Ediwak owo ẹdọhọ ke mmimọ imọdiọn̄ọ Abasi. Edi edieke ẹdọhọde mmọ ẹtịn̄ se mmọ ẹdiọn̄ọde ẹban̄a Abasi, edidi ẹtịn̄ ẹka n̄kan̄ emi, ẹtịn̄ ẹka n̄kan̄ oko. Ndusụk owo ẹdọhọ ke Abasi esisọn̄ esịt akaha, ke enye esitetie ebet ndinọ owo ufen ke ini owo eduede. Ndusụk ẹdọhọ ke Abasi ama nnyịn esinyụn̄ efen ọnọ nnyịn kpukpru ini, inamke n̄kpọ m̀mê nso ke inam. Mbon en̄wen ẹdọhọ ke Abasi odu oyom usụn̄ etieti ọkpọn̄ nnyịn, ke enye inyeneke mbubehe ndomokiet ye nnyịn. Kpukpru se mme owo ẹtịn̄de emi anam ediwak owo ẹkere ke owo ikemeke ndinen̄ede ndiọn̄ọ Abasi.

Ndi ufọn odu ndidiọn̄ọ Abasi? Ih, ufọn odu. Ndinen̄ede ndiọn̄ọ Abasi ayanam ifiọk se ikpadade uwem nnyịn inam man ikop inemesịt. (Utom 17:26-28) Edieke edide ufan Abasi, enye eyenen̄ede ama fi onyụn̄ an̄wam fi. (James 4:8) Se ifọnde ikan edi ke ndifiọk nnennen se Bible etịn̄de aban̄a Abasi ekeme ndinam odu uwem ke nsinsi.—John 17:3.

Didie ke ekeme ndinen̄ede ndiọn̄ọ Abasi? Kere nte akasan̄ade ọdiọn̄ọ owo emi edide edima ufan fo idahaemi. Anaedi ekebem iso ọdiọn̄ọ enyịn̄ esie, mme edu esie, se enye amade ye se enye asuade, se enye akanamde, se enye aduakde ndinam, ye mme n̄kpọ ntre. Ndifiọk mme n̄kpọ emi ama anam enen̄ede ọdiọn̄ọ owo oro.

Kpasụk ntre, imekeme ndinen̄ede ndiọn̄ọ Abasi edieke idiọn̄ọde ibọrọ mme mbụme emi:

Magazine emi ayanam ọfiọk nte Bible ọbọrọde mme mbụme emi. Enye n̄ko ayanam enen̄ede ọfiọk Abasi onyụn̄ anam ọfiọk ufọn oro edidiade edieke edide ufan Abasi.