Faizal ama enyene udọn̄ọ esịt emi okoyomde ẹsiak enye idem. Emi eketịbe isua kiet kpọt ke n̄wan esie ama akakpa. Enye ọdọhọ ete: “Ke ini n̄kotde n̄wed Job, mmesinịm ke enyene ntak emi Jehovah akanamde ẹwet n̄wed Bible oro. Ke ini inen̄erede ifụhọ, ndien ikụt ke enyene owo ke Bible emi okonyụn̄ ofụhọde nte nnyịn, emi esidọn̄ nnyịn esịt.” Enye ama adian do ete: “Ufọn idụhe ndiyak uwem odorode nnyịn.”

Tarsha ekedi ekpri eyen ke ini eka esie akakpade. Enye ọdọhọ ete: “Sia edide mmọdiọn̄ọ Abasi emi okobotde mi, oro anam mfiọk ntak emi ndude uwem, anam nnyene idotenyịn, onyụn̄ anam n̄kop inemesịt. Jehovah enyene odudu ekem ndisọn̄ọ nnyịn idem nnyụn̄ n̄n̄wam nnyịn iyọ se iwọrọde nnyịn ke usen ke usen.”

MME ibuotikọ oro ẹbede ẹtịn̄ nsio nsio mfịna emi ẹkemede ndinam uwem odorode owo. Ke ini n̄kpọ ọwọrọde fi, emekeme ndikere m̀mê ufọn osụk odu ndika iso ndu uwem m̀mê owo ndomokiet akam ọfiọk se iwọrọde fi. Edi nịm ke Abasi ọfiọk se iwọrọde fi. Afo ọmọsọn̄ urua ke enyịn esie.

Owo emi ekewetde Psalm 86 ama ọfiọk ke Abasi ekere aban̄a imọ, ntak edi oro enye ọkọdọhọde ete: “Ami nyeseme n̄kot fi ke usen nnanenyịn, koro afo eyeyere mi.” (Psalm 86:7) Edi afo emekeme ndikere m̀mê Abasi edibọrọ didie akam fo ke “usen nnanenyịn”?

Kpa ye oro Abasi mîdinamke kpukpru mfịna fo okụre ke ebe oro, Bible owụt ke enye ekeme ndinam esịt ana fi sụn̄ man ekeme ndiyọ se iwọrọde fi. Philippi 4:6, 7 ọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere.” Mbọk se nte mme itie N̄wed Abasi oro isiakde mi ẹwụtde ke Abasi enen̄ede ekere aban̄a nnyịn.

Abasi Ekere Aban̄a Fi

“Abasi ifreke baba kiet ke otu [akadan̄abasi]. . . . Mbufo ẹmesọn̄ urua ẹkan ediwak akadan̄abasi.”Luke 12:6, 7.

SE ỌKPỌFIỌKDE: Abasi ifreke n̄kpri inuen nte akadan̄abasi emi mme owo mîdaha ke n̄kpọ. Enye ọfiọk kpukpru mmọ sia mmọ ẹsọn̄ urua ke enyịn esie. Edi mme owo ẹsọn̄ urua ke enyịn Abasi ẹkan akadan̄abasi. Ke otu kpukpru se Jehovah okobotde ke isọn̄, idụhe se ẹkemede ndimen ndomo ye owo sia Abasi okobot owo ke “mbiet” esie, mme owo ẹnyụn̄ ẹkeme ndinyene nti edu oro Abasi enyenede.—Genesis 1:26, 27.

“O Jehovah, afo omodụn̄ọde mi, omonyụn̄ ọfiọk mi. . . . Afo emetie ke anyan usụn̄ ọfiọk ekikere mi. . . . Domo mi se, nyụn̄ fiọk ekikere mi.”Psalm 139:1, 2, 23.

SE ỌKPỌFIỌKDE: Abasi ọfiọk kpukpru n̄kpọ aban̄a fi. Enye ọfiọk se isịnede fi ke esịt ye se ifịnade fi. Ọkpọkọm mme owo idiọn̄ọke se ifịnade fi, Abasi ọdiọn̄ọ, enye onyụn̄ oyom ndin̄wam fi. Ntak edi oro mûkpayakke uwem odorode fi.

 Abasi Ayan̄wam Fi

“O Jehovah, kop akam mi; ndien eseme emi nsemede nyom un̄wam akpakam edi ebịne fi. . . . Kpan̄ utọn̄ nọ mi; ke usen emi nsemede, wara yere mi. . . . Enye ọyọbiọn̄ utọn̄ ke akam mbon oro ẹbụmede kpukpru n̄kpọ mmọ.”Psalm 102:1, 2, 17.

SE ỌKPỌFIỌKDE: Jehovah okụt mmọn̄eyet mbon oro ẹbọde ufen toto ke ini emi ufen ọkọtọn̄ọde ke ererimbot emi. (Psalm 56:⁠8) Enye okụt mmọn̄eyet fo n̄ko. Enye eti kpukpru ufen emi ọbọde ye kpukpru eyet emi atuade sia afo ọmọsọn̄ urua ke enyịn esie.

“Kûsuan enyịn, koro ami ndide Abasi fo. Ami nyọsọn̄ọ fi idem. Ami nditreke ndin̄wam fi. . . . Ami Jehovah Abasi fo . . . Enye emi ọdọhọde fi ete, ‘Kûfehe ndịk. Ami nyan̄wam fi.’” Isaiah 41:10, 13.

SE ỌKPỌFIỌKDE: Abasi eben̄e idem ndin̄wam fi. Edieke ọduọde, enye ayanam adaha ada.

Ini Iso Ọyọfọn

“Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”John 3:16.

SE ỌKPỌFIỌKDE: Abasi ama fi tutu enye enyịme ndinọ Jesus Eyen esie edikpa ọnọ fi. N̄kpa Jesus emi anam enyene idotenyịn ndidu uwem ke nsinsi nnyụn̄ n̄kop inemesịt. *

Kpa ye oro nsio nsio mfịna ẹkemede ndinam uwem odorode fi, da ini kpep Ikọ Abasi nyụn̄ tie kere se Abasi ọn̄wọn̄ọde ndinam nnọ nnyịn. Oro ayanam okop inemesịt, idinyụn̄ iyakke uwem odorode fi.

^ ikp. 19 Edieke oyomde ndifiọk se akpanamde man adia ufọn n̄kpa Jesus, se vidio oro Ti N̄kpa Jesus ke www.jw.org/efi. Se ke ebiet emi okụtde: SE ẸDỌN̄DE > MME VIDIO > MBONO ESOP YE UKWỌRỌIKỌ.