Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  No. 3 2016

 IBUOTIKỌ MAGAZINE EMI | KE INI OWO FO AKPADE

Ndi Ọdiọk Ndifụhọ N̄kpa Owo Fo?

Ndi Ọdiọk Ndifụhọ N̄kpa Owo Fo?

Ndi akanam ọmọdọn̄ọ ndien etise idem ọsọn̄ fi? Sia udọn̄ọ oro ọkọsọpde okụre fi ntre, anaedi ama ọsọsọp efre se iketịbede. Edi ndifụhọ n̄kpa owo itiehe ntre. Dr. Alan Wolfelt ekewet ke n̄wed esie oro ẹkotde Healing a Spouse’s Grieving Heart ete ke owo isitreke ndifụhọ n̄kpa owo esie. Enye ama ọdọhọ n̄ko ke edieke mme owo ẹn̄wamde owo oro ofụhọde, ke nte ini akade mfụhọ esie ayafiak osụhọde.

Ke uwụtn̄kpọ, Abraham ama ofụhọ ke ini n̄wan esie akakpade. Bible ọdọhọ ke ‘Abraham ama ofụhọ aban̄a Sarah onyụn̄ atua enye.’ Etie nte enye ama ofụhọ ebịghi. * Jacob n̄ko ama ofụhọ ke ini ẹkebian̄ade enye ke idiọk unam owot Joseph eyen esie. Enye ama ofụhọ ke “ediwak usen,” ndien mbonubon esie ikekemeke ndidọn̄ enye esịt. Ke ediwak isua ama ekebe, n̄kpa Joseph okosụk afafịna enye.—Genesis 23:2; 37:34, 35; 42:36; 45:28.

Abraham etie ekpere okpo Sarah atua eyet

Mfịn n̄ko, ediwak owo ẹsifụhọ ke anyan ini ke ini owo oro mmọ ẹkenen̄erede ẹkpere, akpade. Yak ineme iban̄a owo iba.

  • “Robert ebe mi akakpa ke July 9, 2008. Mbemiso enye akadahade utom usenubọk oro, ima idia udia, itịm kiet eken inua, ifat idem nnyịn, inyụn̄ idọhọ ke imama kiet eken nte isinamde kpukpru usenubọk. Edi enye ama ekenyene aksiden ke usụn̄ akpa. Isua itiokiet edi emi tọn̄ọ enye akakpa, edi ke ababiak mi. N̄kereke ke nyetre ndifụhọ n̄kpa ebe mi.”—Gail emi edide isua 60.

  • “Kpa ye oro edide isua 18 ẹbe tọn̄ọ edima an̄wan mi akakpa, n̄kpa esie ke osụk ababiak mi. Esidọn̄ mi ndifiak n̄kụt enye. Ke uwụtn̄kpọ, ini ekededi emi n̄kụtde ediye n̄kpọ-obot, mmesiti enye nnyụn̄ n̄kere nte enye akpamade nditiene nse n̄kpọ oro.”—Etienne emi edide isua 84.

Se inemede emi owụt ke n̄kpa esibiak owo ebịghi. Edi kpukpru nnyịn isifụhọke ukem ukem, ntre ifọnke idọhọ ke nte owo enye eken ofụhọde ifọnke. N̄ko, ikpanaha iduọhọ idem nnyịn edieke ikerede ke imofụhọ ikaha. Nso ke ikpanam ke ini ifụhọde?

^ ikp. 4 Isaac eyen Abraham ama onyụn̄ ofụhọ n̄kpa Sarah eka esie ke anyan ini. Enye okosụk ofofụhọ n̄kpa eka esie ke isua ita ama ekebe, nte ẹtịn̄de ke ibuotikọ oro “Kpebe Mbuọtidem Mmọ,” ke Enyọn̄-Ukpeme emi.—Genesis 24:67.

Kpep N̄kpọ En̄wen

ENYỌN̄-UKPEME (EKE UKPEPNKPỌ)

Nte Ekemede Ndiyọ N̄kpa An̄wan m̀mê Ebe Fo

Esinen̄ede abiak owo ebighi edieke n̄wan m̀mê ebe esie akpade. Kot man kop nte idotenyịn ediset ke n̄kpa ekemede ndidọn̄ owo esịt.