk ẹbe nde. Mmọ ẹsasua mme owo, ntre mmọ ẹsinam ata ediwak owo ẹbọ ufen ke ererimbot. Ke uwụtn̄kpọ, Satan ama owot kpukpru ufene ye mme asan̄autom Job emi ekedide owo Abasi. Ekem, enye anam “akamba ofụm” ediberi ufọk emi nditọ Job duop ẹkedude onyụn̄ owot kpukpru mmọ. Ke oro ebede, Satan ama ọtọ Job ata idiọk udọn̄ọ, anam mbufụt ofụt enye “ọtọn̄ọde ke ekaikpat esie tutu esịm etịn̄ibuot.”—Job 1:7-19; 2:7.

Edi ibịghike-bịghi ẹmọn̄ ẹsobo Satan ẹfep. Tọn̄ọ ẹkesio enye ẹduọk mi ke isọn̄, enye ọdiọn̄ọ ke “ini imọ edi ibio.” (Ediyarade 12:12) Satan ididụhe aba, ndien ata eti mbụk edi emi.

MBON EMI ẸTODE ISỌN̄ ẸKA HEAVEN

“Afo [Jesus] ama ada iyịp fo edep mme owo osion̄o ke kpukpru esien ye usem ye obio ye idụt, ọnọ Abasi, omonyụn̄ anam mmọ ẹdi obio ubọn̄ ye mme oku ẹnọ Abasi nnyịn, ndien mmọ ẹyekara isọn̄ nte ndidem.”—Ediyarade 5:9, 10.

Kpasụk nte ẹkenamde Jesus eset okodu uwem ke heaven, ẹyenyụn̄ ẹnam mbon en̄wen ẹset n̄ko ẹka heaven. Jesus ọkọdọhọ mme apostle esie emi ẹkesọn̄ọde ẹda ye enye ete: “Mmọn̄ nnyọn̄ n̄ka n̄ketịm itie nnịm nnọ mbufo. N̄ko, . . . nyafiak ndi ndida mbufo nnyọn̄, man mbufo n̄ko ẹkpedu ke ebiet eke ami ndude.”—John 14:2, 3.

 Mbon emi ẹkade heaven ẹnyene se idade mmọ ika. Mmọ ẹyediana ye Jesus ẹkara ofụri isọn̄ ke Obio Ubọn̄ Abasi, ẹyenyụn̄ ẹda akpakịp edidiọn̄ ẹsọk kpukpru mme andidụn̄ isọn̄. Obio Ubọn̄ emi ke Jesus ọkọdọhọ mme anditiene enye ẹbọn̄ akam ẹban̄a ke ini enye ekekpepde mmọ ndibọn̄ akam, nte: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”—Matthew 6:9, 10.

SE MBON ORO ẸDUDE KE HEAVEN ẸDINAMDE

Apostle John ekewet ete: “N̄kop ọkpọsọn̄ uyo emi otode ebekpo nte ọdọhọde ete: ‘Sese! Ebietidụn̄ Abasi omodu ye owo, . . . ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.’”—Ediyarade 21:3, 4.

N̄kukụt emi aban̄a ini emi Obio Ubọn̄ Abasi, emi Jesus ye mbon oro ẹsetde ẹka heaven, ẹdisobode ererimbot Satan ẹnyụn̄ ẹnam ofụri isọn̄ akabade edi Paradise. Mme n̄kpọ emi ẹsinamde nnyịn ifụhọ inyụn̄ itua ididụhe aba. N̄kpa n̄ko ididụhe aba.

Nso kaban̄a ediwak biliọn owo emi ẹma ẹkekpan̄a, edi emi owo mîdinamke ẹset ẹka heaven? Ẹyenam mmọ ẹset ẹdidu uwem ke nsinsi ke Paradise mi ke isọn̄.—Luke 23:43.

Mme n̄kukụt emi ẹnen̄ede ẹwụt ke Jehovah Abasi, Jesus Christ Eyen esie, nti angel, ye mbon oro ẹnamde ẹset ẹka heaven ẹyom n̄kpọ ọfọn nnyịn sia mmọ ẹnen̄ede ẹkere ẹban̄a nnyịn. Edieke oyomde ndifiọk mme n̄kpọ en̄wen emi mmọ ẹdinamde, mbọk bụp Mme Ntiense Jehovah mîdịghe ka ikpehe Intanet nnyịn emi, www.jw.org/efi kosio n̄wed emi Nso ke Bible Ekpep Nnyịn?