Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  No. 2 2017

 IBUOTIKỌ MAGAZINE EMI | NDI AYAMA NDIBỌ AKAKAN ENỌ ABASI?

Anana-Mbiet Enọ

Anana-Mbiet Enọ

EKEME nditie nte ke n̄kpọ usọi pencil emi Jordan akamade mi idịghe n̄kpọ ndomokiet. Edi enye esịne ke otu n̄kpọ emi enye amade akan. Jordan ọdọhọ ete: “Akanieren kiet emi ekesidide ufọk nnyịn ọkọnọ mi n̄kpọ emi ke ini n̄kedide ekpri eyenọwọn̄. Enye ekekere Russell, ndien kpukpru owo ke ubon nnyịn ẹkedi ufan esie.” Ke Russell ama akakpa, Jordan ama edifiọk ke enye ama enen̄ede an̄wam ete-eka imọ onyụn̄ an̄wam ete ye eka imọ ke ini n̄kpọ ọkọsọn̄de ye mmọ. Jordan ọdọhọ ete: “Idahaemi mma n̄kọdiọn̄ọ se Russell akanamde mi, mmenen̄ede mma ekpri enọ esie emi n̄kan nte n̄kamade.”

Se Jordan etịn̄de emi owụt ke ndusụk owo ẹkeme ndida nte ke enọ oro ẹnọde owo iwọrọke n̄kpọ. Edi owo emi ẹnọde enọ oro ekeme ndima n̄kpọ oro etieti onyụn̄ ada enye nte n̄kpọuto. Bible etịn̄ ntem aban̄a akakan enọ oro ẹnọde nnyịn: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”​—⁠John 3:⁠16.

Enọ emi ekeme ndinam owo enyene nsinsi uwem! Ndi odu enọ eke okponde akan emi? Kpa ye oro ndusụk owo mîdiọn̄ọke nte enọ emi ọsọn̄de urua, mme Christian ẹfiọk ke enye “enen̄ede okpon” onyụn̄ ‘ọsọn̄ urua.’ (Psalm 49:8; 1 Peter 1:​18, 19) Edi ntak emi Abasi ọkọnọde Eyen esie edikpa ọnọ nnyịn-e?

Kop nte apostle Paul ọkọbọrọde mi: ‘Idiọkn̄kpọ okoto owo kiet odụk ererimbot, n̄kpa onyụn̄ oto ke idiọkn̄kpọ oro odụk, ndien n̄kpa atara esịm kpukpru owo.’ (Rome 5:12) Adam ama anam idiọkn̄kpọ ke ndikọsọn̄ ibuot ye Abasi, ndien enye ama akpa ke ntak oro. N̄kpa ama oto Adam ebe esịm kpukpru nditọ esie.

 “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.” (Rome 6:23) Abasi ọkọnọ Jesus Christ Eyen esie ediwa mfọnmma uwem esie onyụn̄ osio nnyịn ke ufụn idiọkn̄kpọ ye n̄kpa. Kpukpru mbon emi ẹbuọtde idem ye Jesus ẹyenyene nsinsi uwem ke ntak uwa oro enye akawade, emi ẹnyụn̄ ẹdiọn̄ọde nte “ufak.”—Rome 3:24.

Paul eketịn̄ ntem aban̄a kpukpru edidiọn̄ oro Abasi edidade Jesus Christ idiọn̄ mbon oro ẹtuakde ibuot ẹnọ enye: “Ekọm enyene Abasi ke ntak enọ mfọn esie oro inua mîkemeke ndibụk.” (2 Corinth 9:15) Ufak oro ayan̄a owo ifiọk. Edi nso inam ufak edi akakan ke otu nti enọ oro Abasi ọnọde nnyịn? Didie ke enye okpụhọde ye mme enọ Abasi eken? * Ndien nso ke ikpanam iban̄a enọ emi? Mbọk kot nte Bible ọbọrọde mme mbụme emi ke ibuotikọ iba oro ẹtienede.

^ ikp. 8 Jesus ama enyịme ‘ndiyak ukpọn̄ esie nnọ kaban̄a nnyịn.’ (1 John 3:16) Edi sia edide Abasi ọkọdọhọ Jesus edikpa ọnọ nnyịn, ibuotikọ iba emi ẹtienede ẹnen̄ede ẹtịn̄ se Abasi akanamde ke ndinọ nnyịn ufak.