Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME NO. 4 2016

 BIBLE OKPỤHỌDE MME OWO

Ama Ada Ini Mbemiso N̄kemede Ndinam N̄kpọ Abasi

Ama Ada Ini Mbemiso N̄kemede Ndinam N̄kpọ Abasi
  • ISUA AKAMANADE: 1953

  • EBIET OTODE: AUSTRALIA

  • SE ENYE EKEDIDE: ỌKỌDỌDUỌ ENYỊNE KE NDISE IDAN̄

NTE UWEM MI EKETIEDE:

Ete mi ama ọwọrọ ke Australia edi Germany ke 1949. Enye ama okoyom utom ke kọmpeni emi ẹsidọkde ukan̄ ẹnyụn̄ ẹnọde ikan̄ ilektrik. Enye okodụn̄ ke ekpri obio emi ẹkotde Victoria. Do ke enye ọkọdọ eka mi. Ami n̄kamana ke 1953.

Isua ifan̄ ke oro ebede, eka mi ama ọtọn̄ọ ndikpep Bible ye Mme Ntiense Jehovah. Ntre, n̄kọtọn̄ọ ke ata ekpri n̄kop n̄kpọ mban̄a Bible. Edi ete mi ikoyomke ndikop ẹtịn̄de n̄kpọ ndomokiet ẹban̄a Abasi. Enye ama esimia eka mi onyụn̄ esịn enye ndịk ke idem. Eka mi ama aka iso ededịbe ekpep Bible onyụn̄ enen̄ede ama se enye ekekpepde. Ini ekededi emi ete mi ọwọrọde ke ufọk, eka mi ama esikpep mi ye adiahaeka mi se ẹkekpepde enye ke Bible. Enye ama ọdọhọ nnyịn ke isọn̄ ayakabade edi Paradise, onyụn̄ etịn̄ nte nnyịn idikopde inemesịt edieke idude uwem nte Bible ọdọhọde idu.—Psalm 37:10, 29; Isaiah 48:17.

Ke ini n̄kedide isua 18, mma n̄kpọn̄ ufọk ke ntak emi ete mi ekesinamde n̄kpọ afai afai ye nnyịn. Kpa ye oro n̄kọdiọn̄ọde ke se eka mi ekekpepde mi ke Bible edi akpanikọ, n̄kadaha emi ke akpan n̄kpọ. Mma ntọn̄ọ ndinam utom nte ọdiọn̄-ikan̄-ilektrik ke kọmpeni emi ẹsidọkde ukan̄. Ke ini n̄kedide isua 20, mma ndọ n̄wan. Isua ita ke oro ebede, adiaha nnyịn ama amana, ndien mma mfiak n̄kere se n̄kpadade uwem mi nnam. Mma ndiọn̄ọ ke Bible ekeme ndinam nnyịn ikop inemesịt ke ubon, ntre mma ntọn̄ọ ndikpep Bible ye Ntiense Jehovah kiet. Edi n̄wan mi ama enen̄ede asua Mme Ntiense Jehovah. Ke ini n̄kodụkde mbono esop usen kiet, enye ama ọdọhọ mi ke edieke n̄kade iso ndikpep Bible ke ana n̄kpọn̄ ufọk. N̄kekemeke ndinyan̄a, ntre mma ntre ndikpep Bible ye Mme Ntiense Jehovah. Nte ini akakade, mma ntua n̄kpọfiọk ke ntak emi n̄ketrede ndisọn̄ọ nda nnam se inende.

Usen kiet, mbon itieutom nnyịn ẹma ẹwụt mi ndise idan̄. Ama enem mi ndise, edi se n̄kokụtde ama etek mi esịt. Esịt ama enen̄ede amia mi ufen ke mma n̄kese ndise oro mma. Mma nti se n̄kesikpepde ke Bible, nnyụn̄ n̄kere ke Abasi iditreke ndimia mi ufen. Edi nte n̄kakade iso ndise oburobụt ndise, ndise idan̄ iketekke mi esịt aba. Nte ini akakade, n̄kọdọduọ nnyịne.

 Mma ndọdiọn̄ nnam idiọkn̄kpọ ke ofụri isua 20, ntịghi se eka mi ekekpepde mi. Mma mbiara n̄ka anyan ke ntak oburobụt ndise oro n̄kesisede. N̄kesikpe ntịme ke itọn̄ nnyụn̄ mma oburobụt idọkọ. N̄kesida idan̄ nte n̄kpọ mbubru. Kpa ye oro mma n̄kọdọ n̄wan, n̄kosụk nnyenyene iban ke an̄wa. N̄kamaha utọ uwem emi n̄kodude.

Ndọ nnyịn ama abiara, ndien uwem mi ikọwọrọke n̄kpọ. Mma mbọn̄ akam nnọ Jehovah ke ofụri esịt. Mma mfiak ntọn̄ọ ndikpep Bible, kpa ye oro edide isua 20 ama ebe. Etisịm ini oro, ete mi ama akpa, ndien eka mi ama ana baptism onyụn̄ akabade edi Ntiense Jehovah.

