Andrew emi odụn̄de ke Sierra Leone ọdọhọ ete: “Mmọn̄ ye mbat ama ọtọ emen ufọk nnyịn onyụn̄ abiat kpukpru se ikenyenede. Eketie nte eke nnyịn okụre.”

David emi odụn̄de ke Virgin Islands ọdọhọ ete: “Ima ifiak inyọn̄ ufọk ke oyobio ama eketre. Kpukpru se ikenyenede ama atak. Iyịp ama asat nnyịn ke idem. Eyen mi ama atua ewere ke isọn̄.”

EDIEKE edide akanam oto-obot afanikọn̄ esịm fi, ọwọrọ ọmọfiọk nte utọ n̄kpọ oro esifịnade owo. Idem esikpa mbon emi utọ afanikọn̄ oro esịmde, esịt etịmede mmọ, esinyụn̄ etie ndusụk mmọ nte edi n̄kpọ ndap. Idem esimem ediwak mmọ, uwem onyụn̄ odorode mmọ.

Edieke oto-obot afanikọn̄ abiatde kpukpru se enyenede, emekeme ndikere ke okwo okụre. Amakam ekeme nditọn̄ọ n̄kere ke n̄kpa fo ọfọn akan uwem. Edi mbọk kûduọk idotenyịn sia Bible ọdọhọ ke n̄kpọ ọyọfọn ke ini iso.

NDIFIỌK SE BIBLE EKPEPDE ANAM OWO ENYENE IDOTENYỊN

Ecclesiastes 7:8 ọdọhọ ete: “Utịt n̄kpọ ọfọn akan editọn̄ọ.” Ke ini afanikọn̄ etịbede, uwem ekeme ndidorode fi sia ekerede ke idotenyịn idụhe. Edi nte esịnde idem anam utom man afiak ọtọn̄ọ uwem, oyokụt ke n̄kpọ ekeme ndifiak mfọn.

Bible ọdọhọ ke ini ke edi emi owo mîdikopke “aba uyo ntuan̄a m̀mê uyo mfụhọ.” (Isaiah 65:19) Emi editịbe ke Obio Ubọn̄ Abasi ke ini ẹdinamde ofụri isọn̄ akabade Paradise. (Psalm 37:11, 29) Afanikọn̄ ndomokiet ididụhe ini oro. Edieke afanikọn̄ oro eketịbede ọnọ fi osụk abiakde fi mîdịghe edieke edide ini ekededi oro etide se iketịbede, esịt etịmede fi, kûfịna sia Abasi ọn̄wọn̄ọ ndinam nnyịn ifre utọ n̄kpọ oro. Bible ọdọhọ ete: “Owo iditịghi aba mme akpa n̄kpọ, mmọ idinyụn̄ idụkke owo esịt.”—Isaiah 65:17.

Abasi ọn̄wọn̄ọ ndinọ fi “ini iso ye idotenyịn,” oro edi, ndinam odu uwem ke emem ke Obio Ubọn̄ esie. (Jeremiah 29:11) Ndi emi anam enyene idotenyịn? Sally, oro iketịn̄de iban̄a ke akpa ibuotikọ, ọdọhọ ete, “Nditie n̄kere nti n̄kpọ oro Abasi ọn̄wọn̄ọde ndinam nnọ nnyịn ke ini iso anam ntre ndikere mban̄a se iketịbede, ndien oro anam n̄keme ndiyọ se iwọrọde mi.”

Enyene ediwak n̄kpọ en̄wen emi Obio Ubọn̄ Abasi edinamde inọ nnyịn ke mîbịghike. Ọkpọfọn oyom usụn̄ ọfiọk mme n̄kpọ emi. Edieke anamde oro, uwem ididorokede fi ọkpọkọm nso utọ afanikọn̄ esịm fi. Oyonyụn̄ enyene idotenyịn ndidu uwem ke ini emi afanikọn̄ ndomokiet mîditịbeke aba. Edi, Bible etịn̄ se idin̄wamde nnyịn idahaemi ke ini afanikọn̄ esịmde nnyịn. Se ndusụk se enye etịn̄de mi.