Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  No. 4 2016

 IBUOTIKỌ MAGAZINE EMI | NTE BIBLE ASAN̄ADE EDISỊM MFỊN

Ntak Emi Bible Odude Edisịm Mfịn

Ntak Emi Bible Odude Edisịm Mfịn

Abasi ikayakke n̄kpọ anam Bible. Ntak edi oro nnyịn inyenede enye mfịn. Ndien edieke edide ẹtịm ẹkabade Bible emi afo enyenede, ọwọrọ se esikotde edi ata ukem ye se mme andiwet Bible ẹkewetde. * Edi ntak emi Bible osụk odude esịm mfịn kpa ye oro ẹkewetde enye ke n̄kpọ emi ekemede ndisọp mbiara, mme owo ẹkesuade enye, ẹkenyụn̄ ẹdomode ndikpụhọ n̄kpọ ke esịt? Nso inam Bible edi n̄wọrọnda n̄wed?

“Mmedi ndifiọk ke Bible oro inyenede mfịn edi enọ Abasi”

Ediwak mbon emi ẹsikpepde Bible ẹnyịme ke se apostle Paul eketịn̄de aban̄a Bible edi akpanikọ. Enye ọkọdọhọ ete: “Abasi ọkọnọ odudu spirit ẹda ẹwet ofụri N̄wed Abasi.” (2 Timothy 3:16) Mmọ ẹnịm ke se inamde Bible odu esịm mfịn edi ke enye edi N̄wed Abasi. Faizal oro iketịn̄de iban̄a ke akpa ibuotikọ ke magazine emi ama ọtọn̄ọ ndikpep Bible man ese m̀mê ẹma ẹkpụhọ n̄kpọ ke Bible. Se enye okokụtde ama akpa enye idem. Enye ama edifiọk ke ediwak se ẹsikpepde ke ufọkabasi isịneke ke Bible. Enye ama onyụn̄ ekpep se Abasi aduakde ndinam ke isọn̄ emi, ndien emi ama enen̄ede otụk enye.

Enye ọdọhọ ete: “Mmedi ndifiọk ke Bible oro inyenede mfịn edi enọ Abasi. Kere ise, edieke Abasi enyenede odudu ndibot ofụri ekondo, ndi enye ikpekemeke ndinọ ubonowo Bible nnyụn̄ nnam enye odu esịm eyo nnyịn? Edieke owo ọdọhọde ke enye ikemeke, ọwọrọ enye ọdọhọ ke enyene n̄kpọ emi Ata Ọkpọsọn̄ Abasi mîkemeke ndinam. Ọkpọdiọk etieti ndikere ke enyene n̄kpọ emi Abasi mîkemeke ndinam.”—Isaiah 40:8.

^ ikp. 3 Kot ibuotikọ emi “Didie ke Ekeme Ndifiọk Bible Oro Ẹkabarede Ọfọn?” ke Enyọn̄-Ukpeme May 1, 2008.