NTE BIBLE OKOKPỤHỌREDE UWEM MI:

Nte n̄kodude uwem ama okpụhọde ata akamba akamba ye nte Bible ọdọhọde idu. Edi isan̄ enye emi, mma mbiere ke nyanam n̄kpọ man esịt ana mi sụn̄ nte Bible ọdọhọde. Mma ntọn̄ọ ndikpekpeme se ntịn̄de nnyụn̄ n̄kpep ndimụm idem n̄kama ke ini n̄kpọ ayatde mi. Mma mbiere n̄ko nditre oburobụt uwem, mbre mfọniso, ndin̄wọn̄ mmịn mbe ubọk, ye ndiyịp n̄kpọ ke itieutom.

Mbon itieutom nnyịn ikọdiọn̄ọke ntak emi nyomde nditre mme n̄kpọ emi. Ke ofụri isua ita, mmọ ẹma ẹdomo ndinam mfiak n̄kodu uwem nte n̄kesidude. Edieke nduede ntịn̄ idiọk ikọ mîdịghe nduọ obom, esịt ama esinem mmọ, mmọ ẹnyụn̄ ẹdọhọ: “Idahaemi ndien ke anam n̄kpọ nte Joe nnyịn.” Ikọ oro ama esibiak mi tutu! Ekesitie nte ntọn̄ọke-tọn̄ọ kan̄a.

Ndise idan̄ ekesiyọyọhọ itieutom nnyịn—ke n̄wed, ke fon, ye ke kọmputa. Mbon itieutom nnyịn ẹma ẹsinọ nsio nsio ndise idan̄ ẹsọk mme owo ke kọmputa, nte ami n̄kesinyụn̄ nnamde. Mma mbiere ndision̄o idem n̄kpọn̄ ndise idan̄, edi mmọ ikoyomke ntre. Mma nneme n̄kpọ emi ye owo emi ekesikpepde mi Bible. Enye ama enen̄ede akpan̄ utọn̄ ọnọ mi. Enye ama ọsọn̄ọ mi idem onyụn̄ ada nsio nsio itie N̄wed Abasi owụt mi se n̄kpanamde man ntre ndisise ndise idan̄. Enye ama onyụn̄ ọdọhọ n̄ka iso mben̄e Jehovah an̄wam mi.—Psalm 119:37.

Usen kiet, mma n̄kot mbon oro isinamde utom kiet nte ẹdi ineme nneme. Enyene owo iba ke otu mmọ emi ẹkedide mbon mmịn, edi emi ẹkedọhọde ke iyom nditre mmịn. Ke kpukpru mmọ ẹma ẹkesop idem, mma ndọhọ ẹnọ owo iba emi mmịn ẹn̄wọn̄. Mmọ ẹma ẹdọhọ ẹte: “Nnyịn ikemeke ndinam utọ n̄kpọ oro. Udiọn̄ọke ke mmọ ẹyoyom usụn̄ nditre mmịn.” Mma ndọhọ mmọ, “Ami n̄ko nyoyom usụn̄ nditre ndisise ndise idan̄.” Tọn̄ọ ke usen, mmọ ẹma ẹdiọn̄ọ ke imemke ye ami, ke n̄n̄wan̄wana nditre ndise ndise idan̄. Mmọ ikonyụn̄ inyịkke mi aba ndinam mme n̄kpọ oro n̄n̄wanade-n̄wana ndision̄o idem n̄kpọn̄.

Nte ini akakade, Jehovah ama an̄wam mi ntre ndisise ndise idan̄. Ke 1999, mma nna baptism nnyụn̄ n̄kabade ndi Ntiense Jehovah. Mmọkọm Abasi nte enye mîkotopke mi iduọk, edi ọnọde mi ifet ndidu eti uwem nnyụn̄ n̄kop inemesịt.

Mmọdiọn̄ọ ndien ntak emi Jehovah asuade mme n̄kpọ oro n̄kesinamde. Sia enye edide edima Ete mi, enye ikoyomke ndise idan̄ abiat mi. Se Mme N̄ke 3:5, 6 etịn̄de edi ata akpanikọ. Itie oro ọdọhọ ete: “Buọt idem ye Jehovah ke ofụri esịt fo kûnyụn̄ uberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” Ndinam item Bible ekpeme mi onyụn̄ anam kpukpru se nnamde ọwọrọ usụn̄.—Psalm 1:1-3.

UFỌN ORO MBỌDE:

Ke ini edem, uwem ama odorode mi. N̄kekere ke n̄wọrọke n̄kpọ. Edi idahaemi n̄kereke utọ n̄kpọ oro aba, esịt onyụn̄ ana mi sụn̄. Mma ntre oburobụt uwem, ndien mmenịm ke Jehovah efen ọnọ mi onyụn̄ an̄wam mi. Ke 2000, mma ndọ Karolin, ediye eyenan̄wan emi amade Jehovah nte nnyụn̄ mmade. Uwem enem nnyịn etieti. Enen̄ede enem nnyịn ndidu ke edisana esop Jehovah nnyụn̄ nnyene nditọete ke ofụri ererimbot.

Kpep N̄kpọ En̄wen

Ẹsikpep Owo Bible Didie?

Mme owo ke ofụri ererimbot ẹdiọn̄ọ ke Mme Ntiense Jehovah ẹsikpep owo Bible ke mfọn. Se nte mmọ ẹsinamde.

Didie ke Mme Edumbet Bible Ẹn̄wam Nnyịn?

Jesus ama etịn̄ ntak emi iyomde ndausụn̄ onyụn̄ etịn̄ edumbet iba emi okponde akan.

Afo Emekeme Ndibe Idomo!

N̄kpọ ita emi ẹkemede ndin̄wam fi omụm idem akama.